“1–7 ni Jiulai. Cakacaka 1–5: ‘Dou na Qai Dautukuni Au’” Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019 (2019)
“1–7 ni Jiulai. Cakacaka 1–5,” Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019
Siga ni Penitiko, mai vei Sidney King
1–7 ni Julai
Cakacaka 1–5
“Dou na Qai Dautukuni Au”
Ni o vulica tiko na Cakacaka 1–5, na Yalo Tabu ena rawa ni vakauqeti iko mo kunea na dina e veiganiti ki na nomu bula. Toqa toka na veitikina era vakauqeti iko, ka vakasaqara na madigi mo wasea na veika o vulica tiko.
Vola na Veika o Vakauqeti Kina
O sa bau vakananuma tu se cava beka e vakasamataka ka vakila tiko o Pita ena gauna e tiko kina kei ira na iApositolo, “ni ra sa rai matua ki lomalagi” ni sa lako cake vei Tamana o Jisu? (Cakacaka 1:10). Na Lotu e tauyavutaka na Luve ni Kalou e sa liutaka tiko oqo o Jisu mai vei Pita, na parofita ni Kalou. Na itavi me liutaka na sasaga me “vakalotutaki ira e veivanua kecega” e sa vakatautaki oqo vei Pita (Maciu 28:19). Ia kevaka e a vakila ni malumalumu se rere, eda sega ni raica e dua na kena ivakadinadina ena ivola ni Cakacaka. Na veika ga eda kunea sai koya nai vakaraitaki ni ivakadinadina qaqa kei na saumaki, na cakamana ni veivakabulai, nai vakaraitaki vakayalo, kei na tubu ni Lotu. Ia oqo, ena isolisoli ni Yalo Tabu, e sa sega ni o Pita na gonedau tawavuli vata ga a kunea o Jisu ena bati ni Wai e Kalili. E sega talega ni tamata yalobibi ka ena vica ga na macawa ki liu a tagi yaso tu baleta ni a cakitaka ni kilai Jisu mai Nasareci.
Ena ivola ni Cakacaka, o na wilika e dua na itukutuku mana sara me baleti Jisu Karisito kei na Nona kosipeli. O na raica talega na kena rawa ni veisautaka na tamata na kosipeli—oka kina o iko—ni sa rawa ni yaco me ra vakataka na tisaipeli qaqa sa kila tu na Kalou.
Vakasama eso ni Vuli iVolanikalou Yadua
Cakacaka 1:1–8, 15–26; 2:1–42; 4:1–13, 31–33
E dusimaka na Nona Lotu o Jisu Karisito mai vua na Yalo Tabu.
Na ivola ni Cakacaka e volai tu kina na nodra sasaga na iApositolo me tauyavutaka na Lotu i Jisu Karisito ni oti na Lako cake ni Vakabula. E dina ga ni sega ni tiko e vuravura o Jisu Karisito, e liutaka o Koya na Lotu ena ivakatakila mai na Yalo Tabu. Vakasamataka e a liutaki ira vakacava na Yalo Tabu ena nodra dusimaki na iliuliu vou ni Lotu i Karisito ni o railesuva na veitikina oqo: Cakacaka 1:1–8, 15–26; 2:1–42; 4:1–13, 31–33.
Na cava eso nai lesilesi, veikacivi, se itavi e sa solia vei iko na Turaga? Na cava o vulica mai na veika era sotava na iApositolo ni veigauna e liu me baleta na nomu rawa ni vakararavi vua na Yalo Tabu me dusimaki iko?
Raica na Bible Dictionary, Holy Ghost.”
Na cava na inaki ni solisoli ni duivosavosa?
Nai solisoli ni duivosavosa e rawa ni nanumi ni kena vosataki e dua na vosa e sega ni dua e kila. Ia, na Parofita o Josefa Simici e tukuna tiko na veika e yaco ena Cakacaka 2 me vakamatatataka na isolisoli ni Yalo “e soli ena inaki ni vunautaki [ni kosipeli] ena kedra maliwa o ira e sega ni kilai vinaka na nodra vosa; me vaka ena siga ni Penitiko.… Na ituvatuva cecere duadua ni [solisoli] ni duivosavosa sai koya na kena vosataki na nodra vosa na veimatanitu tani” (Na Nodra iVakavuvuli na Peresitedi ni Lotu: Josefa Simici [2008], 383–84). Na Kana vata ni Penitiko, e dua na gauna ni nodra vakacagicagi na Jiu, e kauta vata mai e vuqa na Jiu mai na veimatanitu tani ki Jerusalemi. Nai solisoli ni duivosavosa e vakatara me ra kila na vulagi na nodra vosa na iApositolo ena nodra vosa ni vanua.
Na imatai ni vakavuvuli kei na cakacaka vakalotu ni kosipeli e vukei au me’u lako mai vei Karisito.
