Paula ena Delana o Masi

22–28 ni Julai

Cakacaka 16–21

“Sa Kacivi Keda na Turaga me da Vunautaka na Kosipeli”

Ni oti nomu wilika na Cakacaka 16–21, vakasamataka na ivakarau e rawa ni vukei iko kina ena vakarautaki ni nomu lesoni na veivakauqeti ni Yalo kei na vakasama eso ena ituvatuva oqo. Raica na “Sotava Nodra Gagadre na Gone Sobu” ena ivolavakarau oqo me ikuri ni veivuke.

Vola na Veika o Uqeti Kina

ivakatakilakila ni veiwasei

Sureta na Veiwasei

Sureti ira na gone me ra tukuna vei iko se sa vakataki ira vakacava na daukaulotu nikua o Paula. Taroga, “O sa bau wasea mada na kosipeli vua e dua?”

ivakatakilakila ni veivakavulici

Vakavulica na iVunau

Gone Sobu

Cakacaka 16:25–34

Era dau vakavulici ira na tamata me baleti Jisu o ira na daukaulotu.

Era sa kila beka na gone o vakavulica na ka era dau cakava na daukaulotu? O na vukei ira vakacava na gone me ra kila ni rawa ni ra wasea na kosipeli vei ira na tani?

iTaviqaravi e Rawa ni Caka

• Vukei ira na gone me ra matanataka na Cakacaka 16:25–34 ni o vakalekalekataka na kedrau itukutuku o Paula kei Sailasa ena vunautaki ni kosipeli ena valeniveivesu (raica talega na “Wase 61: Paula kei Sailasa e Valeniveivesu,” New Testament Stories, 158–60, se na kena vidio ena LDS.org). Vakamacalataka ni o ira na daukaulotu nikua era dau vakavulici ira talega na tamata me baleti Jisu ka vukei ira ena nodra vakavakarau ki na papitaiso.

• Cakava na itokaniyaca ni daukaulotu me ra dara na gone, ka vukei ira me ra vola na yacadra ena itokaniyaca. Vakavulici ira na gone ena veimalanivosa rawarawa vakaivunau e rawa ni ra wasea vei ira na tani, me vaka na “Kalou sa Tamada Vakalomalagi dau loloma,” “dau vosa mai na Kalou vua e dua na parofita bula,” se “o Jisu Karisito na noda iVakabula.”

• Sureti ira na gone me ra wasea na veika matailalai baleta e dua era kila e kaulotu tiko. E rawa ni ra droinitaka e dua na iyaloyalo se vola e dua na itukutuku me vakau vua e dua na daukaulotu.

Cakacaka 17:10–12

Na ivolanikalouv e vakadinadinataki rau na Tamada Vakalomalagi kei Jisu Karisito.

Dina beka ni so na gone o vakavulica era se bera ni wilivola rawa, e rawa ni o vukei ira me ra taleitaka cake na ivolanikalou ka raica na ivakarau era vakadinadinataka kina na iVakabula.

iTaviqaravi e Rawa ni Caka

• Biuta wavoki ena rumu e vica na ivolanikalou, qai laiva vei ira na gone me ra vaqara. Vukea e dua vei ira na gone me wilika na malanivosa “Era dau … vakasaqara na ivolanikalou e veisiga” (Cakacaka 17:11). Sureti ira na gone me ra dusia na veisiga yadua ni macawa ena ivolanivula ni ra tokaruataka vata kei iko na malanivosa oqo.

• Me ra vakavulici na gone ni vakadinadinataki Tamada Vakalomalagi kei Jisu Karisito na ivolanikalou, vukei ira me ra cega e dua na wase ena ivolanikalou, vaka na Cakacaka 17 se 18, ka raica na veigauna e basika kina na vosa Kalou se Turaga. O na vinakata beka mo vakatakilakilataka na vosa eso oqo me rawarawa nodra raica na gone. Ena veigauna kece era kunea kina e dua vei ira na vosa oqo, sureti ira me ra wasea e dua na ka era kila baleti Tamada Vakalomalagi kei Jisu Karisito.

Cakacaka 17: 22–31

Au luve ni Kalou,

Ena Delana o Masi, a vakavulica o Paula na dina taumada baleta na ivakarau ni Kalou, oka kina na dina ni o keda na Luvena ka ni sa “sega ni yawa vei keda yadua” o Koya. (Cakacaka 17:27). O na vukei ira vakacava na gone me ra voleka cake kivua na Tamadra Vakalomalagi?

iTaviqaravi e Rawa ni Caka

• Sureti ira na gone me ra tokaruataka na malanivosa “Ni da sa kawa ni Kalou” (Cakacaka 17:29), ka vakamacalataka ni kawa e kena ibalebale na luvena. Wasea nomu ivakadinadina vei ira yadua na gone, vakayadua, ni o koya na luve ni Kalou. Tarogi ira se cava na nodra nanuma ni ra sa rogoca ni ra luve ni Kalou. Sureti ira me ra wasea se cava na nodra nanuma me baleta na Tamadra Vakalomalagi.

• Vakaraitaka na kedra iyaloyalo na gone kei na nodra matavuvale (kevaka e rawa, vakayagataka na kedra iyaloyalo na gone ena nomu kalasi). Vakamacalataka ni o keda na luvedrau na tinada kei na tamada, ka da sa luvedrau vakayalo kece na noda iTubutubu Vakalomalagi.

