“16–22 Ianuari. Ioane 1: Ua Matou Maua le Mesia,” Sau, Mulimuli Mai ia te A’u—Mo Tagata Taitoatasi ma Aiga: Feagaiga Fou 2023 (2022)

“16–22 Ianuari. Ioane 1,” Sau, Mulimuli Mai ia te A’u—Mo Tagata Taitoatasi ma Aiga: 2023

Ata

o se tama‘ita‘i o loo faasoa atu le talalelei i le nofoaga o nofoaafi

16–22 Ianuari

Ioane 1

Ua Matou Maua le Mesia

A o e faitau ma manatunatu loloto i le Ioane 1, tusi faamaumau ni lagona u’una’i e te mauaina. O a savali ua e maua o le a sili ona taua ia te oe ma lou aiga? O a ni mea e mafai ona e faasoa i au vasega i le Lotu?

Tusifaamaumau Ou Lagona U‘una‘i

Pe ua e mafaufau ea pe mata e te iloaina Iesu le Nasareta o le Alo o le Atua pe ana faapea e te ola i le taimi o Lana galuega i le olaga nei? E tele tausaga, sa faatalitali ai tagata faatuatua o Isaraelu, e aofia ai Aneterea, Peteru, Filipo, ma Natanielu, ma tatalo mo le afio mai o le Mesia folafolaina. Ina ua latou feiloa‘i atu ia te Ia, na faapefea ona latou iloa o Ia o Le sa latou sailia? O le ala lava lea e tasi tatou te iloa uma ai le Faaola—e ala i le taliaina o le valaaulia e “omai i na matamata” mo outou lava (Ioane 1:39). Ua tatou faitau e uiga ia te Ia i tusitusiga paia. Ua tatou faalogo i Ana aoaoga faavae. Ua tatou matauina le ala sa Ia soifua ai. Ua tatou lagonaina Lona Agaga. I le gasologa, ua tatou iloa ai, e faapei ona iloa e Natanielu, e silafia e le Faaola i tatou ma e alofa ia te i tatou ma finagalo e tapena i tatou ia maua “mea silisili” (Ioane 1:50).

Ata

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

O ai Ioane?

O Ioane o se soo o Ioane le Papatiso ma sa mulimuli ane avea ma se tasi o soo o Iesu Keriso ma se tasi o Ana Aposetolo e Toasefululua. Sa ia tusia le Evagelia a Ioane, le tele o tusi, ma le tusi o Faaaliga. I lana Evagelia, sa ia faasino ia te ia lava o le soo “ua alofaina e Iesu” ma le ‘tasi soo” (Ioane 13:23; 20:3). Sa matua malosi lava le naunautai o Ioane mo le folafolaina atu o le talalelei o lea na ia talosaga ai ina ia nofo i le lalolagi seia aulia le Afio Mai Faalua o le Faaola ina ia ona aumaia agaga ia Keriso (tagai Mataupu Faavae ma Feagaiga 7:1–6).

Tagai foi Bible Dictionary, “John”,” “John, Gospel of.”

Ioane 1: 1–5

O Iesu Keriso sa “faatasi ma le Atua i le amataga.”

Sa amata e Ioane lana Evagelia i le faamatalaina o le galuega sa faatino e Keriso a o le’i soifua mai o Ia. “Sa i le amataga … o le Lokou [Iesu Keriso] sa i le Atua.” O le a se mea ua e aoao mai fuaiupu 1--5 e uiga i le Faaola ma Lana galuega? E mafai ona e maua ni faamaninoga fesoasoani i le Faaliliuga a Iosefa Samita, Ioane 1:1–5 i le faaopoopoga i le Tusi Paia). A o amata ona e suesue i le soifuaga o le Faaola, aisea e taua ai le iloa e uiga i Lana galuega i le muai olaga?

Tagai foi Gospel Topics, “Jesus Christ Chosen as Savior,” topics.ChurchofJesusChrist.org.

Ioane 1:1–18

O Iesu Keriso o le “Malamalama moni” o le Alofa o le Atua.

Sa musuia Ioane e saili le Faaola ona o le molimau a Ioane le Papatiso, o le sa tautino atu faapea na ‘auina mai o ia e molimau i … le Malamalama moni” (Ioane 1:8–9). O Ioane lava ia sa tuuina atu foi lana molimau mamana i le soifuaga ma le misiona a le Faaola.

