“9–15 ni Tiseba Ai Vakatakila 1–11: ‘Na Lagilagi, kei na Kaukauwa, me Nona ga … na Lami ka Tawamudu’” Lako Mai, Mo Muri Au—Me Baleti Ira na Lalai: Veiyalayalati Vou 2019 (2019)
“9–15 ni Tiseba. Ai Vakatakila 1–11,” Lako Mai, Mo Muri Au—Me Baleti Ira na Lalai: 2019
Na iVakatawa ni Sipi Vinaka, mai vei Del Parson
9–15 ni Tiseba.
Ai Vakatakila 1–11
“Na Lagilagi, kei na Kaukauwa, me Nona ga … na Lami ka Tawamudu”
Na ivakatakarakara ena Ai Vakatakila e rawa ni dredre me ra kila na gone, ia e tu talega ena Vakatakila na ivunau bibi e totoka ka rawarawa.
Vola na Veika o Uqeti Kina
Sureta na Veiwasei
Sureti ira na gone me ra wasea se na vakacava na nodra nanuma kevaka era raici Jisu Karisito ena dua na raivotu. Vakamacalataka ena ivola ni Ai Vakatakila, a vakamacalataka kina o Joni e dua na raivotu ka raici Jisu kina kei na vuqa na veika bibi me baleta na veigauna sa oti kei na gauna se bera mai.
Vakavulica na iVunau
Gone Sobu
Au rawa ni sureti Jisu ena noqu bula.
Na vosa vakatautauvata baleti Jisu ni tucake tu e katuba ka tukituki tiko sa rawa ni vukei ira na gone me ra kila ni vinakata o Koya me voleka vei ira.
iTaviqaravi e Rawa ni Caka
-
Vakaraitaka na iyaloyalo ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale ka wilika na iVakatakila 3:20. Sureti ira na gone me ra raitayaloyalotaka ni a tukituki tiko ena katuba ni nodra vale o Jisu. Era na vakacurumi Koya beka yani ki loma? Na cava era nanuma ni na tukuna o Koya se cakava?
-
Sureti ira na gone me ra tukuna vei iko baleta na gauna eso era a waraka kina e dua me sikova na nodra vale ka nanamaki tu me ra raica. E bau vakacava tu na waraki ni tamata oya me tukituki ena katuba? E vakacava kevaka era sega ni vakacuruma mai loma na tamata oya? Wilika na iVakatakila 3:20, ka laiva me ra veivukevuke na gone ni taura tu na iyaloyalo kei Jisu ka vakatayaloyalotaka ni tukituki tiko e katuba. E rawa ni ra vakatayaloyalotaka na lewe ni kalasi kadua ni dolava na katuba. Na cava eda rawa ni cakava me voleka mai kina vei keda o Jisu, dina ga ni da sega ni rawa ni raici Koya? Vakasamataka mo solia vei ira yadua na gone e dua na iyaloyalo kei Jisu me ra kauta ki vale.
Sa kilikili duaduaga o Jisu Karisito me noqu iVakabula.
E vulica o Joni mai na nona raivotu ni o Jisu Karisito duadua ga (ka matataki ena dua na lami) sa rawa ni noda iVakabula ka vakataucokotaka na ituvatuva i Tamana (matataki ena ivola dregati).
iTaviqaravi e Rawa ni Caka
-
Ni se bera na kalasi, vaqara na iyaloyalo eso ka matataka na veivakalougatataki sa vakarautaki tu mai na Veisorovaki i Jisu Karisito (me vaka na valetabu, papitaiso, kei na matavuvale), biuti ira ena dua na ivola, ka ologa na ivola ena pepa se wa. Ni o vakayagataka e vica na malanivosa bibi mai na iVakatakila 5:1–10, vakamacalataka na raivotu a raica o Joni. Vakaraitaka na ivola vei ira na gone, ka tukuna vei ira ni sala duadua ga me dola kina na ivola sai koya me kune na iyaloyalo kei Jisu o sa vunitaka tu ena rumu. Ni ra sa kunea na iyaloyalo, dolava na ivola ka wasea vei ira na gone na iyaloyalo eso ena ivola. Vakadinadinataka ni iVakabula duadua ga sa rawa kina na veika kece oya.
-
Vakalekalekataka na raivotu e vakamacalataki ena iVakatakila 5:1–10, ka sureti ira na gone me ra matanataka na veika a vakila o Joni kei na so tale ena veitikina duidui ni raivotu. Me vaka, era na lasutaki tagi beka ni sega ni dua e rawa ni dolava na ivola, se era na kaila beka ni dolava na iVakabula.
Sa vukei au o Jisu Karisito meu savasava mai na ivalavala ca.
A raica o Joni e vuqa na tamata era vakaisulu ena icurucuru balavu “sa [vakavulavulataki] ena dra ni Lami” (tikina 14). Vakasamataka na ivakarau e rawa ni vukei ira kina na gone na raivotu oqo me ra kila na bibi ni noda vakasavasavataki mai na noda ivalavala ca ena Veisorovaki i Jisu Karisito.
iTaviqaravi e Rawa ni Caka
-
Vakaraitaka vei ira na gone eso na isulu ni papitaiso se so tale na isulu vulavula kei na dua na iyaloyalo kei Jisu. Wilika na iVakatakila 7:9, 13–14 vei ira na gone, ka kerei ira me ra dusia na iyaloyalo kei na isulu ena veigauna era rogoca kina na vosa vulavula. Vakamacalataka ni isulu vulavula e matataka na savasava ka vakananuma vei keda ni o Jisu Karisito e rawa ni vakasavasavataki keda mai na noda cala.
