Ecce Homo, mai vei Antonio Ciseri

June 17–23

Maciu 27; Marika 15; Luke 23; Joni 19

“Sa Oti”

Maciu 27; Marika 15; Luke 23; kei na Joni 19 e tiko kina na ivakamacala ni otioti ni auwa ni bula vakayago ni iVakabula. Vakasaqara mo vakila Nona loloma vei iko ni o vulica na veika me baleta na Nona solibula kei na mate.

Vola na Nomu Veivakasama

Ena vosa kei na cakacaka, e vakaraitaka o Jisu Karisito na loloma savasava—e dua na ka e vakatoka na iApositolo o Paula me loloma uasivi (raica na 1 Korinica 13). E sega ni dua na gauna me kilai levu kina me vaka nai otioti ni auwa ni bula vakayago ni Vakabula. Na nona vadigagalu vakarokoroko ena mata ni veibeitaki vakailasu e vakaraitaka kina ni o Koya e sega ni “cudrucudru” vakarawarawa (1 Korinica 13:5). Na Nona lomasoli me vakamavoataki, vakalialiai, ka vakoti ena kauveilatai—ni vesuka tu na Nona kaukauwa me tinia Nona yaluma—e vakaraitaka ni “vosota vakadede” ka “vosota na veika kece” (1 Korinica 13:4, 7). Na Nona loloma cecere vua na Tinana kei na loloma veivueti vei ira era vakoti Koya—ena gauna sara madaga ni Nona mosi sega ni vakatauvatani rawa—e vakaraitaka o Koya ni “sa sega ni qara na ka me [Nona] ga” (1 Korinica 13:5). Ena iotioti ni Nona gauna e vuravura, e cakava tiko o Jisu na veika e a cakava tiko o Koya ena gauna ni Nona veiqaravi ena vuravura oqo—e vakavulici keda tiko mai na ivakaraitaki. Sa dina sara, ni loloma uasivi sai koya na “loloma vakalou” (Moronai 7:47).

Vakasama eso ni Vuli iVolanikalou Yadua

Maciu 27; Marika 15; Luke 23; Joni 19

Na lomasoli i Jisu Karisito me vakararawataki ka vakaraitaka na Nona loloma vei Tamana kei keda kece.

E dina ga ni a tu vua na iVakabula na kaukauwa me kaciva mai na “agilose ka tinikarua na vavakoso ka vakacaca” (Maciu 26:53), e digia ena galala me vosota na dredre, veivakalialiai, kei na mosi vakayago e sega ni vakasamataki rawa. Na cava e cakava kina o Koya? “Ena vuku ni nona dauloloma,” e vakadinadinataka o Nifai, ni “na vosoti ira vakadede na luve ni tamata” (1 Nifai 19:9).

Ena dua beka o na tekivuna na nomu vuli me baleta na iotioti ni auwa ni Vakabula ena nomu wilika na 1 Nifai 19:9. Ena tikina cava so ena Maciu 27; Marika 15; Luke 23; kei na Joni 19 o na kunea kina na ivakaraitaki yadua ni veivakararawataki e tukuna tiko o Nifai ni na sotava o Jisu?

“[Era] vakalewai koya, ni sa tamata ca”

“Era sa vakamavoataki koya”

“Era sa vakanakuitataki koya”

“Era sa kasiviti koya”

Na veitikina cava so e vukei iko mo vakila na “loloma veikauwaitaki” ni Tamada Vakalomalagi kei Jisu vei iko? Na itovo ni bula cava so ni noda iVakabula o sa vakauqeti kina mo vakatorocaketaka vakataucoko?

Raica talega na “Jesus Is Condemned before Pilate” kei na “Jesus Is Scourged and Crucified” (vidio, ena LDS.org).

Maciu 27:27–49, 54; Marika 15:16–32; Luke 23:11, 35–39; Joni 19:1–5

Na vakalialiai ni dina ni Kalou e sega ni dodonu me vakamalumalumutaka na noqu vakabauta.

E dina ni vosota tu na veivakalialiai ena Nona veiqaravi o Jisu, e qai tubu cake ga na kena kaukauwa ena gauna ni nona vakamavoataki kei na Vakoti e Kauveilatai. Ia, na veivakalialiai oqo e sega ni veisautaka rawa na dina: e Luveni Kalou o Jisu. Ni o wilika na veivakamaduataki e vosota o Jisu, vakasamataka na veisaqasaqa kei na veivakalialiai ni Nona cakacaka e sotavi tu ena gauna oqo. Na cava eso na rai titobu o vulica me baleta na vosota tiko na veisaqasaqa? Na cava e tarai iko me baleta na nona vosa na ena Maciu 27:54?

Maciu 27:46; Marika 15:34

E a weletaki Jisu li ena kauveilatai na Tamada Vakalomalagi?

