“22-28 ni Jiulai. Cakacaka 16–21: ‘Sa Kacivi Keitou na Turaga Me Keitou Vunautaka Vei Ira na iTukutuku Vinaka’” Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019 (2019)
“22-28 ni Jiulai. Cakacaka 16-21,” Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019
22–28 ni Julai
Cakacaka 16–21
“Sa Kacivi Keitou na Turaga Me Keitou Vunautaka Vei Ira na iTukutuku Vinaka”
Ni o wilika na nona sasaga o Paula me vunautaka na kosipeli, ena rawa ni vakauqeti iko na Yalo ena so na vakasama kei na veika o rawa ni vakila. Vola na veivakauqeti oqo, ka bulia na ituvatuva mo vakayacora vakakina.
Vola na Veika o Vakauqeti Kina
E dua na veituberi ni Turaga a solia vei ira na Nona iApositolo sa ikoya, “O koya mo dou qai lako, ka vakalotutaki ira na lewe ni veivanua kecega, ka papitaisotaki ira ena yaca ni Tamamudou, kei na Luvena, kei na Yalo Tabu: vakavulici ira me ra vakabauta na ka kece kau a vosa kina vei kemudou” (Maciu 28:19–20). E dina ni sega ni yaco o ira na iApositolo kina veimatanitu taucoko sara, e vakaraitaki ena Cakacaka 16–21 o Paula kei ira na nona itokani era vakasakiti sara na toso era cakava ena kena tauyavutaki na Lotu. Era veivakavulici, veipapitaisotaki, ka veivakadeitaki ena isolisoli ni Yalo Tabu. Era vakayacora na cakacaka mana, e vakakina na vakabulai tale mai e dua na tamata mai na mate, ka tukuna talega na Vuki tani Levu (Cakacaka 20:7–12; 20:28–31). Na cakacaka era vakatekivuna e tomani tiko nikua mai vei ira na iApositolo bula, vakakina o ira na tisaipeli yalodina vakataki iko, era sa veivuke tiko ena kena vakavotukanataki na ilesilesi ni Vakabula ena sala e sega ni na rawa beka me vakasamataka o Paula. De dua o kilai ira beka eso na tamata era sega tu ni kila na Tamadra Vakalomalagi kei na Nona kosipeli. De dua o na vakila na “katakata ni loma[mu]” mo wasea kei ira na veika o kila baleti Koya (Cakacaka 17:16). Kevaka o vakamuria na ivakaraitaki ni yalomalumalumu kei na doudou nei Paula, ena wasei ni kosipeli, “a sa dolava na yalona na Turaga” (Cakacaka 16:14).
Vakasama eso ni Vuli iVolanikalou Yadua
Ena liutaki au na Yalo ena noqu sasaga me’u wasea na kosipeli.
Eda gadreva kece na kosipeli i Jisu Karisito, ia eso na tamata era gadreva vakalevu cake mai vei ira tale eso. Oqo e dua na inaki eda gadreva kina na Yalo Tabu ena gauna eda wasea kina na kosipeli—me liutaki keda vei ira sa vakarau tu. Ni o wilika na Cakacaka 16–21, raica na gauna e dusimaki Paula kina kei ira nona itokani na Yalo. Na veivakalougatataki cava so e yaco mai baleta ni ra vakamuria na Yalo? Ena gauna cava o vakila kina na Yalo ni vakauqeti iko ena nomu sasaga mo wasea na kosipeli?
Raica talega na Alama 7:17 – 20; Dallin H. Oaks, “Wasea na kosipeli vakalesui mai,” Ensign se Liaona, Nove. 2016, 57–60; Vunautaka Na Noqu Kosipeli, 92–93.
Au rawa ni vakaraitaka na kosipeli ena ituvaki cava ga.
Na noda biu e vale ni veivesu baleta na vunautaki ni kosipeli ena rawa ni dua nai naki me kua ni vunautaki kina. Ia vei Paula kei Sailasa, e yaco me dua na gauna me rau vakalotutaka kina e dua na kaivesu (raica na Cakacaka 16:16–34). Ena wase taucoko ni Cakacaka 16–21, vakasaqara na ivakaraitaki tale eso ni lomasoli nei Paula me wasea na nona ivakadinadina kei ira na tamata kece. Na cava o nanuma e sa rui doudou ka qaqa kina o koya? Na cava o vulica rawa mai na ivakaraitaki nei Paula?
E vuqa tale tu na itukutuku me baleta na kena wasei na kosipeli ena wase 16–21. Kevaka o vakasaqara vagumatua, o na rawa ni kunea eso era ganiti iko saraga vakatabaki dua. Tovolea mo wilika na veiwase oqo ni o vakasamataka tiko na lalawa oqo? Na cava na isau ni taro o kunea?
“Sa Nona kawa talega koi keda.”
