14–20 ʻOkatopa.

Filipai; Kolose

“ʻOku Ou Faʻa Fai ʻa e Meʻa Kotoa Pē ʻia Kalaisi ʻOkú Ne Fakamālohia Aú”

Lau e Filipai mo Kolose mo fakakaukau ki he fānau ʻokú ke akoʻí. Fekumi ki ha ueʻi fakalaumālie fekauʻaki mo e founga ke akoʻi ʻaki ʻa kinautolu e ngaahi tefitoʻi moʻoni ʻi he ngaahi tohí ni.

Lekooti e Ngaahi Ongo ʻOkú ke Maʻú

Fakaafeʻi Ke Vahevahe

Fehuʻi ki he fānaú pe ko e hā e meʻa ne nau fai ʻi he uike kuo ʻosí ke nau tokoniʻi ai ha taha naʻe fie maʻu hano kaungāmeʻa, ʻo hangē ko ia ne aleaʻi ʻi he kalasi he uike kuo ʻosí.

Akoʻi e Tokāteliné

Fānau Iiki Angé

Filipai 1:3–4; Kolose 1:3, 9

ʻOku ʻofa mai e kau taki ʻo e Siasí mo lotu mai maʻaku.

Naʻe faʻa kamata ʻaki ʻe Paula ʻene ngaahi tohí ʻaki hono fakahaaʻi ʻene ʻofa ki he kau mēmipa ʻo e Siasí mo fakahā ange ʻene lotua kinautolú. Fakakaukau ki he founga te ke lava ai ʻo tokoni ke mahino ki he fānaú ʻoku ʻofa mai ʻenau kau taki ʻo e Siasí kiate kinautolu.

Ngaahi ʻEkitivitī ʻe Ala Fakahokó

• Lau leʻo lahi e Filipai 1:3–4 mo e Kolose 1:3, 9 pea kole ki he fānaú ʻapasia honau nimá pea punou honau ʻulu ʻi he taimi kotoa pē ʻoku nau fanongo ai ki he ngaahi foʻi lea lotu mo e hūfia. Fakamatalaʻi ange, naʻe lotua ʻe he ʻAposetolo ko Paulá ʻa e kau mēmipa ʻo e Siasí, ʻo hangē ko hono lotua kitautolu ʻe heʻetau kau taki ʻo e Siasí he ʻaho ní.

• Fakaʻaliʻali ha fakatātā ʻo Sīsū Kalaisi, pea vahevahe e ngaahi sīpinga ʻo ʻEne lotua ha taha kehe (vakai Luke 22:32; 3 Nīfai 19:21, 23). Ko e hā naʻe kole ʻe Sīsū ʻi he taimi naʻá Ne lotu ai maʻá e niʻihi kehé?

• Tokoniʻi e fānaú ke nau ʻomi e ngaahi hingoa ʻe niʻihi ʻo ʻenau kau taki ʻi he Siasí, hangē ko e palesiteni Palaimelí, ko e pīsopé, pea mo e Palesiteni ʻo e Siasí. Fakamatalaʻi ange, ʻoku kole ʻe he kau taki ko ʻení ki he Tamai Hēvaní ke tāpuekina ʻa e fānaú mo tokoniʻi kinautolu ke nau moʻui faitotonu. Fakakaukau ke tala ange ki he fānaú e meʻa ʻokú ke leaʻaki ʻi he taimi ʻokú ke lotua ai kinautolú.

Filipai 4:4, 8

Te u lava ʻo fiefia ʻi he ʻEikí.

Naʻe poupouʻi ʻe Paula ʻa e Kāingalotú ke nau fiefia—neongo ne nau fehangahangai mo e ngaahi ʻahiʻahi faingataʻa pea nofo pōpula ʻa Paula. Te ke tokoniʻi fēfē ʻa e fānaú ke nau ʻiloʻi ʻoku ʻomi ʻe he moʻui ʻaki ʻa e ongoongoleleí ʻa e fiefiá?

