Vola e dua na ivola o Paula

5–11 ni Okosita

Roma 1–6

“Na Kaukauwa ni Kalou me Ia na Veivakabulai”

Na veivakauqeti cava e yaco vei iko ni o wilika na Roma 1–6? Na veivakauqeti oqo e rawa ni vukei iko mo digidigi mai na vakasama eso ni veivakavulici oqo.

Vola na Veika o Uqeti Kina

ivakatakilakila ni veiwasei

Sureta na Veiwasei

Sureti ira na gone me ra wasea na veika era a cakava me baleta na veisureti a soli vei ira ena lesoni ni macawa sa oti. Kena ivakaraitaki, era a tukuna beka ki na nodra matavuvale na voca ni waqa e vakamacalataki ena Cakacaka 27 vakakina noda muria na parofita?

ivakatakilakila ni veivakavulici

Vakavulica na iVunau

Gone Sobu

Roma 1:16–17

Au rawa ni vakaraitaka noqu vakabauti Jisu Krisito ena noqu muri Koya.

E vakavuvulitaka o Paula ni tu ena kosipeli na mana me ia na veivakabulai vei ira kece era bula ena vakabauti Jisu Karisito. O na vukei ira vakacava na gone me ra vakaraitaka nodra vakabauti Jisu Karisito ena nodra muri Koya?

iTaviqaravi e Rawa ni Caka

• Vukei ira na gone me ra kunei Roma ena dua na mape. Vakamacalataka ni ivola na Roma e lewena e dua na ivola nei Paula vei ira na Yalododonu mai Roma me vukea nodra kila na ivakavuvuli ni kosipeli me vaka na vakabauta.

• Wilika na Roma 1:17 vei ira na gone, ka vukei ira me ra cavuqaqataka na malanivosa “Ena bula ena vakabauta ko koya sa yalododonu.” E rawa ni o lesia vei ira yadua na gone e dua na vosa ka kerea me ra cavuta na vosa oya ni o dusi ira. Vakamacalataka ni ibalebale ni malanivosa oya ni sa dodonu me da bula ena veisiga yadua ena vakabauti Jisu Karisito. Era kila beka na gone na cava na vakabauta? Vakaraitaka e dua na iyaloyalo kei Jisu Karisito ka vakamacalataka ni da vakabauta ni tiko dina o Koya dina ga ni da se bera ni raici Koya Oqo na vakabauta—vakadinata e dua na ka dina ga ni da se bera ni raica.

• Vakamacalataka ni da vakaraitaka noda vakabauti Jisu Karisito ena noda talairawarawa Vua. Vunitaka wavoki ena rumu na kedra iyaloyalo na tamata era cakava tiko na veika e kerea o Jisu me da cakava. Me ra veivukevuke na gone ena vaqara ka vakamacalataka na iyaloyalo. Na cava eda rawa ni cakava meda muri Jisu kina?

• Vesuka na matana e dua na gone qai tuberi koya yani ki na dua na iyaloyalo kei Jisu. Me ra vakaitavi yadudua kina na gone. Vukei ira na gone me ra kila ni dodonu me ra muria na ivakavuvuli nei Jisu me vaka ga nodra muria na nomu veituberi.

Roma 6:1–11.

Na papitaiso sa vaka ni da yaco me da sa tamata vou tale.

O ira na gone o vakavulica era sa vakarau tiko me ra papitaiso. Na cava e rawa ni ra vulica me baleta na papitaiso mai na veidusimaki nei Paula me da “sa ivalavala vakatalega kina ena bula vou”?

iTaviqaravi e Rawa ni Caka

• Sureti ira na gone me ra cavuta tale na malanivosa “me da sa ivalavala vakatalega kina ena bula vou” (Roma 6:4). Vakamacalataka ni gauna eda sa papitaiso kina, sa vosoti noda ivalavala ca. Sa noda kina na madigi me da toso ki liu ena noda digidigi vinaka, veivutuni ni da cala, ka sasaga me da vakataki Jisu vakalevu cake. Vakayagataka na tabana ni itaviqaravi ni macawa oqo me vakavulici vei ira na gone ni na vukei keda na papitaiso me da tamata vou.

• Tukuna vei ira na gone na ivakarau ni yalomu ena gauna o papitaiso kina, ka sureti ira me ra wasea na gauna eso era a tiko kina ena dua na papitaso. Sureti ira me ra droinitaka na kedra iyaloyalo ena nodra siga ni papitaiso se tu mai liu ka wasea na veika e rawa ni ra cakava me ra vakavakarau ki na nodra papitaiso.

• Lagata vata kei ira na gone e dua na sere baleta na papitaiso, me vaka na “When I Am Baptized” (Children’s Songbook, 103). Na cava eda vulica baleta na papitaiso mai na sere oqo?

papitaisotaki e dua na gonetagane

Na papitaiso e ivakatakarakara ni sa tekivu e dua na bula vou vakatisaipeli i Karisito.

ivakatakilakila ni veivakavulici

Vakavulica na iVunau

Gone Qase Cake

Roma 1:16–17

Au rawa ni vakaraitaka noqu vakabauti Jisu Krisito ena noqu muri Koya.

E vakavuvulitaka o Paula ni tu ena kosipeli na mana me ia na veivakabulai vei ira kece era bula ena vakabauti Jisu Karisito. Na vakabauta sa imatai ni ivakavuvuli ni kosipeli. E vakauqeti keda me da talairawarawa ki na ivunau. O na vukei ira vakacava na gone me ra kila vakavinaka cake na vakabauta?

iTaviqaravi e Rawa ni Caka

• Kerea e dua na gone me vaqarai Roma ena dua na mape. Vukei ira na gone me ra kila ena loma ni vica na macawa mai oqo, era na vuli mai na ivola a vola o Paula vei ira na lewe ni Lotu ena veivanua eso, tekivu ena nona ivola vei ira mai Roma.

