“June 24-30. Maciu 28; Marika 16; Luke 24; Joni 20: ‘Esa Oti’” Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019 (2019)
“June 24-30. Maciu 28; Marika 16; Luke 24; Joni 20,” Lako Mai, Mo Muri Au—Me Baleti Ira na Tamata Yadua kei na Matavuvale: 2019
Vakani Ira na Noqu Sipi, mai vei Kamille Corry
June 24–30
Maciu 28; Marika 16; Luke 24; Joni 20–21
Sa Tucaketale ko Koya
Wilika ena masumasu na Maciu 28; Marika 16; Luke 24; kei na Joni 20–21, ka vakanananuma lesu na reki o vakila baleta na Tucake tale i Karisito. Vakasamataka vakatitobu o na wasea vakacava kei ira na tani na nomu ivakadinadina me baleta na veika oqo.
Vola na Nomu Veivakasama
Kivei ira na lewe vuqa era sarava, na mate i Jisu mai Nasareci ena vakabeka e mai oti tu vakasakasaka e dua na bula vakasakiti. E sega beka ni o koya oqo ka vakabulai Lasarusa mai na mate? E sega beka ni lakosivia vakavuqa o Koya na nodra inaki ni laba na Farisi? E tu Vua na kaukauwa me vakabula na mataboko, vukavuka, kei na lokiloki. Era vakarogoci Koya sara madaga na cagi kei na wasawasa. Ia, oqo o Koya, sa lili tu ena kauveilatai, ka cauraka tiko mai, “Sa oti” (Joni 19:30). Ena rawa beka ni so e kurabui dina ena vosa ni veivakalialiai “O Koya sa vakabulai ira na tani; sa sega ni vakabulai koya” (Maciu 27:42). Ia, eda kila ni nona mate o Jisu e sega ni cavacava ni talanoa. Eda kila ni vakadirorogo ni ibulubulu e sega ni ka tudei ka se qai itekivu ga na cakacaka ni veivakabulai nei Karisito. E sa sega ni kune o Koya nikua “ena kedra maliwa na mate” ia vei ira na bula (Luke 24:5). Ena sega ni vagalui na Nona ivakavuvuli, ni ra na vakatavulica o ira Nona tisaipeli yalodina na kosipeli ki “vuravura taucoko,” ni ra nuitaka na Nona yalayala ni na “tiko kei kemudou ena veivanua kecega, me yacova na ivakataotioti kei vuravura” (Maciu 28:19–20).
Vakasama eso ni Vuli iVolanikalou Yadua
Maciu 28; Marika 16; Luke 24; Joni 20
Baleta ni sa tucake tale o Jisu, o i au talega au na tucake tale.
Ena veitikina oqo, o na rawa ni wilika e dua na ka bibi duadua e bau yaco ena itukutuku ni kawatamata: na Tucake tale nei Jisu Karisito. Ni o wiliwili, biuti iko ena vanua era tiko kina o ira era vakadinadinataka na veika e yaco ena gauna ni Tucake tale. Na cava era vakila o ira na ivakadinadina oqo? Na cava o vakila ni o wilika na veika me baleta na Tucake tale ni iVakabula? Nanuma se ko vakayavalati vakacava—ena nomu raica na bula, na nomu veiwekani kei ira na tani, nomu vakabauti Karisito, kei na nomu vakabauta na veidina vakosipeli tale eso.
Raica talega na Bible Dictionary, “Resurrection”; “Resurrection,” iUlutaga Vakosipeli, topics.lds.org.
E rawa ni da sureta na iVakabula me “mai tiko kei keda.”
Na veika erau sotava o irau na tisaipeli lakotu ka sota kei na iVakabula tucaketale ena rawa ni tautauvata kei na nomu salatu ni bula vakatisaipeli. Na cava na isema o raica mai na itukutuku oqo kei na veika o sotava ni o daumuri Karisito? Ena rawa vakacava mo taubale vata kei Koya nikua ka sureti Koya me “tiko” tale mada vakalailai?? (Luke 24:29). O na kila vakacava na Nona sa tiko ena nomu bula? Ena sala cava e sa vakadinadinataka kina vei iko na Yalo Tabu na nona itutu vakalou o Jisu Karisito?
E tiko beka na yagona o Jisu Karisito?
Ena itukutuku ni Turaga sa vakaturi ni rairai mai vei Meri Makitala kei na veivosaki kei iratou Nona tisaipeli e muri, eda sa vulica ni a yaco vakaidina ka vakayago na Tucake tale nei Jisu. Ena Yagona sa vakaturi, ka vakalagilagi, e taubale, veivosaki ka kana kei ira na Nona dauvakamumuri o Koya. Eso tale na ivolanikalou e vakadinata ni o Jisu Karisito e tiko na yagona vakalewe kei na sui: Filipai 3:20–21; 3 Nifai 11:13–15; Vunau kei na Veiyalayalati 110:2–3; 130:1, 22.
