30 Sepitema–13  ʻOkatopa

ʻEfesō

“Ko hono Fakahaohaoaʻi ʻo e Kakai Māʻoniʻoní”

ʻI hoʻo ako e ʻIpiseli (tohi) ki he kakai ʻEfesoó, fakakaukau kau ki ha ngaahi tefitoʻi moʻoni te ke lava fakamamafaʻi ke tāpuekina ai e fānau ʻokú ke akoʻí. Lekooti ha ngaahi fakakaukau ‘oku haʻu kiate koe lolotonga hoʻo laú.

Lekooti e Ngaahi Ongo ʻOkú ke Maʻú

Fakaafeʻi Ke Vahevahe

Fakaafeʻi e fānaú ke nau tuʻu laine. Kole ki he tokotaha ʻuluaki ʻi he lainé ke vahevahe ha meʻa naʻá ne ako kimuí ni lolotonga e ako folofola fakafāmilí, Palaimelí, pe ʻi ha feituʻu kehe. Kole ki he tokotaha hoko ʻi he lainé ke ne toe leaʻaki e meʻa ne vahevahe ʻe he tokotaha kimuʻá pea tānaki atu ki ai ha meʻa naʻá ne ako. Toutou fai ʻeni kae ʻoua kuo maʻu ʻe he fānaú kotoa ha faingamālie ke vahevahe.

Akoʻi e Tokāteliné

Fānau Iiki Angé

ʻEfesō 2:19

ʻOku totonu ke hoko e kau mēmipa kotoa ʻo e Siasí ko ha ngaahi kaungāmeʻa mo ha “kaungākolo.”

ʻOku hangē nai e feohi ʻa e fānau ʻi ho kalasí ʻiate kinautolú pehē ki he kau mēmipa ʻo e uōtí, ha “sola” pe “kaungākoló”? Tokoniʻi ke mahino kiate kinautolu neongo ʻoku ʻi ai hotau ngaahi faikehekehe, ʻoku tokoniʻi kitautolu ʻe he Fakamoʻuí ke tau faaitaha mo feʻofaʻaki.

Ngaahi ʻEkitivitī ʻe Ala Fakahokó

• Tuku ha fakatātā ʻo e Fakamoʻuí ʻi he lotomālie ʻo e lokí. Fakaafeʻi e fānaú ke nau tuʻu ʻi ha ngaahi tafaʻaki kehekehe ʻo e lokí ke fakafofongaʻi e “solá” pe “mulí.” ʻI hoʻo lau e ʻEfesō 2:19, fakaafeʻi kinautolu ke nau ʻunu atu ki he fakatātā ʻo Kalaisí kae ʻoua kuo nau tuʻu fevāofiʻaki. Talaange kiate kinautolu, ʻi heʻetau fakaofi atu ki he Fakamoʻuí, ʻoku lava ke tau faaitaha ko ha kaungāmeʻa mo e niʻihi kehé pea mo e “kaungākoló.”

• Kumi ha ngaahi fakatātā ʻo ha fānau mei he ngaahi tapa kehekehe ʻo māmani, pea fufū takai kinautolu ʻi he lokí. Tuku ha fakatātā ʻo e Fakamoʻuí ʻi muʻa ʻi he lokí. Fakaafeʻi hoʻo kalasí ke nau tauhoa hangē ko e kau faifekaú pea nau taufetongi ʻi hono kumi ha fakatātā ʻo ha “sola” ke fokotuʻu ofi ki he fakatātā ʻo e Fakamoʻuí. Tokoniʻi kinautolu ke mahino, ko e taimi ʻoku papitaiso ai e kakaí, ʻoku nau hoko ko ha konga ʻo hotau fāmili ʻi he Siasí, pe ko e “fale ʻo e ʻOtuá.” Te tau lava fēfē ʻo tokoniʻi ha tokotaha foʻou ke ne ongoʻi lata?

ʻEfesō 6:1–3

ʻOku finangalo ʻe he Tamai Hēvaní ke u talangofua ki heʻeku ongomātuʻá.

ʻI hoʻo lau e ʻEfesō 6:1–3, fakakaukau ki ha ngaahi founga te ke lava ʻo tokoniʻi ʻaki fānaú ke mahino kiate kinautolu e ʻuhinga ʻoku mahuʻinga ai ke talangofua ki heʻenau ongomātuʻá.

Ngaahi ʻEkitivitī ʻe Ala Fakahokó

• Lau e ʻEfesō 6:1 ki he kalasí, pe tokoniʻi ha taha ʻi he fānaú ke ne lau. Kole ange ke nau fakatātaaʻi ha ngaahi taimi ne nau talangofua ai ki heʻenau ngaahi mātuʻá. Ko e hā e meʻa ne mei hoko kapau naʻe ʻikai ke nau talangofua?

