O Ioane le Papatiso o loo Papatisoina Iesu

O le faamalama tioata lanu o le Malumalu o Navu Ilinoi, saunia e Toma Holdman

23–29 Ianuari

Mataio 3; Mareko 1; Luka 3

“Ina Teuteu ia Outou le Ala o le Alii”

Amata i le faitauina o le Mataio 3; Mareko 1; ma le Luka 3. A o e tatalo mo le Agaga Paia e fesoasoani ia e malamalama i nei mataupu, o le a Ia tuu atu ia te oe malamalamaaga e faapitoa lava mo oe. Tusifaamaumau nei lagona uuna‘i, ma fai ni fuafuaga e faatino.

Tusifaamaumau Ou Lagona Uuna‘i

E mafai e Iesu Keriso ma Lana talalelei ona suia oe. Na sii mai e Luka se valo‘aga anamua a Isaia lea na faamatala mai ai le a‘afiaga o le a i ai o le afio mai o le Faaola: “O vanu uma e faaeaina ia; o mauga uma ma mea maupu‘epu‘e e faamaulaloina ia; o mea faafatiatama‘i e fai ma mea faalaugatasi ia, ma mea gaoa e fai ma mea laulelei” (Luka 3:5; tagai foi Isaia 40:4). O lenei savali e mo i tatou uma, e aofia ai i latou o e manatu e le mafai ona latou sui. Afai e i ai se mea e tumau pei o se mauga e mafai ona faalaugatasia, o le mea moni foi la e mafai e le Alii ona fesoasoani ia i tatou e faasa’osa’o o tatou lava ala piopio (tagai Luka 3:4–5). A o tatou taliaina le valaaulia a Ioane le Papatiso e salamo ma suia, ua tatou saunia o tatou mafaufau ma loto e talia Iesu Keriso ina ia mafai foi e i tatou ona “vaaia le faaolataga mai le Atua” (Luka 3:6).

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

O ai Mareko?

I tusitala o Evagelia, e pito i itiiti lava se mea ua tatou iloa e uiga ia Mareko. Ua tatou iloa o ia o se soa faifeautalai a Paulo, Peteru, ma nai isi faifeautalai. E toatele sikola o le tusi paia e talitonu na faatonuina e Peteru ia Mareko e tusifaamaumau ia mea na tutupu i le soifuaga o le Faaola. O le Evagelia a Mareko sa foliga mai na tusia muamua nai lo le isi toatolu.

Tagai foi i le Bible Dictionary, “Mareko.”

Mataio 3:1–12; Mareko 1:1–8; Luka 3:2–18

O le salamo o se suiga tele o le mafaufau ma le loto.

O le misiona a Ioane le Papatiso o le saunia lea o loto o tagata e talia le Faaola ma avea atili e faapei o Ia. Na faapefea ona ia faia? Sa ia folafola atu, “Ina salamo ia outou” (Mataio 3:2). Ma sa ia faaaogaina faatusa e pei o fualaauaina ma saito e aoao mai ai e uiga i le salamo (tagai Luka 3:9, 17).

O a isi faatusa e te tau i ai i tala o le galuega a Ioane le Papatiso? (tagai Mataio 3:1–12; Mareko 1:1–8; Luka 3:2–18). Mafaufau e maka i au tusitusiga paia pe tusi foi ni ata o na mea. O a mea o aoao mai e nei faatusa e uiga i le aoaoga faavae ma le tatau o le salamo?

O le salamo moni o “se suiga i le mafaufau, o se mafaufau fou e uiga i e Atua, i le tagata lava ia, ma le lalolagi. … [O lona uiga] o “se liliu atu o le loto ma manatu i le Atua ” (Bible Dictionary, “Salamo”). I le Luka 3:7–14, o a suiga na valaaulia e Ioane ia tagata e fai ina ia saunia ai e talia Keriso? E faapefea ona faatatau lenei fautuaga ia te oe? E mafai faapefea ona e faaali atu ua e salamo moni? (tagai Luka 3:8).

Tagai foi Russell M. Nelson, “E Mafai Ona Tatou Faia Ia Lelei Atu ma Ia Tatou Lelei Atu,” Liahona, Me 2019, 67–69; Dallin H. Oaks, “Faamamāina e le Salamo,” Liahona, Me 2019, 91–94.

Mataio 3:7; Luka 3:7

O ai le au Faresaio ma le au Satukaio?

O le au Faresaio o tagata o se aulotu Iutaia o e sa faamaualuluga i lo latou tausisia a’ia’i o le tulafono a Mose ma ona sauniga. O le au Satukaio sa o se vasega o tagata mauoa Iutaia ua tele o latou faatosinaga i mataupu faalelotu ma faaleupufai; latou te le’i talitonu i le aoaoga faavae o le toetu. Na taufai se ese uma nei vaega mai le uluai faamoemoega o tulafono a le Atua.

Tagai foi Mataio 23:23–28; Bible Dictionary, “Pharisees,” “Sadducees.”

