“23–29 ni Tiseba Ai Vakatakila 12–22: ‘O Koya sa Gumatua ena Rawata na Ka Kecega Oqo’” Lako Mai, Mo Muri Au—Me Baleti Ira na Lalai: Veiyalayalati Vou 2019 (2019)
“23–29 ni Tiseba Ai Vakatakila 12–22,” Lako Mai, Mo Muri Au—Me Baleti Ira na Lalai: 2019
The City Eternal, mai vei Keith Larson
23–29 ni Tiseba
Ai Vakatakila 12–22
“O Koya sa Gumatua ena Rawata na Ka Kecega Oqo”
Ni o vakavakarau mo veivakavulici, raica na veika o vulica vakaiiko se vata na nomu matavuvale mai na iVakatakila 12–22 . Na cava o kauwai kina? Na cava soti o vakauqeti kina? Nanuma ni itaviqaravi eso e vakaturi eke sa rawa ni moici me ganita na gone ena itabayabaki kecega.
Vola na Veika o Uqeti Kina
Sureta na Veiwasei
Sureti ira na gone me ra wasea na vuna era vinakata kina me ra laki bula vata tale kei na Tamada Vakalomalagi. Ena gauna taucoko ni lesoni, vukei ira me ra vaqara na veika era rawa ni cakava me ra vakavakarau ni lesu tale Vua.
Vakavulica na iVunau
Gone Sobu
Au a vakaraitaka na noqu vakabauti Jisu Karisito ena bula taumada.
Ena iValu mai Lomalagi, era a vakadrukai Setani na luvena yalodina na Kalou ena “vosa ni nodra ivakadinadina” kei na vakaraitaki ni nodra vakabauti Jisu Karisito (Ai Vakatakila 12:11).
iTaviqaravi e Rawa ni Caka
-
Me vukei ira na gone ni kila na ibalebale ni kena muri na nona ivakaraitaki e dua, digitaka e dua na gone me “iliuliu,” ka kerei ira na kena vo me ra muri koya ena nodra cakava na ka e cakava. Oti qai laiva me ra iliuliu na vo ni gone. Wilika na iVakatakila 12:7–11 vei ira na gone ka vakamacalataka ni se bera ni da sucu mai, eda a digitaka me da muri Jisu ka sega ni o Setani.
-
Lagata vata e dua na sere baleta na bula taumada, me vaka na “I Lived in Heaven” se “I Will Follow God’s Plan” (Children’s Songbook, 4, 164–65). Taroga na taro me vaka, Na cava a yaco mai lomalagi ni se bera ni da sucu? Na cava eda digitaka me da cakava? (Raica talega “Introduction: Our Heavenly Father’s Plan,” iTalanoa ni Veiyalayalati Vou, 1–5, se na kena vidio ena LDS.org.)
Au rawa ni vakavakarau ki na iKarua ni Lako Mai i Jisu Karisito ena digitaki ni dodonu.
O na vukei ira vakacava na gone me ra kila ni na dua na gauna marautaki vei keda na iKarua ni Lako Mai kevaka eda muria na ivunau i Jisu?
iTaviqaravi e Rawa ni Caka
-
Vakaraitaka na iyaloyalo ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale, ka wilika na iVakatakila 19:7. Vakamacalataka na “vakawati ni Lami” sa matataka na iKarua ni Lako Mai i Jisu Karisito. Na cava na vuna era “marau” kina na tamata? Tarogi ira na gone kevaka era sa bau lako ki na dua na vakamau. E a vakacava beka? Na cava na vuna era marau kina na tamata?
-
Wasea vei ira na gone na vuna o sa vakanamata tiko kina ki na iKarua ni Lako Mai i Jisu Karisito. O ni rawa talega ni lagata vata e dua na sere baleta na iKarua ni Lako Mai, me vaka “When He Comes Again” (Children’s Songbook, 82–83).
-
Sureti ira na gone me ra wasea na ka era cakava me ra vakavakarau kina ki na lotu ena Sigatabu. Na cava na vuna eda cakava kina na veika oqo ni bera noda gole ki lotu? Na cava na vuna me da vakavakarau kina ki na iKarua ni Lako Mai i Karisito? Ena tabana ni itaviqaravi ni macawa oqo, me ra droinitaka na gone na ka era rawa ni cakava me ra vakavakarau kina ki na iKarua ni Lako Mai.
Ai Vakatakila 21:1, 3–4, 22–27; 22:1–2
Au sa rawa ni bula vata kei na Tamada Vakalomalagi kei ira na tamata au lomana ena matanitu vakasilesitieli.
Ena iotioti ni rua na wase ni iVakatakila, a vakayagataka o Paula na ivosavosa totoka me vakamacalataka na lagilagi vakasilesitieli era na marautaka na yalodina.
iTaviqaravi e Rawa ni Caka
-
Me ra droinitaka na gone na vunikau e vakamacalataki ena iVakatakila 22:2 ena papa. Vakamacalataka ni vunikau oqo sa vunikau ni bula, ka sa matataka na loloma ni Kalou na vuana (raica na 1 Nifai 11:21–22). Solia vei ira na gone na tikinipepa eso e buli vaka na vuanikau, ka sureti ira me ra droinitaka ena pepa e dua na ka e vukei ira ni vakila na loloma ni Tamada Vakalomalagi. Vakamacalataka ni o ira na yalodina era na bula vata kei na Tamada Vakalomalagi ena matanitu vakasilesitieli.
-
Wasea vei ira na gone na ivakatakarakara se veika eso a vakayagataka o Joni me vakamacalataka na lagilagi vakasilesitieli (raica na iVakatakila 21:1, 3–4, 22–27; 22:1–2), ka sureti ira na gone me ra droinitaka na iyaloyalo ni veika oqo.