E solia na rai oqo o Elder Jeffrey R. Holland: “Au vakadinadinataka … ni dua na Tama uasivi e sega ni weletaka na Luvena ena auwa koya. … Ia, ni a taucoko sara na cecere ni soli bula nei Luvena ni sa lomasoli vakaidina me vakayacora, e kauta tani mai vakalailai na veivakacegui ni Yalona mai vei Jisu, na itokani ni Nona ituvaki. … Me taucoko ka tawamudu na Veisorovaki ni [Vakabula], e dodonu me vakila o Koya na cava dina na mate sega walega ni vakayago ia e vakayalo talega, me vakila ena vakacava na kena ituvaki ena gauna sa biuti koya kina na Yalo vakalou, ka vakila na galili, e sega na vakanuinui, kei na yaluma titobu” (“E Sega sa Tiko vata Kei Koya,” Ensign se Liaona, Me 2009, 87–88).

Luke 23:34

Sa noda ivakaraitaki na iVakabula ni veivosoti.

Na cava o vakila ni ko wilika na nona vosa na iVakabula ena Luke 23:34? (raica na vakasama mai na Joseph Smith Translation ena ivakamacala e botona c). Vosa tiko ena nona vosa na iVakabula, o Peresitedi Henry B. Eyring e vakavulica: “meda vosoti ka vosota sega sa vakakina kivei ira era vakacudrui keda. E vakaraitaka vei keda na iVakabula mai kauveilatai. … Eda sega ni kila na yalodra o ira era vakacudrui keda” (Me Rawa ni da sa Dua Bau ga,” Ensign, Me 1998, 68). Ena rawa ni vukei iko vakacava na tikina oqo kevaka e dredre tiko vei iko mo vosota e dua?

Luke 23:39–43

Na cava nai balebale ni “parataisi” ena nona itukutuku na iVakabula vua na daubutako?

Ena ivolanikalou, na vosa na parataisi e kena ibalebale “e dua na vanua e kune kina na vakacegu kei na marau ena vuravura ni yalo ni oti na bula oqo”—e dua na vanua e baleti ira na yalododonu. E vakatavulica na Parofita o Josefa Simici ni vosa na parataisi ena Luke 23:43 “e vakadewa cala; e tukuna na Turaga vua na daubutako ni rau na tiko vata kei Koya ena vuravura ni yalo” (Tudei ena Vakabauta, 111; raica talega na Joseph Smith, Journal, June 11, 1843, josephsmithpapers.org). Ena vuravura ni yalo, ena rogoca na daubutako ni vunautaki na kosipeli.

Eso na Vakasama me baleta na Vuli iVolanikalou Vakavuvale kei na Lotu Vakavuvale ena Moniti

Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo eso na vakatutu:

Maciu 27:3–10

E dina ga ni kilai Jisu vakavinaka o Jutasa, e “vukitani mai vei [Jisu], ka vakacudrui baleta na nona vosa” (iVakadewa nei Josefa Simici, Marika 14:31 [ena Marika 14:10, ivakamacala e ra a). Na cava e rawa ni vakavuna me ra vukitani mai vua na iVakabula o ira e kena irairai ni kaukauwa tu na nodra ivakadinadina? E rawa vakacava meda dina tiko ga vei Jisu Karisito?

Maciu 27:11–26; Marika 15:1–15; Luke 23:12–24; Joni 19:1-16

Na cava e soli Jisu yani kina o Pailato me vakoti, dina ga ni kila ni a sega nona cala o Jisu? Na cava eda vulica mai na veika e sotava o Pailato me baleta na noda dau tutaka na veika eda kila ni dodonu? Ena rawa beka ni veivuke me ra vakatasuasuataka na nomu vuvale e dua na tikina ka na vakatarai ira me ra tutaka na veika era kila ni dina.

“A sa colata na nona kauveilatai ko koya, ka lako yani ki … Kolikoca” (Joni 19:17).

Maciu 27:46; Luke 23:34, 43, 46; Joni 19:26–28, 30

E rawa talega ni o lesia e dua se sivia na itukutuku e cavuta na iVakabula ena Kauveilatai, e kune ena veitikina oqo, kina lewe ni vuvale yadua ka kerei ira me ra wasea na veika era sa vulica baleta na iVakabula kei na Nona ilesilesi.

Marika 15:39

E sa vaqaqacotaka vakacava na noda wilika tiko na Veivakoti na noda ivakadinadina ni sa “Luve ni Kalou” o Jisu?

Joni 19:25–27

Na cava eda rawa ni vulica mai na veitikina oqo me baleta na noda lomana ka tokoni ira na noda lewe ni matavuvale?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Vakatorocaketaki ni Noda Veivakavulici

Vakatotomuria na Bula ni iVakabula. “E veivuke na noda vulica na ivakarau e veivakavulici kina na iVakabula—na iwalewale a vakayagataka o Koya kei na veika a cavuta. Ia na kaukauwa ni iVakabula me veivakavulici ka laveti ira cake na tani e lako mai… na mataqali tamata vakacava o Koya. Na levu ni nomu gugumatua mo sasaga mo bula me vakataki Jisu Karisito, na levu ni nomu rawa ni veivakavulici me vakataki Koya” (Veivakavulici ena iVakarau ni Vakabula, 13).

O Karisito ena kauveilatai, mai vei Carl Heinrich Bloch