O sa bau vakila ni o “laucoka [e] yalo[mu],” me vakai ira na Jiu ena gauna ni Penitiko? (Cakacaka 2:37). E dua beka na ka o veivutunitaka ni o sa cakava, se o sa vinakata ga mo veisautaka nomu bula. Na cava mo cakava ni o vakila na veika oqo? Na nona ivakasala o Pita vei ira na Jiu e kune ena Cakacaka 2:38. Mo raica ka kila na cava e rawa ni cakava nai matai ni vakavuvuli kei na cakacaka vakalotu ni kosipeli (oka kina na vakabauta, veivutuni, papitaiso kei na solisoli ni Yalo Tabu se naka e dau vakatokai me ivunau i Karisito) vei ira era saumaki mai me vaka e volai tu ena Cakacaka 2:37–47.
Ena rawa ni o sa papitaisotaki ka ciqoma nai solisoli ni Yalo Tabu, e rawa vakacava ni o tomana tiko ga na kena bulataki nai vunau i Karisito? Vakasamataki na vosa oqo mai vei Elder Dale G. Me vaka e vakamacalataka o Elder DaleG. Renlund: “Na ivakarau ni vosota me yacova na ivakataotioti: “Ni sa rawa meda vakataucokotaki ena vakararavi vakaotia vakaveitaravi ka vakawasoma … ni cakacakataki na vakabauti Karisito, veivutuni, vakayagataki ni sakaramede me vakavoui na veiyalayalati kei na veivakalougatataki ni papitaiso, kei na ciqomi ni Yalo Tabu me itokani tudei cecere cake. Ni da vakayacora vakakina, eda na vakataki Karisito ka rawa ni vosota me yacova nai vakataotioti, kei na veika e sala vata mai” (“Era Tovolea Tiko ga na Yalododonu Edaidai,” Ensign se Liaona, Me 2015, 56).
Raica talega na 2 Nifai 31; 3 Nifai 11:31 – 41; 27; Brian K. Ashton, “Na iVunau i Karisito,” Ensign se Liaona, Nove. 2016, 106–9.
Na cava na “gauna ni vakacegu” kei na “gauna ena caka tale me vinaka na ka kecega”?
“Na gauna ni vakacegu” e tukuna tiko baleta na Mileniumi, na gauna ena lesu mai kina ki vuravura o Jisu Karisito. “Na gauna ena caka tale me vinaka na ka kecega” e tukuna tiko baleta na Vakalesui mai ni kosipeli.
Na tisaipeli i Jisu Karisito e soli vei ira na kaukauwa me ra vakayacora na cakacaka mana ena Yacana.
E namaka na tamata lokiloki me rawata mai na ilavo vei ira na lako tiko mai ki na valetabu. Ia, na italai ni Turaga e solia vua na ka e levu cake. Ni o wilika na Cakacaka 3; 4:1–31; kei na 5:12–42, vakasamataka e qai vakacava na revurevu ni cakamana a yaco vei:
Tamata lokiloki
Pita, kei Joni
O ira na vakadinadinataka e valetabu
O ira na bete kei na daunilawa
Eso tale na Yalosavasava
Raica talega na vidio “Peter and John Heal a Man Crippled Since Birth,” “Peter Preaches and Is Arrested” (LDS.org).
Eso na Vakasama me baleta na Vuli iVolanikalou Vakavuvale kei na Lotu Vakavuvale ena Moniti
Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo eso na vakatutu:
Ena gauna cava eda vakila kina ni sa “laucoka na yalo[da]” ni da vakavulica tiko e dua na kosipeli? Na cava na kena ibalebale oqo? Na cava e bibi kina meda kaya, “Na cava meda cakava?” ena gauna eda vakila kina na veika oqo?
E duatani vakacava na veivakalougatataki e ciqoma na tamata ena valetabu mai na veika e namaka tiko o koya? Na cava na noda rai me baleta na sala duatani e sa yaco mai kina vei keda na veivakalougatataki ni Tamada Vakalomalagi?
Na Ka Ga sa Tu Vei Au, Au Sa Solia Vei Iko, mai vei Walter Rane
Na cava e vakauqeti iko me baleta na nodrau yalodina o Pita kei Joni? Ena rawa vakacava meda doudou ena noda vakadinadinataki Jisu Karisito?
Ena rawa ni vakatasuasuataka na nomu vuvale nai talanoa baleti Ananaiasa kei Safaira ena isulusulu rawarawa ni gauna oya kei na so na sede siliva. Na cava e rawa ni da vulica mai na italanoa oqo? Me vakatau ena veika e gadreva na nomu vuvale, dou na rairai veitalanoataka beka na dina, nodra tokoni nai liuliu ni Lotu, se na veika e vakatabui.
Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.
Vakatorocaketaki Noda Veivakavulici
Digia e dua nai Ulutaga. Me ra vakaitavi na lewe ni vuvale ena digitaki ni ulutaga mai na Cakacaka 1–5 me vulica vata na matavuvale.
Na Lako Cake ni Turaga, mai vei William Henry Margetson