Karisito tucake tu kei na dua na goneyalewa kei na dua na turaga

Na iBotani mai Kiliati, mai vei Annie Henrie

4—10 ni Noveba

Iperiu 1–6

Jisu Karisito, “sa Vakavuna na Bula Tawamudu’’

Na dina cava o kunea ena Iperiu 1–6 o vakauqeti mo vakavulica vei ira na gone? Vakarogoca na veivakauqeti ni Yalo e yaco mai ni o vakavakarau, ka raica mo vola.

Vola na Veika o Uqeti Kina

ivakatakilakila ni veiwasei

Sureta na Veiwasei

Era a ciqoma beka na gone na veisureti ena mua ni lesoni ena macawa sa oti me ra raica e dua na tiki ni ivolanikalou e rawa ni ra wasea? Ke vakakina, solia vei ira na gauna me ra wasea. Kevaka e sega, vukei ira me ra vakasamataka e dua na ka era se qai vulica walega oqo ena ivolanikalou e rawa ni ra wasea.

ivakatakilakila ni veivakavulici

Vakavulica na iVunau

Gone Sobu

Iperiu 1:2–10; 2:8–10, 17–18

Au vakabauti Jisu Karisito.

Na veitikina oqo e rawa ni vukei ira na gone me ra vulica e levu na ka me baleti Jisu Karisito ka vaqaqacotaka na kedra isema Vua.

iTaviqaravi e Rawa ni Caka

• Ena nomu vosa ga, vola ena tikinipepa na dina baleti Jisu Karisito o kunea ena Iperiu 1:2–10; 2:8–10, 17–18, ka vunitaka wavoki ena rumu. Sureti ira na gone mera raica na veitiki ni pepa. Vukei ira me ra wilika na dina e volai ena pepa, ka veivosakitaka na ibalebale ni dina oqo. Kevaka e ganita, vakamacalataka ni vakatokai o Jisu me Luve ni Kalou baleta ni o Tamada Vakalomalagi na tama ni Yalona kei na Yagona.

• Veisoliaka wavoki ena rumu e dua na iyaloyalo ni iVakabula, ka me ra wasea na gone yadua na vuna e vakavinavinakataki Jisu Karisito kina ena gauna e taura tiko kina na iyaloyalo.

Iperiu 3:8

E vinakata na Tamada Vakalomalagi me da “kakua ni vakaukauwataka na [yaloda].”

Na Iperiu 3 e solia na kedra ivakaraitaki na Isireli ni ra vakaukauwataka na yalodra ka sega ni vinakata na veivakalougatataki ni Turaga. Sa ivakasala talega vei keda kece sara me da kakua ni vakaukauwataka na yaloda.

iTaviqaravi e Rawa ni Caka

• Kauta mai e dua na sipaji (se isulu ni masiyaya) kei na dua na vatu ki na kalasi. Sureti ira na gone me ra tara na iyaya oqori ka vakamacalataka se vakacava na ka era vakila. Sova kina e vica na ituruwai, ka dusimaka ni levu na wai e curuma na sipaji mai na vatu. Vakamacalataka ni gadrevi me malumalumu na yaloda me rawa ni da ciqoma kina e levu na dina ni Tamada Vakalomalagi ki yaloda.

• Kotiva e dua na ibulibuli ni uto mai na dua na ka malumu, me vaka na isulu, kei na dua na ka kaukauwa, me vaka na kateni. Tukuna vei ira na gone ni gauna eda vakarorogo ka talairawarawa kina e malumalumu na yaloda ia na gauna eda sega ni vakarorogo ka talairawarawa kina e kaukauwa na yaloda. Ena nomu vosa ga, wasea eso na ivakaraitaki mai na ivolanikalou baleti ira na tamata a malumalumu na yalodra se yalo kaukauwa (me vakataki Nifai, Leimani, kei Lemueli [1 Nifai 2:16–19], Paula [Cakacaka 9:1–22], se Josefa Simici [Josefa Simici—Ai Tukutuku 1:11–20]). Ni o wasea na ivakaraitaki yadua, sureti ira na gone me ra dusia na yalo malumalumu se na yalo kaukauwa.

Mosese ni tabaka tiko na tacina o Eroni

Kacivi Eroni ki na Cakacaka o Mosese, mai vei Harry Anderson

Iperiu 5:4

Era sa kacivi mai vua na Kalou na Matabete.

Na Iperiu 5:4 e dua na tikina bibi baleta ni vakamatatataka ni o ira na matabete—kei ira tale eso era veiqaravi ena Lotu—e dodonu me ra kacivi mai vua na Kalou.

iTaviqaravi e Rawa ni Caka

• Wilika na Iperiu 5:4 vei ira na gone. Kerea e dua na matabete me vakamacalataka na cava na matabete ka wasea na veika sa sotava ena nona ciqoma na matabete.

• Vukei ira na gone me ra cavuqaqataka na veimalanivosa mai na ikalima ni yavu ni vakabauta. Wasea nomu ivakadinadina ni o ira na tamata era kacivi me ra cakava na cakacaka ni Kalou era kacivi mai vua na Kalou ena ivakatakila.

ivakatakilakila ni veivakavulici

Vakavulica na iVunau

Gone Qase Cake

Iperiu 1:2–10; 2:8–10, 17–18

Au vakabauti Jisu Karisito.