• Vola na itukutuku mai na Roma 1:16 ena papa, vakalala na vanua e dodonu me tiko kina e vica na vosa. Kerei ira na gone me ra cega na ivolanikalou ka vakalewena na veitikina lala. Dusia na malanivosa “Niu sa sega ni maduataka na itukutuku vinaka kei Jisu Karisito,” ka sureti ira na gone me ra wasea na ibalebale ni malanivosa oqo vei ira.

• Sureta e dua na gone me wilika i cake na Roma 1:17, ka kerei ira na vo ni gone me ra vakarogoca e dua na vosa e tokaruataki. Cava na ibalebale ni “bula ena vakabauta”? Vukei ira na gone me ra raica e dua na ivakamacala ni vakabauta ena dua na ivurevure me vaka na iDusidusi ki na iVolanikalou, “Vakabauta,” scriptures.lds.org. Ena duatani vakacava na noda bula kevaka eda sega ni vakabauti Jisu Karisito?

• Vakaraitaka vei ira na gone e dua na kau kei na sorenikau, ka taroga se da na vukea vakacava e dua na sorenikau me yaco me kau. Vakamacalataka ena noda tea ka vakasuasuataka tiko e dua na sorenikau, eda vakaraitaka ni da vakabauta ni na tubu. Eda vakaraitaka vakacava ni da vakabauti Jisu Karisito? Vakasamataka mo lagata e dua na sere baleta na vakabauta, me vaka na “Faith” (Children’s Songbook, 96), me tiki ni itaviqaravi oqo.

Roma 3:23–24

Eda gadrevi Jisu Karisito taucoko me rawa kina ni bokoci noda ivalavala ca.

E vinakata o Paula me ra kila na kai Roma ni na yaco duadua ga na veivakabulai ena vukui Jisu Karisito kei na Nona loloma soliwale. Vakasamataka vakatitobu mo na vakavulica vakacava vei ira na gone na dina oqo.

iTaviqaravi e Rawa ni Caka

• Sureta e dua vei ira na gone me wilika na Roma 3:23–24. Na cava era nanuma na gone ni vakavulica tiko vei keda na veitikina oqo? Vakamacalataka ni “loloma” ena tikina e 24 e kena ibalebale na nona isolisoli ni loloma kei na loloma cecere na iVakabula, ka rawa kina ni vosoti na noda ivalavala ca.

• Vakaliliga e dua na kakana se iyaloyalo e cake sara ena lalaga se ena dua tale na vanua ka ra na sega ni yacova rawa vakataki ira na gone. Laiva me ra tovolea me ra yacova, ka vakatauvatana oqo ki na ivakavuvuli nei Paula ena Roma 3:23. Qai vukei ira me ra yacova. Na cava sa cakava ena vukuda na iVakabula ka da na sega ni rawa ni cakava vakataki keda? Sureti ira na gone me ra wasea na veika era nanuma baleta na iVakabula ni ra vakasamataka na veika sa cakava o Koya ena vukudra.

Roma 6:1–11

Na papitaiso sa vaka ni da yaco me da sa tamata vou tale.

E vakavulica o Paula ni papitaiso e vakatakarakarataka na mate kei na Tucaketale i Karisito. E vakatakarakarataka talega na “mate” ni noda bula ivalavala ca ka mai vakaturi cake me da “sa ivalavala vakatalega kina ena bula vou” (Roma 6:4). Eda vakavouia noda yalayala me da lako ena bula vou ena veigauna kece eda vakayagataka kina na sakaramede.

iTaviqaravi e Rawa ni Caka

• Sureta e dua na gone me wilika na Roma 6:3–6. Na cava e tukuna o Paula ni papitaiso “e sa vakataka”?

• Veivosakitaka se vakatakarakarataka vakacava na mate kei na tucaketale na papitaiso. Vakasamataka mo vakaraitaka na vidio “The Baptism of Jesus” (LDS.org). Na cava na vuna erau ivakatakarakara vinaka kina ni veika e yaco ni da papitaiso na mate kei na tucaketale?

• Wilika vata na masu ni sakaramede (raica na V&V 20:77, 79). Vakananuma vei ira na gone ni gauna eda taura kina na sakaramede, eda sa vakavouia na yalayala eda a vakayacora ena gauna eda papitaiso kina me da muri Jisu Karisito. E vukei keda vakacava na sakaramede me da “sa ivalavala vakatalega kina ena bula vou”?

• Sureti ira na gone me ra cakava na ivolakabi eso e vakaraitaka na cava na kena ibalebale vei ira me da “sa ivalavala vakatalega kina ena bula vou”? E rawa ni ra vakaliliga ena nodra rumu na gone me vukea nodra nanuma me ra dau digidigi vinaka.

ivakatakilakila ni vuli

Vakauqeta na Vuli e Vale

Vakayaloqaqataki ira na gone me ra kerei ira na lewe ni matavuvale me ra vakatakila vei ira na gauna era raici ira kina na gone ni cakava voli e dua na ka e vakaraitaka na vakabauta.

Vakatorocaketaki Noda Veivakavulici

Tara cake nodra yalodei na gone. Me vukea na taraicake ni nodra yalodei na gone ni rawa ni ra vulica vakataki ira na kosipeli, vakacaucautaki ira ni ra vakaitavi ena kalasi.

tabana ni itaviqaravi: papitaisotaki