16–22 Ianuari

Ioane 1

Ua Ma Maua le Mesia

A o e faitauina le Ioane 1, tusifaamaumau lagona uunai e te maua. O leotootoga o lenei vaiaso o i le Sau, Mulimuli Mai ia te Au—Mo Tagata Taitoatasi ma Aiga e mafai ona fesoasoani ia te oe i le suesueina o lenei mataupu. O gaoioiga fautuaina nei e mafai ona e maua ai ni manatu i auala e mafai ona fesoasoani i tamaiti e aoao ia mataupu faavae o i le Ioane 1. O gaoioiga mo tamati ua matutua atu e mafai ona fetuunai, pe a manaomia, e mafai foi mo tamaiti laiti ifo.

Valaaulia le Fefaasoaai

Ina ia fesoasoani i tamaiti e faasoa mai mea ua latou iloa e uiga ia Iesu, faaali atu ata o Ia o loo faataunuuina nisi o Ana matafaioi o loo faamatala mai i le Ioane 1 (e pei o le foafoaina o le lalolagi po o le aoao atu o le talalelei). Valaaulia tamaiti e faamatala mai le mea lea o loo tupu i ata.

Aoao atu le Aoaoga Faavae: Tamaiti Laiti

Ioane 1:1–2

Sa soifua Iesu faatasi ma le Tama Faalelagi a o lei fanau mai o Ia.

Na aoao mai Ioane sa soifua Iesu Keriso faatasi ma le Atua a o lei oo i Lona olaga faaletino. O i tatou foi sa nonofo faatasi ma le Atua a e tatou te lei fananau mai (tagai “O Le Aiga: O Se Folafolaga i le Lalolagi,” ChurchofJesusChrist.org). O le a faapefea ona e aoao atu i tamaiti lenei upumoni?

Gaoioiga e Mafai ona Fai

• Faamalamalama atu e faapea “o le Lokou” i le Ioane 1:1 e faasino ia Iesu. Faitau leotele le fuaiupu, ma fai i tamaiti e ta’u “Iesu” i taimi taitasi e te faitauina ai “le Lokou.” Faaali atu le ata ua faaautuina “Muai Olaga” (ChurchofJesusChrist.org; tagai foi Vaai Ia I O Outou Tamaiti [2008], 15). Faamalamalama atu o Iesu Keriso sa nonofo faatasi ma le Tama Faalelagi a o lei sau o Ia i le lalolagi.

• Faaaoga punaoa e pei o nei e aoao ai le fanau e uiga i lo tatou olaga ma le Atua ae tatou te lei o mai i le lalolagi: “Faatomuaga: O le Fuafuaga a Lo Tatou Tama Faalelagi” (i le Tala o le Feagaiga Fou, 1–5, po o le vitio talafeagai o i luga o le ChurchofJesusChrist.org) po o le “Muai Olaga” i le Taiala i Tusitusiga Paia (scriptures.ChurchofJesusChrist.org).

• Valaaulia se matua e aumai se pepe i le vasega. Fesili i tamaiti po o fea le mea na i ai le agaga o lenei pepe aʻo leʻi fanau mai o ia. Faamanatu i tamaiti na i ai le taimi sa avea ai foi i latou ma pepe, ma molimau atu sa latou nonofo foi i le lagi ma le Tama Faalelagi o ni fanau agaga a e latou te lei fananau mai.

Ioane 1:3

Na foafoaina e Iesu mea uma.

O le iloaina e uiga i le matafaioi a Iesu Keriso o se Foafoa e mafai ona fesoasoani e faateleina ai lo latou migao mo Ia.

Gaoioiga e Mafai Ona Fai

• Faitau faatasi ma tamaiti le Ioane 1:3 ma faaali i ai le ata mai le otootoga o lenei vaiaso i le Sau, Mulimuli Mai iate Au—Mo Tagata Taitoatasi ma Aiga. Fesoasoani i tamaiti e tauloto le fasifuaitau “na Ia [Iesu Keriso] faia mea uma lava.”

• Faaali atu i se tasi o tamaiti se ata o se tasi o foafoaga a le Alii. Tuu atu ia te ia e faamatala atu i isi tamaiti, ma fai atu ia i latou e mate po o le a le mea o loo faamatalaina.

• Fesili atu i tamaiti taitasi e faaigoa mai se mea na foafoaina e Iesu Keriso. Fesoasoani i tamaiti e mafaufau i ni auala e mafai ona latou tausia ai le lalolagi ma isi foafoaga a le Alii.

O Iesu Keriso na foafoaina le lalolagi ma mea uma o i ai.

Ioane 1:35–51

E mafai ona ou valaaulia isi e o mai ia Iesu Keriso ma aoao e uiga ia te Ia.

O leIoane 1 o loo i ai tala i soo o e na valaaulia tagata e “o mai ma vaai” o Iesu o le Alo o le Atua. E oo lava i tamaiti laiti e mafai ona mulimuli i lenei faataitaiga.

Gaoioiga e Mafai ona Fai

• Faamatala le ala na aoao ai Aneterea e uiga ia Iesu, ma tau atu pe na faapefea ai la ona aoao e Aneterea ia Peteru (tagai Ioane 1:35–42). Faasoa atu le ala na e aoao ai e uiga i le Ekalesia, pe valaaulia foi se tagata fou o le au paia e faasoa mai pe na faapefea ona ia aoao e uiga i le Ekalesia.

• Faasoa atu le tala ia Filipo o valaauina Natanielu e “sau ia, ina matamata” (Ioane 1:43–51). Nana se ata o Iesu i se atigipusa, ma valaaulia se tamaitiiti e “sau e vaai” i ai ma ta’u atu i isi tamaiti e uiga i le mea sa ia vaai i ai.