• Hiva fakataha ha hiva fekauʻaki mo e talangofuá, hangē ko e “Te u Talangofua Leva” (Tohi Hiva ʻa e Fānaú, 71). Taʻofi hili e ʻuluaki lainé, pea kole ki ha taha he fānaú ke ne talamai ha meʻa ne kole ange ʻe heʻene mātuʻá ke ne fai; pea fakaʻosi leva ʻa e foʻi hivá. Toutou fai kae lava ke maʻu ‘e he fānau kehé ha faingamālie.

• Vahevahe ha aʻusia ʻa ia naʻá ke talangofua ai ki hoʻo ongomātuʻá pea tāpuekina ai koe. Pe vahevahe e talanoa kau kia Chloe mei he lea naʻe fai ʻe Sisitā Carole M. Stephens ko e “Kapau ʻOku Mou ʻOfa Kiate Au, Fai ʻEku Ngaahi Fekaú” (Ensign pe Liahona, Nōvema 2015, 118–20) pe fakaʻaliʻali e vitiō “Going to Grandmaʻs” (LDS.org).

ʻEfesō 6:10–18

ʻE lava ke maluʻi au ʻe he teunga tau ʻo e ʻOtuá.

Te ke tokoniʻi fēfē ʻa e fānaú ke mahino kiate kinautolu ʻoku hangē ʻa hono fakahoko e ngaahi meʻa ʻoku totonú, ko hono tui ha teunga taú?

Ngaahi ʻEkitivitī ʻe Ala Fakahokó

• Fakaʻaliʻali ha fakatātā ʻo ha tokotaha ʻokú ne tui ha teunga tau, hangē ko ia ʻi he peesi ʻekitivitī ki he uike ní pe fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí. Lolotonga hoʻo fakamatala fakanounouʻi ʻa e ʻEfesō 6:10–18, fakaʻaliʻali ki he fānaú e anga hono maluʻi ʻe he ngaahi konga kehekehe ʻo e teunga taú e konga kehekehe ʻo e sinó. (Vakai “Ko e Teunga Tau Kakato ʻa e ʻOtuá,” Liahona, Sune 2016, 24–25.)

• ʻOmi ki he kalasí ha ngaahi meʻa kehekehe te ne lava ʻo fakafofongaʻi e ngaahi konga ʻo e teunga taú ʻoku lave ki ai ʻi he ʻEfesō 6:14–17 (hangē ko ʻení, ko ha tātā pe ʻēpani), pe faʻu ha ngaahi konga faingofua ʻo e teunga taú mei he pepá. Tuku ki he fānaú ke nau taufetongi ʻi hono tui e “teunga taú.” Aleaʻi hono ʻuhinga ke maluʻi mei he koví pea mo e founga ʻoku maluʻi ai kinautolu ʻe hono tui e konga takitaha ʻo e teunga taú. ʻOku tau tui fēfē ʻa e teunga tau ʻa e ʻOtuá? (hangē ko ʻení, ʻaki hono ako e folofolá, tokoniʻi e niʻihi kehé, lotu, talangofua, mo e alā meʻa pehē).

Akoʻi e Tokāteliné

Fānau Lalahi Angé

ʻEfesō 2:13–19

Ko e kaungākolo kitautolu ʻi he fale ʻo e ʻOtuá.

ʻOku fakamālohia ʻa e fānaú ʻi he taimi ʻoku nau maʻu ai ha ngaahi kaungāmeʻa lelei ʻi he ongoongoleleí. Te ke tokoniʻi fēfē kinautolu ke fakatupulaki lelei ange ʻenau feohi fakakaungāmeʻá?

Ko e “kaungākolo” kitautolu ʻi he fale ʻo e ʻOtuá fakataha mo e Kāingalotú.

Ngaahi ʻEkitivitī ʻe Ala Fakahokó

• Lau fakataha e ʻEfesō 2:19, pea aleaʻi e ʻuhinga ʻo e hoko ko ha sola pe mulí. Vahevahe ha aʻusia ʻa ia naʻá ke ongoʻi ai ko ha sola pe muli koe pea naʻe tokoniʻi koe ʻe ha taha ke ke ongoʻi lata mo talitali lelei. Fakaafeʻi e fānaú ke nau vahevahe ha ngaahi aʻusia tatau mo iá. Ko e hā te tau lava ʻo fai ke tau hoko ai ko ha “kaungākolo” kae ʻikai ko ha sola? ʻOku ʻi ai nai ha fānau ʻi ho kalasí ʻoku ʻikai ke nau faʻa kau mai, mahalo pē koeʻuhí ʻoku nau ongoʻi ko ha sola kinautolu? Tokoniʻi e fānaú ke nau faʻu ha palani ke tokoniʻi e kau mēmipa ko iá ke nau ongoʻi ʻoku talitali lelei mo ʻofaʻi kinautolu.

• Ke tokoniʻi e fānau ʻokú ke akoʻí ke nau fevāofiʻaki, hiki ha ngaahi fehuʻi ʻi he palakipoé ʻokú ne ueʻi kinautolu ke vahevahe ha meʻa fekauʻaki mo kinautolu, hangē ko e Ko e fē ha taimi ne tali ai ho lotú? pe Ko e hā e meʻa ʻokú ke manako ke fakahoko fakataha mo ho fāmilí? Vahevahe kinautolu ke nau tauhoa, pea fakaafeʻi kinautolu ke nau fai e ngaahi fehuʻí ʻiate kinautolu pē. Ko e hā ne nau feakoʻaki kau kiate kinautolú?

