Jesus Preaching Sermon on the Mount [Si Jesus nga Nagsangyaw sa Wali diha sa Bungtod], ni Gustave Doré

Pebrero 13–19

Mateo 5; Lucas 6

“Bulahan Kamo”

Ang imong oportunidad sa pagtudlo sa mga bata bililhon. Samtang imong andamon ang imong kaugalingon sa espirituhanon nga paagi, ang Ginoo mogiya kanimo.

Dapita ang Pagpaambit

Hangyoa ang mga bata sa paghisgot og butang nga ilang gibuhat karong semanaha aron sa pagpaambit sa kahayag sa Ginoo ngadto sa usa ka tawo—tingali pinaagi sa pagkahimong maayo nga ehemplo o sa pagpakita og gugma ug pagkamabination.

Itudlo ang Doktrina: Mas Gagmay nga mga Bata

Mateo 5:9

Mamahimo ako nga tigpasiugda og kalinaw.

Ang mga bata nga imong gitudloan mamahimong adunay gamhanan nga impluwensiya sa panimalay samtang motratar sila sa ubang tawo uban sa gugma ug pagkamabination.

Posible nga mga Kalihokan

• Basaha ang Mateo 5:9 ngadto sa mga bata, ug ipasabot nga ang mga tigpasiugda og kalinaw mohimong malinawon sa bisan unsang dapit, bisan asa pa sila. Isulat sa gagmayng piraso sa mga papel ang pipila ka mabingkilon nga mga sitwasyon nga mahimong atubangon sa mga bata (sama pananglit, ang mga igsoon mag-away tungod sa usa ka dulaan). Dapita ang matag bata sa pagkuha og usa ka piraso sa papel. Samtang imong basahon ang matag sitwasyon, hangyoa ang mga bata sa pagpaambit kon sa unsang paagi nga sila mamahimong tigpasiugda og kalinaw niana nga sitwasyon. O pagpaambit og pipila ka dili tinuod [fictional] nga mga sitwasyon, ug tabangi ang mga bata sa pagtino kon ang mga tawo nga nalambigit mga tigpasiugda ba og kalinaw o dili.

• Dapita ang pipila ka ginikanan sa mga bata sa pagbisita sa imong klase ug sa pagpaambit og mga ehemplo sa mga panahon sa dihang ang ilang mga anak mao ang mga tigpasiugda og kalinaw sa panimalay.

Mateo 5:14–16

Gusto ni Jesus nga mamahimo ako nga usa ka kahayag ngadto sa uban.

Ang gagmay nga mga bata mahimong adunay gamhanan nga impluwensiya alang sa kaayohan ngadto sa uban. Unsaon nimo sa pagdasig kanila aron mapasanag ang ilang kahayag?

Posible nga mga Kalihokan

• Ipakita sa mga bata ang pipila ka butang nga mohatag og kahayag, ug ipakita ang usa ka litrato sa mga bata. Basaha ang Mateo 5:14–16, ug sultihi ang mga bata nga ang ilang maayo nga mga ehemplo mamahimong sama sa usa ka kahayag nga makita sa uban. Unsaon nato sa paggamit sa atong kahayag aron sa pagdala sa uban ngadto sa Dios?

• Pasigaha ang usa ka flashlight libot sa lawak, ug dapita ang mga bata sa pagsunod sa kahayag gamit ang ilang mga mata. Gamita ang kahayag aron sa paggiya sa ilang mga mata ngadto sa usa ka hulagway sa Manluluwas. Sa unsang paagi ang kahayag makatabang kanato? Sa unsang paagi nga mahimo kitang kahayag sa kalibotan? Taboni ang flashlight. Unsay mahitabo kon dili nato ipaambit ang atong kahayag o kon ato kining tagoan?

• Tagoi ang usa ka flashlight sa kwarto, ug palonga ang mga suga. Ipapangita kini sa mga bata. Rebyoha ang Mateo 5:15, ug hisgoti kon nganong dili nato angayng tagoan ang atong kahayag.

