26 Tesema–1 Ianuari

Ua Ia i Tatou le Tiutetauave mo Lo Tatou Lava Aoaoina

A o e faitauina mau o lenei otootoga, tusifaamaumau soo se lagona uunai faaleagaga e te mauaina. O le a e matauina o otootoga taitasi o lenei tusi lesona o loo i ai ni gaoioiga mo tamaiti laiti ifo faapea tamaiti matutua, ae e mafai ona e fetuuna’ia soo se gaoioiga mo lau vasega.

Valaaulia le Fefaasoaai

I le amataga o vasega taitasi, tuu i tamaiti ni avanoa e faasoa mai ai mea o loo latou aoaoina e uiga i le talalelei. Mo se faataitaiga, o le vaiaso lenei e mafai ona e valaaulia i latou e faasoa mai a latou tala e fiafia i ai e uiga ia Iesu Keriso.

Aoao atu le Aoaoga Faavae: Tamaiti Laiti

E finagalo Iesu Keriso ou te mulimuli atu ia te Ia.

O le a outou faitauina ma tamaiti le tele o tala mai le soifuaga o Iesu Keriso i lenei tausaga. Fesoasoani ia malamalama tamaiti tatou te aoao i nei tala ina ia mafai ai ona tatou mulimuli atili i le faataitaiga atoatoa a Iesu Keriso.

Gaoioiga e Mafai ona Fai

• Tau atu i tamaiti e uiga i le valaaulia a le Faaola, “Mulimuli mai ia te au,” o loo maua i le Mataio 4:18–22. Fai se gaoioiga lea e fai e le isi tamaitiiti se taga ona fai atu lea i isi tamaiti, “Mulimuli mai ia te au.” Valaaulia isi tamaiti e toe fai mai le taga.

• Faaali atu ata o tagata o loo mulimuli i le Faaola i auala eseese, i le taimi o Lana auaunaga i le olaga nei ma i o tatou aso. E mafai ona e maua ata i le Tusi Ata o le Talalelei po o mekasini a le Ekalesia. E mafai foi ona e faaali atu le vitio “Light the World” (ChurchofJesusChrist.org). Tuu i tamaiti e faailoa mai pe o faapefea ona mulimuli tagata i le Faaola.

• Fesoasoani i tamaiti e mafaufau i mea o latou faia e mulimuli ai i le Faaola. O le usuina o le ”Saili Vave Le Alii” (Tusipese a Tamaiti, 67) e mafai ona avatu ai ia i latou ni nai manatu. Tuu atu ia i latou e tusi o latou lava ata ao faia nei mea.

E mafai e tamaiti ona maua a latou lava molimau o upumoni faaletusitusiga paia.

E moni tusitusiga paia.

E mafai ona maua se molimau a tamaiti faapea e moni tusitusiga paia tusa lava pe lei mafai ona latou faitautusi. A o e suesue faatasi ma tamaiti i tusitusiga paia i lenei tausaga, e mafai ona e fesoasoani ia latou iloaina e i latou lava e moni tusitusiga paia.

Gaoioiga e Mafai ona Fai

• Valaaulia tamaiti e faamatala mai e uiga i ni meaalofa e fiafia i ai na latou mauaina mo o latou aso fanau po o isi aso faamanatu. Aumai se kopi o tusitusiga paia ua afifi faameaalofa, tuu atu i se tamaititi e tatalaina, ma molimau atu o tusitusiga paia o se meaalofa mai le Tama Faalelagi mo i tatou.

• Faaali i tamaiti ni nai tusi e i ai ni tala fatu, ma fesili i ai po o a tala latou te fiafia tele i ai. Faaali i ai tusitusiga paia, ma molimau atu o tusitusiga paia o loo i ai le upu a le Atua mo i tatou. Latou te faamatala e uiga i tagata sa ola ma mea na tutupu moni lava.

• Faasoa atu savali o loo maua i le 2 Timoteo 3:15 ma le Moronae 10:3–5, fesoasoani i tamaiti e toe fai mai ni nai fuaitau. Fesoasoani ia latou malamalama e mafai ona latou iloa e moni tusitusiga paia mo i latou lava.

• Nana se ata o le Faaola, ma avatu i tamaiti ni faaataataga e fesoasoani ia i latou i le sueina. Fesoasoani ia malamalama tamaiti pe mafai faapefea ona fesoasoani le suesueina o tusitusiga paia tatou te iloa ai Iesu Keriso. Ia feauaua’i tamaiti i le nanaina o le ata ma tuu atu ni faaataata i isi tamaiti.

• Usu faatasi se pese e faatatau i le aoaoina o le talalelei, e pei o le “Saili, Mafaufau Loloto, ma Tatalo” (Tusipese a Tamaiti, 66), ma fesoasoani i tamaiti e fatu ni taga e o faatasi ma upu. Faasoa atu i tamaiti se tasi pe lua o mau e te fiafia i ai, ma ta’u atu i ai pe na faapefea ona e iloa e moni tusitusiga paia. Afai e i ai ni mau a tamaiti e fiafia i ai po o ni tala faatusipaia, valaaulia i latou e faasoa mai.

Aoao atu le Aoaoga Faavae: Tamaiti Matutua

E finagalo Iesu ia ou aoao e uiga ia te Ia ma mulimuli ia te Ia.

Mafaufau pe na faapefea ona e iloa Iesu Keriso. O le a se mea e mafai ona e faia e fesoasoani ai i tamaiti e aoao ma mulimuli ia te Ia?

