Me Da Bula me Vakakina, mai vei Sam Lawlor

8–14 ni Julai

Cakacaka 6–9

“A Cava Ko Ni Sa Vinakata Meu Cakava?”

Tekivu ena nomu wilika na Cakacaka 6–9. Na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale sa rawa ni vukei iko mo kila na veiwase oqo. Na itaviqaravi me baleti ira na gone sobu ena ituvatuva oqo e rawa ni moici me ganiti ira na gone qase cake, se kena veibasai.

Vola na Veika o Uqeti Kina

Sureta na Veiwasei

Vola eso na yaca ni tamata mai na Cakacaka 6–9 ena papa—o Saula beka se o Sitiveni. Sureti ira na gone me ra wasea na veika era kila baleta e dua vei ira na tamata oqo.

Vakavulica na iVunau

Gone Sobu

Cakacaka 6–7

Au rawa ni muri Jisu Karisito ena noqu tutaka na dina.

Na cava e rawa ni ra vulica na gone mai vei Sitiveni me baleta na muri Jisu Karisito?

iTaviqaravi e Rawa ni Caka

• Vukei ira na gone me ra bulia eso na matanimeke me salavata kei na dua na sere baleta na digitaki ni dodonu, me vaka na “Stand for the Right” (Children’s Songbook, 159). Vakayagataka na Cakacaka 7:51–60 mo tukuna vei ira na gone na ivakarau e vakavuvulitaki Jisu Karisito kina o Sitiveni, dina ga ni a vakacudrui ira vakalevu na iliuliu ni Jiu na nona kitaka vakakina (raica talega “Wase 57: Wicked Men Kill Stephen,” New Testament Stories, 150–51, se na kena vidio ena LDS.org). A tutaka vakacava na dina o Sitiveni?

• Solia vei ira na gone e vica na ivakaraitaki ni gone ka me ra digidigi ni cakava na ka dodonu se cala. Tarogi ira na gone na cava era na cakava me ra tutaka kina na dodonu.

Cakacaka 8:26–39

E vakauqeti au na Yalo Tabu meu wasea na kosipeli vei ira na tani.

A muria o Filipe na veivakauqeti ni Yalo ka vukea e dua na kai Iciopea a dredre tiko nona kila na ivolanikalou. Na lesoni cava e tiko ena italanoa oqo me baleti ira na gone o vakavulica?

Vakavulica tiko na kai Iciopea o Filipe, mai vei RobertT. Barrett

iTaviqaravi e Rawa ni Caka

• Dreta vata mai e rua na idabedabe me dua na kareti. Sureta e rua na gone me rau dabe ena kareti, dua me matataki Filipe kei koya kadua na kai Iciopea. Qai talanoataka nona vakavulica o Filipe na kosipeli vua na kai Iciopea.

• O sa bau vakila mada na Yalo Tabu ni tukuna mo wasea na kosipeli vua e dua, me vaka na ka e sotava o Filipe ena Cakacaka 8:29? Wasea na ka o sotakaya vata kei ira na gone.

Cakacaka 9:1–20

Niu cakava e dua na cala, na Tamada Vakalomalagi e sureti au meu veivutuni ka veisau.

Ni tukuna o Jisu vei Saula me muduka na nona vakacacani ira tiko ena Lotu ni Turaga, a veivutuni saraga o Saula ka veisau. E rawa ni vukei ira vakacava na gone o vakavulica na itukutuku oqo me ra veisau vakatotolo ni ra cakava e dua na cala?

iTaviqaravi e Rawa ni Caka

• Vakalekalekataka na italanoa ni veisau nei Saula, kunei ena Cakacaka 9:1–20 (raica talega na “Wase 59: Saul Learns about Jesus,” New Testament Stories, 154–55, se na kena vidio ena LDS.org).

• Vola se kauta mai na iyaloyalo ni veika e dau veisau, me vaka na luve ni boto, ka dau veisau me boto, se na vunikau ena draki duidui eso. A veisau vakacava o Saula ni sikovi koya o Jisu Karisito?

• Droinitaka e dua na gaunisala veilatai ena papa. Sureti ira na gone me ra cavuta na vanua eso era via sikova, ka volai ira ena dela ni dua na gaunisala. Cava ena yaco kevaka eda goleva e dua na gaunisala cala? E tautauvata vakacava kei na noda butuka tale na sala dodonu na veivutuni?

• Kerei ira na gone me ra tokaruataka na ka e tukuna o Saula vua na Turaga: “A cava ko ni sa vinakata meu cakava?” Na cava e vinakata vei keda na Turaga me da cakava?

Vakavulica na iVunau

Gone Qase Cake

Cakacaka 6–7

Au na ivakadinadina kei Jisu Karisito.

E rawa vakacava ni o vukei ira na gone o vakavulica me ra vuli mai na ivakaraitaki nei Sitiveni ni duri tu vakaivakadinadina i Jisu Karisito?

iTaviqaravi e Rawa ni Caka

• Wilika na Cakacaka 6:5–15 kei na 7:51–60 vata kei ira na gone. A ivakadinadina vakacava i Jisu Karisito o Stephen?. Sureta e dua se levu na gone me ra vakatayaloyalotaki Sitiveni ka wasea na ka era vakabauta kei na vuna.