Ngaahi ʻEkitivitī ʻe Ala Fakahokó

• Kole ki he fānaú ke nau fakafanongo ki ha foʻi lea ʻoku nau toutou ʻasi lolotonga hoʻo lau e Filipai 4:4. Kole ki he fānaú ke nau fakahā atu ʻa e meʻa te nau ala fai ʻi he taimi ʻoku nau fiefia aí. Tokoni ke mahino kiate kinautolu ʻoku ʻuhinga ʻa e “fiefia ʻi he ʻEikí” ke ongoʻi fiefia koeʻuhi he ʻoku tau maʻu ʻa e ongoongoleleí pea koeʻuhi ʻoku ʻofa ʻa Sīsū Kalaisi ʻiate kitautolu.

• ʻOmi ha meʻa pe fakatātā ʻokú ne fakafofongaʻi ʻa e ngaahi meʻa ʻoku tokoni kiate koe ke ke “fiefia ʻi he ʻEikí.” Te ke lava ʻo ʻomi ha meʻa fakaʻofoʻofa naʻe fakatupu ʻe he ʻOtuá pe ko ha fakatātā ʻo ha temipale, ko e Fakamoʻui kuo toetuʻú, pe ko ha fāmili. Tuku ki he fānaú ke nau taufetongi ʻi hono fili ha fakatātā pe ko ha meʻa naʻe ʻomi, pea tala ange kiate kinautolu e ʻuhinga ʻokú ne ngaohi ai koe ke ke fiefiá. Fakaafeʻi kinautolu ke vahevahe e ngaahi meʻa ʻoku tokoni kiate kinautolu ke nau fiefia ai ʻi he ʻEikí.

• Lau fakataha e Filipai 4:8, pea tokoniʻi e fānaú ke nau fakakaukau ki he ngaahi meʻa ʻoku feʻunga mo e ngaahi fakamatala ʻi he vēsí (vakai foki ki he Tefito ʻo e Tuí 1:13). ʻOange ki he fānaú ha fanga kiʻi laʻi pepa pea tuku ke nau tā ha ngaahi fakatātā ʻo e ngaahi meʻá ni ke tokoni kiate kinautolu ke nau “fakakaukau ki he” ngaahi meʻa naʻe fakamatalaʻi ʻe Paulá.

Kolose 1:23; 2:6–7

ʻOku totonu ke “aka [tuʻu maʻu]” ʻeku tuí ʻia Sīsū Kalaisi.

Kapau ʻe lava ʻe he fānaú ʻo langa ʻenau moʻuí mo ʻenau tuí ʻi he Fakamoʻuí, te nau malava ke matuʻuaki e ngaahi faingataʻa ʻo e moʻuí.

Ngaahi ʻEkitivitī ʻe Ala Fakahokó

• Fakaʻaliʻali e fakatātā ʻo ha fuʻu ʻakau mei he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí lolotonga hoʻo lau e ngaahi kupuʻi lea mahuʻinga mei he Kolose 1:23; 2:6–7. (pe fakaʻaliʻali e vitioó “Spiritual Whirlwinds” ʻi he LDS.org.) Ko e hā ʻe hoko ki he fuʻu ʻakau ko ʻení kapau ʻe tō mai ha matangi pea ʻikai ke ʻi ai ha aka mālohi e fuʻu ʻakaú? Tuku ki he fānaú ke nau tuʻu pea nau pehē pē ko ha fuʻu ʻakau kinautolu ʻoku vaivai ʻa hono ngaahi aká ʻi ha matangi mālohi, hili iá pea nau toe pehē pē ko ha fuʻu ʻakau ia mo ha ngaahi aka mālohi. ʻE lava fēfē ke tokoniʻi kitautolu ʻe he tui ki he Fakamoʻuí, ke tau hangē ha fuʻu ʻakau ʻoku mālohi hono aká?

