Siga ni Penitiko, mai vei Sidney King.

Julai 1–7

Cakacaka 1–5

“Dou na iVakadinadina Bula Vei Au”

Tekivuna nomu vakavakarau ena wiliki ni Cakacaka 1–5. Segata ena yalomasumasu mo kila na nodra gagadre na gone o vakavulica.. Lako Mai, Mo Muri Au—Baleta na Tamata Yadua kei na Matavuvale ka sa rawa talega ni vukei iko na ituvatuva oqo.

Vola na Veika o Uqeti Kina

Sureta na Veiwasei

Vola O cei o au? ena papa. Vakarautaka e vica na itukutuku baleti Pita ka tarogi ira na gone se baleti cei na itukutuku. Na cava tale era kila me baleti Pita?

Vakavulica na iVunau

Gone Sobu

Cakacaka 1:1–11

Sa liutaka na Nona Lotu o Jisu Karisito mai vei ira na parofita kei na iapositolo.

Na vulici ni ivakarau a liutaka kina na Nona Lotu e liu na iVakabula mai vei ira na iapositolo sa rawa ni vukea na nodra rawata na gone na ivakadinadina me baleti ira na parofita kei na iapositolo ni noda gauna.

iTaviqaravi e Rawa ni Caka

• Vakaraitaka na tabana taucoko ni iyaloyalo ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale. Tarogi ira na gone na vuna era nanuma era rai tiko kina ki lomalagi na tamata. Vakalekalekataka na itukutuku mai na Cakacaka 1:1–11. Raica talega na “Wase 55: Liutaka na Lotu o Ira na iApositolo,” iTalanoa mai na Veiyalayalati Vou, 145–47, se na kedra vidio ena (LDS.org).

• Ni ra raica tiko na kalasi na iyaloyalo mai na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale, sureta e dua na gone me taura tu e dua na kedra iyaloyalo na iApositolo ni gauna oqo. O cei e liutaka na Lotu ni sega ni tiko e vuravura na Karisito? Era liutaka vakacava na Lotu?

• Qitora e dua na qito ni vakasotari vata e rua na wase iyaloyalo ni Mataveiliutaki Taumada kei na iApositolo Le Tinikarua era bula tiko. Ni sa vakasotari rawa e dua, wasea na yacana na iApositolo se Peresitedi kei na dua na ka baleti koya.

• Ena daku ni dua na iyaloyalo kei Jisu, vakabira na iyaloyalo lalai ni veika e rawa ni vakavulica e dua na parofita, me vaka na papitaiso se dua na valetabu. Me ra veivukevuke na gone ni raica e dua vei ira na iyaloyalo ka tukuna vei ira na vo ni kalasi, “Sa vakavulici keda na parofita baleta na [ulutaga ena iyaloyalo].”

Cakacaka 3:1–10

Sa rawa ni vakalougatataki ira na tani na Tamada Vakalomalagi mai vei au.

Na cava o rawa ni cakava mo vukei ira kina na gone me ra kila na ivakarau e rawa ni ra vakalougatataki ira kina na tu wavoliti ira? Vukei ira me ra vuli mai na ivakaraitaki nei Pita kei Joni ena nodrau vakabula na tamata lokiloki.

iTaviqaravi e Rawa ni Caka

• Sureti ira na gone me ra matanataka na italanoa ena Cakacaka 3:1–10, me vaka na dodoki ni ligadra ena kere ilavo kei na rika tu ena marau. A vakalougatataka vakacava na tamata ka sega ni lako rawa na Tamada Vakalomalagi?

• Kauta mai e dua na kato era tu kina na iyaloyalo ka matataka na sala eso eda rawa ni vakalougatataki ira ka qaravi ira kina na tani. Me ra veivukevuke na gone ni digitaka na iyaloyalo mai na kato ka wasea na ivakarau era rawa ni vakalougatataki ira kina na tani ena sala oya.

• Kerei ira na gone me ra wasea e dua na gauna era a vukea kina e dua.

Cakacaka 5:1–11

Au rawa ni dau yalodina.

Era a vakatovotovotaka na vakabauta Vakarisito taumada e dua na ivakarau ni lawa ni vakatatabu me vukea na nodra maroroi na dravudravua. O ira na taukeni qele era volitaka ka solia na ilavo vei ira na iApositolo me wasei vei ira na Yalododonu me vaka nodra gagadre. Erau a sega ni yalodina o Ananaiasa kei Savaira ena nodrau isolisoli, ni rau nanuma ni rawa ni rau lawakitaka na italai ni Turaga.

iTaviqaravi e Rawa ni Caka

• Vukei ira na gone me ra matanataka na kedrau italanoa o Ananaiasa kei Savaira. Vakamacalataka ni dina ga eda na sega ni mate ni da lasu, e vakaraitaki ena italanoa oqo na bibi ni noda dau dina vua na Tamada Vakalomalagi.

• Lagata vata e dua na sere baleta na yalodina, me vaka na “I Believe in Being Honest” (Children’s Songbook, 149). Vukei ira na gone me ra kila ni dua na tiki ni yalodina sai koya me da dautukuna ga na ka dina ka sega ni taura na ka e nona tale e dua.

