“8–14 ni Jiulai. Cakacaka 6–9: ‘A Cava Ko Ni sa Vinakata Meu Cakava?’” Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019 (2019)
“8–14 ni Jiulai. Cakacaka 6–9,” Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019
Meda sa Qai Bula Tiko, mai vei Sam Lawlor
8–14 ni Julai
Cakacaka 6–9
“Kemuni na Turaga, A Cava Ko Ni sa Vinakata Meu Cakava?”
Tekivu ena kena wiliki na Cakacaka 6–9. Na veika e vakaturi ena idusidusi oqo ena rawa ni vukei iko mo kila mai eso na ivakavuvuli bibi ena veiwase ni vola oqo, e dina ga o na rawa ni kunea eso ena nomu vuli tiko vakataki iko.
Vola na Veika o Vakauqeti Kina
Kevaka e dua e sega ni nanumi me na rawa ni curu ki na lotu, sai koya beka oqori o Saula—e dua na Farisi e kilai levu ni dau vakacacani ira na lotu Va-Karisito. Ena gauna e tukuna kina na Turaga vei Ananaiasa e dua na tisaipeli me vakasaqarai Saula ka qai solia vua e dua na veivakalougatataki, e a via tu vakasuka o Ananaiasa. “Turaga,” e kaya o koya, “era sa lewe vuqa au sa rogoca kina nai tukutuku ni tamata oqo, na levu ni ca sa kitaka vei ira na nomuni tamata yalosavasava” (Cakacaka 9:13). Ia e kila na Turaga na lomai Saula kei na veika ena rawa ni rawata, ka sa tiko ena Nona vakasama nai lesilesi nei Saula: “Ko Koya oqo na tamata digitaki vei au, me kauta na yacaqu ki na matadra na veimatanitu tani, kei ira na tui eso, kei ira na luvei Isireli” (Cakacaka 9:15). Sa vakamuria o Ananaiasa, ena gauna e kunea kina na dauveivakacacani oqo e liu, e kacivi koya “na wekaqu Saula” (Cakacaka 9:17). Kevaka e a rawa ni veisau vakataucoko o Saula ka rawa ni kidavaki koya ena marau o Ananaiasa, e rairai dodonu beka meda nanuma ni sa sega ni rawa ni veisau e dua—oka talega kina o keda?
Vakasama eso ni Vuli iVolanikalou Yadua
Na yaloqu e dodonu me tiko saraga e “matana na Kalou.”
Na lotu e tubu tikoga sa kena i balebale talega na tubu cake ni kena gadrevi me ra veiqaravi na tisaipeli ena matanitu. Ena Cakacaka 6:1–15, na cava e so nai vakarau ni bula eratou vasaqara na Tinikarua na iApositolo vei ira era na mai veiqaravi vata kei iratou? Ni o wilika na Cakacaka 6–8, raica nai vakarau ni bula eso oqo, kei na so tale, era vakaraitaka na tamata vakataki Sitiveni kei Filipe. Na cava e a leqa tiko vei Saimoni, ka cava eda rawa ni vulica mai vei koya me baleta na gagadre ni veisau?
E tiko beka e dua na ka o vakauqeti kina mo veisautaka me vakadeitaka ni sa tiko ena “matani Kalou” na utomu? (Cakacaka 8:21–22). Ena rawa beka vakacava ni vakalougatataki iko na veisau oqo ni o qarava tiko na Kalou?
Na noda sega ni vinakata na Yalo Tabu ena rawa ni liutaka na cakitaki ni Vakabula kei ira Nona parofita.
O ira nai liuliu vaka-Jiu, e dina ga ni ra sa lesi tu me ra vakarautaki ira na tamata ena lako mai ni Mesaia, era cakitaki Jisu Karisito ka cikevaka me vakoti ena kauveilatai baleta na nodra qaciqacia kei na vaqara kaukauwa. E yaco vakacava oqo? E cauraka o Sitiveni vei ira, “Dou sa dau vorata tikoga na Yalo Tabu” (Cakacaka 7:51). Na cava o nanuma na ibalebale ni vorata na Yalo Tabu? Ena rawa vakacava ni vakavuna meda cakitaka na iVakabula kei ira Nona parofita na noda vorata na Yalo Tabu?
Ni o wilika na Cakacaka 6–7, vakasaqara eso tale nai tukutuku e vakatavulica vei ira na Jiu o Sitiveni. Na itovo vakacava e tukuna tiko o koya me ra qaqarauni kina? O kidava tiko beka eso na itovo vakaoqo vei iko? Na cava e vakavulica vei iko na vosa nei Sitiveni me baleta na isau ni vorati na Yalo Tabu? Ena rawa vakacava ni o qaqarauni ka dauvakamuria na veivakauqeti ni Yalo Tabu ki na nomu bula?
Raica talega na vidio “The Martydom of Stephen” (LDS.org).
Ocei tale e vakataki Sitiveni, ni a vakamatei baleta na nodra ivakadinadina baleti Jisu Karisito?
