21–27 ʻOkatopa.

1 mo e 2 Tesalonika

“Ke ʻOua Naʻa Ueʻingofua Homou Lotó, pe Puputuʻu”

ʻI hoʻo lau ʻi he faʻa lotu mo e fānaú e 1 mo e 2 Tesalonika te ke maʻu ha ngaahi tefitoʻi moʻoni ʻoku fie maʻu ke mahino kiate kinautolu.

Lekooti e Ngaahi Ongo ʻOkú ke Maʻú

Fakaafeʻi Ke Vahevahe

ʻI he lēsoni ʻo e uike kuo ʻosí, naʻá ke fakaafeʻi nai e fānaú ke nau fakaʻaongaʻi ʻa e ngaahi meʻa ne nau akó ʻi ha faʻahinga founga pē? Tuku ki he fānaú ke nau fakaʻaongaʻi e ngaahi ʻuluaki miniti siʻi ʻo e kalasi ʻi he uike ní ke vahevahe ʻenau ngaahi aʻusiá.

Akoʻi e Tokāteliné

Fānau Iiki Angé

1 Tesalonika 5:1–6

ʻI heʻeku muimui ki he ngaahi fekau ʻa e ʻOtuá, te u mateuteu ai ki he Hāʻele ʻAnga Ua Mai ʻa Sīsū Kalaisí.

ʻE lava ke tokoniʻi kitautolu ʻe he akonaki ʻa Paulá ke tau teuteu mo tokanga ki he ʻaho lahi ko ia ʻe toe hāʻele mai ai e Fakamoʻuí ki he māmaní.

Ngaahi ʻEkitivitī ʻe Ala Fakahokó

• Fakaafeʻi ha faʻē ke talanoa kau ki heʻene ongo ʻi heʻene tatali ke fanauʻi ʻene pēpeé taʻe te ne ʻilo tonu e taimi ʻe hoko ai hono fanauʻi maí. Lau e 1 Tesalonika 5:2–3, pea talaange ki he fānaú ʻe toe hāʻele mai ʻa Sīsū Kalaisi ki he māmaní, ka ʻoku ʻikai ʻilo ha taha ki he taimí—hangē ko e ʻikai ʻilo ʻe ha faʻē ʻa e taimi ʻe fanauʻi ai ʻene pēpeé.

• Kole ki he fānaú ke nau talanoa fekauʻaki mo ha taimi ne nau teuteu ai ki ha fononga ʻeveʻeva pe kātoanga. Ko e hā ne nau fai ke nau kau atu ki aí? ʻOmi ha kato leta pe kato pea tuku ki he fānaú ke nau pehē pē ʻoku nau faʻo ia ko e teuteu ki ha fononga ʻeveʻeva pe kātoanga. Fakamatalaʻi ange ʻoku tau teuteu he toe hāʻele mai ʻa Sīsū Kalaisí ʻaki ʻetau lotu, lau e folofolá, muimui ʻi he palōfitá, mo moʻui angatonu ʻi he ʻaho kotoa takitaha. Kole ki he fānaú ke nau tā ha ngaahi fakatātā ʻo e founga te nau lava ai ʻo fai ʻeni pea faʻo leva ki he kato letá.

• Lau e 1 Tesalonika 5:6 ki he fānaú pea fakamatalaʻi ange kapau ʻoku ʻikai ke tau teuteu ki he toe hāʻele mai ʻa Sīsuú, ʻoku hangē ia kuo tau tō ʻo mohe pea ʻe ʻikai ke tau mateuteu kiate Ia. Fakaafeʻi e fānaú ke nau pehē pē ʻoku nau mohe. Fakamatalaʻi ange kapau te tau mateuteu, ʻoku hangē ʻoku tau ʻāʻā ʻo tatali kiate Iá. Fakaafeʻi kinautolu ke nau ʻā hake. Hivaʻi fakataha e “ʻO Ka Ne Ka Toe Haʻú” (Tohi Hiva ʻa e Fānaú, 46–47).

2 Tesalonika 2:1–3

Naʻe akoʻi mai ʻe Paula ʻe hoko ha hē mei he moʻoní kimuʻa pea toe hāʻele mai ʻa Sīsū Kalaisi.

Naʻe faifai pea hē ʻa e Siasi naʻe fokotuʻu ʻe Sīsū Kalaisí mei he moʻoní, ko hono ʻuhingá naʻe ʻave ʻa e mafai ʻo e lakanga fakataulaʻeikí mo e ngaahi moʻoni ʻo e ongoongoleleí mei he māmaní. Naʻe kikiteʻi ʻe Paula ʻe hoko ʻa e hē ko ʻeni mei he moʻoní, pe ko e “heé,” kimuʻa ʻi he Hāʻele ʻAnga Ua mai ʻa e Fakamoʻuí.