Mai Aceni, e raica kina o Paula na veimataqali vakasama kei na rai vakalotu. Era dau vakasaqara me “ra veitukutukunitaka ga se rogoca e dua na ka vou,” na veika e mai vakaraitaka o Paula e ka vou dina sara vei ira (raica na Cakacaka 17:19–21). Era vakalou ki na vuqa na kalou, ka oka talega kina e dua era vakatoka me “Kalou tawakilai” (Cakacaka 17:23), ia era vakabauta ni ra mana se kaukauwa na kalou eso oqo, era sega ni bula, se vakayago, ka sega dina sara ni Tamada. Wilika na veika e tukuna vei ira o Paula ena rawa ni veivuke me ra kila na Kalou, ka raica talega na veituvaki duidui ni Kalou o na kunea. Na cava na kena ibalebale vei iko ni “Nona kawa na Kalou”? (Cakacaka 17:29). Ena nomu rai, na cava na duidui ni o dua na luve ni Kalou mai na dua ga na Nona ibulibuli? Kevaka o tu e yasai Paula ni a wasea tiko nona vakadinadina, na cava o na tukuna vei ira na kai Kiriti ni gauna makawa me baleta na Tamada Vakalomalagi? O kila beka e dua ena rawa ni yaga vua na nomu ivakadinadina?
Na Yaga ni dua na Yalo, mai vei Lemon Swindle
Raica talega na Roma 8:16; 1 Joni 5:2; “We Are the Offspring of God” (vidio, LDS.org).
Eso na Vakasama me baleta na Vuli iVolanikalou Vakavuvale kei na Lotu Vakavuvale ena Moniti
Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo eso na vakatutu:
Me vukea nomu vuvale me raitayaloyalotaka na veika e yaco tiko ena veiwase oqo, ena rawa ni marautaki, ni dou wilika vata, me makataki na veivanua e lako kina o Paula ena mape (raica na mape ena mua ni dusidusi oqo).
Ena rawa vakacava meda vakataki ira vakalevu cake na Yalosavasava ena ivolanikalou? Ena vukei keda vakacava na noda vulica na ivolanikalou meda “sa uasivi”? (Cakacaka 17:11). Na cava e rawa ni da cakava meda rawa ni da rawata kina “ na ikaukauwa ni volanikalou”? (Cakacaka 18:24).
Na veivakavuvuli mai vua na Parofita o Josefa Simici ena rawa ni vukea nomu vuvale ena veitalanoataki ni Cakacaka 19:1–7: “Na papitaiso ena wai e sega ni o koya kece na papitaiso, ka sa sega ni yaga kevaka e sega ni vakayacori nai karua ni veimama—sai koya, na papitaiso ena Yalo Tabu. … ‘Meda sucu ena wai kei na Yalotabu’ e kenai balebale na tabadromuci ena wai me bokoci nai valavala ca ka ciqoma na isolisoli ni Yalo Tabu ni oti oya. E soli oqo ena veitabaki ni liga mai vua e dua e tiko vua na dodonu sa soli mai vua na Kalou” (Nodra iVakavuvuli na Peresitedi ni Lotu: Josefa Simici, 95). Na veivakalougatataki cava so e sa yaco mai vei keda ni da ciqoma nai solisoli ni Yalo Tabu?
Na cava e vakauqeti kina o ira na tamata ena veitikina oqo me ra vakama na nodra ivola ka kena isau e “limasagavulu na udolu nai lavo siliva”? (Cakacaka 19:19). E tiko beka eso na veika se taviqaravi vakavuravura e dodonu meda biuta vakatikitiki me rawa nida ciqoma na veivakalougatataki vakalomalagi?
Na gauna cava e sa bau ciqoma na nomu vuvale nai vakavuvuli nei Karisito ni “a ka ni veivakalougatataki vakalevu me Soli-ka ka vakalailai ga me taura na ka”? (Cakacaka 20:35). E tiko beka e dua ena rawa ni yaga vua na veiqaravi, gauna, se ka ni loloma mai na nomu vuvale? Mo dou tuva vakavuvale eso na vakasama me veiqaravi vua e dua. Na cava eda vakila nida vakayacora na veiqaravi vei ira na tani? Na cava e ka ni veivakalougatataki vakalevu me soli-ka ka vakalailai ga me taura na ka?
Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.
Vakavinakataki ni Vuli Yadudua
Vola na veivakauqeti vakayalo. Ni yaco mai na veivakauqeti vakayalo se rai titobu, vola toka. Me ivakaraitaki, e rawa ni o vola na nomu nanuma ena vanua lala ena imatau ena nomu ivolanikalou, ena Gospel Library app. Se ena nomu ivolaniveisiga. “Ni o vola na veivakauqeti vakayalo, o vakaraitaka tiko vua na Turaga ni o vakamareqeta na Nona veidusimaki, ka na vakalougatataki iko vakalevu cake ena ivakatakila” (Veivakavulici ena iVakarau ni Vakabula. 12; raica talega na 30).
Na Nona iLakolako Vakaulotu na iApositolo o Paula.