Paula e valeniveivesu

29 ni Julai–4 ni Okosita

Cakacaka 22–28

“Dua na iTalatala kei na dua na iVakadinadina”

Ni o wilika na italanoa ni nona veiqaravi na iApositolo o Paula ena Cakacaka 22–28, vaqara na ivakavuvuli ena vakaibalebale vei ira na gone o vakavulica.

Vola na Veika o Uqeti Kina

ivakatakilakila ni veiwasei

Sureta na Veiwasei

Vakaraitaka na iyaloyalo ni lokamu ni valeniveivesu, dua na waqa, kei na dua na gata. Sureti ira na gone me ra wasea e dua ga na italanoa era kila me baleti Paula ka salavata kei na iyaloyalo eso oqo.

ivakatakilakila ni veivakavulici

Vakavulica na iVunau

Gone Sobu

Cakacaka 23:10–11

O Tamada Vakalomalagi kei Jisu Karisito erau kauwaitaki au ka rau na vukei au ena gauna dredre.

Na vulici ni ivakarau a vukei Paula kina na iVakabula sa rawa ni vukei ira na gone me ra kila ni rau kauwaitaki ira o Tamada Vakalomalagi kei Jisu.

iTaviqaravi e Rawa ni Caka

• Wasea na italanoa ena Cakacaka 23:10–11 ni nona sikovi Paula e valeniveivesu na iVakabula. Se vakaraitaka na vidio “Be of Good Cheer” (LDS.org), ka vakatayaloyalotaka na italanoa oqo. Wasea e dua na gauna o a vakatovolei kina ka qai tuberi iko ka vakacegui iko na Kalou. Kerei ira na gone me ra wasea na gauna era a vakila kina na veivakacegui ni Kalou.

• Vukei ira na gone me ra cavuqaqataka na ka a tukuna o Jisu vei Paula: “Mo vakacegu ga.” Kerei ira na gone me ra vakasamataka e dua e rawa ni ra sureta me vakacegu ga—e dua beka e yalorarawa se lomaleqa.

Cakacaka 26:1–29

E rawa niu wasea noqu ivakadinadina vei ira tale eso.

Na railesuvi ni ivakadinadina nei Paula vei Tui Akaripa e rawa ni vukea nodra vulica na gone na ivakarau me ra wasea kina na veika era kila ni dina.

iTaviqaravi e Rawa ni Caka

• Kauta mai e dua na isala ni tui ki na kalasi me dara e dua na gone ka vakatayaloyalotaka ni o koya o Tui Akaripa Sureta e dua tale na gone me tu e matana na tui me matataki Paula ni o vakalekalekataka na ivakadinadina nei Paula kei na nona sauma o Tui Akaripa, e kune ena Cakacaka 26:1–29 (raica na “Chapter 63: Paul Finishes His Mission,” New Testament Stories, 162–66, se na kena vidio ena LDS.org). Vakamacalataka ni rawa ni da wasea na noda ivakadinadina kei ira tale eso, me vaka e vakayacora o Paula.

• Kerei ira na gone me ra vakarorogo ni o lagata se wilika e dua na sere baleta na ivakadinadina, me vaka na tikina e 2 ni “Testimony” (Hymns, naba 137) se “I Know My Father Lives” (Children’s Songbook, 5). Sureti ira na gone me ra laveta na ligadra ni ra rogoca e dua na ka e rawa ni ra wasea kina nodra ivakadinadina. O na gadreva beka mo lagata vakavica na sere; sureti ira na gone me ra tokoni iko mai ni sa tekivu me ra kila na qaqana. Kerei ira me ra wasea eso na ka me baleta na kosipeli era kila ni dina.

• Vakayagataka na tabana ni itaviqaravi ni macawa oqo me vukei ira na gone me ra vakasamataka e dua na ka e rawa ni ra tukuna ni ra wasea nodra ivakadinadina. Sureti ira me ra wasea nodra ivakadinadina vua e dua ena nodra matavuvale.

