21–27 ni Okotova

1 kei na 2 Cesalonaika

“Me Kakua ni Totolo na Yavalati ni Nomudou Vakasama, se Mo Dou Taqaya”

Ni o wilika ena yalomasumasu na 1 kei na 2 Cesalonaika ni o vakasamataki ira tiko na gone, o na kunea na ivakavuvuli eso e gadrevi me ra kila.

Vola na Veika o Uqeti Kina

Sureta na Veiwasei

Ena lesoni ni macawa sa oti, o a sureti ira beka na gone me ra vakayagataka na ka era vulica ena sala eso? Me ra vakayagataka na gone na imatai ni vica na miniti ena kalasi ni macawa oqo me ra wasea kina na veika era sotava.

Vakavulica na iVunau

Gone Sobu

1 Cesalonaika 5:1–6

Niu muria na ivunau ni Kalou, au sa na tuvakarau ki na iKarua ni Lako Mai i Jisu Karisito.

Na ivakasala nei Paula e rawa ni vukei keda me da tuvakarau ka yadrava toka na siga levu koya ena lako tale mai kina ki vuravura na iVakabula.

iTaviqaravi e Rawa ni Caka

• Sureta e dua na tina me tukuna mada na ituvaki ni yalona ena nona waraka toka me sucu mai na luvena ni sega mada ga ni kila deivaki sara na gauna ena vakasucu kina. Wilika na 1 Cesalonaika 5:2–3, ka tukuna vei ira na gone ni na lako tale mai ki vuravura o Jisu Karisito, ia e sega ni dua e kila vakaidina na kena gauna—me vaka ga nona sega ni kila vakaidina e dua na tina na gauna ena sucu kina na luvena.

• Kerei ira na gone me ra tukuna e dua na gauna era a vakavakarau tiko kina ki na dua na ilakolako se soqo. Na cava era a cakava me ra vakavakarau kina? Kauta mai e dua na kato ni isulu se katotuberi ka me ra vakatayaloyalotaka na gone ni ra sa vakasosolo ki na dua na ilakolako se dua na soqo. Vakamacalataka ni da vakarautaki Jisu Karisito ena nona lako tale mai ena noda masu, wilika na ivolanikalou, muria na parofita, ka buladodonu e veisiga. Kerei ira na gone me ra droinitaka na iyaloyalo ni ivakarau era rawa ni cakava kina oqo ka biuta ena nodra kato ni sulu.

• Wilika na 1 Cesalonaika 5:6 vei ira na gone ka vakamacalataka ni kevaka eda sega ni vakarautaka tiko na lesu tale mai i Jisu, ena vaka ni da sa mocelutu ka da na sega ni vakarau tu Vua. Sureti ira na gone me ra vakatayaloyalotaka ni ra sa moce. Vakamacalataka ni kevaka eda vakarau tu, ena vaka ni da sa yadra ka waraki Koya tiko. Sureti ira me ra yadra mai. Lagata vata “When He Comes Again” (Children’s Songbook, 82–83).

2 Cesalonaika 2:1–3

E vakavulica o Paula ni na yaco na vukitani ni se bera ni lako tale mai o Jisu Karisito.

A mani yaco na vukitani ki na Lotu a tauyavutaka o Jisu Karisito, sa kena ibalebale ni sa kau tani mai vuravura na lewa ni matabete kei na dina ni kosipeli. A parofisaitaka o Paula ni vukitani oqo, se na “lutu tani,” ena yaco ni se bera na iKarua ni Lako mai ni iVakabula.

iTaviqaravi e Rawa ni Caka

• Ni wili oti na 2 Cesalonaika 2:3 vata kei ira na gone, tara e dua na vale cecere mai na bilo palasitika se buloko. Tukuna vei ira na gone ni bilo se palasitika e matataka na veitiki bibi ni Lotu Dina, me vaka na dina vakosipeli, na matabete, na veivauci ena valetabu, kei ira na parofita. Ni sa mate o Paula kei ira na vo ni iApositolo, era sa yali na veika oqo, ka sa yali mai vuravura ena vuqa na yabaki na Lotu dina. Sureta e dua na gone me vakabalea na valececere, ka vakamacalataka ni sa vakatokai oqo na Vukitani se “lutu tani.” Ni sa kauta lesu mai na Nona Lotu o Jisu Karisito, e a vakatokai na Veivakalesuimai. Raica na “Vukitani,” Tudei ena Vakabauta, 13–14.)

• Vakaraitaka e dua na iVola i Momani kei na iyaloyalo ni parofita kei na valetabu. Sureti ira na gone me ra kaya “Vukitani” ni o vunitaka na iyaya ena dua na katotuberi kei na “Veivakalesuimai” ni o kauta tale mai tuba na iyaya.

• Lagata na sere e vakavuvulitaka na dina era a kau tani ena Vukitani ka vakalesui mai ena noda gauna oqo, me vaka na “Au Luve ni Kalou,” “The Church of Jesus Christ,” kei na “I Love to See the Temple” kei na (Children’s Songbook, 2–3, 77, 95).

Vakavulica na iVunau

Gone Qase Cake

1 Cesalonaika 5:1–6

Niu muria na ivunau ni Kalou, au sa na tuvakarau ki na ikarua ni Lako Mai i Jisu Karisito.

