Vakalougatataki Eparama o Melikiseteki, mai vei Walter Rane

11–17 ni Noveba

Iperiu 7–13

“E Dua na Bete Levu ni Veika Vinaka ena Yaco Mai”

Ni o railesuva ka vakananuma vakatitobu na ituvatuva oqo, dikeva matua na veivakauqeti o ciqoma baleti ira na gone o vakavulica. Ena vukei iko na Yalo mo kunea na itukutuku eso me baleti ira ena Iperiu 7–13.

Vola na Veika o Uqeti Kina

Sureta na Veiwasei

Kerei ira na gone me ra wasea na veika era dau cakava kei na nodra matavuvale me ra vulica na kosipeli e vale. Sureti ira me ra wasea eso na ka taleitaki era sotava ena vulici ni kosipeli kei na nodra matavuvale.

Vakavulica na iVunau

Gone Sobu

Iperiu 7:1–6

Na matabete e rawa ni vukei keda ena vuqa na sala.

Na Iperiu 7:1–6 e rawa ni vakarautaka e dua na madigi me veikilaitaki kina vei ira na gone na veivakalougatataki ni matabete.

iTaviqaravi e Rawa ni Caka

• Vakamacalataka vakalekaleka o cei o Eparaama, qai vakayagataka na Iperiu 7:1–6 kei na iVakadewa nei Josefa Simici ni iVakatekivu 14:36–40 (ena ikuri ni iVolatabu) me vakavulica ni a saumi ikatini o Eparaama vei Melikiseteki. Vakamacalataka ni tu vei Melikiseteki na matabete cecere, sai koya na kaukauwa ni Kalou e soli vua na tamata e vuravura, ka vakayagataka o koya me vakalougatataki Eparaama kina. Era na marautaka beka na gone me ra matanataka na italanoa ena iyaya rawarawa eso, me vaka na isala ni tui kei na waqanivola ni katini.

• Sureta mai e dua na Matabete i Eroni kei na dua na Matabete i Melikiseteki me sikova na kalasi ka tukuna vei ira na gone na ivakarau erau sa vakayagataka kina na matabete me vakalougatataki ira na tani. Qai vakaraitaka vei ira na gone na iyaloyalo ni veicakacaka vakalotu duidui ni matabete (me ivakaraitaki, raica na iyaloyalo 103–8 ena iVola ni Yaloyalo Vakosipeli). Vukei ira na gone me ra tukuna na matabete cava e gadrevi ena cakacaka vakalotu yadua ka solia na iyaloyalo oya vua na matabete dodonu me taura.

Iperiu 11:1–32 .

Na vakabauta sai koya noda vakadinata na veika eda sega ni raica.

E dina ni ra sega ni rawa ni raici Tamada Vakalomalagi kei Jisu Karisito se vakila na veivakalougatataki kece sara ni kosipeli, e rawa ni ra tara cake na gone o vakavulica na vakabauta ena vulici ni ivakaraitaki eso ena Iperiu 11.

iTaviqaravi e Rawa ni Caka

• Vakaraitaka e dua na iyaloyalo kei Jisu. Biuta wavoki ena rumu eso na iyaya me matataka na “ivakadinadina eso” ni tiko dina o Koya e dina ga eda sega ni rawa ni raici Koya (me vaka na ivolanikalou, dua na iyaloyalo ni Matai ni Raivotu, kei na dua na iyaloyalo ni vuravura). Sureti ira na gone me ra vaqara na iyaya, qai wasea vei ira na ivakarau e vukei keda kina na iyaya yadua me da vakabauta ni bula tiko o Jisu.

• Kauta mai e dua na irinicagi, ka me ra qai veivukevuke na gone ni vakila na irivaki ni cagi e matadra. Vakavulica vei ira ni da sega ni rawa ni raica na cagi, ia eda rawa ni vakila. Vakakina, eda sega ni rawa ni raica na Tamada Vakalomalagi kei Jisu Karisito, ia eda rawa ni vakila na Nodrau loloma ka vakabauta ni Rau tiko dina.

• Wasea na italanoa ni dua se levu na tamata e tukuni ena Iperiu 11:4–32. Vakasamataka mo vakayagataka Na iTalanoa ena Veiyalayalati Makawa (raica na wase 4–6, 8–10, 15–17, 23, kei na 28). Na cava era cakava na tamata oqo me vakaraitaka ni ra vakabauta e dua na ka era sega ni raica rawa? Wasea eso na veivakalougatataki o sa ciqoma ena vuku ni nomu vakabauta.

Iperiu 13:5–6

Ena vukei keda na Tamada Vakalomalagi kei Jisu Karisito ka sega ni laivi keda.

Na veivakatovolei cava beka era sa sotava tiko na gone? Ena vukei ira beka vakacava na itukutuku ena Iperiu 13:5–6 ?

iTaviqaravi e Rawa ni Caka

• Railesuva eso na italanoa ni Veiyalayalati Vou era sa vulica na gone ena yabaki oqo ka vukei ira kina eso na iVakabula, me vaka Nona vakabula na tamata wamalai (raica na Luke 5:18–26) se vakania na 5,000 (raica na Maciu 14:15–21). Vukei ira na gone me ra vulica na malanivosa “A noqu ivukevuke ko Jiova” (Iperiu 13:6).

• Sureti ira na gone me ra droinitaka e dua na iyaloyalo ni gauna era a rere kina. Wilika vei ira na Iperiu 13:5–6 , ka vakadinadinataka ni na vukei keda na Tamada Vakalomalagi ka sega ni laivi keda. Vukei ira na gone me ra kotiva na uto pepa lelevu me rawa ni ubia na droini. Na cava eso na ka ena vukei keda ni voleka yani vua na Tamada Vakalomalagi? Vola eso na ka oqo ena uto.

