Maroroi ena Vale ni manumanu, mai vei Dan Burr

16–22 ni Tiseba

Siganisucu

“Na iTukutuku Vinaka ni Marau Levu”

Na lesoni oqo e dua na madigi me vakavulici vei ira na gone me ra marautaka na sucu ni iVakabula, nona bula, kei na nona ilesilesi ena gauna ni Siganisucu. Vakasamataka tiko oqo ena nomu vakavakarau mo veivakavulici.

Vola na Veika o Uqeti Kina

Sureta na Veiwasei

Vakaraitaka na iyaloyalo mai na ituvatuva ni macawa oqo ena Lako Mai Mo Muri Au—Baleta na Tamata Yadua kei na Matavuvale, ka sureti ira na gone me ra wasea na ka era kila me baleta na sucu ni iVakabula.

Vakavulica na iVunau

Gone Sobu

Maciu 2:1–12; Luke 2:1–14

A lako mai ki vuravura o Jisu Karisito me vaka e dua na gonelailai.

Era dau taleitaka na gone na italanoa ni sucu i Jisu Karisito. Na dina vakaivunau cava o raica ena italanoa oqo o nanuma ni dodonu me ra kila na gone?

iTaviqaravi e Rawa ni Caka

• Wilika na Luke 2:1–14 vei ira na gone, se vakamacalataka na veika e yaco ena veitikina oqo ena dikevi ni “Chapter 5: Jesus Christ Is Born,” New Testament Stories, 13–15, se na kena vidio ena LDS.org. Sureti ira na gone me ra droinitaka na iyaloyalo ni veika oqo ka vakayagataka na iyaloyalo me ra tukuna kina na italanoa. Na cava na vuna o marautaka kina ni lako mai ki vuravura o Jisu vaka e dua na gonelailai?

• Kerei ira na gone me ra tukuna vei iko na italanoa ni nodratou muria na Tamata Vuku na kalokalo me kunei Jisu. Kevaka ena gadrevi me vakananumi vei ira na italanoa, raica na Maciu 2:1–12 se “Chapter 7: The Wise Men,” New Testament Stories, 18, se na kena vidio ena LDS.org. Vunia ena loma ni rumu e dua na iyaloyalo kei Jisu. Droinitaka se kotiva e dua na kalokalo pepa ka taura cake tu. Sureti ira na gone me ra vakatayaloyalotaka ni o ira na tamata vuku kau ka ni loloma voli, ka kauti ira wavokita na rumu me ra vaqarai Jisu. Na cava eso na ka ni loloma e rawa ni da solia vei Jisu mai na noda bula nikua

• Lagata vata kei ira na gone e vica na sere ni Siganisucu, me vaka na “Me da Marau” kei na “Bogi Buto” (Sere ni Lotu, naba 116, 119) se “Stars Were Gleaming,” “Mai Peceliema,” kei na “Oh, Hush Thee, My Baby” (Children’s Songbook, 37, 42–43, 48).

Joni 3:16.

Ena vuku i Jisu Karisito au sa rawa ni laki bula vata tale kei na Tamada Vakalomalagi ena dua na siga.

Era kila beka na gone o vakavulica na vuna e lako mai kina ki vuravura o Jisu Karisito? Taura na gauna mo vakananuma kina na veika sa cakava ena vukumu na iVakabula kei na ivakarau e rawa ni o vukei ira kina na gone me ra kila na veika sa cakava ena vukudra o Koya.

iTaviqaravi e Rawa ni Caka

• Kauta mai ki na kalasi e dua na ioloolo ka ni loloma ka tiko e loma e dua na iyaloyalo kei Jisu Karisito. Biuta e dua na itokaniyaca ena iloloma ka volai toka kina na “Joni 3:16” , ka tukuna vei ira na gone ni oqo e dua na ivakatakilakila ni iloloma e tiko e loma. Wilika na Joni 3:16 vata kei ira na gone, ka sureti ira me ra vakilakila se cava na iloloma ka dolava. Cava na vuna e tala mai kina vei keda na Luvena na Kalou?

• Digitaka na iyaloyalo eso mai na iVola ni Yaloyalo Vakosipeli (me vaka na naba 1, 30, 35–66, 84) e vakaraitaka eso na sala e vakalougatataki ira kina na tamata o Jisu ni bula voli e vuravura. Me ra taura cake tu na iyaloyalo na gone ni o talanoa tiko. O na gadreva beka mo digitaka eso na iyaloyalo ka salavata kei na qaqa ni “He Sent His Son” kei na “Tell Me the Stories of Jesus” (Children’s Songbook, 34–35, 57) ka me ra taura cake tu na gone na iyaloyalo ni ra lagata na veisere oqo.

