Korinica, Ceva kei Kirisi, na Foramu kei na Vale ni Matabose ni Koro, droini nei Balage Balogh

19–25 ni Okosita

1 Korinica 1–7

“Mo Dou Semati Vakavinaka Sara”

Ena vukei iko na Yalo Tabu mo kila na ivakavuvuli cava ni kosipeli ena 1 Korinica 1–7 ena vukei ira na gone o vakavulica. Ni o wilika ena masumasu na iwase eso oqo, vola na vakasama kei na nanuma eso e votu vei iko mai vua na Yalo.

Vola na Veika o Uqeti Kina

Sureta na Veiwasei,

Ni se vo e vica na siga, sureta e dua se vica na gone me ra raica e dua na tikina ena 1 Korinica 1–7 e rawa ni ra wasea ki na kalasi. O rawa ni sureti ira na nodra itubutubu me ra veivuke kevaka e gadrevi.

Vakavulica na iVunau

Gone Sobu

1 Korinica 2:11–14

Na Yalo Tabu e vakavuvulitaka vei au na dina ni kosipeli.

E dua na itavi ni Yalo Tabu me vakavulica vei keda na dina. Na veika cava soti sa sotavi o rawa ni wasea vei ira na gone me vukea nodra kila oqo?

iTaviqaravi e Rawa ni Caka

• Vakaraitaka na iyaya se iyaloyalo ka matataka na ivakarau eda vulica kina na vuravura (vaka e dua na koronivuli, ivola, se selevoni). Na cava eda rawa ni vulica ni da vakayagataka na veika oqo? Vakamacalataka ena 1 Korinica 2:11, 14, a vakavulica o Paula ni sala duadua ga eda rawa ni vulica kina me baleta na Kalou, na Yalo ni Kalou, sai koya na Yalo Tabu. Na cava e rawa ni da cakava me da vulica “na veika ni Kalou”?

• Sau na ligamu ni o cavuta na veivosa yadua ni iyatuvosa “Na Yalo Tabu e vakavulica vei keda na ka dina.” Kerei ira na gone me sau na ligadra ka tokaruataka na malanivosa. Wasea vei ira na gone e dua na gauna a vukei iko kina na Yalo Tabu mo kila ni dina e dua na ka.

• Lagata vata e dua na sere baleta na Yalo Tabu, me vaka “The Holy Ghost” (Children’s Songbook, 105). Vukei ira na gone me ra raica na malanivosa ena sere e vakavulica na ivakarau e vosa kina vei keda na Yalo Tabu kei na ka e vakavulica vei keda o Koya.

1 Korinica 3:10–11

Sa noqu yavu o Jisu Karisito.

Era sa vakadavora tiko na gone e dua na yavu ni nodra ivakadinadina, ka na rawa ni o vukei ira me ra tara e dua na yavu dei vei Jisu Karisito.

iTaviqaravi e Rawa ni Caka

• Wilika na 1 Korinica 3:11 vei ira na gone, ka vakamacalataka ni o Jisu Karisito sa noda yavu. Vakaraitaka vei ira na gone na iyaloyalo ni veika eso eda rawa ni taukena na kena ivakadinadina, oka kina e dua na iyaloyalo kei Jisu Karisito. Vukei ira me ra tuva na iyaloyalo me rawa ni tiko sara e ra na iyaloyalo kei Jisu, me vaka e dua na yavu, kei na vo ni iyaloyalo me “tara cake” ena Kena ivakadinadina.

• Bulia eso na matanimeke ni sere “The Wise Man and the Foolish Man” (Children’s Songbook, 281), ka lagata vata kei ira na gone na sere. Solia vei ira yadua na gone e dua na vatu ka volai toka kina “sa noqu yavu o Jisu Karisito.” Me ra kauta i vale na vatu me vakananuma vei ira na ka era sa vulica.

• Wasea na iyaloyalo ni so na nomu italanoa talei ni nona bula na iVakabula ka kerei ira na gone me ra tukuna vei iko na ka e yaco tiko ena iyaloyalo. Me ra qai wasea eso na nodra italanoa taleitaki baleti Jisu. Wasea na nomu ivakadinadina ni o Jisu Karisito sa yavu ni nomu vakabauta.

1 Korinica 6:19

Na yagoqu e vaka e dua na valetabu.

O na vukei ira vakacava na gone me ra vakavinavinakata na yagodra me isolisoli mai vua na Kalou ka gadreva vakalevu tu me ra qarauna vinaka?

iTaviqaravi e Rawa ni Caka

• Vakaraitaka vei ira na gone na iyaloyalo ni valetabu eso (raica na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale), ka wilika na vosa oqo mai na 1 Korinica 6:19: “Sa vale ni Yalo Tabu na yagomudou.” Vukei ira na gone me ra kila ni vinakata na Tamada Vakalomalagi me da maroroya na savasava ni yagoda ka vakatabuya, me vaka e dua na valetabu.

• Vakaraitaka na iyaloyalo ni dua na gone, ka biuta wavokita na iyaloyalo na veika eso e vinaka ki yagoda kei na veika e ca. Sureti ira na gone me ra veivukevuke ni vakatakila na ka vinaka ka biuta tani na ka ca.

• Ni lagata vata e dua na sere me baleta na yago, me vaka na “Head, Shoulders, Knees, and Toes” (Children’s Songbook, 275), ka tarogi ira na gone na vuna era vakavinavinakataka kina na yagodra.

Vakavulica na iVunau

Gone Qase Cake

1 Korinica 1:23–25

E yalomatua cake sara na Kalou mai vua na tamata, kau sa vakaraitaka na yalomatua dina niu vakabauta na Nona ivakavuvuli.