• Vakavulica vei ira na gone na ikarua ni qaqa ni “Tell Me, Dear Lord” (Children’s Songbook, 176). Me vaka na qaqa ni sere, na veivuke cava e rawa ni da ciqoma ni voleka vei keda na Tamada Vakalomalagi kei Jisu Karisito? Tukuna e dua na gauna a voleka kina vei iko na Tamada Vakalomalagi ka vukei iko.

Vakavulica na iVunau

Gone Qase Cake

Iperiu 7:1–4

Era dau muria na iVakabula o ira na matabete bula kilikili.

O na vakayagataka vakacava na veitikina oqo mo vukei ira na gone ni kila ni o ira ka tu vei ira na matabete me ra yalodina ka qaravi ira na tani me vaka na iVakabula?

iTaviqaravi e Rawa ni Caka

• Vukei ira na gone me ra vola na veika era kila tu baleti rau e rua na matabete cecere o Eparaama kei Melikiseteki. E rawa ni ra vukei ena Iperiu 7:1–4; Eparaama 1:1–2; kei na iVakadewa nei Josefa Simici ni iVakatekivu 14:25–40 (ena ikuri ni veivuke ni iVolatabu). Na itovonibula va-Karisito cava soti e tu vei rau na turaga oqo ka vukei rau ni rokova na matabete?

• Kerei ira na gone me ra wilika na Iperiu 7:1–2 ka vaqara na itutu eso e vakayagataki me vakamacalataki Melikiseteki. E vakananumi keda vakacava na itutu eso oqo me baleti Jisu Karisito? Vukei ira me ra vakasamataka na sala eso e “Tui ni Sautu” kina o Jisu Karisito. Era kila tiko beka eso tale na matabete ka ra sa dua talega na ivakaraitaki ni muria na iVakabula?

• Wasea e dua na gauna a vukei iko kina e dua na matebete buladodonu mo toro voleka vua na iVakabula. Vukei ira na gone me ra vakasamataka na sala eso sa vakalougatataki ira kina na veiqaravi vakamatabete.

Iperiu 11

Sa dau vakalougatataki ira era vakabauta na Tamada Vakalomalagi.

Na Iperiu 11 e tiko kina e vuqa na ivakaraitaki ni tamata era a vakalougatataki ni ra cakacaka ena vakabauta. Na italanoa cava ena veivakauqeti vakalevu se veivuke vei ira na gone o vakavulica?

iTaviqaravi e Rawa ni Caka

• Sureti ira na gone me ra vola ena papa na veika era sa vulica me baleta na vakabauta ena Iperiu 11:1–3, 6. Solia vei ira yadua na gone na yacana e dua e cavuti ena Iperiu 11, ka sureti ira me ra wilika na veitikina e baleta na tamata oya. Kerei ira me ra wasea eso na ka me baleta na tamata oya me rawa ni ra vakilakila na gone tale eso se o cei oya. Era a vakaraitaka vakacava na vakabauta na tamata oqo, ka vakalougatataki ira vakacava na Tamada Vakalomalagi? (Me baleta na kedra iyaloyalo na tamata oqo, raica na iwasewase ni Veiyalayalati Makawa ena iVola ni Yaloyalo Vakosipeli).

• Ni oti na wiliki ni so na ivakaraitaki yalodina ena Iperiu 11, kerei ira na gone me ra vola baleta e dua na tamata era kila a vakaraitaka na vakabauta. Sureta e vica na gone me ra wasea na nodra ivakaraitaki ki na kalasi.

Iperiu 12:5–11

Na Turaga sa dau vunauci ira e lomana.

Na veitikina oqo e rawa ni vukei ira na gone me ra kila ni sa vakadodonutaki ira na Tamada Vakalomalagi, nodra itubutubu, kei na so tale baleta ni ra lomani ira ka vinakata me ra vuli mai na nodra cala.

iTaviqaravi e Rawa ni Caka

• Wilika vata na Iperiu 12:5–11, ka kerei ira na gone me ra vaqara na vuna e dau vunauci keda kina na Tamada Vakalomalagi (vakadodonutaki se vakavulici keda). Na cava e vakavulica vei keda oqo baleta na vuna era dau vakadodonutaki ira talega kina na luvedra na itubutubu vakavuravura? Me da na sausaumi vakacava ki na veivakadodonutaki ena loloma?

• Wasea na nodra ivakaraitaki na tamata ena ivolanikalou era a vunauci mai vua na Turaga ka veivutuni (kena ivakaraitaki, raica na 1 Nifai 16:25–27; Ica 2:13–15). Era sa ivakaraitaki vinaka vakacava ni ivakavuvuli ena Iperiu 12:5–11?

• Ni wiliki oti na Iperiu 12:5–11, sureti ira na gone me ra vola e vica na ka era na tovolea ni nanuma ni ra sa vakadodonutaki ena vuku ni nodra cala.

Vakauqeta na Vuli e Vale

Sureti ira na gone me ra vola se droinitaka e dua na iyaloyalo ni cava era nanuma sa ka bibi duadua era vulica ena kalasi. Vakayaloqaqataki ira me ra wasea na ka era sa vulica ki na nodra matavuvale.

Vakatorocaketaki Noda Veivakavulici

Vakayagataka na tabana ni itaviqaravi. Ni ra sa vakacavara voli na gone na tabana ni itaviqaravi ena gauna ni kalasi, vakayagataka na gauna mo railesuva kina na ivakavuvuli eso mai na lesoni.