• Vakayagataka na matakau pepa me matanataki kina na gauna eso e yalodina se sega ni yalodina kina e dua. Kerei ira na gone me ra tucake kevaka a yalodina tiko na tamata oya se dabe ena fuloa kevaka a sega ni yalodina tiko o koya.

Vakavulica na iVunau

Gone Qase Cake

Cakacaka 1:8, 22–26

O Jisu Karisito sa liutaka na Nona Lotu mai vei ira na parofita kei na iapositolo.

E rawa ni ra kila na gone o vakavulica ni ra sa liutaka tiko na Lotu ni iVakabula nikua na parofita kei na iapositolo, me vaka ga ena gauna makawa.

iTaviqaravi e Rawa ni Caka

• Vola ena papa E liutaka vakacava o Jisu Karisito na Lotu ni sa sega ni tiko o Koya e vuravura? Sureti ira na gone me ra vaqara na isau ni taro ni o wilika na vosa ni iVakabula kivei ira na iApositolo Cakacaka1:8.

• Wilika vata na Cakacaka 1:22-26. Ni vakatakila vakalasi, na ivakarau era kaciva kina e dua na iapositolo vou na iApositolo.

• Ni se bera na gauna, kerea e dua na gone kei na nona itubutubu me rau wilika baleta e dua na iApositolo se qai kacivi wale (ena LDS.orgbeka). Sureta na gone me wasea na ka sa vulica vei ira na kalasi ka, kevaka e rawa, na ka e tukuna na iApositolo me baleta na nona ilesilesi ena itukutuku ni imatai ni nona koniferedi raraba.

Era a liutaka na Lotu na iApositolo ni oti na lako cake ki lomalagi i Karisito.

Cakacaka 3:1–10

E vakalougatataki ira na tani na Tamada Vakalomalagi mai vei au, kevaka mada ga au sega ni vutuniyau.

O na vakavulica vakacava vei ira na gone ni sa rawa me ra vakalougatataki ira na tani, kevaka mada ga e sega vei ira na “siliva kei na koula”? Cakacaka 3:6 O na vukei ira vakacava me ra raica na madigi eso ni qaravi Kalou ena nodra qaravi ira na tani?

iTaviqaravi e Rawa ni Caka

• Kerea e dua na gone me wilika na Cakacaka 3:1–10 ni ra matanataka na vo ni gone na italanoa. (Me veivuke, raica talega na Wase 56: Vakabula o Pita e Dua na Tamata,” iTalanoa ni Veiyalayalati Vou, 105–6, se na kena vidio ena LDS.org.) E rawa talega ni o vakaraitaka na vidio “Peter and John Heal a Man Crippled Since Birth” (LDS.org). Na sala cava a cecere cake kina na veivakalougatataki e ciqoma na tamata oqo mai na ilavo a kerea?

• Solia wavoki e dua na taga ilavo siliva. Ni ra taura tu na taga na gone, tarogi ira se cava e rawa ni ra volia ena ilavo. Qai taura lesu na taga ilavo siliva ka tarogi ira na gone se veivakalougatataki cava e sega ni rawa ni ra volia. Sureti ira me ra wasea na sala cava e rawa ni ra qarava kina e dua ka sega ni vakayagataki na ilavo (Cakacaka 3:6).

Cakacaka 2:36–47

Sa vakadinadinataka ki lomaqu na Yalo Tabu na dina ni kosipeli.

Ni ra vulica na gone me ra kila na ivakarau e dau vosa kina vei ira na Yalo Tabu, era na vakauqeti me ra vakarorogo ka cakacakataka na veivakauqeti era ciqoma.

iTaviqaravi e Rawa ni Caka

• Wilika vata na Cakacaka 2:36-37. E vakaevei na ka eda vakila ni tukuna ki na yaloda na Yalo Tabu e dua na ka?

• Ni cakava vata vakalasi e dua na ivolakabi ka volai tu kina Na cava me da cakava? e cake. Dau vakaraitaka e veimacawa na ivolakabi, ka vakuria na sala eso era rawa ni cakacakataka kina na gone na ka era vulica ena lesoni ni veimacawa.

• Sureti ira na gone me ra vakaraica na veika vinaka era a cakava na tamata ni oti nodra papitaiso ena Cakacaka 2:41–47. Na cava na veika vinaka eda rawa ni cakava me vakaraitaka ni da sa vakavinavinakataka na isolisoli ni Yalo Tabu eda a ciqoma ena gauna eda papitaiso kina?

Vakauqeta na Vuli e Vale

Vakauqeti ira na gone me ra tuva e dua na sala e rawa ni ra qarava kina na Tamada Vakalomalagi ena nodra vukea e dua na lewe ni nodra matavuvale ena macawa oqo.

Vakatorocaketaki ni Noda Veivakavulici

Cavuqaqataka e dua na ivolanikalou. Digitaka e dua na mala ni ivolanikalou o nanuma ni rawa ni vukei ira na gone ena nomu kalasi, me vaka na Cakacaka 2:38 se Cakacaka 3:19, ka vukei ira ni cavuqaqataka e dua na malanivosa mai na ivolanikalou. Na iyaloyalo, matanataki liga, se irairai eso sa rawa talega ni vukei ira na gone ni vakadeitaka na ivolanikalou ki na nodra vakasama.