“9–15 Ianuari. Mataio 2; Luka 2: Ua Matou O Mai e Ifo Atu ia te Ia,” Sau, Mulimuli Mai ia te A’u—Mo Tagata Taitoatasi ma Aiga: Feagaiga Fou 2023 (2022)

“9–15 Ianuari. Mataio 2; Luka 2,” Sau, Mulimuli Mai ia te A’u—Mo Tagata Taitoatasi ma Aiga: 2023

Ata

O le Au Makoi o loo malaga i kamela

Ina Tatou Ifo Atu ia ia Te Ia, saunia e Dana Mario Wood

9–15 Ianuari

Mataio 2; Luka 2

Ua Matou O Mai e Ifo Atu ia te Ia

A o e faitauina le Mataio 2 ma le Luka 2, mata’itu soo se malamalama’aga faaleagaga e te maua. E mafai ona fesoasoani lenei otootoga ia te oe e te iloa ai mataupu faavae taua talafeagai o loo i nei mataupu.

Tusifaamaumau Ou Lagona Uuna’i

Mai le aso o Lona soifua mai, sa manino lava o Iesu e le o se tamaitiiti pei ona masani ai. Sa le na o se fetu fou i le lagi po o le folafolaga fiafia faaagelu na tulaga ese ai le tamameamea o Iesu. O le mea moni foi o tagata faamaoni eseese—mai atunuu, matata, ma tala’ga eseese—sa vave ona lagonaina le tosina atu ia te Ia. A o lei fetalaia foi e Ia Lana valaaulia e “sau, mulimuli mai ia te a’u,” sa latou o mai (Luka 18:22). Ioe, e le o tagata uma na o mai ia te Ia. Sa toatele ē sa lei ano atu ia te Ia, ma sa saili foi se taitai lotovale e faaumatia Lona soifua. Peitai, o le au saili o le amiotonu lotomaualalalo, mama, ma le tuuto sa vaai atu ia te Ia mo le tagata sa i ai o Ia—o lo latou Mesia folafolaina. O lo latou tuuto ua musuia ai foi i tatou, aua o le “tala lelei e olioli tele ai” lea na aumai i leoleo mamoe sa mo “nuu uma,” ma o le “Faaola, o Keriso le Alii” na soifua mai i lena aso mo i tatou uma (tagai Luka 2:10–11).

Ata

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Luka 2:1–7

Sa soifua mai Iesu Keriso i tulaga maualalo.

E ui ina sa i ai ia Iesu Keriso le mamalu faatasi ma le Atua le Tama “a o lei faia le lalolagi” (Ioane 17:5), sa finagalo malie o Ia e fanau mai i tulaga maualalo ma soifua ai ma i tatou i le lalolagi. A o e faitau i le Luka 2:1–7, mafaufau loloto po o le a le mea o aoao mai e lenei tala e uiga i Lona soifua mai ia te oe e uiga ia te Ia? Taumafai e faailoa mai ni faamatalaga po o se malamalamaaga i lenei tala e te lei maitauina muamua. E faapefea e le maitauina o nei mea ona aafia ai ou lagona ia te Ia?

Tagai foi “The Christ Child” (vitio), ChurchofJesusChrist.org.

Mataio 2:1–12; Luka 2:8–38

E tele molimau o le soifua mai o Keriso.

O le soifua mai ma le tamameamea o Keriso sa faailogaina e molimau ma le au tapuai mai le tele o itu eseese o le olaga. A o e suesueina a latou tala, o le a se mea ua e aoao mai e uiga i auala e tapuai ma molimau atu ai ia Keriso?

Molimau ia Keriso	O le a se mea ua ou aoao mai e uiga i le tapuai ma le molimau atu ia Keriso?
Molimau ia Keriso Leoleo mamoe (Luka 2:8–20)	O le a se mea ua ou aoao mai e uiga i le tapuai ma le molimau atu ia Keriso?
Molimau ia Keriso Simeona (Luka 2:25–35).	O le a se mea ua ou aoao mai e uiga i le tapuai ma le molimau atu ia Keriso?
Molimau ia Keriso Ana (Luka 2:36–38)	O le a se mea ua ou aoao mai e uiga i le tapuai ma le molimau atu ia Keriso?
Molimau ia Keriso Au Makoi (Mataio 2:1–12)	O le a se mea ua ou aoao mai e uiga i le tapuai ma le molimau atu ia Keriso?

Tagai foi 1 Nifae 11:13–23; 3 Nifae 1:5–21; “Shepherds Learn of the Birth of Christ” ma le “The Christ Child Is Presented at the Temple” (vitio), ChurchofJesusChrist.org.

Mataio 2:13–23

E mafai ona maua e matua faaaliga e puipui ai o latou aiga.

Semanu e le mafai lava e Iosefa ona ia faia le mea sa poloaiina o ia e fai—e puipui Iesu i Lona tamaitiiti—e aunoa ma le fesoasoani mai le lagi. E faapei foi o le Au Makoi, sa ia maua se faaaliga sa lapataia ai o ia mai mea matautia. A o e faitau e uiga i le aafiaga o Iosefa i le Mataio 2:13–23, mafaufau i mea matautia faaletino ma faaleagaga o loo feagai ma i tatou i aso nei. Manatunatu loloto i aafiaga i ni taimi na e lagonaina ai le taitaiga a le Atua i le puipuia o oe ma lou aiga po o e pele ia te oe. Mafaufau e faasoa atu nei aafiaga i isi. O le a se mea e mafai ona e faia ia maua ai lena ituaiga o taitaiga i le lumanai?

