15–21 ni Julai,

Cakacaka 10–15

“Sa Tubu ka Yaco me Vuqa na Vosa ni Kalou”

Tekivuna nomu vakavakarau ni veivakavulici ena nomu wilika na Cakacaka 10–15. Na Lako Mai, Mo Muri Au—Baleta na Tamata Yadua kei na Matavuvale sa rawa ni vukei iko mo kila na veiwase oqo, ka rawa ni solia vei iko na ituvatuva oqo eso na vakasama ni veivakavulici.

Vola na Veika o Uqeti Kina

Sureta na Veiwasei

Me vukea nodra wasea na gone na veika era vulica tiko ka vakila, e rawa ni o kerei ira me ra wasea na veika era cakava tiko me vakaraitaka ni ra vakabauti Jisu Karisito.

Vakavulica na iVunau

Gone Sobu

Cakacaka 10:34–35

Na Tamada Vakalomalagi e lomani ira taucoko na Luvena.

E dua na ivunau bibi ka rawa sara mada ga ni ra kila na gone lalai sai koya na tamata kece e luvena na Kalou ka lomani ira kece na Luvena o Koya.

iTaviqaravi e Rawa ni Caka

• Vakaraitaka na iyaloyalo Christ and Children from around the World (Gospel Art Book, naba 116) ni o wilika na Cakacaka 10:34–35. Vakamacalataka ena gauna nei Pita era a vakabauta eso na tamata ni Kalou e lomana ga eso na ilala tamata, ia sa kila o Pita ni Kalou e lomani ira kece na luvena, ka vinakata o Koya me ra vulica kece na kosipeli.

• Sureti ira na gone me ra droinitaka e dua na kedra iyaloyalo. Wasea nomu ivakadinadina ni lomani ira yadua kei ira kece na Luvena na Tamada Vakalomalagi, se vakacava na kedra irairai se evei na vanua era lako mai kina.

• Lagata vata kei ira na gone e dua na sere ni lomani ira na tani—kena ivakaraitaki, “I’ll Walk with You” (Children’s Songbook, 140–41). Sureti ira me ra wasea na ivakarau e rawa ni ra vakaraitaka kina na loloma vei ira kecega na tamata—vei ira sara mada ga era duatani mai vei ira—me vaka ga a vakayacora o Jisu.

• Kerei ira vakailiu na itubutubu ni gone yadua me ra mai wasea eso na itovo ni bula taleitaki nei luvena. Wasea ena kalasi na kena isau mai vei ira, ka vakadinadinataka ni lomani ira na gone yadua na Tamada Vakalomalagi.

• Dusia na gone yadua ka kaya, “o Tamada Vakalomalagi e lomani [yacana].” Me ra qai veivukevuke na gone ena nodra veidusi ka cavuta na malanivosa oqo.

Cakacaka 11:26

Koi au e dua na Lotu va-Karisito baleta niu vakabauta ka muri Jisu Karisito.

Era na kila na gone o vakavulica ni ra dau vakatokai na lewe ni Lotu na Momani baleta ni da vakabauta na iVola i Momani, ia era kila beka ni da sa lotu talega va-Karisito baleta ni da vakabauti Jisu Karisito?

iTaviqaravi e Rawa ni Caka

• Wilika na Cakacaka 11:26 vei ira na gone. Vakamacalataka ni dua e vakabauta ka dau muri Jisu Karisito sa vakatokai me lotu va-Karisito, eda sa lotu kina va-Karisito.

• Lagata na “The Church of Jesus Christ” (Children’s Songbook, 77) vata kei ira na gone. Me vakaevei beka na noda ivalavala ena lotu, e koronivuli, vakakina e vale baleta ni da sa muri Jisu Karisito ka lewena na Nona Lotu?

• Me ra rokataka na gone na itokaniyaca ena tabana ni itaviqaravi ni macawa oqo ka daramaka toka e vale.

Cakacaka 12:1–17

Sa dau rogoca ka sauma na Tamada Vakalomalagi na masu.

Na italanoa ni agilosi ka a sereki Pita mai valeniveivesu e vakavulica vakaukauwa ni dau sauma na Tamada Vakalomalagi na masu.

iTaviqaravi e Rawa ni Caka

• Sureti ira na gone me ra dramakata na italanoa ni nona sereki mai valeniveivesu o Pita ena Cakacaka 12:1–17 ni o vakalekalekataka na italanoa. E sauma vakacava o Tamada Vakalomalagi na nodra masu o ira era a masulaki Pita tiko?

• Lagata e dua na sere ni masu—me vaka na, “We Bow Our Heads” (Children’s Songbook, 25)—ka cakava na iwalewale eso me vukea nodra vulica na gone na masu. Sureti ira na gone me ra wasea na ivakaraitaki ni so na ka e rawa ni ra vakavinavinakataka vei Tamada Vakalomalagi ka kerea Vua ena masu.

• Vakaraitaka na kedra iyaloyalo na tamata era masu tiko (raica, me ivakaraitaki na, Gospel Art Book, naba 111 kei na 112) ni ko wasea e dua na ka o a sotava ena nona sauma na Tamada Vakalomalagi nomu masu.

  

  E lomani keda o Tamada Vakalomalagi ka na sauma noda masu.

Vakavulica na iVunau

Gone Qase Cake

Cakacaka 10:34–35; 15:6–11

“Na Kalou sa sega ni digitaka vakailoa na tamata.”

