Loloma Vinaka Sara, mai vei Del Parson

2–8 ni Tiseba

1–3 Joni; Juta

“Sa Loloma na Kalou”

Na nodrau iVola o Joni kei Juta sa vakavulica na loloma kei na rarama ni Tamada Vakalomalagi. Ni o vuli tiko ena macawa oqo, vakananuma vakatitobu na vuna era gadreva kina na gone o vakavulica na Nona rarama kei na loloma ena nodra bula. Nanuma mo vakasamataka na itaviqaravi kece sara ena ituvatuva oqo, sega ni o koya walega e tuvai ena ruku ni itabayabaki o vakavulica.

Vola na Veika o Uqeti Kina

Sureta na Veiwasei

Sureti ira na gone me ra wasea na ivakarau era vakila kina na loloma ni Tamada Vakalomalagi se na vuna era nanuma kina ni vaka na cina na Tamada Vakalomalagi.

Vakavulica na iVunau

Gone Sobu

1 Joni 1:5–7; 2:8–11

E kauta mai na rarama ki na noqu bula na muri Jisu.

Ena rawa ni vukei iko vakacava ni vakavulici ira na gone baleta na rarama e kauta mai ki na noda bula na Tamada Vakalomalgi na vakatauvatani ni rarama kei na butobuto vakayago?

iTaviqaravi e Rawa ni Caka

• Kerei ira na gone me ra vakayacana na veika e vakavuna na rarama. Vukei ira me ra kila na vinaka ni rarama, me vaka ni vukea na itei me ra tubu, rawa kina me da rai, ka veivakatakatari. Sureti ira na gone me ra veivukevuke ni cinava voli e dua na iyaloyalo kei Jisu Karisito ni ra kaya, “sa rarama na Kalou” (1 Joni 1:5). Vakadinadinataka ni rawa ni vakararamataka na noda bula na Tamada Vakalomalagi kei Jisu Karisito ni da talairawarawa ki na ivunau.

• Vakabutobutotaka na rumu ni vuli, ka sureti ira na gone me ra vakatura na sala eso e rawa ni vakararamataki kina na rumu. Vukei ira me ra vakasamataka na sala eso eda rawa ni kauta mai kina na rarama i Jisu Karisito ki na noda bula. Ni ra wasea na nodra isaunitaro, waqaca na cinalivaliva se cereka na ilati ni katubaleka me vakararamataki cake tiko kina na rumu.

1 Joni 4:10–11, 20–21

Au vakaraitaka noqu lomana na Kalou niu vakaraitaka noqu lomani ira na tani.

Vukei ira na gone ni raica na isema ni loloma era vakila baleta na Tamada Vakalomalagi kei na loloma era vakaraitaka vei ira na Luvena.

iTaviqaravi e Rawa ni Caka

• Wilika na 1 Joni 4:11 vei ira na gone, ka lagata e dua na sere baleta na loloma ni Kalou, me vaka na “My Heavenly Father Loves Me” (Children’s Songbook, 228). Kerea e vica na gone me wasea se ra kila vakacava ni lomani ira na Tamada Vakalomalagi. Ni oti na isaunitaro yadua, sureti ira na gone me ra veimoko ka kaya, “sa loloma na Kalou, ka lomani au na Kalou.”

• Wilika na 1 Joni 4:21 vei ira na gone. Sureti ira me ra wasea se matanataka e vica na sala e rawa ni ra vakaraitaka kina na loloma vua e dua na itokani, me vaka ena dua na imoko se dua na kadi. Ena vakaevei na lomadra na noda itokani ni caka vei ira na veika oqori? Na cava beka ena nanuma na Tamada Vakalomalagi ni da cakava na ka vinaka eso vei ira na tani?

1 Joni 2:3–5; 5:3

Au vakaraitaka na noqu lomana na Kalou niu muria na Nona ivunau.

E rawa ni ra vulica na gone ena yabaki lailai ni “sega ni ka bibi na vunau” ni Kalou kei na nodra vakamuri sa dua na sala ni vakaraitaki loloma ki Vua.

iTaviqaravi e Rawa ni Caka

• Wilika na 1 Joni 5:3, ka kerei ira na gone me ra rogoca na ka e tukuna na tikina oqo baleta na ivakarau eda rawa ni vakaraitaka kina ni da lomana na Kalou. Sureti ira na gone me ra cavuta na levu ga ni ivunau era rawata. Ena vakaevei na ivakarau ni yalona na Tamada Vakalomalagi ni da talairawarawa ki na Nona ivunau?

• Sureti ira na gone me ra droinitaka e dua na iyaloyalo me vakaraitaka e dua na sala era rawa ni vakaraitaka kina nodra lomana na Tamada Vakalomalagi. Kena ivakaraitaki, sa rawa ni ra droinitaka e dua na kedra iyaloyalo ni muria tiko e dua vei ira na ivunau. Lagata vata e dua na sere ni talairawarawa, me vaka na “Choose the Right Way” (Children’s Songbook, 160). E vakaevei na ivakarau ni yaloda ni da talairawarawa?

Vakavulica na iVunau

Gone Qase Cake

1 Joni 2:8–11; 4:7–8, 20–21

Au vakaraitaka noqu lomana na Kalou niu vakaraitaka noqu lomani ira na tani.