• Fakaafeʻi ha taha ke ne tā ha fuʻu ʻakau ʻi he palakipoé. Kole ki he fānaú ke nau fakahingoa ha ngaahi meʻa te nau lava ʻo fai ke nau “tuʻu maʻu” ai ʻia Sīsū Kalaisi. ʻI he taimi kotoa pē ʻoku fakahingoa ai ʻe ha taha ha meʻa, fakaafeʻi ia ke ne tānaki atu ha aka ki he fakatātaá.

Akoʻi e Tokāteliné

Fānau Lalahi Angé

Filipai 4:4–13

Kapau te u maʻu e tui kia Sīsū Kalaisi, te u lava ʻo fiefia neongo e ngaahi taimi faingataʻá.

Naʻe foua ʻe Paula ha ngaahi faingataʻa lahi, ka naʻá ne fiefia koeʻuhi naʻá ne maʻu ha tui kia Sīsū Kalaisi.

Ngaahi ʻEkitivitī ʻe Ala Fakahokó

• Kole ki he fānaú ke nau fakakaukau pē ʻoku nau ʻi ha fale fakapōpula hangē ko ia ne ʻi ai ʻa e ʻAposetolo ko Paulá ʻi he taimi naʻá ne fai ai e tohi ki he kau Filipaí. Lau mo e fānaú e Filipai 4:4–13 pea kole ange ke nau fekumi ki he ngaahi foʻi lea ko ʻení: fiefia, melino, fiemālie. Ko e hā naʻe lava ai ʻa Paula ʻo fiefia mo ongoʻi nonga neongo ʻene ʻi he fale fakapōpulá? Tokoniʻi e fānaú ke nau kumi e ngaahi foʻi lea ʻEiki, ʻOtua, mo e Kalaisi ʻi he ngaahi vēsí. Tokoniʻi kinautolu ke mahino naʻe ngaohi ʻe he tui ʻa Paula kia Sīsū Kalaisí, ke ne fiefia.

• Fakaafeʻi e fānaú ke nau tokoni atu ke fakakakato e ngaahi sētesi hangē ko ʻení: Te u kei lava pē ʻo sio ʻi he fakapoʻulí kapau ʻoku ou maʻu ha . Te u kei lava pē ʻo ongoʻi mokomoko ʻi tuʻa ʻi ha ʻaho ʻafu kapau ʻoku ou maʻu ha . Te u kei lava pē ʻo maʻu ʻa e fiefia ʻi he ngaahi taimi faingataʻá kapau ʻoku ou . Tokoniʻi e fānaú ke nau fakakaukau ki he ngaahi founga te nau lava ai ʻo maʻu ʻa e fiefiá ʻia Sīsū Kalaisi ʻi he taimi ʻoku nau ʻi ha taimi faingataʻa ai. Te nau lava ʻo hivaʻi ha himi, lau ha potufolofola manako, tokoni ki ha taha, pe fai ha lotu fakafetaʻi. Ko e hā ʻoku fokotuʻu mai ʻe he Filipai 4:4–13? Vahevahe mo e fānaú ha ngaahi himi pe potufolofola ʻokú ne tokoniʻi koe ke ke maʻu e fiefiá lolotonga e ngaahi taimi faingataʻá.

Filipai 4:8

Te u lava ʻo fakakaukau ki he ngaahi meʻa ʻoku moʻoni, totonu, mo fakaʻofoʻofá.

ʻOku faʻa fakaʻaliʻali ʻa e fānaú ki he ngaahi meʻa ʻoku kovi mo ʻulí. Te ke lava ʻo tokoni kiate kinautolu ke nau fekumi ki he ngaahi meʻa ʻoku langaki moʻui mo maʻá.

