Into the Wilderness [Ngadto sa Kamingawan], ni Eva Koleva Timothy

Enero 30–Pebrero 5

Mateo 4; Lucas 4–5

“Ang Espiritu sa Ginoo ania Kanako”

Sugdi ang imong pagpangandam alang niini nga leksiyon pinaagi sa pagbasa sa Mateo 4 ug Lucas 4–5. Ang Dali, Sunod Kanako—Alang sa mga Indibidwal ug mga Pamilya makatabang kanimo sa pagsabot niini nga mga kapitulo, ug kini nga latid makahatag kanimo og mga ideya sa pagtudlo.

Dapita ang Pagpaambit

Hangyoa ang mga bata nga ipasa-pasa ang usa ka hulagway ni Jesus gikan sa usa ka bata ngadto sa sunod. Samtang gunitan sa matag bata ang hulagway, dapita siya sa pagpaambit og usa ka butang nga gibuhat ni Jesus sa dihang dinhi pa Siya sa yuta.

Itudlo ang Doktrina: Mas Gagmay nga mga Bata

Mateo 4:1–11; Lucas 4:1–13

Makapili ako sa matarong sama sa gibuhat ni Jesus.

Ang gagmay nga mga bata “dili makasala” (Doktrina ug mga Pakigsaad 29:47). Hinuon, ang istorya ni Jesus nga nakigbatok sa mga tintasyon ni Satanas makadasig sa mga bata sa pagpili sa matarong.

Posible nga mga Kalihokan

• Isaysay ang istorya bahin sa mga pagtintal kang Jesus gikan sa Mateo 4:1–11. (Tan-awa usab sa “Kapitulo 11: [Si] Jesus Gitintal,” sa Mga Istorya sa Bag-ong Tugon, 30–31.) Sa tukma nga mga higayon sa istorya, ipangutana ang, “Unsa kaha ang angay nga buhaton ni Jesus?”

• Ipakita ang usa ka hulagway ni Jesukristo, ug dayon ihulagway ang mga pagpili nga tingali himoon sa usa ka gamayng bata. Hangyoa ang mga bata sa pag-abante og usa ka lakang padulong sa hulagway sa matag higayon nga mohulagway ka og maayo nga pagpili. Hangyoa sila nga moatras og usa ka lakang gikan niini sa matag higayon nga mohulagway ka og dili maayo nga pagpili.

• Tabangi ang mga bata nga makat-on sa mga pulong sa usa ka awit mahitungod sa paghimo og maayo nga mga pagpili, sama sa “Pilia ang Matar[o]ng nga Paagi” (Songbook sa mga Bata, 82). Gamita ang mga hulagway, mga butang, o ubang biswal nga mga tabang [visual aids] nga may kalabotan ngadto sa mga pulong sa awit.

Lucas 4:18–19

Si Jesukristo mao ang akong Manluluwas.

Ang Lucas 4:18–19 naghulagway sa misyon ni Jesus. Unsaon nimo pagtabang ang mga bata nga makadayeg sa unsay Iyang nahimo alang kanila?

Posible nga mga Kalihokan

• Basaha ang Lucas 4:18–19 ngadto sa mga bata, ug ipasabot kon unsa ang gisugo kang Jesukristo nga buhaton dinhi sa yuta (sa pagtudlo kanato kon unsaon nga makabalik ngadto sa Langitnong Amahan, sa paghupay kanato, ug sa pag-ayo sa mga tawo). Ipaambit kon sa unsang paagi nga gibuhat Niya kini nga mga butang alang kanimo.

• Dapita ang pipila ka bata nga magpakaaron-ingnon nga naglibog, naguol, o nasakit. Hangyoa ang ubang mga bata sa pagdrama-drama kon unsay ilang mabuhat sa pagtabang kanila. Ipamatuod nga si Jesukristo mianhi aron sa pagtudlo, paghupay, ug pag-ayo kanato ug nga kita kinahanglang mosunod sa Iyang ehemplo.