E ono malie le faia o se lisi o upumoni sa faaaofia ai e Ioane i lenei molimau amata e uiga ia Keriso (fuaiupu 1–18; tagai foi Faaliliuga Iosefa Samita, Ioane 1:1–19 [i le faaopoopga o le Tusi Paia]). Aisea e te manatu ai na amata e Ioane lana Evagelia i nei upumoni? Mafaufau e tusi lau lava molimau ia Iesu Keriso—mata o le a se mea e te manao e faasoa atu? O a ni ou aafiaga na fesoasoani ia te oe e te iloa ai ma mulimuli i le Faaola? Faamata o ai e faamanuiaina e ala i le faalogo i lau molimau?

Ioane 1:11–13

E tuuina mai e Iesu Keriso ia i tatou “lea manuia ia avea” o atalii ma afafine o le Atua.

E ui o i tatou uma o afafine ma atalii agaga o le Atua le Tama, a tatou agasala ona faanofoesea lea pe vavaeese i tatou mai ia te Ia. Ua ofo mai e Iesu Keriso ia i tatou se ala e toe foi atu ai e ala i Lana taulaga togiola. Mafaufau loloto i mea ua aoao mai i le Ioane 1:11–13 e uga i le avea ma ni afafine ma atalii o le Atua. Mafaufau foi i mea ua aoao mai e nei mau e uig ai le ala tatou te maua ai lenei meaalofa: Roma 8:14–18; Mosaea 5:7–9; Mataupu Faavae ma Feagaiga 25:1. O le a le uiga ia te oe o le maua o “lea manuia ia avea” o se afafine po o se atalii o le Atua?

Ioane 1:18

E molimau le Tama i Lona Alofa

Fai mai le Ioane 1:18 e leai se tasi ua vaai i le Atua. Ae peitai, o le Faaliliuga a Iosefa Samita o lenei fuaiupu, ua faamanino mai ai e faapea, “e leai se tagata ua vaai i le Atua i soo se taimi, vaganā ua molimau atu o ia i le Alo” (tagai Ioane 1:18, vaefaamatalaga i). Mafaufau e toe iloilo taimi nei na faalogoina ai le Atua le Tama o molimau e uiga i le Alo: Mataio 3:17; 17:5; 3 Nifae 11:6–7; Iosefa Samita—Talafaasolopito 1:17.

Aisea o se faamanuiaga ai le i ai o nei tala? O le a se mea ua latou aoao mai ia te oe e uiga i le faiā a Iesu Keriso ma Lona Tama?

Ata

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

A o tatou suesueina tusitusiga paia, o le a tatou maua musumusuga mo o tatou olaga.

Ioane 1:4–10.E mafai faapefea ona e fesoasoani i lou aiga e vaai faalemafaufau i mea sa latou faitauina i nei fuaiupu e uiga i le malamalama? E mafai ona e tuu atu i tagata o le aiga e feauauai i le faamumuina o se moli i se potu pogisa ma faasoa mai pe o faapefea ona avea le Faaola ma Malamalama i o latou olaga. A o e faitauina la le Ioane 1:4–10, atonu e maua e tagata o le aiga se malamalamaaga faaopoopo i le molimau a Ioane e uiga ia Iesu Keriso, o le Malamalama o le Lalolagi.

Ioane 1:35–36.Aisea atonu na ta’u ai e Ioane le Papatiso ia Iesu ”o le Tamai Mamoe a le Atua”? O le a se mea tatou te iloa e uiga i lenei faalaniga mai le savali a Elder Jeffrey R. Holland “Faauta i le Tamai Mamoe a le Atua” po o le savali a Elder Gerrit W. Gong “Leoleo Mamoe Lelei, Tamai Mamoe a le Atua”? (Liahona, Me 2019, 44–46, 97–101)

Ioane 1:35–46.O a ni taunuuga o le molimau a Ioane? O le a se mea ua aoao mai e lou aiga mai tagata o loo faamatalaina i nei fuaiupu e uiga i le ala e faasoa atu ai le talalelei? Tagai foi i le vitio “Inviting Others to ‘Come and See’” (ChurchofJesusChrist.org).

Ioane 1:45–51.O le a le mea na fai e Natanielu na fesoasoani na te maua ai se molimau i le Faaola? Valaaulia tagata o le aiga e talanoa pe na faapefea ona maua a latou molimau.

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Viiga fautuaina: “O Iesu Lo’u Sulu,” Viiga, nu. 89.

Faaleleia o Lo Tatou Aoao Atu

Faasoa atu lesona o mea faitino. Valaaulia tagata o le aiga e sue meafaitino e mafai ona latou maua e fesoasoani ia latou malamalama ai i mataupu faavae o loo maua i mau o loo outou faitauina o se aiga. Mo se faataitaiga, atonu latou te faaaogaina se moliga’o e fai ma Malamalama o Keriso (tagai Ioane 1:4).