tucake tu e tautuba ni valetabu e tolu na marama

28 ni Okotova–3 ni Noveba

1 kei na 2 Timoci; Taito; Filimoni

“Mo Nodra iVakarau Era sa Vakabauta”

Vulica ena masumasu na 1 kei na 2 Timoci; Taito; kei na Filimoni mo vulica na ivakavakayagataki ni veivola oqo mo dusimaki ira na gone ena buladodonu (raica na 2 Timoci 3:16).

Vola na Veika o Uqeti Kina

ivakatakilakila ni veiwasei

Sureta na Veiwasei

Kerei ira na gone me ra veitalanoataka e dua e “ivakaraitaki ni vakabauta” vinaka vei ira. Na cava era sa cakava tiko me ra ivakaraitaki vinaka kina vei ira na tani?

ivakatakilakila ni veivakavulici

Vakavulica na iVunau

Gone Sobu

1 Timoci 3:1–2; Taito 1:7–9

O ira na bisopi era liutaka na tabanalevu vakaitalai ni Kalou.

E vakavulici rau o Timoci kei Taito o Paula me baleta na bibi ni bisopi. O na vakavulica vakacava vei ira na gone na ka e dau cakava na bisopi? (Na peresitedi ni tabana e sa vakatauvatani ki na dua na bisopi.)

iTaviqaravi e Rawa ni Caka

• Droinitaka e dua na iyaloyalo rawarawa ni nomu bisopi ena papa. Kerei ira na gone me ra vakayacana eso na ka era kila me baleta na bisopi. E vakacava tu beka o koya? Na cava dau cakava o koya? E vakalougatataka vakacava o koya na tabanalevu? (E rawa ni o kunea eso na itovonibula vakabisopi ena 1 Timoci 3:1–2 kei na Taito 1:7–9.) Ni ra wasea na gone na nodra vakasama, vola ena veitiki ni pepa ka me ra biuta na gone ena papa ena yasa ni droini.

  vosa tiko o bisopi vua e dua na cauravou ena nona valenivolavola

  Era kacivi na bisopi me ra veidusimaki vakayalo vei ira na lewe ni tabanalevu.

• Vola na itavi ni dua na bisopi ena veitiki ni pepa—me vaka na ciqomi ni ikatini kei na isolisoli ni lolo, veikacivi, veivakatarogi ni lewenilotu, vukei ni dravudravua kei na vakaleqai, kei na nodra masulaki na tani. Biuta na veitiki ni pepa ena dua na bilo, ka sureta na gone yadua me tomika e dua. Qai vukea na gone me matanataka vata kei iko na itavi eso oqo. Wasea na nomu ivakadiandina ni o nomu bisopi e sa kacivi mai vua na Kalou.

• Sureti ira na gone me ra droinitaka e dua na iyaloyalo ni bisopi ni qaravi ira tiko na lewe ni tabanalevu. Vakatura me ra solia vua nodra droini me nodra vakavinavinaka. Na cava eda rawa ni cakava meda vukei koya?

1 Timoci 4:12 .

Au sa rawa ni nodra “ivakaraitaki o ira na vakabauta”.

Na cava o rawa ni cakava mo vakauqeti ira kina na gone me ra yalodei ena nodra rawa ni “ivakaraitaki o ira era vakabauta”?

iTaviqaravi e Rawa ni Caka

• Lagata vata kei ira na gone na “Do as I’m Doing” (Children’s Songbook, 276). Kerei ira na gone me ra muria nomu ivakaraitaki ena nodra cakava na ivukivuki o cakava. Me ra veivukevuke na gone ena nodra liutaki na vo ni kalasi me ra muria nodra ivukivuki. Wilika na 1 Timoci 4:12, ka tarogi ira na gone na cava era rawa ni cakava me ra ivakaraitaki vinaka kina vei ira na tani.

• Wasea e dua na gauna o a tovolea kina mo ivakaraitaki vinaka vua e dua se ni a ivakaraitaki vinaka vei iko e dua. Vukei ira na gone me ra kila ni gauna era sa ivakaraitaki vinaka kina, sa rawa ni ra vukea na nodra lewe ni matavuvale kei na itokani.

2 Timoci 3:14–17

Ena vukei au na ivolanikalou ni vulica na dina.

Kevaka o rawa ni vukei ira na gone ni vulica me ra taleitaka na ivolanikalou, ko na vakalougatataka na nodra bula ena veitabayabaki muri mai.

iTaviqaravi e Rawa ni Caka

• Vakaraitaka e dua na ituvani ni ivolanikalou, ka vukei ira na gone me ra vakamatautaki ira kina ni vakaraitaki vei ira na tabana ni ulutaga ni iVolatabu, na iVola i Momani, na Vunau kei na Veiyalayalati, kei na Mataniciva Talei. Sureta e dua na gone me taura tu na ivola eso oqo ni o wilika na 2 Timoci 3:15–17. Vakamacalataka ni sa dau vakaroti ira na parofita ena veigauna taucoko ni itukutuku makawa na Tamada Vakalomalagi me ra vola na ka dina sa vakatakila vei ira o Koya. E rawa ni da vulica na veidina oqo ni da wilika na ivolanikalou.

• Kerei ira na gone me ra veivosakitaka na ka talei duadua era taukena. Na cava era cakava vata kaya? Me ra veivukevuke ni taura tu na ivolanikalou ka cereka vakamalua na veitabana. Na cava eda vakayagataka kina na ivolanikalou? Na cava na vuna me da qarauni ira vakavinaka kina? Vukei ira na gone me ra bulia eso na matanimeke me sala vata kei na sere baleta na ivolanikalou, me vaka na “Search, Ponder, and Pray” se “Book of Mormon Stories” (Children’s Songbook, 109, 118).

ivakatakilakila ni veivakavulici

Vakavulica na iVunau

Gone Qase Cake

1 Timoci 4:12 .

Au sa rawa ni nodra “ivakaraitaki o ira na vakabauta”.