• Lagata e dua na sere baleta na Tamada Vakalomalagi, me vaka na “I Know My Father Lives” (Children’s Songbook, 5). Ena nodra veivuke na gone, vola na vosa se droinitaka na iyaloyalo eso ena papa e matataka na veika eda vulica mai na sere me baleti Tamada Vakalomalagi

• Wilika vei ira na gone na veivosa oqo mai na Cakacaka 17:27: “Ni sa sega ni yawa vei keda yadua o koya.” Tukuna na gauna eso o a vakila kina nomu volekata na Tamada Vakalomalagi, ka sureti ira na gone me ra kitaka vakakina.

turaga e taura tu na goneyalewa lailai

Na tamata yadua sa luve ni Kalou.

ivakatakilakila ni veivakavulici

Vakavulica na iVunau

Gone Qase Cake

Cakacaka 16:14–15, 25–34; 18:7–8, 24–28

E rawa ni daukaulotu ena gauna oqo.

O rawa vakacava ni vukei ira na gone me ra vakataki Paula ka wasea vei ira na tani na veika era sa vulica tiko me baleta na kosipeli?

iTaviqaravi e Rawa ni Caka

• Sureti ira na gone me ra wilika na Cakacaka 16:14–15, 25–34; 18:7–8, 24–28 ka vola na yacadra na tamata erau a wasea vei ira na kosipeli o Paula kei Apolosa. Qai sureti ira me ra vola na yaca ni tamata e rawa ni ra wasea kina na kosipeli. Me ra qai matanataka na gone na sala me ra tukuna kina vei ira na tamata oqo me baleti Jisu Karisito se sureti ira mai ki lotu. E rawa talega ni o sureti ira na gone me ra vola itukutuku ena wasei ni ivakadinadina ni dua na dina vakosipeli vei ira na tamata oqo.

• Sureti ira na daukaulotu tudei era veiqaravi tiko, o ira sa lesu mai na kaulotu, se daukaulotu ni tabanalevu me ra sikova mai na kalasi ka tukuna na veika era sa sotava ena nodra wasea na kosipeli. Vakayaloqaqataki ira na gone me ra taroga na ivakarau e rawa ni ra wasea kina na kosipeli vei ira na tani.

Cakacaka 17:2–4, 10–12; 18:28

Na ivolanikalou e vakadinadinataki Jisu Karisito.

O ira kece na parofita era vakadinadinataki Jisu Karisito. O na vakavulici ira vakacava na gone me ra kunei Koya ena ivolanikalou, ena gauna mada ga e sega ni cavuti kina na Yacana?

iTaviqaravi e Rawa ni Caka

• Me ra wilika na gone na Cakacaka 17:2–4, 10–12; 18:28, ka sureti ira me ra vaqara na veika e tautauvata kina na veimalanivosa oqo. Mai na veitikina oqo, na cava a vukei ira na tamata ni vakabauta na kosipeli i Jisu Karisito?

• Sureti ira na gone me ra wasea nodra italanoa taleitaki baleti Jisu era sa vulica mai na ivolanikalou ena yabaki oqo. Ena veitikinipepa, vola kina na idusidusi vakaivolanikalou eso e vakavuvulitaka na iVakabula, ka vunitaki ira wavolita na rumu. Qai sureti ira na gone me ra vaqara. Sureti ira na gone me ra vakaraica na idusidusi era sa kunea, ka kerei ira me ra veiwaseitaka na ka e vakavuvulitaka na ivolanikalou me baleti Jisu.

• Kerei ira na gone me ra vukei iko ena caka ni dua na ivolakabi rawarawa e rawa ni ra makataka ni ra wilika se vulica na veika e baleti Jisu mai na ivolanikalou. Vakaraitaka e veimacawa ena loma ni yabaki taucoko, ka vukei ira na gone ni raica na tikina eso ena ivolanikalou e vakavuvulitaki Jisu.

Cakacaka 17: 22–31

Au luve ni Kalou

O na vukei ira vakacava na gone mera nanuma ni ra sa luve ni Kalou?

iTaviqaravi e Rawa ni Caka

• Vakaraitaka vei ira na gone e dua na vatu, ka vakamacalataka ena gauna nei Paula, era dau qarava na tamata na kalou e caka ena vatu kei na veika tale eso. Kerei ira na gone me ra wilika na Cakacaka 17:27–29. Na cava eda vulica baleta na Kalou mai na veitikina oqo? Vakamacalataka ni kawa e kena ibalebale na luvena. Tarogi ira na gone se vakaevei na nodra nanuma ni ra kila ni ra sa luve ni Kalou.

• Kerei ira na gone me ra wilika na Cakacaka 17:27. Sureti ira na gone me ra droinitaka na iyaloyalo ni sala eso e rawa ni ra “vakayayamo beka” se vakasaqara na Kalou. Na gauna cava beka era a vakila kina ni “sega ni yawa sara vei [ira]” o Koya?

ivakatakilakila ni vuli

Vakauqeta na Vuli e Vale

Vakauqeti ira na gone me ra vaqara e dua na ivolanikalou ena macawa oqo ka vakavuvulitaki Jisu Karisito (e rawa ni yaco oqo ena nodra gauna ni vuli ivolanikalou yadua se vakamatavuvale). Ena macawa mai oqo, sureti ira me ra wasea na veika era sa kunea.

Vakatorocaketaki Noda Veivakavulici

Vukei ira na gone me ra yaco ni dauvuli vinaka sara. Na nomu inaki ni vakavulici ira na gone e sega walega ni kena wasei na dina vei ira. Sa dodonu talega mo vukei ira me yaco me ra bularawati ira ena vakasaqarai ni dina. Vaka oqo, mai na kena tukuni walega vei ira na gone na italanoa ni nona vunau voli o Paula ena delana o Masi, sa rawa ni o tuva na itaviqaravi eso, me vaka era vakaturi ena ituvatuva oqo, ena vukei ira ni raica vakataki ira na dina eso ena italanoa.

tabana ni itaviqaravi: Au luve ni Kalou