Ngaahi ʻEkitivitī ʻe Ala Fakahokó

• Hili hono lau mo e fānaú e 2 Tesalonika 2:3, langa ha taua ʻaki ha ngaahi ipu pelesitiki pe poloka. Talaange ki he fānaú ʻoku fakafofongaʻi ʻe he ngaahi ipú pe poloká ʻa e ngaahi konga mahuʻinga ʻo e Siasi moʻoní, hangē ko e ngaahi moʻoni ʻo e ongoongoleleí, lakanga fakataulaʻeikí, sila ʻi he temipalé, mo e kau palōfitá. Hili e pekia ‘a Paula mo e kau ʻAposetolo kehé, naʻe mole e ngaahi meʻá ni, pea ʻikai ke ʻi he māmaní ʻa e Siasi moʻoní ʻi ha ngaahi taʻu lahi. Fakaafeʻi ha taha ʻi he fānaú ke ne holoki e tauá, pea fakamatalaʻi ange ʻoku ui ʻeni ko e Hē mei he moʻoní pe “heé.” ʻI he taimi naʻe toe ʻomi ai ʻe Sīsū Kalaisi ʻa Hono Siasí, naʻe ui ia ko e Toe Fakafoki Maí. (Vakai “Hē mei he Moʻoní,” Tuʻu Maʻu ʻi he Tuí, 76–77.)

• Fakaʻaliʻali ha Tohi ʻa Molomona mo e ngaahi fakatātā ʻo e palōfitá mo ha temipale. Fakaafeʻi e fānaú ke nau leaʻaki e “Hē mei he Moʻoní” ʻi he taimi te ke fufuuʻi ai e ngaahi meʻá ʻi ha kato, pea leaʻaki e “Fakafoki Maí” ʻi he taimi te ke toe ʻomi ai e meʻá ki tuʻá.

• Hivaʻi ha ngaahi hiva ʻokú ne akoʻi e ngaahi moʻoni naʻe ʻave lolotonga e Hē mei he moʻoní pea toe fakafoki mai ʻi hotau kuongá ni, hangē ko e “Fānau Au ʻa e ʻOtua,” “Ko e Siasi ʻo Sīsū Kalaisí,” mo e “Fie Siofia ha Temipale” mo e (Tohi Hiva ʻa e Fānaú, 2–3, 48, 99).

Akoʻi e Tokāteliné

Fānau Lalahi Angé

1 Tesalonika 5:1–6

ʻI heʻeku muimui ki he ngaahi fekau ʻa e ʻOtuá, te u mateuteu ai ki he Hāʻele ʻAnga Ua Mai ʻa Sīsū Kalaisí.

ʻE lava ke tokoniʻi kitautolu ʻe he akonaki ʻa Paulá ke tau teuteu mo tokanga ki he ʻaho lahi ko ia ʻe toe hāʻele mai ai e Fakamoʻuí ki he māmaní.

Ngaahi ʻEkitivitī ʻe Ala Fakahokó

• Fakaafeʻi ha taha ʻi he fānaú ke ne lau e 1 Tesalonika 5:1–6 lolotonga e muimui atu e toenga ʻo e fānaú. Hili e veesi takitaha, kole ki ha taha ʻi he fānaú ke ne fakamatala fakanounouʻi e meʻa ʻokú ne fakakaukau ʻoku lave ki ai e vēsí. Mahalo te ke fie fakamatalaʻi ange ʻoku ʻuhinga e “ʻaho ʻo e ʻEikí” ki he Hāʻele ʻAngaua mai ʻa Sīsū Kalaisí. Ko e hā e ʻuhinga ʻoku fakakaukau ai e fānaú ʻoku tatau e Hāʻele ʻAngauá ko ha tangata kaihaʻa ʻi he poʻulí pe ko ha fefine ʻoku ʻamanaki ke ne fanauʻi ha pēpē?

• Talaange ki he fānaú ke nau fakakaukau ʻe ʻaʻahi mai ʻa e Fakamoʻuí ki hoʻo kalasí ʻi ha taimi he ʻahó ni. Te tau teuteuʻi fēfē ʻetau loki akó ki Heʻene ʻaʻahi maí? Tokoniʻi e fānaú ke nau fakakaukau ki he ngaahi meʻa te tau lava ʻo fai ke tau teuteuʻi ai kitautolu ki he ʻaho ʻe toe foki mai ai ʻa Sīsū Kalaisí. Hangē ko ʻení, te tau lava ʻo fakatomala, fakamolemoleʻi, fakaleleiʻi hotau vā fetuʻutaki mo hotau fāmilí, muimui ki he palōfitá, mo tauhi ʻetau ngaahi fuakavá. Poupouʻi e fānaú ke nau fili e meʻa ʻe taha te nau fai ke teuteuʻi ai kinautolu ke nau tali ʻa e Fakamoʻuí ʻi Heʻene Hāʻele Maí.

2 Tesalonika 2:1–3

Naʻe akoʻi mai ʻe Paula ʻe hoko ha hē mei he moʻoní kimuʻa pea toe hāʻele mai ʻa Sīsū Kalaisi.

Kapau ʻoku mahino ki he fānaú naʻe ʻave ʻa e Siasi ʻo Sīsū Kalaisí mo ʻEne ongoongoleleí mei he māmaní lolotonga ʻa e Hē Fakaʻaufulí, ʻe mahino ange kiate kinautolu e mahuʻinga ʻo e Toe Fakafoki Maí.

