Roma

12–18 ni Okosita

Roma 7–16

“Vakamalumalumutaka na Ca ena Vinaka”

Ni o wilika na Roma 7–16, vola na veivakauqeti o ciqoma baleta na ivakarau o rawa ni vakavulica kina vei ira na gone na dina ena iwase eso oqo.

Vola na Veika o Uqeti Kina

ivakatakilakila ni veiwasei

Sureta na Veiwasei

Taroga vei ira na gone kevaka era a wasea ki na nodra matavuvale e dua na ka era a vulica ena Lalai ena macawa sa oti. (O na gadreva beka mo railesuva vata kei ira na lesoni ni macawa sa oti.) Ke vakakina, na cava era a wasea?

ivakatakilakila ni veivakavulici

Vakavulica na iVunau

Gone Sobu

Roma 8:35-39.

Sa Lomani Au na Tamaqu Vakalomalagi

O na vakayagataka vakacava na vosa nei Paula mo vakavulici ira kina na gone ni na dau lomani ira tikoga na Tamada Vakalomalagi?

danisi vata kei luvena yalewa o tamana

Na Tamada Vakalomalagi e lomani ira vakayadua na Luvena.

iTaviqaravi e Rawa ni Caka

• Vukei ira na gone me ra cavuqaqataka na malanivosa “[E sega ni dua na ka e rawa] ni tawasei keda mai na loloma ni Kalou” (Roma 8:39). Mo vakaraitaka na dina oqo, vakota vata e rua na papa, ka vola ena dua “o keda” kei na kena ikarua “na loloma ni Kalou.” Laiva vei ira na gone me ra tovolea me ra tawasei rau na papa.

• Kauti ira na gone i tuba me ra vakila na cilanisiga, se vakaraitaka na iyaloyalo ni matanisiga. E tautauvata vakacava kei na matanisiga na loloma ni Tamada Vakalomalagi? Vukei ira me ra kila ni dina ga ni yawa sara na matanisiga, e sa rawa ni vukea meda katakata. E rawa ni da vakila e veigauna na loloma ni Tamada Vakalomalagi, dina ga ni sega ni tiko vata kei keda. E rawa talega mo ni lagata vata “My Heavenly Father Loves Me” (Children’s Songbook, 228-29).

Roma 10:17

Na vakabauta e lako mai ena rogoci ni vosa ni Kalou.

Ni ra rogoca na gone na vosa ni Kalou ka vakarorogo kina vakavinaka, ena tubu nodra vakabauta na Kalou. E rawa vakacava mo vukei ira me ra kila na bibi ni vakarorogo ki na vosa ni Kalou?

iTaviqaravi e Rawa ni Caka

• Wilika na Roma 10:17 vei ira na gone, ka vakaraitaka vei ira na iyaloyalo ni veigauna eso era rawa kina ni rogoca na vosa ni Kalou (me vaka na vuli ivolanikalou vakamatavuvale, na lotu, se koniferedi raraba; raica na tabana ni itaviqaravi ena macawa oqo). Taroga vei ira na gone na gauna era a rogoca kina na vosa ni Kalou.

• Tukuna na kena italanoa e dua na gone a vakarorogo ki na vosa ni Kalou ena sala duidui eso. Ni o tukuna tiko na italanoa, uvuca tiko vakalalai e dua na baluni me vakaraitaka na tubu ni nona vakabauta e dua na gone ni rogoca na vosa ni Kalou.

• Me vukei ira na gone me ra kila ni rawa ni tubu nodra vakabauta, vukei ira me ra lagata na “Faith” (Children’s Songbook, 96–97). Ni ra lagata tiko, kerei ira me ra vaka na sorenitei ena nodra lolou sobu. Ena veigauna era lagata kina na vosa vakabauta, me ra talave cake vakalailai me vaka e dua na kautei sa tubu tiko.

• Vunitaka e valenivuli e dua na ivolanikalou, dua na kena itaba na Peresitedi ni Lotu, kei na dua na ilavelave ni mekesini Friend se Liaona . Kerei ira na gone me ra vaqara na veika oqo ka wasea se rawa vakacava ni da rogoca na vosa ni Kalou mai na veika oqo.

Roma 16:1–4

E rawa niu vakavinavinakataki ira ka vukei au.

A vakavinavinakataki ira na tamata ka vukei koya o Paula. O rawa ni vukei ira na gone me ra raica na veika vinaka era dau cakava na tani ena vukudra ka nanuma me ra vakavinavinakataki ira.

iTaviqaravi e Rawa ni Caka

• Vakamacalataka ni a vakavinavinakataka o Paula na veivuke a ciqoma mai vua na marama o Fipi kei rau na veiwatini o Pirisila kei Akuila (raica na Roma 16:1–4). Kerei ira na gone me ra droinitaka na iyaloyalo kei Paula kei iratou na lewe tolu oqo ni o wasea na vosa kei na malanivosa mai na veitikina oqo.

• Sureti ira yadua na gone me ra wasea e dua na ka vinaka ka cakava vua e dua ena dua na gauna lekaleka sa oti. Vukei ira na gone me ra cakava na kadi ni vakavinavinaka me baleti ira oqori.

• Vukei ira na gone me ra vulica ni cavuta na vakavinavinaka ena veimataqali vosa. E rawa ni veivuke na sere “Children All Over the World” (Children’s Songbook, 16–17) .

ivakatakilakila ni veivakavulici

Vakavulica na iVunau

Gone Qase Cake

Roma 8:16-18.

E vinakata na Tamada Vakalomalagi meu vakarautaka ni ciqoma na veika kece e Nona.