• Tuu atu i tamaiti e valivali le itulau o gaoioiga o lenei vaiaso, ma fautuaina i latou e faaaoga e valaaulia ai se tasi e aoao e uiga ia Iesu.

• Fai i se tamaitiiti e faamatala atu se taimi na ia faasoa atu ai se mea e pei o se meataalo po o se meaalofa i se tasi. E mafai faapefea ona tatou faasoa atu le talalelei? Faamatala atu se tala i se tamaitiiti sa faasoa atu le talalelei i se uo, e pei o le “O se Uo ma se Faifeautalai,” Uo, Iulai 2018, 12–13; Liahona, Iulai 2018, 70–71.

Aoao atu le Aoaoga Faavae: Tamaiti Matutua

Ioane 1: 1–5

Sa nonofo faatasi Iesu Keriso ma le Tama Faalelagi a o lei fanau mai o Ia.

E oo lava a o lei fanau mai o Ia, sa faatino e Iesu Keriso ni matafaioi taua i le fuafuaga a le Tama Faalelagi. A o e faitauina le Ioane 1:1–5, o le a se mea ua faagaeetia ai oe i le galuega a Keriso i le muai olaga?

Gaoioiga e Mafai ona Fai

• Fesili i tamaiti pe latou te iloaina se mea e uiga i mea na faia e Iesu a o lei fanau mai o Ia. Valaaulia i latou e vaavaai mo tali i le Ioane 1:1–5. E ono fesoasoani le vaavaai i le Faaliliuga a Iosefa Samita, Ioane 1:1–5 (i le faaopoopoga i le Tusi Paia).

• Faasoa ni vaega o le “Folasaga: O Le Fuafuaga a lo Tatou Tama Faalelagi” (i le Tala o le Feagaiga Fou, 1–5, po o le vitio talafeagai i luga o le ChurchofJesusChrist.org). Fesili i tamaiti pe o a ni mea ua latou aoao ai e uiga ia Iesu Keriso.

• I ni nai aso ao lei faia le vasega, valaaulia ni nai tamaiti e o mai sauniuni i le vasega e faaali pe faamatala se mea na latou fatuina. Faaali ata o nisi o foafoaga a le Alii, ma faaaoga le Ioane 1:3 e faamalamalama ai o Iesu na foafoaina le lalolagi ma mea uma o i ai.

1 Ioane :4–9

O Iesu Keriso o lo’u malamalama.

O le faatusa o le malamalama e mafai ona fesoasoani e malamalama ai tamaiti i le Faaola ma Lana talalelei. E mafai faapefea ona e musuia tamaiti e saili i le malamalama o le Faaola i le taimi ua foliga pogisa ai le lalolagi?

Gaoioiga e Mafai ona Fai

• Valaaulia tamaiti e faitau le Salamo 27:1; Ioane 1:4–9; Mosaea 16:9; ma le Mataupu Faavae ma Feagaiga 39:1–2, ma vaavaai mo fasifuaitau e tutusa ai nei mau. E faapefea ona faapei Iesu Keriso o se malamalama?

• Faaali atu se ata o le Faaola ma ni nai meafaitino e aumaia se malamalama, e pei o se moliuila. E faapefea ona faapei Iesu Keriso o nei meafaitino? E mafai faapefea ona tatou faasoa atu Lona malamalama i isi? Usu faatasi le “O Iesu Lou Sulu” (Viiga, nu. 49) po o se isi pese e uiga i le malamalama o le talalelei.

• Fesili i tamaiti po o le a se mea latou te faia pe a latou i ai i le pogisa ma ua lagonaina le fefefe. Molimau atu e mafai ona latou liliu atu i le Faaola pe a latou fefefe.

Ioane 1:35–51

I le avea ai ma se e mulimuli ia Iesu Keriso, e mafai ona ou valaaulia isi e mulimuli atu ia te Ia.

Mafaufau pe mafai faapefea ona e faaaogaina faataitaiga o i le Ioane 1:35–51 e faamalosiauina ai tamaiti e valaaulia isi e aoao e uiga i le Faaola.

Gaoioiga e Mafai ona Fai

• Fesoasoani i tamaiti e suesue i le Ioane 1:35–51 e saili ai mea na fai mai tagata e valaaulia ai isi e aoao e uiga i le Faaola. Tuu atu ia i latou e faataitai a latou tala e fai e valaaulia ai se uo e aoao e uiga ia te Ia.

• Fai i tamaiti e faaaoga le itulau o gaoioiga o le vaiaso lenei e fai ai se valaaulia e mafai ona latou faaoaga e valaaulia ai se uo po o se tagata o le aiga e aoao atili e uiga ia Iesu Keriso.

• Tuu atu i tamaiti le avanoa e faamatala ai i le vasega se mea latou te fiafia i ai. Fesoasoani i tamaiti ia vaai pe mafai faapefea ona pei le faasoa atu o le talalelei o le faasoaina atu o isi mea tatou te fiafia i ai (mo se faataitaiga, tagai i le vitio “Good Things to Share” i luga o le ChurchofJesusChrist.org).

Uunaia le Aoaoina i le Aiga

Fautuaina tamaiti e valaaulia se tasi latou te alolofa i ai e aoao atili e uiga ia Iesu Keriso.

Faaleleia o Lo Tatou Aoao Atu

Faaaoga mea faitino. Saili ni auala e fesoasoani ai i tamaiti e vaai faalemafaufau i mea o loo latou aoaoina i tusitusiga paia. E mafai ona e faia lenei mea ma ata o le talalelei, atatusi, vitio, papeti, po o faatinoga pupuu o tala.