E dodonu me ra kila na gone o vakavulica ni o Tamada Vakalomalagi e lomani ira kece na Luvena, se vakacava tu na kedra irairai, se ra lako mai vei, se digidigi cava era cakava.

iTaviqaravi e Rawa ni Caka

• Tarogi ira na gone kevaka e rawa ni ra tukuna nona ivakarau e dua na tamata ena nodra raici koya ga se nodra rawa ni kila na vanua e lako mai kina. Me vaka na Cakacaka 10:35, e kila vakacava na Kalou kevaka e dua na tamata sa “dodonu vua”?

• Wilika na Cakacaka 10:34–35; 15:6–11 vata kei ira na gone. Vakamacalataka ena gauna nei Pita, era vakabauta na Jiu ni sega ni vakadonuya na Kalou o ira era sega ni Jiu (o ira oqori a vakatokai na Kai Matanitu Tani). Ia qai vakavulica na Kalou vei Pita ni lomani ira kece na Luvena na Kalou, o ira na Jiu kei ira na Matanitu Tani. Lagata vata na “I Am a Child of God” (Children’s Songbook, 2–3). Sureti ira na gone me ra sosomitaka ena dui yacadra na vosa me vaka na au se o au.

• Sureti ira na gone me ra wasea e dua na ka e duatani kina e dua na gone ena kalasi. Vakamacalataka ni iyatuvosa “Ni sega ni dau digitaka vakailoa na tamata na Kalou” sa kena ibalebale ni lomani ira kece na luvena na Tamada Vakalomalagi, ka ni sa lomani ira, e vinakati ira kece na Luvena o Koya me ra rogoca na kosipeli.

Cakacaka 11:26

Na tamata lotu va-Karisito sai koya e vakabauta ka muri Jisu Karisito.

E rawa vakacava mo vukei ira na gone me ra kila ni nodra vosa kei na nodra ivalavala sa vakaraitaka ni ra lotu va-Karisito?

iTaviqaravi e Rawa ni Caka

• Sureti ira na gone me ra wilika na Cakacaka 11:26; 3 Nifai 27:3–8; kei na Vunau kei na Veiyalayalati 115:4. Vola Lotu va-Karisito ena papa ka toqa na tikina e tukuna “Karisito.” Kerei ira na gone me ra wasea se cava nodra nanuma ni kena ibalebale na Lotu va-Karisito.

• Kerei ira na gone me ra cavuta na ilawalawa duidui era lewena, me vaka nodra matavuvale se kalasi ena Lalai. Sureti ira me ra wasea na vuna era vakavinavinakataka kina ni ra vakabauta va-Karisito ka lewena na Lotu i Jisu Karisito ni Yalododonu Edaidai. Me da vakaraitaka beka vakacava vei ira na tani ni da lotu va-Karisito?

• Vakaraitaka e vica na iyaya se iyaloyalo ka matataka na dina eso e duatani kina na Lotu i Jisu Karisito, me vaka e dua na iyaloyalo ni veivakalougatataki vakamatabete. Kerea e dua na gone me digitaka e dua na iyaya se iyaloyalo ka vakamacalataka se sa dua na veivakalougatataki vakacava ki na noda Lotu. Vakamacalataka ni vuqa na vakabauta va-Karisito e vuravura era lewena e vuqa na veimatalotu, o keda eda lewena na Lotu vata ga a tauyavutaka o Jisu Karisito e vuravura.

• Vakaraitaka na vidio “True Christianity” (LDS.org). Sureti ira na gone me ra droinitaka na veika era rawa ni cakava me ra lotu va-Karisito dina kina.

Cakacaka 12:1–17

Niu masu ena vakabauta, ena sauma na Tamada Vakalomalagi.

Vakasamataka mada na gauna a sauma kina nomu masu na Tamada Vakalomalagi. Mo na vakayagataka vakacava na veika a yaco oqori mo vakavulica kina vei ira na gone ni Tamada Vakalomalagi ena rogoca ka sauma nodra masu ena Nona ivakarau kei na gauna?

iTaviqaravi e Rawa ni Caka

• Sureti ira na gone me ra dramataka na italanoa ni nona sereki Pita mai valeniveivesu na agilosi ena Cakacaka 12:1–17 ni o tukuna tale na italanoa ena nomu vosa ga.

• Tarogi ira na gone ena nodra nanuma ni ibalebale ni “daumasulaki koya tiko” (Cakacaka 12:5). A saumi vakacava na nodra masu na tamata? Sureti ira na gone me ra wasea ne veika era sotava ka a sauma kina o Tamada Vakalomalagi na nona masu e dua se matavuvale. E rawa talega ni o wasea e dua na gauna a sauma kina o Koya nomu masu ena dua na ivakarau e duatani mai na ka o a namaka se vinakata. Vakadinadinataka ni lomani keda na Kalou, ka na sauma o Koya na noda masu ena ivakarau kei na gauna e vinaka duadua vei keda.

Vakauqeta na Vuli e Vale

Solia vei ira na gone e dua na iyaloyalo se iyaya me ra vakaraitaka ena nodra vale me ivakananumi vei ira na lewe ni matavuvale me ra dau masu vata.

Vakatorocaketaki Noda Veivakavulici

Vakadinadinataka na veivakalougatataki yalataki. Ni o sureti ira na gone ena Lalai me ra bulataka e dua na ivakavuvuli, wasea na yalayala eso sa vakayacora na Kalou vei ira era bulataka na ivakavuvuli oya. Kena ivakaraitaki, e rawa ni o wasea na ivakadinadina ni veivakalougatataki yalataki o sa ciqoma ena nomu vaqara na isaunitaro ena masu.