• Sureti ira na gone me ra wasea na nodra italanoa taleitaki me baleti Jisu. Ni sa tukuni oti na italanoa yadua, vukei ira na gone me ra vakaotia na iyatuvosa oqo: “E lako mai vuravura o Jisu me .” Qai vakaraitaka na iyaloyalo e semati ki na nona isoro ni veivakaduavatataki na iVakabula, nona mate, kei na Tucaketale (raica na iVola ni Yaloyalo Vakosipeli, naba 56, 57, 58, 59) ka tukuna vakalekaleka na veika oqo. Wasea na nomu ivakadinadina ni a lako mai ki vuravura o Jisu Karisito me mai mate ena vukuda ka vakaturi cake tale me rawa ni da lesu tale vua na Tamada Vakalomalagi.

  

  Kecisemani, mai vei J. Kirk Richards

Vakavulica na iVunau

Gone Qase Cake

Maciu 1:18–25; 2:1–12; Luke 1:26–38; 2:1–20

A lako mai ki vuravura o Jisu Karisito me vaka e dua na gonelailai.

O na vukei ira beka vakacava na gone me ra vakanamata vei Jisu Karisito ena Siganisucu?

iTaviqaravi e Rawa ni Caka

• Sureta e dua na gone me wilika na veika a yaco ena sucu ni iVakabula ena Maciu 1:18–25; 2:1–12; Luke 1:26–38; 2:1–20. Kerei ira na vo ni gone me ra veivukevuke ena droinitaka na iyaloyalo ena papa me baleta na veika e vakamacalataki tiko ena ivolanikalou. Na cava e vakavulica vei keda na italanoa eso oqo me baleti Jisu Karisito?

• Vakaraitaka na vidio “Good Tidings of Great Joy: The Birth of Jesus Christ” (LDS.org). Kerei ira na gone me ra vola na cava ga era rogoca ka na vukea me ra vakanamata vei Jisu Karisito ena gauna ni Siganisucu. Ni oti na vidio, sureti ira mera wasea na veika era sa vola.

• Sureti ira na gone me ra vola ena so na tikinipepa na veika e rawa ni ra cakava me vukea nodra vakanamata vua na iVakabula ena gauna ni Siganisucu. Biuta nodra pepa ena taga se itawatawa eso me ra kauta i vale na gone. Eso na vakasama sa rawa ni oka kina na wili ivolanikalou, laga serenilotu ni Siganisucu, kei na veicakacaka ni loloma.

• Lagata na sere ni Siganisucu me baleta na iVakabula (raica na Children’s Songbook, 36–54; Serenilotu, naba 201–214), ka sureti ira na gone me ra wasea na qaqana se malanivosa e dau taleitaka mai na sere.

Joni 3:16.

Ena vuku i Jisu Karisito au sa rawa ni laki bula vata tale kei na Tamada Vakalomalagi ena dua na siga.

O na vukei ira vakacava na gone me ra railesuva na veika era sa vulica ena yabaki oqo ka kila na vuna era gadrevi Jisu Karisito kina ena nodra bula?

iTaviqaravi e Rawa ni Caka

• Vola ena rua na tikinipepa O cei o Jisu Karisito? kei na Cava na vuna e lako mai kina ki vuravura? ka vakabiri rau ena yasa duidui ni rumu ni vuli. Sureta na gone yadua me wilika e dua vei ira na ivolanikalou oqo: Maciu 16:15–16; Joni 3:16; 1 Nifai 10:4; Mosaia 3:8; Alama 7:10–13; 3 Nifai 27:14–15. Kerei ira na gone me ra vaqara na isaunitaro e rua ena lalaga mai na ivolanikalou era wilika. Sureti ira me ra vola nodra isaunitaro ena tikinipepa ka vakabira e lalaga veitikivi kei na kena taro. Meda vakavinavinakataka vakacava na veika sa cakava vei keda o Jisu Karisito?

• Sureti ira na gone me ra tuva ena papa na yaca se na itutu kece i Jisu e ra vakasamataka rawa (raica na Bible Dictionary, “Christ, names of”). Na cava era vakavulica vei keda na yaca eso oqo me baleti Jisu Karisito kei na Nona ilesilesi? Cava na vuna eda gadrevi Jisu Karisito kina ena noda bula? Me vukea na saumi ni taro oqo, vakaraitaka na vidio “Why We Need a Savior—A Christmas Message about Our Savior Jesus Christ” (LDS.org).

Vakauqeta na Vuli e Vale

Vakayaloqaqataki ira na gone me ra raica e dua mada ga na sala e rawa ni ra vukea kina e dua se me ra voleka yani vei Jisu Karisito ena Siganisucu oqo.

Vakatorocaketaki Noda Veivakavulici

Era taleitaka na gone me ra wasea na veika era vulica tiko. Sa rawa vei ira na gone me ra vaqaqacotaka na lewe ni nodra matavuvale. Vakayaloqaqataki ira na gone o vakavulica me ra wasea ki na nodra matavuvale e dua na ka era vulica ena Lalai. (Raica na Veivakavulici ena iVakarau ni iVakabula 30