Gaoioiga e Mafai ona Fai

• Valaaulia tamaiti e talanoa e uiga i se uo mamae latou te iloa ma faamatala pe na faapefea ona avea lenei tagata ma uo. Faitau ma talanoaina le Ioane 5:39 ma le Ioane 14:15 e sue ai auala e mafai ona tatou lagona ai le latalata ia Iesu. Fai i tamaiti e faamatala mai ni taimi na latou lagona ai ua latou latalata atu ia te Ia.

• Ave lau vasega e savalivali faataamilo i le falelotu. Valaaulia tamaiti e sii o latou lima pe a latou vaai i se mea i le savaliga e faamanatu atu ai ia te i latou se ala e mafai ai ona latou mulimuli i le Faaola (e pei o le vai papatiso po o se ata).

• Usu faatasi ma tamaiti se pese e faatatau i le mulimuli ia Iesu Keriso, e pei o le “Mulimuli Mai ia te A’u” (Viiga,, nu. 62). Valaaulia tamaiti e faasoa mai ni taimi na latou mulimuli ai i le faataitaiga a le Faaola.

E mafai ona ou suesue i tusitusiga paia mo au lava ia.

A o e faitauina faatasi ma tamaiti ia mau ma fai atu i ai fesili, e mafai ona e fausia lo latou talitonu mautinoa e mafai ona latou aoao mai tusitusiga paia ma maua ai oa taua o le malamalama.

Gaoioiga e Mafai ona Fai

• Faitau faatasi le Ioane 5:39 ma le Galuega 17:10–11, ma fesili i tamaiti pe o a mea ua latou aoao e uiga i auala e mafai ona suesue ai i tusitusiga paia.

• Filifili ni nai mau faigofie, ma mamana mai le Feagaiga Fou, tusi mau taitasi i se fasipepa, ona nana lea o pepa. Fatufatu ni faaataataga o le a tata’i ai tamaiti i se “sailiga oa” i totonu o le potuaoga po o le falelotu e sue ai nei mau. A uma ona latou mauaina uma nei mau, talanoaina le uiga o le mau ma pe aisea ua avea ai ma ‘oa.

• Faasoa atu ni nai mau e pele ia te oe ma faamalamalama pe aisea e taua ai ia te oe. I le avea ai o se vasega, teu se lisi o mau taua na maua e tamaiti i le Feagaiga Fou i lenei tausaga—i le fale po o taimi o le Peraimeri.

• Fai se talanoaga ma tamaiti e uiga i le mafuaaga e faigata ai i nisi taimi ona faitau tusitusiga paia. Fai i tamaiti e fefaasoaa’i fautuaga ma isi e uiga i le suesueina o tusitusiga paia. Fai atu foi ia i latou e faasoa mai ni aafiaga lelei sa latou maua i tusitusiga paia.

• Fesoasoani i tamaiti e fai ni kalena faigofie e mafai ona latou faaaogaina e maka ai pe o le a le tele latou te faitauina ai tusitusiga paia. E mafai ona faamanatu atu ia i latou e nei kalena e faitau tusitusiga paia i aso uma.

Ou te manaomia la’u lava molimau

O tamaiti o loo e aoaoina o le a manaomia a latou lava molimau i le Tama Faalelagi ma Iesu Keriso. O le a se mea e mafai ona e faia e musuia ai i latou e aoao upumoni mo i latou lava?

Gaoioiga e Mafai ona Fai

• Faamatala le tala i taupou e toasefulu (tagai Mataio 25:1–13; tagai foi i le “Mataupu 47: O Taupou e Toasefulu,” i le Tala o le Feagaiga Fou,118–20, po o le vitio e o faatasi o i le ChurchofJesusChrist.org). Fai atu i tamaiti fesili faapenei: E faapefea ona pei a tatou molimau o ni lamepa? Aisea e taua ai le i ai o a tatou lava molimau?

• Talanoaina po o a ni mea e mafai ona tatou faia e faamalolosia ai a tatou molimau? Mo manatu, valaaulia tamaiti e sue le Ioane 7:17 ma le Moronae 10:3–5. Valaaulia i latou e faasoa mai mea ua latou iloa e moni.

• Fai i tamaiti e fesoasoani atu ia te oe e faaigoa ia poloka faufau i upumoni e fausia ai a tatou molimau (tagai Autu o le Talalelei, “Molimau,” topics.ChurchofJesusChrist.org). Tuu atu i tamaiti e faaaoga poloka e fau ai se tulaga e suitulaga i se molimau.

Uunaia le Aoaoina i le Aiga

E mafai faapefea ona e fautuaina tamaiti ma o latou matua e aoao mai le Feagaiga Fou i le fale? Mo se faataiaiga, e mafai ona e valaaulia tamaiti e tauloto se tasi o mau sa outou talanoaina i le vasega (e ono fesoasoani le vaevae o le mau i ni fasifuaitau pupuu) ma faasoa atu lea fuaiupu i o latou aiga.

Faaleleia o Lo Tatou Aoao Atu

Fetuunai gaoioiga mo le matutua ma tomai o tamaiti o e aoaoina. O tamaiti e laiti ifo e manaomia ni faamalamalamaga auiliili ma aoao mai metotia eseese faafaiaoga. A o faasolo ina matutua tamaiti e mafai ona latou saofaga atili mai ma lelei atu i le faasoa mai o o latou mafaufauga. Tuu atu i ai ni avanoa e faasoa mai ai, molimau mai, ma auai. Tuu atu se fesoasoani pe a manaomia. (Tagai Aoao Atu i le Ala o le Faaola, 25–26.)