Era na raica na gone o vakavulica—kevaka era se bera ni raica oti—ni so na tamata era vakavuvulitaka na veika e veisaqasaqa kei na yalomatua ni Kalou. Na vulici ni 1 Korinica 1:23–25 e rawa ni vukei ira na gone me ra kila ni sa yalomatua cake na Kalou mai vua na tamata.

iTaviqaravi e Rawa ni Caka

• Wilika vata na 1 Korinica 1:23–25 ka vukei ira na gone me ra kunea na vosa vuku kei na lialia. Vakamacalataka ni vuqa na tamata era nanuma ni sa ka lialia na ivakavuvuli i Paula, ia e vakamacalataka o Paula ni vakabauti ni kosipeli i Karisito sai koya na vuku dina. Na cava na vuna e vuku kina me da vakabauta na ka e ivakavuvulitaka na Kalou?

• Vukei ira na gone me ra dramataka nodra sausaumi ki na vakasama ni tamata era nanuma ni sa ka “lialia” na ivakavuvuli ni Lotu—me vaka na vakabauta na iVakabula, maroroya na Vosa ni Vuku, se talairawarawa ki na lawa ni ikatini. Kena ivakaraitaki, e rawa ni ra vakadinadinataka na veivakalougatataki e yaco ena bulataki ni ivakavuvuli oqo.

• Wasea e dua na gauna era nanuma kina eso ni sa ka lialia na ka o vakabauta, se wasea e dua na ivakaraitaki mai na ivolanikalou. E rawa beka ni ra wasea na gone eso na ka vata vaqori? E rawa ni vukei keda vakacava na 1 Korinica 1:25 me da yalodina tikoga ni ra vakatoka eso na noda vakabauta me ka lialia?

1 Korinica 2:11–14

E vakavulica vei au na Yalo Tabu na dina ni kosipeli.

O na vukei ira vakacava na gone me ra vakadinadinataka ni ra sa gadreva na Yalo Tabu me ra kila na “veika ni Kalou”?

iTaviqaravi e Rawa ni Caka

• Cakava e dua na ituvatuva eda na vulica kina na vuravura—me ivakaraitaki, na ivola, koronivuli, kei na initaneti. Qai wilika vata na 1 Korinica 2:11–14. Na cava era vakavuvulitaka na veitikina oqo me baleta na ivakarau eda vulica kina “na veika ni Kalou”?

• Sureti ira na gone me ra wasea e dua na gauna era a vakila kina na veivakauqeti ni YaloTabu, ka vakatokai talega “na Yalo ni Kalou” (1 Korinica 2:11–14). Na gauna vakaoqori e rawa ni okati kina nodra lotu tiko, masu, se wili ivolanikalou. Vukei ira me ra kila ni sa vakavulica tiko na dina vei ira na Yalo Tabu, me vaka e vakamacalataka o Paula.

• Sureta na gone yadua me wilika e dua vei ira na ivolanikalou oqo: 1 Korinica 2:11–14; 1 Nifai 10:17; Moronai 10:3–5; kei na Vunau kei na Veiyalayalati 8:2–3. Kerei ira na gone me ra wasea na veika era vulica mai na ivolanikalou eso oqo ena ivakarau e vakavulici keda kina na Yalo Tabu. Vakauqeti ira me ra vola na idusidusi eso oqo ena iyalayala ni draunipepa ni nodra ivolanikalou.

1 Korinica 6:19–20

E dodonu meu doka na yagoqu ka vakasavasavataka.

Na kilai ni yagoda ni ra sa isolisoli mai vua na Tamada Vakalomalagi ena vukei ira na gone me ra vakatabuya na yagodra, ena gauna mada ga era temaki kina me ra na vorata.

iTaviqaravi e Rawa ni Caka

• Kauta mai e dua na ioloolo iloloma ka tiko i loma na iyaloyalo ni dua na gone kei na valetabu. Sureti ira na gone me ra wilika na 1 Korinica 6:19–20 ka vakilakila se cava e tiko ena iloloma. Laiva me ra cega na iolo ni loloma ka veivosakitaka se vakataka vakacava na valetabu na yagoda.

• Veitalanoa kei ira na gone baleta na ivakarau me da raica kina na valetabu. Kevaka sa vaka na valetabu na yagoda, me na vakacava noda raica na yagoda? Na lagati se wiliki ni qaqa ni dua na sere baleta na valetabu, me vaka na “The Lord Gave Me a Temple” (Children’s Songbook, 153), e rawa ni veivuke ena saumi ni taro oqo. Ni da caka cala, me da vakasavasavataka tale vakacava na noda “valetabu”?

• Wilika vata na iwasewase ka kena ulutaga “Tiko Bulabula ni Yago kei na Yalo” me Me iSakisaki ni iTabagone (2011, 25–27). Sureti ira na gone me ra vola ena papa na ivakasala era kunea me baleta na ivakarau me da qarauna kina na yagoda.

Vakauqeta na Vuli e Vale

Sureti ira na gone me ra wasea ki na nodra matavuvale e dua na sere era a lagata ena kalasi kei na cava era vulica mai kina.

Vakatorocaketaki Noda Veivakavulici

Vakadinadinataki Jisu Karisito E dua vei ira na ka bibi duadua o rawa ni cakava vaqasenivuli oya mo vakadinadinataki Jisu Karisito. Oqo ena vukei ira na gone ni vaqaqacotaka na nodra ivakadinadina ka vakila na loloma ni iVakabula ena vukudra.