26 Tesema–1 Ianuari

O i Tatou e Nafa mo lo Tatou Lava A‘oa‘oina

O le faamoemoega o tusitusiga paia, o le fesoasoani lea ia te outou ia o mai ia Keriso ma ia atili ai ona loloto lo outou liua i Lana talalelei. O leSau Mulimuli Mai ia Te A’u—Mo Tagata Taitoatasi ma Aiga e mafai ona fesoasoani e te malamalama ai i tusitusiga paia ma maua ai le malosi‘aga faaleagaga e moomia e oe ma lou aiga. Ona, i tou vasega i le Lotu, o le a tou maua ai ni avanoa e faasoa atu ai malamalamaaga ma faamalosi‘au ai ou uso a Au Paia i a latou taumafaiga e mulimuli ia Keriso.

Tusifaamaumau Ou Lagona Uunai

“Se a ea la oulua feau?” Sa fesili atu ai Iesu i soo o Ioane le Papatiso (Ioane 1:38). Atonu e te fesili ifo foi ia te oe lava i lenei fesili—aua o mea e te maua i le Feagaiga Fou i lenei tausaga o le a faalagolago tele i mea e te sailia. “Ia outou saili, ona outou maua ai lea” o le folafolaga lea a le Faaola (Mataio 7:7). Ia fai fesili e oo atu i lou mafaufau a o e su‘esu‘e, ona saili lea ma le filiga mo tali. I le Feagaiga Fou o le a e faitau ai e uiga i aafiaga mamana faaleagaga a soo o Iesu Keriso. I le avea ai o se soo faamaoni o le Faaola, e mafai ona i ai a oe lava aafiaga mamana faaleagaga pe a e taliaina le valaaulia a le Faaola, o loo maua i lenei voluma paia atoa, “Sau, mulimuli mai ia te a’u” (Luka 18:22).

Manatu mo Suesuega Faaletagata Lava Ia o Tusitusiga Paia

Ina ia aoao moni mai le Faaola, e tatau ona ou taliaina Lana valaaulia, “Sau, mulimuli mai ia te au.”

O le valaaulia a le Faaola, Sau, mulimuli mai ia te au,” e faatatau i tagata uma—pe tatou te fou i luga o le ala o le avea ma soo pe na tatou savalia i o tatou olaga atoa. O Lana valaaulia lenei i se alii mauoa talavou o le sa taumafai e tausia poloaiga (tagai Mataio 19:16–22; Luke 18:18–23). O le mea na aoaoina e le taulealea—ma le mea e tatau ia i tatou uma ona aoaoina—o le avea ma se soo o lona uiga o le tuuina atu lea o o tatou agaga atoa i le Tama Faalelagi ma Iesu keriso. Tatou te agai i luma i lo tatou avea ai ma soo pe a tatou faailoa atu mea o loo tatou vaivai ai, fai suiga, ma saili e mulimuli atoatoa ia te i Laua.

O le aoao mai le Faaola e amata pe a tatou taumafai ia malamalama i mea sa Ia aoaoina mai. Mo se faataitaiga, e faapefea ona loloto lou malamalama i le lotomaualalo ao e suesuea mea nei?

• O aoaoga a le Faaola (tagai Mataio 18:1–5; Luka 18:9–14)

• O se faataitaiga mai Lona soifuaga (tagai Ioane 13:1–15)

A e fia aoao atili, taumafai e fai le gaoioiga lenei i se isi mataupu faavae o le talalelei e pei o le alofa po o le faamagalo atu.

E nafa lava au mo lo’u lava aoaoina.

Na aoao mai Elder David A. Bednar: “E le tatau ona tatou faamoemoe i le Ekalesia o se faalapotopotoga e aoao pe ta’u mai ia i tatou mea uma tatou te manaomia ona iloa ma faia ia avea ai ma soo tuuto ma tumau ma le lototoa e oo i le iuga. Ae, o lo tatou tiutetauave patino o le aoao lea o mea e tatau ona tatou aoaoina, ia ola e pei ona tatou iloa e tatau ona tatou ola ai, ma ia avea ma tagata ua finagalo le Matai ia avea ai i tatou. Ma o o tatou aiga o le faatulagaga sili lea mo le aoaoina, ola ai ma le avea ai” (“Saunia e Maua Mea Manaomia Uma,” Liahona, Me 2019, 102).

O le a le uiga o le nafa mo lou lava aoaoina? Vaavaai mo tali i le saunoaga a Elder Bednar ma i mau nei: Ioane 7:17; 1 Tesalonia 5:21; Iakopo 1:5–6, 22; 2:17; 1 Nifae 10:17–19; 2 Nifae 4:15; Alema 32:27; ma le Mataupu Faavae ma Feagaiga 18:18; 58:26–28; 88:118. O le a se mea ua musuia oe e fai ina ia atili ai lou tinou i le aoaoina o le talalelei?