• Tabangi ang mga bata sa pagpangita ug pagkolor sa gitagoan nga mga kandila diha sa pahina sa kalihokan niini nga semana.

• Kantaha uban sa mga bata ang usa ka awit mahitungod sa pagkahimong usa ka kahayag alang sa uban, sama sa “Si Jesus Buot nga Ako Mahimong Bidlisiw,” “Dan-ag,” o “Sama Ko sa Usa ka Bitoon” (Songbook sa mga Bata, 38, 96–97, 84).

Mamahimo kita nga malipayon pinaagi sa pagpuyo sa paagi nga gitudlo ni Jesus.

Mateo 5:44–45

Gusto ni Jesukristo nga higugmaon nako ang tanan.

Ang gagmayng mga bata makasugod na karon sa pagbansay sa pagpakita og gugma, bisan kon sila gitratar sa dili makiangayon nga paagi sa ilang mga kaedad o mga igsoon. Samtang imong basahon ang Mateo 5:44–45, ikonsiderar kon sa unsang paagi ang mga pagtulun-an sa Manluluwas magamit ngadto sa mga bata nga imong gitudloan.

Posible nga mga Kalihokan

• Isulti og balik ang Mateo 5:44 gamit ang mga pulong ug mga sitwasyon nga masabtan ug bation sa mga bata. Hangyoa ang mga bata sa pagpaambit og mga panahon nga mipakita sila og gugma ngadto sa usa ka tawo bisan kon lisod kining buhaton. Sa unsang paagi gibati nila kini nga mga kasinatian?

• Isip usa ka klase, kantaha ang usa ka awit mahitungod sa paghigugma sa uban, sama sa “Maghigugmaay” (Songbook sa mga Bata, 74). Unsa ang atong makat-onan gikan niini nga awit mahitungod sa paghigugma sa uban?

• Hatagi ang mga bata og mga kasingkasing nga papel nga gisulatan sa mga pulong nga “Akong ipakita ang akong gugma alang sa tanan.” Hangyoa sila sa pag-adorno sa mga kasingkasing ug sa pagsab-it niini diha sa ilang mga panimalay isip usa ka pahinumdom nga mohigugma sa uban.

Itudlo ang Doktrina: Mas Magulang nga mga Bata

Mateo 5:3–12

Mamahimo akong malipayon kon magpuyo ako sa paagi nga gitudlo ni Jesus.

Samtang imong basahon ang Mateo 5:3–12, unsa nga mga pulong ug mga pulongan ang makahuloganon kanimo? Sa unsang paagi kini nga mga pagtulon-an makapanalangin sa mga kinabuhi sa mga bata nga imong gitudloan?

Posible nga mga Kalihokan

• Paghimo og tsart diha sa pisara nga adunay duha ka kolum nga gisulatan og Bulahan ang … ug Panalangin. Dapita ang mga bata sa pagsiksik sa Mateo 5:3–12 nga mangita sa mga kinaiya niadtong giingon ni Jesus nga mamahimong bulahan ug ang mga panalangin nga gisaad Niya kanila. Dayon sulati ang tsart sa unsay ilang nakit-an. Hisgoti sa mga bata kon unsay buot ipasabot sa matag kinaiya ug sa katugbang nga panalangin.

• Isulat ang matag kinaiya gikan niini nga mga bersikulo diha sa usa ka kard ug ang katugbang nga panalangin niini diha sa usa ka kard. Sama pananglit, isulat sa usa ka kard ang “mapaubsanon,” ug sa laing kard isulat ang “maila ang tibuok yuta” (bersikulo 5). Ipapares-pares sa mga bata ang mga kinaiya ug ang mga panalangin. Hangyoa ang mga bata sa pagpili og usa sa mga kinaiya niini nga mga bersikulo nga gusto nilang mapalambo.

Mateo 5:9, 21–24, 38–47

Mamahimo ako nga tigpasiugda og kalinaw.

