Eparaama ena Buca ko Mamire, mai vei Grant Romney Clawson.

18–24.ni Noveba

Jemesa

“Dou Muria na Vosa ka Kakua ni Rogoca Walega”

Na iVola i Jemesa e levu tu kina na dina ka rawa ni vakalougatataka nodra bula na gone o vakavulica. Muria na Yalo mo lewa rawa kina na dina cava soti o na wasea vei ira. E rawa talega ni veivuke na vakasama eso ena ituvatuva oqo.

Vola na Veika o Uqeti Kina

Sureta na Veiwasei

Sureti ira na gone me ra wasea e dua na ivakavuvuli ni kosipeli era nanuma ni ra a vulica kei na nodra matavuvale ena macawa sa oti se ena kalasi ni Lalai ena Sigatabu sa oti. Ni ra sa veiwasei oti na gone yadua, sureta e dua tale na gone ena kalasi me semata vakalekaleka na veika a wasei.

Vakavulica na iVunau

Gone Sobu

Jemesa 1: 5–6

Au rawa ni kerea vua na Tamada Vakalomalagi me vukei au ni vulica na ka dina.

Vukei ira na gone o vakavulica me ra kila ni rawa ni ra gole vua na Tamada Vakalomalagi me baleta na yalomatua. Ni ra vakayacora vakakina era na vakalougatataki vakalevu ni ra sotava na taro dredre.

iTaviqaravi e Rawa ni Caka

• Vukei ira na gone me ra vulica na malanivosa “Kevaka e dua vei kemudou sa lailai vua na vuku, me kerea vua na Kalou” (Jemesa 1:5). Me da na vakataroga vakacava na Kalou? E sauma tiko beka mai vakacava o Koya noda taro?

• Vakaraitaka e dua na iyaloyalo ni iMatai ni Raivotu (iVola ni Yaloyalo Vakosipeli, naba 90), ka wasea na sala a vakauqeti kina o Josefa Simici me kerea na veivuke ni Tamada Vakalomalagi ena dua na taro mai na wiliki ni James 1:5 (raica na Josefa Simici—Ai Tukutuku 1:1–15). Wasea na nomu ivakadinadina ni dau sauma na masu na Kalou, ka vakadinadinataka ni rawa vei ira na gone me ra masuti Koya ni ra lomatarotaro. Me ra droinitaka na gone nodra dui iyaloyalo kei Josefa Simici ni wilika na Jemesa 1:5 ka masuta tiko na Tamada Vakalomalagi.

Jemesa 3:1–13

Au rawa ni tukuna na veika vinaka.

Me vaka a vakadinadinataka o Jemesa, na vulici ni kena tukuni duaduaga na veika vinaka vei ira na tani ena vukei keda me da vakataki Jisu Karisito (raica na Jemesa 3:2).

iTaviqaravi e Rawa ni Caka

• Kauta mai e dua na ka kamikamica kei na dua na ka wiwi me ra tovolea na gone. Vukei ira me ra kila ni sa dodonu me da vakayagataka na yameda me da tukuna na ka kamica (se vinaka) eso ka sega ni tukuna na ka wiwi (se sega ni vinaka) eso (raica na Jemesa 3:10). Vukei ira ni vakasamataka na ivakaraitaki ni veika vinaka eda rawa ni tukuna vei ira na tani.

• Solia vei ira yadua na gone e dua na droini rawarawa ni dua na tamata e vosa tiko. Sureti ira na gone me ra taura cake tu ni o tukuna e dua na ka vinaka e rawa ni da cakava ena yameda (me vaka na tukuni ni dina, veivakacaucautaki, kei na lomasoli ni vukea e dua) ka biuta sobu ni o tukuna e dua na ka e sega ni dodonu me da cakava ena yameda (me vaka na vosa lasu, vosa vakacacani ira na tani, kei na talidredre vua e dua na itubutubu).

• Tokona na itukutuku ena Jemesa 3:1–13 ena lagati vata ni dua na sere baleta na yalovinaka, me vaka na “Kindness Begins with Me” (Children’s Songbook, 145). Vakatura me ra cakava na gone e dua na “tavaya ni yalovinaka” e rawa ni ra vakatawana ena qereqere lalai se so tale na ka lalai ena gauna ga era tukuna kina e dua na ka vinaka vua e dua.

Jemesa 5:7–11

Eso na veivakalougatataki ni Kalou sa gadreva na vosota.

Na vosota e sega ni yaco ga mai vakataki koya, vakabibi vei ira na gone. Vakasamataka na ivakarau o rawa ni vakayagataka kina na ivakasala nei Jemesa me vukei ira na gone o vakavulica me ra vulica na vosota.

iTaviqaravi e Rawa ni Caka

• Vukei ira na gone me ra vakasamataka na gauna eso era a waraka tu kina e dua na ka era vinakata saraga vakaidina. Vakamacalataka ni noda waraka e dua na ka eda vinakata ka sega ni vosakudrukudrutaki sa vakatokai me vosota.

• Vakalekalekataka na Jemesa 5:7 ena nomu vosa ga, ka vakaraitaka e dua na iyaloyalo ni sorenitei se itei. Na cava na vuna eda gadreva kina na vosota ni da tea na kau eso? Na cava ena yaco kevaka eda via dreta na itei me totolo na kena tubu? Vakadinadinataka ni tu vua na Kalou e vuqa na veivakalougatataki me baleti keda, ia eso vei ira e gadreva na vosota.

