“15–21 Jiulai. Cakacaka 10–15: ‘Sa Tubu ga na Vosa ni Kalou me Levu Sara mai’” Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019 (2019)
“15–21 Julai. Cakacaka 10–15,” Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019
15–21 ni Julai
Cakacaka 10–15
“Sa Tubu ga na Vosa ni Kalou me Levu Sara mai”
Wilika vakamatata na Cakacaka 10–15 ka vakatara na gauna me vakauqeti iko na Yalo ena vakasama kei na veika o rawa ni vakila. Na cava eso na ka o rawa ni vulica mai na veiwase ni vola oqo?
Vola na Veika o Vakauqeti Kina
Ena gauna ni Nona veiqaravi ena bula oqo, na veivakavuvuli i Jisu Karisito e dau bolea na tamata ena nodra itovo vakavanua kei na vakabauta eso; e sega ni mai tao oqo ena gauna sa lako cake kina ki lomalagi o Koya—e tomana tiko ga o Koya na veidusimaki ki na Nona Lotu ena vakatakila. Me ivakaraitaki, ena gauna ni bula i Jisu era vunautaka na kosipeli o ira na Nona tisaipeli vei ira na Jiu. Ia ni oti na mate ni Vakabula ka qai parofita ni Lotu, e vakatakila o Jisu Karisito vei Pita ni sa kena gauna donu me vunautaki na kosipeli vei ira na sega ni Jiu. Na vakasama ni wasei ni kosipeli vei ira na kai Matanitu tani ena sega ni veivakidacalataki ena gauna oqo, sa cava beka na lesoni vei iko me baleta na itukutuku oqo? E dua beka na lesoni sai koya na veisau ni lawatu kei na ivakarau—ni Lotu ena gauna makawa kei na gauna nikua—e yaco mai ena ivakatakila mai vua na Turaga vei ira na Nona italai (Emosi 3:7; VV1:38). Nai vakatakila e yaco tiko sa dua na ivakarau bibi ni Lotu dina ka bula i Jisu Karisito. Me vakataki Pita, e dodonu meda ciqoma nai vakatakila bula “sa bula ga ena vosa kecega ni Kalou” (Luke 4:4), oka kina “na veika sa vakatakila oti [o Koya], na veika sa vakatakilai mai ena gauna oqo” kei na “levu tale na veika cecere ka bibi” ena qai vakatakila mai o Koya “me baleta tikoga na Matanitu ni Kalou” (Yavu ni Vakabauta 1:9).
Vakasama eso ni Vuli iVolanikalou Yadua
“Na Kalou sa sega ni digitaka vakailoa na tamata.”
E vuqa na kawa tamata yani ki liu, era sa vakabauta tiko na Jiu ni “kawa i Eparama,” se dua na kawa vakadra i Eparama, e kena ibalebale ni sa ciqoma e dua na tamata (e digitaki) mai vua na Kalou (raica na Luke 3:8). E dua tale e na vakatokai me “tawasavasava” ni kai Matanitu tani ka sega ni ciqomi mai vua na Kalou. Ena Cakacaka 10na cava e vakatavulica na Turaga vei Pita me baleti koya “sa vinaka vua”?Cakacaka 10:35 Nai vakadinadina cava o kunea ena veiwase oqo ni a bulataka tiko na bula dodonu o Konilio ka sa vakadonuya na Turaga? Na cava e bibi kina meda kila ni “Kalou sa sega ni digitaka vakailoa na tamata” (tikina 34), e kena ibalebale ni tamata kecega ena rawa ni ciqoma na veivakalougatataki ni kosipeli kevaka era bulataka na kosipeli? (see 1 Nifai 17:35).
Me vakataki ira na Jiu era raici ira sobu era sega ni kawa i Eparama, o sa bau siqema ni o dau vakalewa vakaca e dua na tamata e duatani mai vei iko? E rawa beka vakacava mo ulabaleta na itovo vakaoqo? E rawa ni ka marautaki me caka ena vica na siga e tarava e dua na itaviqaravi rawarawa: Ena veigauna o veimaliwai kei na dua tale, tovolea mo vakasamataka e lomamu, “Qo e dua na luve ni Kalou.” Ni o vakayacora oqo, na veisau cava soti o raica kei na ivakarau ni nomu vakasama me baleta na veimaliwai kei ira tale eso?
Raica talega na D. Todd Christofferson, “Tiko ga ena Noqu Loloma,” Ensign se Liaona, Nove. 2016, 48–51; 1 Samuela 16:7; “Peter’s Revelation to Take the Gospel to the Gentiles” (vidio, LDS.org).
Ena vakavulici au na Tamada Vakalomalagi, laini ki na laini ena ivakatakila.
Ni raica o Pita na ivakatakila e vakamacalataki ena Cakacaka 10, e sagasaga dredre me kila ka “taqaya tiko na lomana” (tikina 17). Ia e solia na Turaga na kila levu cake vei Pita ena gauna e vakasaqara kina o koya. Ni o wilika na Cakacaka 10, 11, kei na 15, raica na kena vakatitobutaki na nona kila o Pita ena loma ni dua na gauna. O sa vakasaqara ka ciqoma vakacava na kila e levu cake mai vua na Kalou ena gauna o lomatarotaro kina?