ʻEfesō 6:1–3

ʻOku finangalo ʻe he Tamai Hēvaní ke u talangofua mo fakaʻapaʻapaʻi ʻeku ongomātuʻá.

Fakakaukau ki ha ngaahi founga te ke lava ai ʻo tokoni ke mahino ki he fānaú e ʻuhinga ʻoku mahuʻinga ai ke talangofua ki heʻenau ongomātuʻá.

Ngaahi ʻEkitivitī ʻe Ala Fakahokó

• Fakaafeʻi e fānaú ke nau lau fakafoʻituitui e ʻEfesō 6:1–3 pea feinga ke ʻiloʻi e ngaahi kupuʻi lea ʻoku hā makehe kiate kinautolú. Fakaafeʻi kinautolu ke vahevahe e ngaahi kupuʻi lea ko ʻení mo e ʻuhinga ʻoku nau ongoʻi ai ʻoku mahuʻinga e ngaahi kupuʻi lea ko ʻení.

• Fakaafeʻi e fānaú ke vahevahe ha ngaahi sīpinga ʻo ha kakai ʻi he folofolá ne nau talangofua mo fakaʻapaʻapaʻi ‘enau ongomātuʻá, hangē ko e Fakamoʻuí (vakai Luke 2:42–52), Lute (vakai Lute 1), pe Nīfai (vakai 1 Nīfai 3:1–8). Ko e hā e ʻuhinga ʻoku mahuʻinga ai ke talangofua mo fakaʻapaʻapaʻi ʻetau ongomātuʻá?

• ʻOange ki he fānaú takitaha ha laʻipepa ʻoku tohi ai e foʻi lea fakaʻapaʻapaʻi ʻi ʻolunga. Aleaʻi ko e hā e ʻuhinga ʻo e foʻi leá. Fakaafeʻi e fānaú ke tohi pe tā ʻi heʻenau pepá ha meʻa te nau lava ʻo fai ke fakahaaʻiʻaki ʻoku nau fakaʻapaʻapaʻi ʻenau ongomātuʻá.

ʻEfesō 6:10–18

ʻE lava ke maluʻi au ʻe he teunga tau ʻo e ʻOtuá mei he koví.

ʻI hoʻo lau e ʻEfesō 6:10–18, fakakaukau ki ha ngaahi fakatamaki fakalaumālie ʻoku fehangahangai mo e fānaú, pea mo e founga te ke lava ʻo tokoni ai ke fakamālohia e fānaú ke ikunaʻi ia.

Ngaahi ʻEkitivitī ʻe Ala Fakahokó

• ʻI hono lau ʻe ha taha e ʻEfesō 6:10–18, kole ki ha tokotaha kehe ke ne lisi pe tā ʻi he palakipoé ʻa e konga ʻo e teunga tau ʻoku lave ki ai e vēsí. Ko e hā e ʻuhinga ʻoku mahuʻinga ai e teunga taú ʻi ha tau? Te tau lava fēfē ʻo tui ha teunga tau fakalaumālie ʻi he ʻaho kotoa?

• Vahe ki he fānaú takitaha ke tā mo fakahingoa ha konga ʻo e teunga taú ʻoku fakamatalaʻi ʻi he ʻEfesō 6:14–17. ʻE maluʻi fēfē nai kitautolu mei he koví ʻe he ngaahi kongokonga ko ʻeni ʻo e teunga taú? Ko e hā ʻoku talaʻofa ʻe he ʻEikí kiate kinautolu ʻoku nau ʻai e teunga tau ʻo e ʻOtuá? (vakai ʻEfesō 6:13). ʻOku ʻuhinga ki he hā ke “faʻa tuʻu ai ʻi he ʻaho ʻo e koví”?

Poupouʻi e Ako ʻi ʻApí

Fakaafeʻi e fānaú ke nau fakasio he uiké ni ha taha ʻe ngali ongoʻi hangē ha solá. Fakatukupaaʻi kinautolu ke fai ha meʻa ke nau tokoni ai ki he tokotaha ko iá.

Fakatupulaki ʻEtau Akoʻí

Tokoniʻi e fānau īkí ke nau ako mei he folofolá. Ke tokoni ki he fānaú ke nau ako mei he folofolá, nofotaha ʻi ha veesi pē ʻe taha ʻo e folofolá pe ko ha kupuʻi lea mahuʻinga. Mahalo te ke lava fakaafeʻi ʻa e fānaú ke nau tuʻu ki ʻolunga ʻi he taimi ʻoku nau fanongo ai ki ha foʻi lea pau pe kupuʻi lea. (Vakai Ko e Faiako ʻi he Founga ʻa e Fakamoʻuí, 25–26.)