Cakacaka 27

Era vakasalataki au na parofita me baleta na veika rerevaki.

Vakasamataka na ivakarau e rawa ni vakavulici ira kina na gone na italanoa ni voca ni waqa nei Paula ni ra dau raica na parofita na veika dredre eda sega ni raica rawa.

iTaviqaravi e Rawa ni Caka

• Sureti ira na gone me ra vakatayaloyalotaka ni ra tiko ena dua na waqa sa voca tu ena cava. Wilika na ivakaro nei Paula vei ira na tamata, e kune ena Cakacaka 27:9–10, ka wasea na italanoa ni voca ni waqa a yaco baleta ni ra a sega ni rogoca na nona ivakaro (raica na tikina 11, 39–44). Vakaraitaka na itaba ni Peresitedi ni Lotu. Na mataqali ivakaro vakacava e dau solia vei keda o koya?

• Biuta e vica na iyaloyalo se iyaya wavokita na loma ni rumu me matataka na veika era sa vakavulica vei keda na parofita, me vaka na lako i lotu se me da papitaiso. Lako wavoki ena rumu vakalasi, ka tu vakadua ena iyaloyalo se iyaya yadua mo veivosakitaka na ivakarau eda na taqomaki kina ni da muria na nodra ivakavuvuli na parofita.

Peresitedi Thomas S. Monson

Ena vukea noda taqomaki na noda muria nodra ivakavuvuli na parofita.

ivakatakilakila ni veivakavulici

Vakavulica na iVunau

Gone Qase Cake

Cakacaka 23:10–11; 27:18–26; 28:1–6

Niu sotava na veika dredre, e sega ni laivi au na Kalou.

Ena veivakatovolei kece e sotava o Paula, a tiko vata kei koya na Turaga. O na vukei ira vakacava na gone me ra vakatauvatana na veika e sotava o Paula ki na nodra dui bula?

iTaviqaravi e Rawa ni Caka

• Vakayagataka na Cakacaka 23:10, mo vakamacalataka kina ni a biu ki valeniveivesu o Paula baleta ni a vakavuvulitaki Jisu vei ira na tamata. Qai wilika na Cakacaka 23:11 vata kei ira na gone. Se vakaraitaka na vidio “Be of Good Cheer” (LDS.org), ka vakaraitaka na italanoa oqo. Cava na vuna me “vakacegu ga” kina o Paula dina ga ni a curu tu i valeniveivesu?

• Vola ena papa Cakacaka 23:10–11; Cakacaka 27:18–26; kei na Cakacaka 28:1–6. Vakaraitaka na iyaloyalo ni dua na valeniveivesu, dua na waqa, kei na dua na gata, ka sureti ira na gone me ra railesuva na veitikina oqo ka vakasotara vata kei na iyaloyalo. Ena italanoa yadua oqo, a vakaraitaka vakacava na Turaga vei Paula ni tiko vata kei koya?

• Sureta e dua mai na tabanalevu me wasea e dua na gauna a tiko kina vata kei koya na Turaga ena dua na gauna dredre. E rawa tale beka ga ni o wasea eso na ka o sa sotava se o ira na gone.

Cakacaka 26:1–29

Au rawa ni wasea vakadoudou na noqu ivakadinadina kei Jisu Karisito.

Na yaloqaqa nei Paula ena wasei ni nona ivakadinadina sa rawa ni vukei ira na gone me ra doudou ni wasea na nodra ivakadinadina.

iTaviqaravi e Rawa ni Caka

• Sureti ira na gone me ra wilika na Cakacaka 26:1–29 ka vaqara na dina vakosipeli eso a vakavulica o Paula kivei Tui Akaripa. Cava beka na vuna ena rerevaki kina me wasea o Paula na veika oqo vua na tui? Sureti ira na gone me ra vola eso na ivakavuvuli ni kosipeli era kila ni dina. Kerei ira me ra vakasamataka e dua era kila e gadreva tu me rogoca na nodra ivakadinadina ni veidina oqo.