Na ituvatuva ni Tamada Vakalomalagi sa vakavuna vei keda meda yaco me vakataki Koya ka taukena na veika kece e tu Vua. Na dina oqo e rawa ni uqeti ira na gone o vakavulica me ra bulataka ena yalodina na kosipeli.

iTaviqaravi e Rawa ni Caka

• Wilika vata na Roma 8:16–18. Na cava eda vulica mai na veitikina oqo me baleta o cei o keda kei na kena rawa meda vakataki cei? Vakamacalataka ni o “koya e nona ivotavota” sai koya ka taukena, se ciqoma, na veika e tu vei rau na nona itubutubu. Vola ena papa Na cava eda gadreva me da cakava me noda ivotavota kina na veika kece e tu vei Tamada mai Lomalagi? Lagata vata e dua na sere me baleta na talairawarawa, me vaka na “I Will Follow God’s Plan for Me” (Children’s Songbook, 164–65), ka vaqara na kena isau. Na isau cava tale era rawa ni vakasamataka na gone?

• Kerei ira na gone me ra vakasamataka e dua na tui e vinakata me ra na liutaka na nona matanitu ena dua na siga na luvena tagane kei na yalewa. Vakamacalataka ni Tamada Vakalomalagi sa vaka e dua na tui, ka sai keda na Luvena tagane kei na yalewa vakatui. E rawa ni o wasea na italanoa ni luvena tagane na Tui o Louis XVI ni Varanise, ena vosa nei Sisita Elaine S. Dalton “Nanuma o Cei o Iko!” (Ensign se Liaona, Me. 2010, 121). Ena vukei keda vakacava me da buladodonu e vuravura na noda nanuma tiko ni o keda na luvena na Tamada Vakalomalagi ka sucu mai me yaco ena dua na siga me vakataki Koya? (Ena ikuri ni itukutuku, raica na Tudei ena Vakabauta, 74–76.)

Roma 10:17

Na vakabauta e lako mai ena rogoci ni vosa ni Kalou.

E levu na madigi ni nodra rogoca na vosa ni Kalou na gone. Vukei ira me ra raica na ivakarau e rawa ni vaqaqacotaki kina nodra vakabauta na rogoci ni vosa ni Kalou.

iTaviqaravi e Rawa ni Caka

• Vola na veiyatuvosa oqo ena papa: yaco mai ena , vakakina mai na ni . Kerei ira na gone me ra vakalewena na vanualala ni ra wilika oti na Roma 10:17. Wasea e dua na gauna a vakavulica kina e dua na dina vakosipeli ka vukea me vaqaqacotaka nomu vakabauta—o na rairai wasea beka e dua na ivolanikalou taleitaki se vosacavuti mai na koniferedi raraba. Sureti ira na gone mera wasea na veika era dui sotava.

• Vakayacana e vicavata na bilo wai ena veika eda dau raica kina na vosa ni Kalou (me vaka na ivolanikalou, na soqoni ni lotu, kei na koniferedi raraba). Veivosakitaka na sala e vakalevutaka kina noda vakabauta na vosa ni Kalou ni o sova na bilo yadua ena dua na itawatawa ka yacana na “Vakabauta.”

• Solia vua e dua na gone na kena iyaloyalo na iVakabula ni vakabula tiko e dua ka me ra kakua ni raica na vo ni gone. Kerea na gone oqori me tukuna eso na ka e rawa ni vukei ira na vo ni gone me ra kila na ka e tiko ena iyaloyalo. Eda na wasea vakacava vei ira na tani na veika eda kila me baleta na iVakabula me rawa ni ra vakabauti Koya?

Roma 14:10, 13

“Me da kakua … ni daulelewa.”

Ni ra veimaliwai na gone kei ira tale eso ka duidui na ka era dau digitaka mai vei ira, e rawa ni ra temaki me ra vakalelewa. Vakasamataka na sala e rawa ni vukei ira kina na ivakasala nei Paula vei ira mai Roma me ra kua ni dau lelewa.

iTaviqaravi e Rawa ni Caka

• Sureta e dua na gone me wilika na Romans 14:10, 13. Tarogi ira na gone me ra wilika se cavuta vakavica o Paula na vosa lewa. Na cava na kena ibalebale me da vakalewa e dua? Na cava na vuna me da kakua kina ni vakalewai ira na tani?

• Vakaraitaka na kena iyaloyalo e dua, ka tarogi ira na gone na cava eda kila me baleta na tamata oqo ena noda raica ga na kena iyaloyalo. Na cava eso na ka eda sega ni kila me baleti koya? Na cava na vuna e vinaka duadua ga kina na Turaga me lewa na tamata oqo? (raica na 1 Samuela 16:7).

ivakatakilakila ni vuli

Vakauqeta na Vuli e Vale

Kerei ira na gone me ra digitaka e dua na itaviqaravi ko ni a cakava vakalasi ka cakava vata nodra matavuvale. Tukuna vei ira ena macawa mai oqo sa rawa ni ra wasea na ka era cakava.

Vakatorocaketaki Noda Veivakavulici

Vakaitavitaki ira na gone ena veitalanoataki ni kosipeli. Ena gadrevi beka mo vakasamataka eso na sala vinaka mo vakaitavitaki ira kina na gone sobu ena veivosakitaki ni kosipeli. Ena so na gauna o rawa ni cakava e dua na ka rawarawa sara me vaka nomu sureti ira na gone me ra dabe wavoki ena fuloa ka sega ena nodra idabedabe.

tabana ni itaviqaravi: na vakabauta sa basika mai ena vakarorogo