Vunau ena Vuravura ni Yalo na Karisito, mai vei Robert T. Barrett

25 ni Noveba–1 ni Tiseba

1 kei na 2 ni Pita

“Reki ena Marau Sega ni Tukuni Rawa ka Sinai ena Lagilagi”

Tekivuna nomu vulica na 1 kei na 2 ni Pita ena masu. Nanuma tiko na nomu vakavakarau vinaka duadua ni veivakavulici sai koya na veika o vakila mai na nomu vuli yadua kei na vuli vakamatavuvale.

Vola na Veika o Uqeti Kina

Sureta na Veiwasei

Vakaraitaka na iyaloyalo e kune ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale, ka sureti ira na gone me ra tukuna vei iko e dua na ka era kila me baleti Pita. Vakananuma vei ira ni o Pita a iliuliu ni Lotu ni oti nona tucake tale o Jisu, ka vakamacalataka ni 1 ni Pita kei na 2 ni Pita sai koya na nona ivola vei ira na lewe ni Lotu ena gauna oya.

Vakavulica na iVunau

Gone Sobu

1 Pita 1:6–7; 3:14

Au rawa ni mamarau ena veigauna dredre sara mada ga.

Vakasamataka na sala e rawa mo vakavulica kina na veitikina oqo ena ivakarau me vukea na gone me goleva na iVakabula ni sotava na dredre.

iTaviqaravi e Rawa ni Caka

• Sureti ira na gone me ra wasea na veika dredre a vosota o Jisu, me vaka nona vakamatei ena kauveilatai. Vakamacalataka ni da na sotava na gauna dredre ena noda bula. Wilika vata na 1 Pita 1:6–7; 3:14 , ka wasea e dua na gauna a “vakatovolei kina nomu vakabauta.” Se e rawa ni o wasea na masu ni Parofita o Josefa Simici ena valeniveivesu mai Lipati kei na vakacegu a solia vua na Kalou (raica na V&V 121:1–8; 123:17). Ena vukea vakacava noda kunea na marau ena gauna dredre na noda vakabauti Jisu?

  

  O Josefa Simici ena Valeniveivesu e Lipati, mai vei Greg K. Olsen

• Ni lagata vata e dua na sere ka vakavulica na ivakarau me da kunea kina na marau, me vaka na “I Will Follow God’s Plan” (Children’s Songbook, 164–65).

1 Pita 2:9–12

E vinakata na Tamada Vakalomalagi meu ivakaraitaki vinaka vei ira na tani.

E vakavuvulitaka o Pita ni o keda “na tamata ni Kalou” ka ni noda cakavinaka e rawa ni “vakalagilagi kina na Kalou.”

iTaviqaravi e Rawa ni Caka

• Vakamacalataka na veika e duatani mai na veika e tu vakavolivolita, se vakaraitaka na iyaloyalo ni veika oqori. Me vaka, na valetabu e duatani mai na veivale era wavolita se na ulunivanua e cecere cake mai na buca. Vakamacalataka ni gauna eda muria kina na ivunau, eda na duatani ka ra na raica na tamata na noda ivakaraitaki. Tukuna eso na “cakacaka vinaka” o sa raica ni ra cakava na gone. Vakamacalataka ni cakacaka vinaka vaqo e “vakalagilagi kina na Kalou”—era na vukei ira na tani me ra lomana vakalevu cake na Kalou ka gadreva me ra qaravi Koya.

• Vakacavara vata kei ira na gone na tabana ni itaviqaravi. Era vakalagilagia tiko vakacava na Kalou na tamata era raica ena iyaloyalo?

1 Pita 3:18–20; 4:6

O ira na yalo ena vuravura ni yalo era vulica me baleta na kosipeli.

Ni sa mate, a lako o Jisu ki na vuravura ni yalo ka talai ira na yalo buladodonu me ra vakavulici ira na yalo tale eso era se bera ni ciqoma na kosipeli.

iTaviqaravi e Rawa ni Caka

• Tukuna vei ira na gone me baleta e dua o kila ka sa mate. Vakamacalataka ni sa mate na tamata, sa biuta na yagodra na yalo ka lako ki na vuravura ni yalo. Wilika na 1 Pita 3:19 ka vakamacalataka ni gauna sa mate kina o Jisu, a laki sikova o koya na vuravura ni yalo. E kea, a kerei ira kina na yalo buladodonu me ra vakavulica na kosipeli vei ira na yalo tale eso era se bera ni ciqoma na kosipeli (raica na V&V 138:30).

• Tuva e dua na iyatu dabedabe ena lomadonu ni rumu me vaka na bai. Kerea eso na gone me ra tu ena dua na yasana me ra matataki ira na yalo ena vuravura ni yalo era a sega ni papitaiso ena nodra bula e vuravura. Solia vua e dua vei ira na vo ni gone e dua na ki pepa levu ka volai tu kina “papitaiso baleti ira na mate,” ka kerei koya me kauta tani na bai. Qai vakamacalataka ni o ira na lewe ni Lotu yabaki 12 lako cake e rawa ni ra lako ki na valetabu ka papitaiso ena vukudra na tubudra era a sega ni papitaiso e vuravura. Era na qai rawa ni ciqoma na tubudra oqo na kosipeli ena vuravura ni yalo.