O na vukei ira vakacava na gone me ra kila ni lomana na Kalou sa okati kina na lomani ira era wavoliti keda—o ira mada ga na tamata ka na rairai duatani mai vei keda se dredre ni lomani?

iTaviqaravi e Rawa ni Caka

• Kerei ira na gone me ra raitayaloyalotaka ni dua se qai curu vou mai ki na nodra koronivuli se tabanalevu ka se bera ni kila e dua e kea. Ena vakaevei beka na nona nanuma? Sureta e dua na gone me wilika na 1 Joni 4:7–8. Na cava e vakatura na tikina oqo me baleta na ivakarau me da raica kina e dua na tamata? Wasea eso tale na ituvaki, se kerei ira na gone me ra vakasamata eso na gauna ena rairai donumaki ira kina na madigi me ra vakaraitaka na loloma.

• Kerei ira na gone me ra wilika na 1 Joni 4:7–8, 20–21, ka sureti ira yadua ni vola e dua na iyatuvosa me vakalekalekataka na ka era nanuma ni sa lesoni bibi duadua ena veitikina oqo. Ni ra sa wasea oti nodra iyatuvosa, o na talanoataka beka na italanoa kei Chy Johnson mai na vosa nei Baraca David L. Beck “Your Sacred Duty to Minister” (Ensign se Liaona, Me 2013, 55). Me ra na vakatotomuria beka vakacava na gone na nodra ivakaraitaki na cauravou ena italanoa ka vakaraitaka na nodra lomani Chy? Sureti ira na gone me ra wasea na sala tale eso era rawa ni vakaraitaka kina na nodra loloma vei ira na tu wavoliti ira.

1 Joni 2:3–6; 4:17–18; 5:2–5

Au vakaraitaka na noqu lomana na Kalou niu muria na Nona ivunau.

Sa rawa ni rawarawa cake na muri ni ivunau ni da kila na dina eso e vakavulici ena 1 Joni 5:3. O na vukei ira vakacava na gone ni raica na ivunau me sega ni icolacola ia me madigi eso ni vakaraitaka na nodra loloma vua na Kalou?

iTaviqaravi e Rawa ni Caka

• Sureti ira na gone me ra vola ena papa na sala eso era rawa ni vakaraitaka kina vua na Kalou ni ra lomani Koya. Qai wilika vata na 1 Joni 2:5–6; 5:2–5 me baleta na ikuri ni vakasama. E vakaraitaka vakacava na noda lomana na Tamada Vakalomalagi na talairawarawa ki na ivunau?

  

  Ena gauna mada ga e dredre kina, sa rawa me da digitaka ni muria na ivunau.

• Wilika na 1 Joni 4:17, ka vakamacalataka vei ira na gone “me da doudou kina ena siga ni lewa” sa kena ibalebale na rawati ni yalodei kei na vakacegu ni ra duri tu ena mata ni Kalou me lewai. Na cava e vakavuvulitaka na tikina oqo e sa gadrevi me da cakava me rawati kina na yalodei oqo? Na cava eso na ka eda rawa ni cakava oqo me da yalodei kina ena mata ni Kalou?

Juta 1:18–22

Au rawa ni yalodina tiko ena gauna mada ga era veiwalitaki au kina na tamata.

E rawa ni ra vakalialiai na gone ena vuku ni nodra vakabauta se na ivakarau era bula vakatisaipeli kina i Jisu Karisito. Na veitikina oqo e tiko kina na ivakasala nei Juta ena ivakarau me da yalodina tikoga kina ena veigauna vakaoqori.

iTaviqaravi e Rawa ni Caka

• Kerei ira na gone me ra wasea na gauna eso era a veiwalitaki kina ni cakava voli na ka dodonu. Sureti ira na gone me ra wilika na Juta 1:18–22 ka vaqara na ivakarau e rawa ni da yalodina tikoga kina ni da vakalialiai se veiwalitaki. Vola ena papa na veika era raica, ka veivosakitaka na sala eso era rawa ni muria kina na ivakasala oqo.

• Talanoataka umauma na tadra nei Liai (raica na 1 Nifai 8:1–35), ka kerea e vica na gone me wilika na tikina eso mai na 1 Nifai 8:26–28, 33. Veivosakitaka se ra tautauvata vakacava na tamata ena vale vakaitamera kei ira na dauveivakalialiai a tukuna o Juta. Na cava eda rawa ni cakava me da kakua ni vakayarayarataki kina mai vei ira na veiwalitaki keda se sega ni duavata kei na ka eda vakabauta? (raica na 1 Nifai 8:30, 33).

Vakauqeta na Vuli e Vale

Vakayaloqaqataki ira na gone ni cakava e dua na ituvatuva me caka e dua na ka me ra wasea kina na nodra rarama ki na nodra matavuvale.

Vakatorocaketaki Noda Veivakavulici

Era dau waribariba na gone. O na rairai nanuma ena so na gauna ni nodra igu na gone ena veivagolei tani mai na vuli. Ia sa rawa ni o cakacaka ena nodra itovo waribariba ena nodra sureti me ra matanataka, droinitaka, se lagata e dua na ivakavuvuli ni kosipeli. (Raica na Veivakavulici ena iVakarau ni iVakabula, 25–26.)