-
Vakaraitaka vei ira na gone e dua na tiki ni isulu vulavula, ka me ra vakadukara ena nodra vakavola ena peni se boroya kina na qele. Vakamacalataka ni ivalavala ca e vakadukara na yaloda. Vakaraitaka e dua na iyaloyalo kei Jisu mai Kecisemani (me vaka na iVola ni iYaloyalo Vakosipeli, naba 56), biuta tani na isulu duka, ka vakaraitaka vei ira e dua na isulu vulavula savasava. Vakadinadinataka ni mai na Veisorovaki i Jisu Karisito, sa rawa ni yaco me da savasava.
-
Lagata e dua na sere baleta na papitaiso, me vaka na “When I Am Baptized” (Children’s Songbook, 103), ka veivosakitaka na ivakarau e vukei keda kina o Jisu me da savasava ni da sa papitaiso.
Vakavulica na iVunau
Gone Qase Cake
Au rawa ni digitaka me mai tiki ni noqu bula o Jisu Karisito.
O na vukei ira vakacava na gone o vakavulica me ra dolava na yalodra kei na nodra bula ki na mana kei na veivakayarayarataki i Jisu Karisito?
iTaviqaravi e Rawa ni Caka
-
Sureti ira na gone me ra raica na iyaloyalo mai na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale ni o wilika na iVakatakila 3:20. Me vukea nodra vakaibalebaletaka na iyaloyalo, sureti ira me ra cakacaka vakaisa ni sauma na taro vaqo: Na cava o nanuma e tukituki tiko kina e katuba o Jisu? Na cava na vuna e sega kina ni dua na idoladola ni katuba e tautuba? Na cava na kena ibalebale me da vakacurumi Jisu mai ki na noda bula?
-
Kerei ira na gone me ra vola ena papa na sala duidui eso me da “dolava kina na katuba” vei Jisu. Eso na ivakaraitaki e rawa ni oka kina na nodra qaravi na tani, wiliki ni ivolanikalou, kei na vakayagataki ni sakaramede.
Sa kilikili duaduaga o Jisu Karisito me noqu iVakabula.
Na raivotu e vakamacalataki ena iVakatakila 5 sa vakavulica ni o Jisu Karisito duadua ga sa kilikili ka rawa ni vakayacora na Veisorovaki ka vakabulai keda mai na noda ivalavala ca.
iTaviqaravi e Rawa ni Caka
-
Sureti ira na gone me ra tukuna e dua na gauna era a gadreva kina e dua me cakava e dua na ka era a sega ni cakava rawa vakatakiira. Kerei ira me ra wilika na iVakatakila 5:1–10 ka vaqara na ka e gadrevi me caka ka rawa ni cakava walega e dua na tamata (vakamacalataka ni Lami sai Jisu Karisito ka sa matataka na ituvatuva ni Kalou na ivola). Na cava e cakava vei keda o Jisu ka sega tale ni dua e rawa ni cakava?
-
Kerei ira na gone me ra vaqara e dua na serenilotu se sere ni gone ka vakadinadinataki Jisu Karisito (me vaka na “Beautiful Savior,” Children’s Songbook, 62–63). Na cava e vakavuvulitaka na qaqa ni sere me baleti Jisu Karisito? Ena tautauvata beka vakacava na sere oqo kei na serenilotu ni vakacaucau a lagati baleti Jisu Karisito ena iVakatakila 5:9–10?
Na kosipeli sa rawa ni vukei au meu ulabaleta na veitemaki.
Na kubou ka vakabutobutotaka na macawa ena iVakatakila 9:2 sa rawa ni vakatauvatani ki na veitemaki eso (raica na 1 Nifai 12:17).
iTaviqaravi e Rawa ni Caka
-
Droinitaka na iyaloyalo ni dua na matanisiga kei na o loaloa, ka kotivi rau. Sureti ira na gone me ra wilika na iVakatakila 9:2 kei na 1 Nifaii 12:17 ka vola ena o loaloa se cava e matataka na kubou se kabukabu ena veitikina oqo. Biuta na o loaloa ena papa, ka sureti ira na gone me ra vola na veitemaki eso era dau sotava na gone vakataki ira. Qai biuta na matanisiga ena papa ka kerei ira me ra vola na iyaya ni cakacaka eso sa solia vei keda na Tamada Vakalomalagi me da ulabaleta kina na butobuto e vuravura.
-
E rawa vakacava vei ira na gone me ra vukei ira tale eso ka tu vakayalo ena butobuto? Me vukea nodra vakasamataka na taro oqo, vakaraitaka na vidio “Choose the Light” (LDS.org), ka sureti ira me ra veitalanoataka na dauvodo baisikeli.
Vakauqeta na Vuli e Vale
Sureti ira na gone me ra wasea ki na nodra matavuvale na sala eso e rawa ni ra sureta kina na veivakayarayarataki ni iVakabula ki na nodra itikotiko.
Vakatorocaketaki Noda Veivakavulici
Vakauqeta na vakarokoroko E dua na tiki bibi ni vakarokoroko sai koya na vakasamataki ni Tamada Vakalomalagi kei Jisu Karisito. O na rairai vakananumi ira na gone mera dau vakarokoroko ni lagati se vagugutaki malua e dua na sere se vakaraitaki e dua na iyaloyalo kei Jisu.