-
Ni lagata vata e dua na sere baleta na ituvatuva ni Kalou, me vaka na “I Will Follow God’s Plan” (Children’s Songbook, 164–65). Sureti ira na gone me ra vakatakila na ka era rawa ni cakava me ra laki bula tale kina kei na Tamada Vakalomalagi.
Vakavulica na iVunau
Gone Qase Cake
Au a vakaraitaka na noqu vakabauti Jisu Karisito ena bula taumada.
Era sa tiko e vuravura na gone o vakavulica baleta ni ra a vakabauti Jisu Karisito ena bula taumada ka digitaka me ra muri Koya.
iTaviqaravi e Rawa ni Caka
-
Wilika vata na iVakatakila 12:7–11, ka vola ena papa na vosa gata levu, iValu mai Lomalagi, biu tani, vosa era tusanaka, kei na Lami. Kerei ira na gone me ra vakalekalekataka na veitikina oqo ena vakayagataki ni vosa ena papa. Na cava eda sa vulica baleti Jisu Karisito (na Lami) mai na veitikina oqo? Na cava eda vulica baleta na digidigi eda vakayacora ena bula taumada?
-
Vola ena papa e tolu na iyatu ka vakayacana ena Ni bera na bula oqo, Ena bula oqo, kei na Ruarua. Vakarautaka na tikitikinipepa ka tukuna na dina eso baleta na bula taumada kei na bula oqo, me vaka na E tiko na yagoda, E sega na yagoda, Eda bula ena iserau ni Kalou, Eda vala tiko kei Setani, Eda dau vakaraitaka noda vakabauti Jisu Karisito, ka Da muria na ituvatuva ni Kalou. Me ra veivukevuke na gone ena tomiki ni dua na tikinipepa ka navuca voli se iyatu cava e okati kina. Wasea na dei ni yalomu ni rawa me ra tomana tiko na gone na nodra vakabauti Karisito.
Au rawa ni vakavakarau ki na iKarua ni Lako Mai i Jisu Karisito ena digitaki ni dodonu.
O na vukei ira vakacava na gone o vakavulica me ra kila ni na dua na ka marautaki vei ira na yalododonu na iKarua ni Lako Mai i Jisu Karisito?
iTaviqaravi e Rawa ni Caka
-
Wilika vata na iVakatakila 19:7–8, ka vukea me ra kila na gone na ivakatakarakara ena veitikina oqo—na vakawati sa iKarua ni Lako Mai ni iVakabula, na Lami sai koya na iVakabula, kei na Watina sai koya na Lotu (se o keda kece). Era dau vakavakarau vakacava na tamata ki na dua na vakamau? Na cava so eda rawa ni cakava me da vakarautaka kina na lako tale mai ni iVakabula?
-
Railesuva ka cavuqaqataka na Yavu ni Vakabauta 1:10 vata kei ira na gone. Vakamacalataka ni yavu ni vakabauta oqo sa vakamacalataka na veika taleitaki ka lagilagi ena yaco ni sa lako tale mai ko Jisu. Vakaraitaka na iyaloyalo ni iKarua ni Lako Mai i Jisu ena Lako Mai, Mo Muri Au—Baleta na Tamata Yadua kei na Matavuvale, ka sureti ira na gone me ra droinitaka na nodra nanuma se na vakaevei tu na iKarua ni Lako Mai i Jisu.
Ai Vakatekivu 21:1, 3–4, 22–27; 22:1–2, 17
Au sa rawa ni bula vata kei na Tamada Vakalomalagi kei ira na tamata au lomana ena matanitu vakasilesitieli.
Ena nomu vakavakarau ni vakavulica baleta na matanitu vakasilesitieli, vakasamataka mada na ibalebale ni matanitu vakasilesitieli vei iko. O na wasea vakacava na nomu ivakadinadina vei ira na gone o vakavulica?
iTaviqaravi e Rawa ni Caka
-
Sureti ira na gone me ra vaqara ena veitikina oqo eso na ivakatakarakara se ka lalai a vakayagataka o Joni me vakamacalataka kina na lagilagi vakasilesitieli: Ai Vakatakila 21:1, 3–4, 22–27; 22:1–2. Me ra digitaka e dua na ivakatakarakara se ka lailai era vinakata me ra droinitaka. Oti sa rawa ni ra qai tukuna ki na kalasi baleta nodra droini. Vakayaloqaqataki ira me ra wasea na nodra droini ki na nodra matavuvale e vale.
-
Wilika vata na iVakatakila 22:17, ka vakamacalataka ni yalewa sa qai vakawati ka kaya “Lako Mai” sai koya na Lotu. Na cava eda vinakata ni sureti ira na tani me ra “lako mai” kina? Na cava na sala vinaka eso me da sureti ira kina na tamata me ra “lako mai”?
Vakauqeta na Vuli e Vale
Vukei ira na gone me ra vakarau tu ni wilika na iVola i Momani ena yabaki mai oqo ena nodra sureti me ra kerea e dua na lewe ni matavuvale se itokani me wasea e dua na tikina se italanoa taleitaki mai na iVola i Momani.
Vakatorocaketaki Noda Veivakavulici
Vakavulici ira na gone me ra vola na veika era uqeti kina. Kevaka era sa vulica rawa na gone me ra dau vola na veika era uqeti kina, ena vukei ira me ra vakila ka muria na Yalo. E rawa ni ra vola na gone na veika era uqeti kina ena vakatakilakilataki ni ivolanikalou, droinitaki iyaloyalo, se vakacurumi itukutuku rawarawa ena ivolaniveisiga. (Raica na Veivakavulici ena iVakarau ni iVakabula 30.)