Mataio 3:11, 13–17; Mareko 1:9–11; Luka 3:15–16, 21–22

Sa papatisoina Iesu Keriso ina ia “faataunuuina mea tonu uma.”

Ina ua papatisoina oe, sa e mulimuli i le faataitaiga a le Faaola. Faatusatusa mea ua e aoaoina mai i tala i le papatisoga o le Faaola ma le mea sa tupu i le taimi o lou papatisoga.

O le papatisoga o le Faaola	O Lo’u Papatisoga:
O le papatisoga o le Faaola O ai na papatisoina Iesu, ma o le a le pule na ia umia?	O Lo’u Papatisoga: O ai na papatisoina oe, ma o le a le pule na ia umia?
O le papatisoga o le Faaola O fea na papatiso ai Iesu?	O Lo’u Papatisoga: O fea na papatiso ai oe?
O le papatisoga o le Faaola Na faapefea ona papatisoina Iesu?	O Lo’u Papatisoga: Na faapefea ona papatisoina oe?
O le papatisoga o le Faaola Aisea na papatiso ai Iesu?	O Lo’u Papatisoga: Aisea na papatisoina ai oe?
O le papatisoga o le Faaola Na faapefea ona faaalia e le Tama Faalelagi na fiafia o Ia ia Iesu?	O Lo’u Papatisoga: Na faapefea ona faaalia e le Tama Faalelagi na fiafia o Ia ina ua e papatiso? O faapefea ona Ia faaalia Lana faamaoniga talu mai lena taimi?

Tagai foi 2 Nifae 31; Mosaea 18:8–11; Mataupu Faavae ma Feagaiga 20:37, 68–74; The Baptism of Jesus” (vitio, ChurchofJesusChrist.org.

Mataio 3:16–17; Mareko 1:9–11; Luka 3:21–22

O sui o le Aiga Atua o ni peresona mavaevae e toatolu.

Ua i ai i le Tusi Paia le tele o faamaoniga o sui o le Aigaatua o ni tagata mavaevae se toatolu. O tala i le papatisoga o le Faaola o se tasi ia o faataitaiga. A o e faitau i nei tala, mafaufau loloto i mea e te aoaoina e uiga i le aigaatua. Aisea e taua ai nei aoaoga faavae ia te oe?

Tagai foi i le Kenese 1:26; Mataio 17:1–5; Ioane 17:1–3; Galuega 7:55–56; Mataupu Faavae ma Feagaiga 130:22.

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Mataio 3.Na umia e Ioane le Papatiso le Perisitua Arona. O le a se mea e mafai ona tatou aoaoina mai i le faataitaiga a Ioane e uiga i faamoemoega o le Perisitua Arona? O a ni faamanuiaga tatou te maua ona o le Perisitua Arona? Afai o i ai se alii talavou i lou aiga, atonu e te faaaluina le taimi e fesoasoani ai ia te ia ia malamalama i le ala e mafai ona ia faaaoga ai le Perisitua Arona e faamanuia ai isi. Tagai foi Mataupu Faavae ma Feagaiga 13:1; 20:46–60.)

alii talavou o loo papatisoina se isi

A papatisoina i tatou, e tafiesea a tatou agasala.

Mataio 3:11–17; Mareko 1:9–11; Luka 3:21–22Na vaai tagata o lou aiga i se tasi o papatisoina pe faamauina o se tagata o le Ekalesia? O le a se mea na lagona e tagata o le aiga? Atonu e mafai ona e aoao i latou e uiga i le faafaatusa o le papatisoga ma le faamauga. E faapefea ona pei le papatisoina ma faamauina o se fanauga fou? Aisea tatou te lilofia atoa ai i le vai pe a tatou papatiso? Aisea tatou te ofuina ai ni ofu papae pe a tatou papatiso? Aisea ua faamatala ai le meaalofa o le Agaga paia o se “papatisoga i le afi”? (Mataupu Faavae ma Feagaiga 20:41; tagai foi Bible Dictionary, “Baptism,” “Holy Ghost”).

Mataio 3:17; Mareko 1:11; Luka 3:22.O le a se taimi na tatou lagonaina ai ua fiafia le Atua ia i tatou? O a ni mea e mafai ona tatou faia o se aiga ia fiafia ai le Atua?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Papatisoga,” Tusipese a Tamaiti, 54.

Faaleleia o Suesuega Faaletagata Lava Ia

Ole atu i le Alii mo le fesoasoani. Na tuuina mai tusitusiga paia e ala i faaaliga, ma ina ia malamalama moni ai, tatou te manaomia faaaliga patino. Ua folafola mai le Alii, “Ia outou ole atu, ona foaiina mai ai lea ia te outou; ia outou saili, ona outou maua ai lea; ia outou tuitui atu, ona toina ai lea ia te outou” (Mataio 7:7).

O Ioane o loo papatisoina Iesu

O Ioane le Papatiso o loo Papatisoina Iesu, saunia e Greg K. Olsen