A se gone sara o Timoci me dua na iliuliu ni Lotu, ia a vinakata o Paula me kila ni se rawa tikoga vua me dua na ivakaraitaki. O rawa ni vukei ira na gone o vakavulica me ra yalodei ena nodra rawa ni vakarautaka e dua na ivakaraitaki vinaka.

iTaviqaravi e Rawa ni Caka

• Wilika vata na 1 Timoci 4:12, ka kerei ira na gone me ra vaqara e ono na sala e tukuna o Paula ni rawa me da kedra “ivakaraitaki o ira na vakabauta.” Wasei ira yarua na gone, ka sureta na isa yadua me ra vakasamataka e dua na ituvaki era na rawa ni nodra ivakaraitaki kina na vakabauta. Sureti ira me ra matanataka na nodra ituvaki vei ira na vo ni kalasi.

• Tarogi ira na gone kevaka era vinakata me ra wasea e dua na gauna era a tovolea kina me ra ivakaraitaki vinaka vei ira na tani. Tukuna vei ira na ivakarau era sa ivakaraitaki ni vakabauta tiko kina vei iko kei na ivakarau o siqemi ira kina ni tutuvaka tiko na ivakaraitaki vinaka vei ira na tani.

1 Timoci 6:7–12

Sa dodonu meu lomana vakalevu cake na veika tawamudu mai na ilavo.

Ena dua na vuravura sa levu cake tikoga na kena vakaliuci na veika vakayago, o na vukei ira vakacava na gone me tudei na nodra vakanamata kei na loloma vua na Tamada Vakalomalagi kei Jisu Karisito?

iTaviqaravi e Rawa ni Caka

• Sureti ira na gone me ra tukuna se cava era na volia kevaka e tu vei ira na ilavo kece e vuravura. Sureta e dua na gone me wilika na 1 Timoci 6:7–12, ka kerei ira na vo ni gone me ra vakalekalekataka na ka a vakavulica o Paula vei Timoci me baleta na ilavo. Qai sureti ira na gone me ra wilika tale na veitikina oqori, ka vaqara na veika e tukuna o Paula ni yaga cake mai na ilavo.

• Tuva na iyaloyalo eso ni veika vakavuravura (me vaka na ilavo, iyaya ni vakatatalo, se ka ni veivakamarautaki) kei na veika tawamudu (me vaka na matavuvale se valetabu). Sureti ira na gone me ra wasea ena rua na ibinibini na iyaloyalo—na veika e kauti keda vakavoleka vei Karisito kei na veika e rawa ni kauti keda tani mai vei Karisito kevaka eda lomani ira vakalevu cake mai na noda lomani Koya. Na cava na vuna sa “vu ni ka ca kecega [kina] na lomana na ilavo”?

 2 Timoci 3:14–17

Sa solia vei keda na ivolanikalou na Tamada Vakalomalagi me vukei keda ni kila na dina mai na cala.

Era rawa ni vakila na gone na veivakalougatataki ena wiliki ni ivolanikalou. Ni o vakavulici ira na gone ena ivolanikalou, raica na sala eso mo vakayaloqaqataki ira kina me ra vakila vakaukauwa vakaiira na vosa ni Kalou.

iTaviqaravi e Rawa ni Caka

• Sureti ira na gone me ra wilika na 2 Timoci 3:15–17. Kauta mai e dua na iyaloyalo ka vakaraitaka e dua na italanoa mai vei ira yadua na va na ivola tudei, ka biuta na iyaloyalo ena dua na kateni ubi. Sureta e vica na gone me ra digitaka e dua na iyaloyalo ka tukuna na italanoa. Tarogi ira na gone kevaka e rawa ni ra wasea e dua tale na ka baleta na ivola oya ni ivolanikalou. E “vakavukui [keda] rawa me da bula” vakacava na ivolanikalou?

• Sureti ira na gone me ra wasea nodra tiki ni ivolanikalou taleitaki se dua na ka era sotava e sa vukei ira kina na dina ena ivolanikalou. O na vinakata beka mo wasea na nomu tikina vakaiiko se na ka o sotava.

• Kerea e dua na gone me wilika na Moronai 10:4–5. Na cava e yalataka o Moronai ena veitikina oqo? Tarogi ira na gone na cava era sa cakava me ra rawata e dua na ivakadinadina ni sa dina na ivolanikalou. Sureti ira me ra wilika se vakarorogo wasoma ki na ivolanikalou.

ivakatakilakila ni vuli

Vakauqeta na Vuli e Vale

Sureti ira na gone me ra wasea ki na nodra matavuvale na ka era sa vulica me baleta na ivolanikalou ka me ra vaqara e dua na tiki ni ivolanikalou era rawa ni wasea ki na kalasi ena macawa mai oqo (ena veivuke ni nodra itubutubu, ke gadrevi).

Vakatorocaketaki Noda Veivakavulici

Moica na itaviqaravi me sotava na gagadre. Mo kua ni raica na ituvatuva oqo ni ra sa idusidusi mo muria, vakayagataka ira vaka e dua na ivurevure ni vakasama me vakauqeti iko vakaiiko ni o vakananuma titobu na nodra gagadre na gone o vakavulica. O rawa ni moica na itaviqaravi me ra vakavulici na gone ena itabayabaki cavaga.

tabana ni itaviqaravi: na ivolanikalou e vakavulica vei keda na dina