• Sureti ira na gone me ra veivukevuke ni wilika na Cakacaka 6:3–10, ka vaqara na veika vinaka e tu vei Sitiveni e vukea nona veiqaravi.

• Kerei ira na gone me ra vukei iko ni vakasamataka na veigauna eso e rawa ni ra vakadinadinataki Jisu Karisito kina kei na Nona kosipeli. Vukei ira me ra matanataka eso na gauna oqori. Sureti ira na gone me ra wilika na Mosaia 18:9. Dusimaka ni ivakadinadina kei Jisu Karisito e sa okati ena yalayala eda cakava ena papitaiso.

• Vola na yaca Sitiveni kei Filipe ena papa. Ena ruku ni yacai Sitiveni, vola na sala eso eda rawa ni ivakaraitaki kina vei ira na tani. Ena ruku ni yacai Filipe, vola na sala eso eda rawa ni wasea kina na kosipeli vei ira na tani. Ena vukei keda vakacava ni wasea na kosipeli na noda ivakaraitaki vakatisaipeli i Jisu Karisito?

Cakacaka 8:5–24

Na matabete sa dua na isolisoli tawavoli rawa mai vua na Kalou.

E dau tukuna o Setani ni veika vakayago e kauta mai na marau vei keda. O na vakayagataka vakacava na italanoa kei Saimoni me vukei ira na gone ni taura vakabibi na veika vakayalo me vaka na matabete kei na kena veivakalougatataki?

iTaviqaravi e Rawa ni Caka

• Vakalekalekataka na italanoa kei Saimoni, kunei ena Cakacaka 8:5–24 (raica talega “Chapter 58: Simon and the Priesthood,” New Testament Stories, 152–53, se na kena vidio ena LDS.org). Cava na vuna eda sega ni rawa ni ciqoma kina na matabete ena kena voli? Me ciqoma vakaidina vakacava e dua na matabete? (raica na Yavu ni Vakabauta 1:5).

• Solia vei ira na gone na ivakatakarakara ni ilavo, ka vakaraitaka na iyaloyalo ni veika e rawa ni voli ena ilavo. Tarogi ira na gone se vica nodra ilavo ivakatakarakara era na solia me baleta na veika oqo. Qai vakaraitaka na iyaloyalo ni sakaramede, valetabu (me matataka na veivakalougatataki ni valetabu), papitaiso, kei na veivakalougatataki tale eso eda ciqoma mai na matabete. Vakamacalataka ni isolisoli eso oqo ni Kalou era sa sega ni voli rawa ena ilavo.

Cakacaka 9:1–20

Niu cakava e dua na cala, na Tamada Vakalomalagi e sureti au meu veivutuni ka veisau.

Ni tukuna o Jisu vei Saula me muduka na nona vakacacani ira tiko ena Lotu ni Turaga, a veivutuni saraga o Saula ka veisau. E rawa ni vukei ira vakacava na gone o vakavulica na itukutuku oqo ni gadreva me ra veisau vakatotolo ni ra cakava e dua na cala?

iTaviqaravi e Rawa ni Caka

• Sureti ira na gone me ra lobika veimama e dua na tikinipepa. Kerei ira me ra vola Ni se bera ena dua na veimama kei na Ni sa oti ena ikarua ni veimama. Wilika vata kei ira na gone na Cakacaka 8:1–3; 9:1–2; kei na 9:17–22, ka vaqara na vosa se malanivosa e vakamacalataki Saula ni se bera ka vakakina ni sa oti nona raica na Turaga.

• Sureta e dua na lewe ni tabanalevu me wasea na nona italanoa ni veisau kei na kena sa veisautaka nona bula na nona lewena na Lotu, me vaka na veisau ni bula nei Saula.

• Droinitaka e dua na “gaunisala ki Tamasiko” ena papa. Sureti ira na gone me ra wilika na Cakacaka 9:6, 11, 18, 20–22, ka vaqara na ka e cakava o Saula me veivutuni ka vuki kina vei Karisito, ka vola na veika oqori ena gaunisala. Na cava eda vulica mai vei Saula me baleta na noda rawa ni yaco me vakataki Karisito?

• Sureti ira na gone me ra droinitaka na nodra tikina taleitaki ena italanoa ni veisau nei Saula ka wasea na nodra droini ki na kalasi.

Vakauqeta na Vuli e Vale

Vakayaloqaqataki ira na gone me ra tukuna ki na nodra matavuvale na nodra itaviqaravi taleitaki ena kalasi nikua kei na ka e vakavulica vei ira.

Vakatorocaketaki Noda Veivakavulici

Vukei ira na gone ni vuli mai na ivolanikalou. Era na sega beka ni rawa ni wilivola vakalevu na gone sobu, ia se na rawa tikoga mo vakaitavitaki ira ena vuli mai na ivolanikalou. Kena ivakaraitaki, sa rawa ni o wilika e dua na umavosa ka sureti ira me ra tucake se laveta na ligadra ni ra rogoca vakatabakidua e dua na vosa se malanivosa o vinakata mo vakanamata kina (raica na Veivakavulici ena iVakarau ni iVakabula, 20).