• Sureti ira na gone me ra vakayagataka na tabana ni itaviqaravi ena macawa oqo me ra vola e dua na ka era na rairai tukuna ena nodra ivakadinadina.

Cakacaka 27

Era vakasalataki au na parofita me baleta na veika rerevaki.

E rawa ni ra vakarorogo na gone ki na nodra itukutuku na parofita ni gauna oqo ka vakadinadinataka na nodra ivakaro. O na vukei ira vakacava na gone ni vulica na ivakarau me ra muria kina na ivakaro oya?

iTaviqaravi e Rawa ni Caka

• Kotiva e dua na tikinipepa vaka na ibulibuli ni dua na waqa ki na tikina lalai me vakasotari vata. Sureti ira na gone me ra vola na ivakaro nei Paula ena Cakacaka 27:9–11 ena tikina lalai ka vakasotara vata. Cava na vuna era a sega ni vakarorogo kina vei Paula na tamata?” (raica na tikina e 11). Sureti ira na gone me ra wilika na tikina 18–20 kei na 40–44 me ra kila se cava a yaco kina. (Vakamacalataka baleta ni ra a muria na ivakasala e muri nei Paula na tamata me ra tikoga ena waqa, sega ni dua a mate ena voca ni waqa; raica na tikina e 30–32.) Na cava eda rawa ni vulica mai na ka a yaco oqo me baleta na muri ni parofita?

• Kauta mai e dua na itukutuku ni koniferedi wale ga oqo ni Peresitedi ni Lotu ka wasea vei ira na gone na ivakaro se ivakasala cava ga a solia kina. Sureti ira na gone me ra vakasamataka na sala eso era rawa ni muria kina na parofita.

• Vakaraitaka na vidio “Blessed and Happy Are Those Who Keep the Commandments of God” (LDS.org). Era tautauvata vakacava na parofita kei na tamata e taura tu na ivakadodorairai?

• Vola e vica na itaviqaravi e rawa ni ra cakava na gone ka na vukea nodra vulica na itavi ni dua na parofita—kena ivakaraitaki, “Wilika na Vunau kei na Veiyalayalati 21:4–7” se “Lagata ‘Follow the Prophet’” (Children’s Songbook, 110–11, se vakayagataka e dua tale na sere baleti ira na parofita). Vakaliliga na ivola ni itaviqaravi ena tautuba ni valenivuli, ka sureta e dua na gone me tucake tu e katuba ka wilika vagauna e dua na itaviqaravi vei ira na vo ni gone, ka vakatarai ira me ra vakacavara na itaviqaravi ni bera ni wili tale e dua. Vakamacalataka me vaka ga ni sa veidusimaki e dua na gone vei ira na kena vo, sa vakavulica vei keda na parofita na ka e vinakata na Kalou me da cakava. Kerei ira na gone me ra wasea na ka era sa vulica me baleti ira na parofita mai na itaviqaravi eso oqo.

ivakatakilakila ni vuli

Vakauqeta na Vuli e Vale

Kerei ira na gone me ra vakayagataka na ka era sa vulica me baleti Paula ni vakauqeti ira kina na nodra matavuvale me ra vulica na itukutuku ni parofita wale ga oqo ka veivosakitaka na ivakarau e rawa ni ra muria kina na nona ivakasala

Vakatorocaketaki Noda Veivakavulici

Okata na wakilakila “E levu na gone (kei na qase) e vinaka duadua nodra vuli ni vakayagataki e vica na wakilakila. Vakasaqara na sala me ra vukei kina na gone me ra vakayagataka nodra wakilakila ni rai, rorogo, kei na vakila ni ra vuli. Ena so na gauna, ena rawa sara ni o kunea na sala me vakayagataki kina nodra wakilakila ni vaboboi kei na ikanakana!” (Veivakavulici ena iVakarau ni iVakabula, 25).

tabana ni itaviqaravi: Au rawa ni wasea noqu ivakadinadina