• Wasea na italanoa kei Jope, ka tukuni ena Jemesa 5:11 me ivakaraitaki ni vosota (raica “Chapter 46: Job,” Old Testament Stories, 165–69, se na kena vidio ena LDS.org). A vakalougatataki vakacava o Jope ena nona vosota?

Vakavulica na iVunau

Gone Qase Cake

Jemesa 1: 5–6

Ena vukea au na Tamada Vakalomalagi ni vulica na dina kevaka au kerea na Nona veivuke.

E dina beka ni ra se gone o ira o vakavulica, era gone sobu ga ena vica na yabaki vei Josefa Simici ena gauna a wilika kina na Jemesa 1:5 ka sa vakauqeti me torova na Tamada Vakalomalagi ena masu. Vakasamataka na ivakarau o rawa ni vukei ira kina na gone o vakavulica me ra tara cake nodra vakabauta ni na vukei ira na Kalou ni lailai vei ira na vuku

iTaviqaravi e Rawa ni Caka

• Kerei ira na gone me ra tukuna vei iko na italanoa ni iMatai ni Raivotu nei Josefa Simici ena nodra vosa ga (raica na Josefa Simici—Ai Tukutuku 1:5–19; raica talega na vidio “Joseph Smith’s First Vision” ena LDS.org). A vukei Josefa vakacava na Jemesa 1:5 ? Vukei ira na gone me ra vakasamataka na nodra ivakaraitaki eso na tamata ena ivolanikalou ka ciqoma e dua na isau ni nodra masu (me vakataki Nifai [1 Nifai 11:1–6] kei na taci Jereti [Ica 2:18–3:9]). Na cava eso na ka eda rawa ni kerea vua na Tamada Vakalomalagi ena masu?

• Wilika vata kei ira na gone na Josefa Simici—Ai Tukutuku 1:10–14. Sureti ira na gone me ra vaqara na veika a cakava o Josefa me ciqoma na isau ni nona vakatataro. Me da na muria vakacava na ivakaraitaki nei Josefa Simici ni tiko na noda vakatataro?

Jemesa 1:22–27; 2:14–26

“Na vakabauta e sega ni cakacakataki, sa mate wale.”

O na vukei ira vakacava na gone me ra raica na isema ena maliwa ni ka era vakabauta kei na ka era cakava?

iTaviqaravi e Rawa ni Caka

• Vakaraitaka vei ira na gone e dua na cinalivaliva sega na kena batiri, dua na penikau sega na matana, se dua tale na ka e sega na betena se ka “mate.” Kerei ira na gone me ra wilika na Jemesa 2:14–17 Era vakaraitaka vakacava na dina na veiyaya oqo ena veitikina oqori?

• Sureti ira na gone me ra wilika galugalu na Jemesa 1:22–27; 2:14–26. Qai sureti ira me ra wasea na ka era rawa ni cakava me vakaraitaka ni ra dau muria na vosa. Vaka oqo, era kila beka e dua ka tauvimate tu se galili e rawa ni ra sikova, se rawa li ni ra yalataka me ra qarava vakalevu cake na nodra matavuvale? E rawa talega ni o vakananuma vei ira na vosa eso era sa rogoca beka ena soqoni ni sakaramede nikua. E rawa vakacava meda daumuria na veivosa oqo?

Jemesa 3:1–13

Au rawa ni qarauna na veika au tukuna.

Na vosa eda cavuta ni da veivosaki ena rairai sega beka ni bibi, ia me vaka e vakadinadinataka o Jemesa, sa rawa ni mana sara na kena veivakayarayarataki, ki na vinaka se na ca.

iTaviqaravi e Rawa ni Caka

• E tiko li e dua ena tabanalevu, de dua beka vei ira na gone o vakavulica, ka sa kila na nodra qaravi na ose se kila e dua na ka baleta na waqa? E rawa ni o sureti koya me solia eso na vakasama baleta na ivakavuvuli i Jemesa ena Jemesa 3:3–4 ena vakayagataki ni vosa vinaka, se vakarautaka ga eso na nomu vakasama vakaiiko. Na cava eda vulica baleta na qarauni ni yameda mai na ivakaraitaki eso oqo?

• Sureti ira na gone me ra wilika na Jemesa 3:1–13 ka droinitaka na iyaloyalo ni dua na ka era raica e vakavulica me baleta na qarauni ni yameda. Solia vei ira na gauna me ra wasea na nodra iyaloyalo kei na ka era vulica.

• Ni sa railesuvi vata kece na Jemesa 3:1–13 , railesuva na ivakatagedegede ni vosa ena iSakisaki ni iTabagone (20–21). Vukei ira na gone me ra vakasamataka e dua na ka e rawa ni ra cakava me vakavinakataka na ivakarau ni nodra vosa vei ira na tani, ka vakauqeti ira me ra tuva na nodra takete.

Vakauqeta na Vuli e Vale

Sureti ira na gone me ra masuta na Tamada Vakalomalagi ena dua na taro se tovolea me ra na vosota vakalevu cake ena macawa lako mai. Kerei ira me ra wasea na ka era sotava ena kalasi ka tarava.

Vakatorocaketaki Noda Veivakavulici

Vukei ira na gone me ra dauyavala. “Ni o vakavulici ira na gone, vakatarai ira me ra tara, droinitaka, rokataka, vola, ka bulia. Na veika oqo sa ra levu cake mai na itaviqaravi lasa eso—era sa yaga sara ki na vuli” (Veivakavulici ena iVakarau ni iVakabula, 25).