• Vukei ira na gone me ra vakalewena e dua na vunikau ni matavuvale rawarawa (raica e dua na ivakaraitaki ena “Family History Coloring Pages,” LDS.org).

Vakavulica na iVunau

Gone Qase Cake

1 Pita 3:12–17; 4:13–14, 16

Au rawa ni kune marau kei na vakacegu ena veigauna dredre sara mada ga.

Era sa sotava beka na gone o vakavulica eso na iwalewale ni veisagai se veivakalialiai ena vuku ni ka era vakabauta. Na veitikina oqo e rawa ni vukei ira ena veigauna vakaoqori.

iTaviqaravi e Rawa ni Caka

• Vakalekalekataka e vica na italanoa kei Jisu ena nona vakacacani, se me ra wilika na gone—raica, me kena ivakaraitaki, Maciu 12:9–14 se Luke 22:47–54. Tarogi ira na gone kevaka era sa bau vakasagai se vakalialiai baleta ni ra bulataka na ivakavuvuli ni kosipeli. Ni qai wilika vata na 1 Pita 3:12–14; 4:13–14, 16, ka kerei ira na gone me ra vaqara na ka e tukuna o Pita baleta na “vakararawataki ena ivalavala dodonu.” Na cava na vuna e se rawa tikoga kina ni da marau ni ra vakalialiai keda eso na tamata ni da cakava na ka dodonu?

• Sureta e dua na lewe ni tabanalevu me wasea e dua na gauna a kunea tiko kina na reki se na vakacegu ena dua na veivakatovolei, se wasea na nona kunea na Parofita o Josefa Simici na vakacegu ena nona tiko e Valeniveivesu mai Lipati (raica na V&V 121:1–8; 123:17). Eda na kunea vakacava na marau kei na vakacegu ena gauna ni noda vakatovolei?

1  Pita 3:15

E dodonu meu dau tuvakarau e veigauna meu wasea na kosipeli.

Ena levu na nodra madigi na gone o vakavulica tiko me ra sauma na nodra taro na tamata me baleta nodra vakabauta ena gauna taucoko ni nodra bula. Vakasamataka na veika e rawa ni o cakava mo vukei ira me ra “dau tuvakarau kina e veigauna me ra sauma na taro.”

iTaviqaravi e Rawa ni Caka

• Tukuna e dua na gauna a tarogi iko kina e dua me baleta na Lotu, ka vakamacalataka se o vakila ni o sa tuvakarau mo sauma. Kerea vei ira na gone me ra tukuna e dua na gauna era tarogi ira kina na tamata me baleta na Lotu. Wilika vata na 1 Pita 3:15. Me da na muria vakacava na ivakasala nei Pita ena tikina oqo?

• Ena nodra veivuke na gone, vakasamataka e vica na taro e rawa ni ra taroga na tamata me baleta na ivakavuvuli ni Lotu. Me ra veivukevuke na gone ni vakamacalataka me ra sauma vakacava na taro eso oqo me rawa ni ra dau “tuvakarau tu kina e veigauna.”

1 Pita 3:18–20; 4:6

O ira na yalo ena vuravura ni yalo era vulica me baleta na kosipeli.

Vukei ira na gone me ra kila ni ra mate na yalododonu, era lako ki na vuravura ni yalo me ra vakavulica na kosipeli vei ira era a sega ni ciqoma ni ra tiko voli e vuravura.

iTaviqaravi e Rawa ni Caka

• Droinitaka ena papa e dua na iwirini ka dua na laini e lomadonu. Vola Parataisi ni Yalo ena dua na veimama kei na Valeniveivesu ni Yalo ena ikarua ni veimama. Sureta e dua vei ira na gone me wilika na 1 Pita 3:18–20; 4:6 (raica na 1 Pita 4:6, ivakamacala e ra a, baleta na veivakadodonutaki mai na iVakadewa nei Josefa Simici). Vakamacalataka ni gauna e mate kina o Jisu, a lako o Koya ki na parataisi ni yalo. A vakaroti ira na yalo buladodonu mai kea me ra vakavulica na kosipeli vei ira na yalo ena valeniveivesu.

• Sureta e dua na itubutubu se tacina qase e dua na gone me tukuna nona lako ki na valetabu ka laki cakava nona cakacaka e dua na tubuna.

• Sureti ira na gone me ra vakalewena e dua na vunikau ni matavuvale rawarawa (raica e dua na ivakaraitaki ena “Family History Coloring Pages,” LDS.org).

Vakauqeta na Vuli e Vale

Sureti ira na gone me ra wasea nodra vunikau ni matavuvale vei ira nodra lewe ni matavuvale ka kerei ira me ra veivuke ena vakacuru yaca kina.

Vakatorocaketaki Noda Veivakavulici

Vakasaqara mo kilai ira vinaka na gone o vakavulica. O sa kilai ira na gone o vakavulica, ia vakavouia na vakasama ena ituvatuva oqo ke gadrevi me sotavi na nodra gagadre. E rawa ni o vakayagataka na itaviqaravi e vakatututaki ena ituvatuva oqo, sega ni o koya ga e volai me baleta na itabayabaki o vakavulica. (Raica na Veivakavulici ena iVakarau ni iVakabula 7.)