“Sa kalougata ko ira era sa sega ni raica, ka ra sa vakadinata.”
Ena rawa ni dredre me vakabauti e dua na dina ni sega ni laurai na kena vatuka. Ena rawa ni o vakila ena so na gauna ni o vakai Tomasi, ka kaya, “Kevaka au sa sega ni raica … au na sega ni vakadinata” (Joni 20:25). A sauma vei Tomasi na iVakabula ka kaya, “Sa kalougata ko ira era sa sega ni raica, ka sa vakadinata” (Joni 20:29). O sa vakalougatataki vakacava mo vakabauta na veika vakayalo o sega ni raica rawa? Na cava e vukei iko mo vakabauta na iVakabula ena gauna sara madaga o sega ni raici Koya kina? Na dina cava tale o vakabauta ka sega na kena vatuka? Ena rawa vakacava mo vaqaqacotaka tiko na nomu vakabauta ena “veika e sega ni laurai, ia era sa dina?? (Alama 32:21; raica talega Ica 12:6). Navuca mo vola ena ivolaniveisiga na veika o sotava e sa vukei iko mo vakabauti Jisu Karisito, se wasea kei na dua o kila.
E sureti au na iVakabula meu vakani ira na Nona sipi.
Ena rawa ni ka marautaki me vakatauvatana na Nona veimaliwai na iVakabula kei ira Nona iApositolo ena Joni 21 na imatai ni gauna e vakaroti ira kina o Koya me ra biuta na nodra lawa, me vaka e volai ena Luke 5:1–11. Na cava o kunea e tautauvata kei na cava e duidui? Na raikiloma cava o kunea me baleta na bula vakatisaipeli?
Vakasamataka na vosa ni iVakabula vei Pita ena Joni 21:15–17 e na rawa ni baleti iko. E dua beka na ka e tarovi iko tiko ena nomu veiqaravi vei ira na sipi ni Turaga? Na cava o na sauma vua na Turaga kevaka e tarogi iko, “O sa lomani au beka?” Vakasamataka vakatitobu, ko na vakaraitaka vakacava na nomu lomana na Turaga.
Raica talega na Jeffrey R. Holland, “Na iMatai ni iVakaro Cecere,” Ensign se Liaona, Nove. 2012, 83–85
Eso na Vakasama me baleta na Vuli iVolanikalou Vakavuvale kei na Lotu Vakavuvale ena Moniti
Ni o wilika na Kosipeli kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo eso na vakatutu:
Na cava e baleta o ira na vosa “E sa sega eke o Koya: sa tucake tale” eso na vosa vakanuinui ka bibi duadua e se bau cavuti?
Ni wilika tiko nomu vuvale na veiwase oqo, raica matua na tamata era veimaliwai kei Jisu ena itukutuku yadua. Me ivakaraitaki, ena dua na gauna ena rawa ni dou vakanamata vei ira era sikova na ibulubulu ni iVakabula. Ena dua tale na gauna, o na vulica vakamatau na nodratou ivakarau na iApositolo se o rau na tisaipeli ena sala ki Emeo.
Na Gaunisala ki Emeo, mai vei Jon McNaughton
Veitalanoataka, vakamatavuvale na cakacaka a kerea o Karisito vei ira Nona iApositolo me ra cakava. Ena rawa vakacava ni da vakacavara na cakacaka oqo? E rawa beka ni o wasea e dua na gauna o vakila na “Turaga ni cakacaka tiko [kei iko]” me vukei iko mo rawata na Nona inaki?? (Marika 16:20).
Tuva mo dou wilika vata na tikina oqo ni dou kana tiko. Ena rawa ni vakuria na ibalebale ni vosa ni Vakabula me “vakania noqu sipi.” Ni yavutaki mai na veika e vakatavulica o Jisu me baleti ira nona sipi ena Veiyalayalati Vou (raica na, ivakaraitaki, Maciu 9:35–36; 10:5–6; 25:31–46; Luke 15:4–7; Joni 10:1–16), na cava e vinaka kina na vosa na vakania noqu sipi ni vakaibalebaletaki ki na kauwaitaki ira na luveni Kalou? Na cava e vakavulica na vosa vakatautauvata me baleta na veika e rawa ni vakila me baleti keda na Tamada Vakalomalagi kei Jisu?
Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.
Vakavinakataki ni Vuli Yadudua
Vakayagataka na sere ivakatagi me sureta na Yalo ka vakavulica na ivunau. Na vakarogoci kei na lagati ni sere me vaka na “Sa Tucake!” se “Sa Tucake ko Jisu,” Serenilotu, naba. 114, 115, ena rawa ni sureta na Yalo ka vukei iko mo vulica me baleta na Tucaketale ni iVakabula.
Yalewa, Na Cava o Sa Tagica? mai vei Mark R. Pugh