Cakacaka 10, 11, kei na 15 e vakamacalataka mai na gauna e dusimaki ira kina na Nona italai na Turaga ena vakatakila. Ena rawa ni veivuke mo vola na veika o kunea me baleta na ivakatakila ena veiwase ni vola oqo. E vosa vakacava vei iko na Yalo?
Raica talega na “iVakatakila,” Gospel Topics, topics.lds.org; Ronald A. Rasband, “Laiva na Yalo Tabu liutaka,” Ensign se Liaona, Me 2017, 93–96; “The Jerusalem Conference” (vidio, LDS.org).
Koi au e dua na Lotu va-Karisito baleta niu vakabauta ka muri Jisu Karisito.
Na cava e bibi me baleta na nona vakatokai e dua na tamata me lotu Va-Karisito? (raica na Cakacaka 11:26). Na cava e kena ibalebale vei iko ni ko lotu Va-Karisito se me taura na yacai Jisu Karisito? (see VV 20:77). Vakasamataka na bibi ni yaca. Me kena vakatautauvatataki, na cava nai balebale ni yaca ni matavuvale? Na cava na vuna ka bibi na yaca ni Lotu nikua? (raica na VV 115: 4).
Raica talega na Mosaia 5:7–15; Alama 46:13–15; 3 Nifai 27:3–8; M. Russell Ballard, “Na Bibi ni Dua na Yaca,” Ensign se Liaona, Nove. 2011, 79–82.
Eso na Vakasama me baleta na Vuli iVolanikalou Vakavuvale kei na Lotu Vakavuvale ena Moniti
Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo eso na vakatutu:
E sa bau dua na gauna o vakila e yalomu na veika vakayalo ka qai vakatitiqataka e muri na veika o vakila se vulica? Nai vakasala cava eda rawa ni solia vakayadua ka na rawa ni vukei keda kina meda uabaleta na noda vakatitiqa? (Raica na Ronald A. Rasband, “De Ko ni Guilecava,” Ensign se Liaona, Nove. 2016, 113–15.)
Ena gauna e biu kina ki vale ni veivesu o Pita, era soqoni vata mai na lewe ni Lotu ka masulaki koya. E dua tiko beka na tamata e vakauqeti na nomu vuvale me masulaka, me vaka e dua nai liuliu ni Lotu se dua na daulomani? Na cava na kena ibalebale meda masumasu me vaka “era sa daumasulaki koya tiko”?? (Cakacaka 12:5).
Sa Sereki mai Valeniveivesu o Pita, mai na A. L. Noakes
Ni dou wilika vata nai wase ni vola, eso na lewe ni vuvale era rawa ni toqa toka na veivakalougatataki e yaco mai vei ira na tisaipeli ni Lotu, ka so tale na lewe ni vuvale era rawa ni toqa toka na veisaqasaqa se veivakatovolei era sotava na tisaipeli. Na cava e vakatara kina na Kalou me yaco na veika dredre vei ira na tamata yalododonu?
Na veitikina oqo e vakamacalataka e dua na veisaqasaqa ena Lotu me baleta na nodra cilivi o ira na matanitu tani (sega ni Jiu) era curu ena Lotu me ivakatakilakila ni nodra sa veiyalayalati. E wali na veisaqasaqa oqo ni oti na nodratou sota vata nai Apositolo me vakasamataki nai ulutaga era ciqoma kina e dua nai saunitaro vakauqeti. E rawa ni gauna vinaka oqo mo vakavulica kina nomu vuvale ni yaco tiko nai vakarau vata oqo nikua. Dou digia vakavuvale, e dua na taro me baleta na kosipeli e rawa ni dou kunea vata na kena isau. Vakasaqara vata ena rai titobu ena ivolanikalou kei na nodra vakavuvuli na parofita kei na iapositolo ni gauna oqo. (Na iDusidusi Vakaiulutaga kei na tuvai vakamatanivola ni ulutaga ena mekasini ni Lotu ni lavelave ni koniferedi ena rawa ni veivuke.)
Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.
Vakatorocaketaki Noda Veivakavulici
Droinitaka e dua na iyaloyalo. E rawa ni vukea na lewe ni vuvale me raitayaloyalotaka nai vakavuvuli kei nai talanoa ni volanikalou. Ena rawa ni dou wilika vata vakamatavuvale eso na tikina, ka qai vakatara na gauna vei ira na lewe ni vuvale me ra droinitaka e dua na ka e sema vata kei na veika dou sa wilika. Me vakaoqo, era na rairai taleitaka na lewe ni vuvale na droinitaka nai yaloyalo ni raivotu i Pita ena Cakacaka 10.
Na nona ilakolako kei na raivotu mana nei Kolinio na qaqa ni valu me sotavi Pita e vakaraitaki kina ni “Kalou sa sega ni digitaka vakailoa na tamata” (Cakacaka 10:34).