E imatai ni lotu va-Karisito me vakamatei o Sitiveni (e dua e vakamatei baleta na nona vakabauta) ni oti na Tucake tale nei Jisu Karisito. E vuqa talega na Yalosavasava ena veigauna makawa era a vakamatei baleta ni ra na sega ni cakitaka na nodra vakabauti Jisu Karisito. Eso oqo era tukuni tu ena 2 Veigauna 24:20–21; Marika 6:17–29; Cakacaka 12:1–2; Ai Vakatakila 6:9–11; Mosaia 17:20; Alama 14:8–11; Ilamani 13:24–26; Vunau kei na Veiyalayalati 109:47–49; 135:1–7; kei na Eparama 1:11. E vaka ni oti na Tucake tale mai na mate ni iVakabula, o ira kece na iApositolo vakavo ga o Joni era mate me baleta na nodra ivakadinadina.
Ena vukei au na Yalo Tabu meu dusimaki ira na tani vei Jisu Karisito.
Na cava o vulica me baleta na kena wasei na kosipeli mai na itukutuku ena Cakacaka 8:26–39? E vukei Filipe vakacava na Yalo Tabu? E tautauvata vakacava kei na idusidusi na wasei ni kosipeli? (raica na Cakacaka 8:31).
Ena gauna au vakayacora kina na loma ni Turaga, sa rawa ni’u yaya ni cakacaka e Ligana.
E vakasauri na nona curu ki na lotu o Saula; e lako ka “vunau sara” mai na nodra vesuki ira na lotu va-Karisito ki na vunautaki Karisito ena veivale ni lotu (Cakacaka 9:20). Ni o wilika na nona italanoa, vakasamataka vakatitobu na cava e vakavuna na nona veisautaka. (Me wiliki nai vakamacala ni nona saumaki o Saula, raica na Cakacaka 22:1–16 kei na 26:9–18. Mo kila tiko, ni gauna ni tukutuku oqo, sa veisautaki na yacai Saula ki na Paula.)
E dina ni sega ni dau yaco beka vakawasoma na veika e yaco vei Saula—vei ira e vuqa na tamata, e dua na ka balavu na ikabakaba ni saumaki—e tiko beka e dua na ka o rawa ni vulica mai na saumaki i Saula? Na cava o vulica mai na nodratou itovo ni raica na saumaki nei Saula o Ananaiasa kei ira tale na tisaipeli eso? Na cava o na cakava mo vakayacora kina na ivakavuvuli oqo ena nomu bula? Ena rawa ni o tekivu ena nomu vakataroga ena masu, me vaka e vakayacora o Saula, “Na cava ko ni sa vinakata me’u cakava?” Se e rawa ni o vola na taro oqo me dua nai ulutaga ena nomu volaniveisiga ka vola na veivakauqeti vakayalo e yaco mai vei iko ena veigauna.
Raica talega na Dieter F. Uchtdorf, “Wawa Toka Ga ena Gaunisala i Tamasiko,” Ensign se Liaona, Me 2011, 70–77; “The Road to Damascus” (vidio, LDS.org).
Eso na Vakasama me baleta na Vuli iVolanikalou Vakavuvale kei na Lotu Vakavuvale ena Moniti
Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo eso na vakatutu:
Vakatautauvatataka na itukutuku nei Sitiveni ena Cakacaka 6:8 kei na Cakacaka 7:51–60 ki na itukutuku ni Vakabula ena Luke 23:1–46. E vakamuria vakacava na ivakaraitaki ni Vakabula o Sitiveni?
E vakalougatataki Sitiveni vakacava na Yalo Tabu ena gauna esa vakacacani tiko kina? Ena gauna cava eda sa ciqoma kina na kaukauwa mai na Yalo Tabu ena veigauna dredre eda lako curuma?
E kila beka na nomu vuvale na ibalebale ni “caqeta na mata ni moto”? Na mata ni moto e dua na imoto gagata sara e vakayagataki me tosoya na manumanu. Vakawasoma era na dau teke lesu na manumanu ena gauna e laucoka kina, ka vakavuna na kena curu yani vakatitobu e loma ni manumanu na imoto. Ena sala cava soti ena rawa ni vakayagataki kina vei keda na veivakatautauvatataki oqo?
Tapaica Tucake mai, mai vei Sandy Freckleton Gagon
Vakasamataka mo sureti ira na lewe ni nomu vuvale me ra droinitaka na iyaloyalo ena italanoa ena Cakacaka 9:32–43. Na cava eda vulica me baleta na bula vakatisaipeli mai vei Inia, Tapaica, kei na yada mai Jopa? Rawa vua e dua sa “sinai ena cakacaka vinaka” na vukei ira vakacava vakabauta vua na Turaga? (raica na Cakacaka 9:36, 42; “Wase 60: Pita e kauta mai o Tapaica lesu ki na bula,” iTalanoa ni Veiyalayalati Vou, 156–57, se na kena vidio ena LDS.org).
Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.
Vakavinakataki ni Vuli Yadudua
Vakatautauvatataka na ivolanikalou ki na nomu bula Ni o wiliwili, vakasamataka e rawa ni yaga vakacava ki na nomu bula na italanoa kei na ivakavuvuli ni volanikalou. Me ivakaraitaki, ko na vakila vakacava ni o sa ka “sinai ena Yalo Tabu” ena gauna ni veivakatovolei kei na veivakacacani?? (Cakacaka 7:55).
Au sa Raica na Luve ni Tamata e Tu e Ligai Matau ni Kalou, mai vei Walter Rane