E le gata i lea, atonu e te manao e matamata le vitio “The First Christmas Spirit” (ChurchofJesusChrist.org) o se ata o le mea atonu na lagonaina e Iosefa a o feagai o ia ma le tiutetauave o le tausiga o le Alo o le Atua.

Luka 2:40–52

E oo lava ina ua talavou, sa taulai atu Iesu i le faia o le finagalo o Lona Tama.

I le avea ai o se alii talavou, sa matua mamana le aoao atu e le Faaola o le talalelei na oo lava i aoao i totonu o le malumalu sa matua ofo i Lona “poto ma upu na tali ai” (Luka 2:47). O le a se mea ua e aoao mai i nei fuaiupu e uiga i le Faaola a o talavou? O faapefea ona taumafai tagata autalavou e te iloaina e “fai le galuega a lo [latou] Tama”? (Luka 2:49). Na faapefea ona fesoasoani le autalavou ma tamaiti ina ia e maua se malamalamaaga loloto atu i le talalelei? O le a se isi mea e te aoaoina mai le faataitaiga o le tamaitiiti o Iesu Luka 2:40–52 ma i le Faaliliuga Iosefa Samita, Mataio 3:24–26 (i le faaopoopoga o le Tusi Paia)?

“Lua te le iloa ea e tatau ona ou i le fale o lo’u Tama?” (Luka 2:49).

O le a le faaliliuga a Iosefa Samita?

Ona o le “tele o [upumoni] manino ma pele” ua aveesea mai le Tusi Paia i le tele o seneturi (1 Nifaei 13:28; tagai foi Mose 1:41), sa poloaiina ai e le Alii ia Iosefa Samita e fai se toe iloiloga musuia o le Tusi Paia, ua ta’ua o le Faaliliuga a Iosefa Samita. E tele toe iloiloga na faia e le Perofeta o loo ua aofia ai i le faaopoopoga o le lomiga a le Au Paia o Aso e Gata Ai o tusitusiga paia. Faaliliuga a Iosefa Samita o le Mataio 24, ua ta’ua o le Iosefa Samita—Mataio, e mafai ona maua i le Penina Tau Tele. Mo nisi faamatalaga, tagai i le “Faaliliuga a Iosefa Samita (FIS)” i le Bible Dictionary ma le Gospel Topics article “Bible, Inerrancy of” (topics.ChurchofJesusChrist.org).

Ata

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Luka 2.Valaaulia tagata o le aiga e filifili se tagata o loo faamatala mai i le Luka 2, faitau ni nai fuaiupu e uiga i fegalegaleaiga a lena tagata ma le Faaola, ma faasoa mai se mea na latou aoaoina ua faateleina ai lo latou faatuatua ia Iesu Keriso. Usu faatasi le “Pese Faamoe Pepe a Maria” po o le “Pese o le Kerisimasi,” (Tusipese a Tamaiti, 28, 32). O a ni mea ua tatou aoaoina mai i nei pese e uiga i le fanau mai o le Faaola?

Mafaufau pe mafai faapefea e galuega o faatufugaga ona faalautele la outou talanoaga e uiga i le soifua mai o Keriso. (Mo se faataitaiga, tagai Tusiata a le Talalelei po o le history.ChurchofJesusChrist.org/exhibit/birth-of-Christ.)

Mataio 2:1–12.O le a se mea ua tatou aoaoina e uiga i le sailia ma le mauaina o le Faaola mai le faataitaiga a le Au Makoi?

Luka 2:41–49.O le a le “faamoemoega o le Tama”? (Luka 2:49; tagai i le Mose 1:39; Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 1.2, ChurchofJesusChrist.org). O le a se mea ua tatou aoaoina e uiga i lena faamoemoega mai le tala i le Luka 2:41–49? Mafaufau e tusi i lalo ni nai auala e mafai e lou aiga ona auai i le faia o le faamoemoega o le Tama ma tuu i totonu o se fagu. I le gasologa o le vaiaso a sau, pe a tilotilo lou aiga mo ni auala e fesoasoani ai i le galuega a le Tama, e mafai ona latou filifili mai ni manatu mai le fagu. Fuafua se taimi o le a e faasoa atu ai ou aafiaga.

Luka 2:52.O le a se mea e mafai ona tatou aoao mai le Luka 2:52 i le pe na faapefea ona tuputupu ae Iesu i Lona soifuaga? O a ni sini faaletagata lava ia pe faaleaiga e mafai ona tatou faatutuina e faatupulaia ai “i le poto ma le tino, [ma] alofagia e le Atua ma tagata”?

Mo nisi manatu mo le aoaoina o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “O Fetu Na Pupula,” Tusipese a Tamaiti, 24.

Faaleleia o Suesuega Faaletagata Lava ia

Faaaoga fesoasoaniga mo le suesueina o tusitusiga paia. Ina ia maua malamalamaaga faaopoopo ao e suesue i tusitusiga paia, faaaoga punaoa e pei o vaefaamatalaga, Topical Guide, Bible Dictionary, Taiala i Tusitusiga Paia, ma isi fesoasoani mo suesuega o loo maua i le ChurchofJesusChrist.org.