Ngaahi ʻEkitivitī ʻe Ala Fakahokó

• Fakaafeʻi ha taha ʻi he fānaú ke ne lau e 2 Tesalonika 2:1–3. Fakatatau ki he ngaahi veesi ko ʻení, ko e hā ne pau ke hoko kimuʻa ʻi he “ʻaho ʻo Kalaisí,” ʻa ia ʻoku ʻuhinga ki he Hāʻele ʻAngauá? ʻOku ʻiloʻi nai ʻe ha taha ʻi he fānaú ʻa e ʻuhinga ʻo e “heé”? Fakapapauʻi ʻoku mahino ki he fānaú ʻoku ʻuhinga ia ki he Hē Fakaʻaufulí, ʻa ia ne hoko hili e pekia ʻo e kau ʻAposetolo ʻa e Fakamoʻuí. Mahalo te ke fie maʻu ke vahevahe ʻa e fakamatala mei he “Hē mei he Moʻoní,” Tuʻu Maʻu ʻi he Tuí, 76–77.

• Tokoniʻi e fānaú ke nau lisi ʻi he palakipoé ha niʻihi ʻo e ngaahi moʻoni mo e ngaahi tāpuaki ʻoku tau fiefia ai koeʻuhi ko e ongoongoleleí. (ʻE ala kau ʻi he ngaahi sīpingá ʻa e ngaahi temipalé, kau palōfitá, lakanga fakataulaʻeikí, mo e meʻafoaki ʻo e Laumālie Māʻoniʻoní.) Tamateʻi e takitaha e ngaahi meʻa ko ʻení, pea fehuʻi ki he fānaú e founga ne mei kehe ai ʻenau moʻuí taʻekau ai e ngaahi meʻá ni. Fakamatalaʻi ange, naʻe mole ʻa e ngaahi moʻoni ko ʻení lolotonga e Hē Fakaʻaufulí. Ko e hā e ʻuhinga naʻe mahuʻinga ai ke toe fakafoki mai ki he māmaní ʻi he ngaahi ʻaho kimui ní, ʻa e Siasi ʻo Sīsū Kalaisí? Fakaafeʻi e fānaú ke nau “toe fakafoki” pe toe hiki e ngaahi moʻoní mo e ngaahi tāpuakí ʻi he palakipoé.

2 Tesalonika 3:7–13

ʻOku finangalo ʻe he Tamai Hēvaní ke u ngāue.

Te ke lava fēfē ʻo tokoniʻi e fānaú ke nau ʻilo ko e ngāué ko ha tāpuaki kae ʻikai ko ha meʻa ke fakaʻehiʻehi mei ai?

Ngaahi ʻEkitivitī ʻe Ala Fakahokó

• Fakaafeʻi e fānaú ke nau taufetongi ʻi hono lau ha ngaahi veesi mei he 2 Tesalonika 3:7–13 pea fekumi ki he palopalema naʻe fepaki mo e Kāingalotú. Ko e hā e ʻuhinga ʻoku finangalo ai e Tamai Hēvaní ke tau ngāué? Ko e hā e meʻa ʻe hoko kapau he ʻikai ʻaupito ke tau ako ke ngāue mālohi? Tuku ki he fānaú ke nau taufetongi ʻi hono fakatātaaʻi ha ngaahi ngāue faingofua kae mateʻi ʻe he toenga ʻo e fānaú ʻa e meʻa ʻoku nau faí.

• Fakaafeʻi e fānaú ke nau talanoa ki ha taimi ne nau ngāue mālohi ai ʻi ha ngāue ne vahe ange, pe ko ha taumuʻa. Naʻa nau ongoʻi fēfē kau kiate kinautolu ʻi he ʻosi ʻenau ngāué? ʻOku ʻuhinga ki he hā ke “ʻoua naʻa … fiu ʻi he fai leleí”? (2 Tesalonika 3:13).

Poupouʻi e Ako ʻi ʻApí

Fakaafeʻi e fānaú ke nau talanoa ki he mēmipa ʻo e fāmilí pe kaungāmeʻa, ha ʻuhinga ʻe taha ʻoku nau houngaʻia ai ʻi heʻetau maʻu ʻa e ongoongoleleí ʻi māmani he ʻahó ni (ʻe lava ʻo tokoni ʻa e peesi ʻekitivitī ki he uike ní ke nau manatuʻi).

Fakatupulaki ʻEtau Akoʻí

Poupouʻi e ngaahi mātuʻa ʻa e fānaú. “Ko e ngaahi mātuʻá ko e kau faiako mahuʻinga taha kinautolu ʻo e ongoongoleleí ki heʻenau fānaú—ʻokú na fakatou maʻu e tefitoʻi fatongia mo e mālohi lahi taha ke tākiekina ʻenau fānaú (vakai, Teutalōnome 6:6–7). ʻI hoʻo akoʻi e fānaú ʻi he lotú, fekumi ʻi he faʻa lotu ki he ngaahi founga ke poupou ai ki heʻenau mātuʻá ʻi honau fatongia mahuʻingá” (Ko e Faiako ʻi he Founga ʻa e Fakamoʻuí, 25).