A volai na iVola vei ira na Iperiu me vaqaqacotaka nodra vakabauti Jisu Karisito na Yalododonu mai Iperiu. E rawa ni vakakina vei ira na gone o vakavulica.

iTaviqaravi e Rawa ni Caka

• Lesia vei ira yadua na gone e vica na tikina ena Iperiu 1:2–10; 2:8–10, 17–18, ka sureti ira na gone me ra vakasaqara ena veitikina oqori na dina me baleti Jisu Karisito. Kerei ira me ra wasea se vola ena papa na veika era sa raica rawa. Na cava tale era kila me baleti Jisu Karisito? E rawa ni ra raica beka na gone eso na vakasama ena sere me vaka “Au sa Kila ni Bula Tu” (Serenilotu, naba. 136) se “He Sent His Son” (Children’s Songbook, 34–35).

• Sureti ira na gone me ra droinitaka na kedra iyaloyalo vata kei ira nodra itubutubu. Kerei ira me ra wasea na veika era tautauvata kina kei ira nodra itubutubu. Vakamacalataka ni kena tukuna na Iperiu 1:3 ni o Jisu Karisito “na iyaloyalo ni nona itovo [na Kalou],” sa kena ibalebale ni o Jisu kei Tamada Vakalomalagi e tautauvata na veika vinaka kei na itovonibula e tu vei rau. Vakadinadinataka ni da na vulica na veika baleti Tamada Vakalomalagi ena noda vulica na veika baleti Jisu Karisito ka muria.

• Vukei ira na gone me ra vakasamataki ira na tamata e rawa ni ra wasea vei ira na nodra ivakadinadina kei Jisu Karisito. Vakasamataka mo sureti ira me ra vakatovotovotaka na veiwasei era na tukuna vei ira oqori baleti Jisu.

Iperiu 3:7–19.

Me da ciqoma na veituberi kei na veivakalougatataki nei Tamada Vakalomalagi, sa dodonu “me da kakua ni vakaukauwataka na [yaloda].”

Ena Iperiu 3, e vakayagataki na kedra italanoa na Isireli ena lekutu me vakavulici kina na kena bibi me da kakua ni vakaukauwataka na yaloda. O rawa ni vakayagataka vakacava na italanoa oqo mo vakavulici ira kina na gone ena nomu kalasi na ivakavuvuli oqo?

iTaviqaravi e Rawa ni Caka

• Kerei ira na gone me ra vakasamataka na veika e kaukauwa ka malumu. (O na gadreva beka mo kauta mai eso na sabolo mo vakaraitaka vei ira.) Wilika vata na Iperiu 3:8. Na cava na ibalebale ni yalo kaukauwa? Na cava e vinakata kina na Kalou me malumalumu na yaloda?

• Ena nomu vosa ga, wasea na italanoa baleti ira na Isireli ena nodra vakaukauwataka na yalodra vua na Turaga ena lekutu (raica Na Tiko Mai na Lekutu 14:1–12; Iperiu 3:7–19). Me ra matanataka na gone na italanoa. Na cava ena yaco kevaka eda vakaukauwataka na yaloda vua na Turaga kei na Nona kosipeli?

• Sureti ira na gone me ra wilika na Maciu 13:15; Iperiu 3:15; Mosaia 11:29; kei na Mosese 6:27. Kerei ira me ra droinitaka ena papa na veitiki ni yago e cavuti ena veitikina oqo. Na cava na ibalebale ni daliga didivara, mataboko, kei na yalo kaukauwa vakayalo? Me da vakadeitaka beka vakacava ni sa vakarau tu na daligada, matada, kei na yaloda me ciqoma na veivakalougatataki ni Kalou?

Iperiu 5:1–4.

Era sa kacivi mai vua na Kalou na matabete.

Na Iperiu 5 e vakarautaka e dua na madigi me veitalanoataka se cava na matabete—na mana kei na dodonu me ia na cakacaka ena yaca ni Kalou—kei na ivakarau e ciqomi kina. Ena yaga vakalevu cake oqo vei ira na gonetagane era sa vakarau tiko me ra tabaki ki na matabete.

iTaviqaravi e Rawa ni Caka

• Vakaraitaka na iyaloyalo Solia o Mosese vei Eroni na Matabete (iVola ni Yaloyalo Vakosipeli, naba 15) ni wilika e dua na gone na Iperiu 5:4. Ena veivuke beka me vakamacalataki ni nona sa mai matai ni tamata o Eroni me ciqoma na Matabete i Eroni, sa mani vakayacani kina vua. Vukei ira na gone me ra vakasamataka na itavi era dau qarava na Matabete i Eroni (me vaka na veipapitaisotaki, vakalougatataka ka veisoliyaka na sakaramede, ka sureti ira na tamata me ra lako vei Karisito).

• Vukei ira na gone me ra vakasamataka na sala duidui eso era ciqoma kina na tamata na veivakadonui. Kena ivakaraitaki, e ciqoma vakacava na veivakadonui na qasenivuli, vuniwai, se iliuliu vakapolitiki? E dau solia vakacava na Kalou na Nona veivakadonui? Sureti ira na gone me ra vakasamataka na taro oqo ni ra wilika na Iperiu 5:4 kei na ikalima ni yavu ni vakabauta.

ivakatakilakila ni vuli

Vakauqeta na Vuli e Vale

Sureti ira na gone me ra wasea e dua na ivolanikalou, sere, se itaviqaravi era vulica ena kalasi nikua vata kei ira nodra matavuvale ena lotu vakamatavuvale.

Vakatorocaketaki Noda Veivakavulici

E rawa ni ra kila na gone na veivakayarayarataki ni Yalo. Vakavulica vei ira na gone ni yalo vakacegu, loloma, kei na lomavinaka e tiko vei ira ni ra tukuni se lagati Jisu Karisito kei na Nona kosipeli e sa vakavuna na Yalo Tabu. Na veiyalo oqo sa rawa ni tara cake na nodra ivakadinadina.

tabana ni itaviqaravi: E tiko na noqu ivakadinadina kei Jisu