Na ivakasala nei Paula sa rawa ni vukei keda me da tuvakarau ka yadrava toka na siga levu koya ena lako tale mai kina ki vuravura na iVakabula.

iTaviqaravi e Rawa ni Caka

• Sureta e dua na gone me wilika na 1 Cesalonaika 5:1–6 ni ra vakamuria toka na vo ni gone. Ni oti na veitikina yadua, kerea e dua na gone me vakalekalekataka na cava e nanuma ni tukuna tiko na tikina oya. O na vinakata beka mo vakamacalataka ni “siga ni Turaga” e kena ibalebale na iKarua ni Lako Mai i Jisu Karisito. Cava na vuna era nanuma kina na gone ni sa vakatauvatani na iKarua ni Lako Mai kivua e dua na daubutako ena bogi se dua na yalewa sa vakarau vakasucu?

• Tukuna vei ira na gone me ra raitayaloyalotaka ni na veisiko mai ki na nomu kalasi na iVakabula ena dua na gauna nikua. Me da na vakarautaka beka vakacava na noda valenivuli ki na Nona veisiko mai? Vukei ira na gone me ra vakasamataka na veika eso eda rawa ni cakava me da vakarautaki keda kina ki na siga ena lesu tale mai kina o Jisu Karisito. Me ivakaraitaki, e rawa ni da veivutuni, veivosoti, vakavinakata noda veiwekani vakamatavuvale, muria na parofita, ka rokova na noda veiyalayalati. Vakayaloqaqataki ira na gone me ra digitaka e dua na ka era na cakava me ra vakarautaki ira kina ni ciqoma na iVakabula ena Nona Lako Mai.

2 Cesalonaika 2:1–3

E vakavulica o Paula ni na yaco na vukitani ni se bera ni lako tale mai o Jisu Karisito.

Kevaka era sa kila na gone ni a kautani mai vuravura ena Vuki Tani Levu na Lotu i Jisu Karisito kei na Nona kosipeli, ena matata cake vei ira na veiganiti ni Veivakalesuimai.

iTaviqaravi e Rawa ni Caka

• Sureta e dua vei ira na gone me wilika na 2 Cesalonaika 2:1–3. Mai na veitikina oqo, na cava e dodonu me yaco ni bera “na siga i Karisito,” ka kena ibalebale na iKarua ni Lako Mai? E dua beka vei ira na gone e kila na ibalebale ni “dua na lutu tani”? Vakadeitaka me ra kila na gone ni sa kena ibalebale na Vukitani Levu, ka a yaco ni oti na nodra vakamatei na iApositolo ni iVakabula. O na gadreva beka mo wasea na itukutuku mai na “Vukitani,” Tudei ena Vakabauta, 13–14.

• Vukei ira na gone me ra vola ena papa eso na dina kei na veivakalougatataki eda marautaka baleta na kosipeli. (Eso beka na kena ivakaraitaki e rawa ni oka kina na valetabu, parofita, na matabete, kei na isolisoli ni Yalo Tabu.) Bokoca laivi yadua na veika oqo, ka tarogi ira na gone se na duatani vakacava na nodra bula kevaka e sega na veika oqo. Vakamacalataka ni dina eso oqo era a yali ena Vukitani Levu. Cava na vuna bibi me vakalesui tale mai kina ki vuravura na Lotu i Jisu Karisito ena gauna oqo? Sureti ira na gone me ra “vakalesuya mai” se vola tale na dina kei na veivakalougatataki eso ena papa.

2 Cesalonaika 3:7–13

E vinakata na Tamada Vakalomalagi meu cakacaka.

O na rawa ni vukei ira vakacava na gone me ra raica na cakacaka me dua na veivakalougatataki, sega ni dua na ka me levei?

iTaviqaravi e Rawa ni Caka

• Sureti ira na gone me ra veivukevuke ni wilika na veitikina mai na 2 Cesalonaika 3:7–13 ka vaqara na leqa era a sotava voli na Yalododonu. Cava na vuna e vinakata kina na Tamada Vakalomalagi me da cakacaka? Na cava ena yaco kevaka eda sega ni vulica me da cakacaka vakaukauwa? Me ra veivukevuke na gone ni matanataka na veicakacaka rawarawa ni ra vakilakila na vo ni gone se cava era cakava tiko.

• Sureti ira na gone me ra tukuna e dua na gauna era a cakacaka kina vakaukauwa ena dua na itavilesi, cakacaka, se dua na takete. Na cava era nanuma me baleti ira ena gauna era sa oti kina? Na cava na kena ibalebale “me da kakua ni oca ena cakacaka vinaka”? (2 Cesalonaika 3:13).

Vakauqeta na Vuli e Vale

Sureti ira na gone me ra tukuna ki na dua na lewe ni matavuvale se itokani e dua na vuna era vakavinavinakata kina ni sa tu vei keda e vuravura nikua na kosipeli (na tabana ni itaviqaravi ena macawa oqo sa rawa ni vukei ira ni nanuma).

Vakatorocaketaki Noda Veivakavulici

Tokoni ira na itubutubu ni gone. “Era sa qasenivuli ni kosipeli bibi duadua na itubutubu kivei ira na luvedra—sa nodra ruarua na itavi bibi kei na kaukauwa levu duadua me ra vakayarayarataka na luvedra (raica Nai Vakarua 6:6–7). Ni o vakavulici ira na gone ena lotu, vakasaqara ena masumasu na sala eso me ra tokoni kina nodra itubutubu ena nodra itavi bibi” (Veituberi ena iVakarau ni iVakabula, 25).