Mitudlo si Jesus nga ang mga tigpasiugda og kalinaw pagatawgon nga mga anak sa Dios. Unsaon nimo sa pagdasig ang mga bata nga mamahimong mga tigpasiugda og kalinaw?

Posible nga mga Kalihokan

• Dapita ang usa ka bata sa pagbasa og kusog sa Mateo 5:9. Unsa man ang usa ka tigpasiugda og kalinaw? Unsa ang mga paagi nga mamahimo kitang mga tigpasiugda og kalinaw diha sa atong mga pamilya ug mga higala? (Alang sa pipila ka ideya, tan-awa ang mga bersikulo 21–24, 38–47.)

• Hangyoa ang matag bata sa paghunahuna og usa ka sitwasyon nga nagkinahanglan sa tabang sa usa ka tigpasiugda og kalinaw. Unsa ang buhaton sa usa ka tigpasiugda og kalinaw niana nga sitwasyon?

• Dapita ang mga bata sa pagpaambit og mga higayon sa dihang mipakita sila og gugma sa usa ka tawo, bisan kon kana nga tawo lahi kanila o lisod higugmaon.

Mateo 5:14–16

Ang akong kahayag mahimong modan-ag sa dalan aron ang uban makasunod ni Jesus.

Daghan sa mga bata nga imong gitudloan mihimo og mga pakigsaad sa bunyag. Hunahunaa kon sa unsang paagi ang mga pulong sa Manluluwas diha sa Mateo 5:14–16 adunay kalabotan sa ilang mga pakigsaad. Unsa kaha ang mga mensahe nga aduna ang Ginoo niini nga tudling alang sa mga bata sa imong klase?

Posible nga mga Kalihokan

• Tabangi ang mga bata nga makasag-ulo sa Mateo 5:16. Isulat ang bersikulo diha sa pisara. Basaha kini og dungan sa pipila ka higayon, nga papason ang pipila ka pulong sa matag higayon. Dapita ang mga bata sa pagdrowing og mga butang nga ilang mabuhat aron mahimong kahayag ngadto sa uban. Hisgoti kon sa unsang paagi nga ang pagkahimong kahayag ngadto sa uban makatabang kanato sa pagtuman sa atong mga pakigsaad sa bunyag (tan-awa sa Mosiah 18:8–10).

• Kantaha ang usa ka awit mahitungod sa pagpaambit og kahayag sa uban, sama sa “Dan-ag” (Songbook sa mga Bata, 96). Sa unsang paagi nga kita makapaambit sa kahayag sa Manluluwas?

• Hangyoa ang mga bata sa pagdrowing og mga butang nga mohatag kanato og kahayag. Basaha ang Mateo 5:14–16. Pangutan-a sila nganong gusto ni Jesus nga mamahimo kitang kahayag sa kalibotan.

• Dapita ang duha ka bata nga mag-atubang sa usag usa, ug hangyoa ang usa ka bata nga maningkamot nga makapahiyom ang usa nga dili mohikap kaniya. Hisgoti ang mahitungod sa gahom nga anaa sa mga bata nga makadala og kalipay ngadto sa uban.

Awhaga ang Pagkat-on diha sa Panimalay

Dapita ang mga bata sa pagtan-aw og tawo nga nahimong tigpasiugda og kalinaw niining semanaha. Sa pagsugod sa klase sa sunod semana, dapita sila sa paghisgot kon kinsa ug unsay ilang nakita.

Pagpalambo sa Atong Pagtudlo

Tabangi ang mga bata nga mahimong aktibo. “Samtang ikaw magtudlo sa mga bata, tugoti sila sa paghimo, pagdrowing, pagkolor, pagsulat, ug pagmugna. Kini nga mga butang dili lang makalingaw nga mga kalihokan—mahinungdanon kini sa pagkat-on” (Pagtudlo sumala sa Pamaagi sa Manluluwas, 25).