Ou te manaomia ona iloa le meamoni mo a’u lava ia.

Atonu e te iloa ni tagata e foliga mai e le mamulu lava lo latou faatuatua, tusa lava po o le a le mea e tupu i o latou olaga. Atonu latou te faamanatu atu ia te oe taupou popoto e toalima i le faataoto a le Faaola (tagai Mataio 25:1–13). O le mea atonu e te le vaaia o a latou taumafaiga filiga e faamalolosia a latou molimau o le upumoni.

E faapefea ona tatou maua ma faafailele a tatou lava molimau? Tusi i lalo ou manatu ao e mafaufau loloto i mau nei: Luka 11:9–13; Ioane 5:39; 7:14–17; Galuega 17:10–12; 1 Korinito 2:9–11; ma le Alema 5:45–46. (Tagai foi Gospel Topics, “Testimony,” topics.ChurchofJesusChrist.org.)

E tatau ona maua e i tatou taitoatasi se molimau mo i tatou lava

O le a se mea e tatau ona ou faia pe a i ai ni a’u fesili?

A o e sailia le malamalama faaleagaga, o le a oo atu fesili i lou mafaufau. O mataupu faavae nei e mafai ona fesoasoani ia te oe e taulima ai fesili i ni auala e fausia ai le faatuatua ma le molimau:

• Saili le malamalama mai le Atua. O le Atua o le punavai o upumoni uma, ma e faaali mai e Ia upumoni e ala i le Agaga Paia, o tusitusiga paia, ma Ana perofeta ma aposetolo.

• Faatino i le faatuatua. Afai e le vave ona maua mai tali, faalagolago o le a faaali mai e le Alii ia tali pe a oo i le taimi sa’o. A o le taimi lenei, ia ola pea i le upumoni ua e iloa.

• Ia tausisia se vaaiga e faavavau. Taumafai e vaai atu i mea e faapei ona silasila i ai le Alii, ae le pei ona vaai i ai le lalolagi. Tagai i au fesili i le matalalaga o le ata o le faaolataga a le Tama Faalelagi.

Manatu mo Suesuega Faaleaiga o Tusitusiga Paia ma Afiafi Faaleaiga

Mataio 13:1–23.Ina ia fesoasoani i lou aiga ia sauniuni e aoao mai le Feagaiga Fou i lenei tausaga, e mafai ona tou faitau i le faataoto i le lulu saito. E ono fiafia lou aiga e o i fafo ma vaavaai mo ituaiga eleele eseese o loo faamatalaina i le faataoto. E mafai faapefea ona tatou faia o tatou loto ia pei o le “eleele lelei” lea na faamatalaina e Iesu? (Mataio 13:8).

Kalatia 5:22–23; Filipi 4:8.Na valaaulia oe e Peresitene Russell M. Nelson e “suia [lou] fale i se falefetafa’i o le faatuatua” ma “toefaatulaga lou fale i se nofoaga autu o le aoaoina o le talalelei.” Ia i latou o e faia ia mea, sa ia folafola mai: “O le a fiafialau fanau e aoao ma ola i aoaoga a le Faaola, ma o le a faaitiitia le faatosinga a le fili i lou olaga ma i lou aiga. O suiga i lou aiga o le a iloga ma tumau” (“Avea ma Faataitaiga Lelei o le Au Paia o Aso e Gata Ai,” Liahona, Nov. 2018, 113).

O le amataga o le tausaga fou o se taimi lelei lea e faia ai se fonotaga faaleaiga e uiga i le faia o lo outou aiga “falefetafa’i o le faatuatua” ma “se nofoaga autu o le aoaoina o le talalelei.” O a ni manatu ua oo atu i tou mafaufau o ni auala e faia ai lenei mea, a o tatou faitau i le Kalatia 5:22–23 ma le Filipi 4:8? Atonu e mafai e lou aiga ona faatutu ni sini faaletagata lava ia ma faaleaiga e suesue le Feagaiga Fou i le tausaga a sau nei. O le a se mea e mafai ona tatou faia e faamanatu ai i tatou lava e uiga ia tatou sini?

Mo nisi manatu mo le aoaoina o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Aoao Mai ia Ou Savali i le Malamalama,” Tusipese a Tamaiti, 70.

Faaleleia o le Suesuega Faaletagata Lava Ia

Vaavaai mo le aoaoga faavae. O se aoaoga faavae, o se upumoni faavavau e le masuia. Na tautino mai e Peresitene Boyd K. Packer e faapea “o le aoaoga faavae moni a malamalama i ai, e suia ai uiga ma amioga” (Little Children,” Ensign, Nov. 1986,17). A o outou suesueina ma lou aiga ia tusitusiga paia, vaavaai mo upumoni ia e mafai ona fesoasoani ia te outou ia ola atili ai faapei o le Faaola.

Malamalama o le Lalolagi, saunia e Brent Borup