Ngaahi ʻEkitivitī ʻe Ala Fakahokó

• Kole ki ha taha ke ne lau leʻo lahi e Filipai 4:8 lolotonga e fekumi he niʻihi kehé ʻi he Tefito ʻo e Tui 1:13 ki he ngaahi lea ʻoku na tatau aí. Fakaafeʻi ha taha ke ne hiki e ngaahi lea ko ʻení ʻi he palakipoé. ʻOmi ha ngaahi fakaʻuhinga faingofua ʻo e ngaahi lea ko ʻení pea ʻai e fānaú ke nau fakatauhoa e ngaahi fakaʻuhingá ki he ngaahi leá. Ko e hā e ʻuhinga ʻoku totonu ai ke tau “fakakaukau ki he” ngaahi meʻá ni? Te tau lava fēfē ʻo “fekumi” ki he ngaahi meʻa ko iá?

• Kole ki he fānaú ke nau fakahingoa e ngaahi meʻa ʻoku feʻunga mo e ngaahi fakamatala ʻi he Filipai 4:8. Fakaafeʻi kinautolu ke nau tauhi ha lisi ʻi he uiké ni ʻo ha meʻa ne nau fakatokangaʻi ʻoku feʻunga mo e ngaahi fakamatala ko ʻení. Poupouʻi kinautolu ke nau ʻomi ʻenau ngaahi lisí ki he Palaimelí ʻi he uike kahaʻú pea vahevahe e meʻa ne nau maʻú.

Kolose 1:23; 2:6–7

ʻOku totonu ke “aka [tuʻu maʻu]” ʻeku tuí ʻia Sīsū Kalaisi.

ʻOku feinga ʻa Sētane ke ne fakavaivaiʻi e tui ʻa e fānaú ʻo fakafou ʻi he ngaahi ʻahiʻahi mo e ngaahi tokatēline hala. Te ke lava fēfē ʻo ueʻi fakalaumālie e fānaú ke fakamālohia ʻenau tuí ʻi he Fakamoʻuí, ke ʻoua naʻa nau “mamaʻo mei he ʻamanaki lelei ʻo e ongoongoleleí”?

Ngaahi ʻEkitivitī ʻe Ala Fakahokó

• Fakaafeʻi e fānaú ke nau tā ha ngaahi fakatātā ʻokú ne fakafofongaʻi e ngaahi moʻoni ʻoku nau maʻu ʻi he Kolose 1:23; 2:6–7. Tuku ke nau vahevahe ʻenau ngaahi fakatātaá ki he kalasí pea fakamatalaʻi e ngaahi moʻoni ʻoku fakafofongaʻi aí.

• Fakaʻaliʻali e vitioó “Spiritual Whirlwinds.” Ko e hā ha ngaahi ʻahiʻahi mo ha ngaahi tokāteline ʻi he māmani he ʻaho ní ʻoku lava ke ne fakavaivaiʻi ʻetau tuí? Ko e hā te tau lava ʻo fai ke fakamālohia ʻetau tuí kae lava ke tau “tuʻu maʻu” ʻia Sīsū Kalaisi?

Poupouʻi e Ako ʻi ʻApí

Fakaafeʻi e fānaú ke vahevahe ki honau ngaahi fāmilí e meʻa ne nau ako fekauʻaki mo e “tuʻu maʻu” ʻia Kalaisí. Te nau lava ʻo fakaʻaongaʻi e peesi ʻekitivitī ki he uike ní pe ko ha potufolofola ne nau lau lolotonga e kalasí he ʻahó ni.

Fakatupulaki ʻEtau Akoʻí

ʻOku fie ʻilo mo ako ʻa e fānaú ʻo fakafou ʻi ha ngaahi aʻusia kehekehe mo foʻou. Fakaʻaongaʻi ha ngaahi ʻekitivitī ʻoku tokoni ki he fānaú ke nau ngaungaue, fakaʻaongaʻi ʻenau ngaahi ongó, fekumi, mo fakahoko ha ngaahi meʻa foʻou. ʻE lava tokoni ʻa e ngaahi fokotuʻu ʻi he “Ko Hono Feau e Ngaahi Fie Maʻu ʻo e Fānau Iiki Angé” ʻi he kamataʻanga ʻo e maʻuʻanga tokoni ko ʻení. (Vakai foki, Ko e Faiako ʻi he Founga ʻa e Fakamoʻuí, 25–26.)