• Ipakita ang mga hulagway ni Jesus nga nagtuman sa Iyang misyon (tan-awa sa Libro sa mga Hulagway sa Ebanghelyo). Hangyoa ang mga bata sa paghulagway kon unsa ang gibuhat ni Jesus diha sa matag hulagway. Ipakita usab ang mga litrato sa mga tawo nga naningkamot nga mahisama ni Jesus (makakita ka og pipila diha sa mga magasin sa Simbahan).

Mateo 4:18–22; Lucas 5:1–11

Si Jesukristo nagdapit kanato nga mahimong “[mga mananagat og] mga tawo.”

Ang panawagan sa Manluluwas nga, “Kuyog kamo kanako ug tudloan ko kamo sa pagpanagat [o]g mga tawo” (Mateo 4:19), para sa tanan, lakip sa mga bata.

Posible nga mga Kalihokan

• Pagdapit og duha ka bata nga magpakaaron-ingnon nga sila si Simon Pedro ug Andres samtang imong basahon ang Mateo 4:18–22. Tabangi ang mga bata sa pagtino kon unsay gibiyaan niini nga mga tawo aron mosunod ni Jesus.

• Papuli-puliha ang mga bata sa pagsaysay sa istorya gikan niini nga mga bersikulo gamit ang hulagway sa ubos ug sa latid niini nga semana diha sa Dali, Sunod Kanako—Alang sa mga Indibidwal ug mga Pamilya.

• Kantaha og dungan ang usa ka awit mahitungod sa pagsunod ni Jesukristo, sama sa “Sundon Ko ang Plano sa Dios” (Songbook sa mga Bata, 86–87). Tabangi ang mga bata nga makakita sa mga butang nga gihisgotan diha sa awit nga ilang mahimo aron sa pagsunod ni Jesus.

• Gamita kini nga pahina sa kalihokan karong semanaha aron hisgotan uban sa mga bata kon sa unsang paagi nga sila mahimong “[mga mananagat og] mga tawo” pinaagi sa pagsunod kang Jesus. Mahimo usab kamong magdula og pagpares-pares [matching] nga dula gamit ang pahina sa kalihokan. Paggunting og duha ka kopya sa matag isda, ikulob kini, ug dapita ang mga bata nga tagsa-tagsa kining ihayang aron makakita og pares.

Christ Calling Two Disciples [Si Kristo nga Nagtawag og Duha ka Disipulo], ni Gary Ernest Smith

Itudlo ang Doktrina: Mas Magulang nga mga Bata

Mateo 4:1–11; Lucas 4:1–13

Si Jesus mipakita og ehemplo kanako pinaagi sa pagbatok sa tintasyon.

Gani si Jesukristo gitintal ni Satanas, apan wala gayod Siya magpadala. Unsaon nimo pagtabang ang mga bata nga mosunod sa Iyang ehemplo?

Posible nga mga Kalihokan

• Paghimo og tsart sa pisara nga pangalanan og Mga Tintasyon ni Satanas ug Mga Tubag ni Jesus. Tabangi ang mga bata nga masulatan ang sulod sa tsart gamit ang Mateo 4:1–11 ug Lucas 4:1–13. Pangutan-a ang mga bata kon sa unsang paagi sila makasunod sa ehemplo ni Jesus.

• Pagsulat og pipila ka sitwasyon diin ang usa ka bata mahimong matintal sa paghimo og sayop nga pagpili. Papilia ang usa ka bata nga basahon ang usa ka sitwasyon, ug hangyoa ang mga bata nga maghisgot kon unsaon nila sa pagbatok ang tintasyon niana nga sitwasyon.

Mateo 4:1–2

Ang pagpuasa makatabang kanako nga mobati nga duol sa Langitnong Amahan.

Sa wala pa magsugod ang Iyang pangalagad, si Jesus nagpuasa ug “nakig-uban sa Dios” (Joseph Smith Translation, Matthew 4:2 [sa Giya ngadto sa mga Kasulatan]). Tabangi ang mga bata nga makasabot kon sa unsang paagi nga ang pagpuasa makahatag kanila og espirituwal nga kalig-on ug makatabang kanila nga mobati nga duol sa Langitnong Amahan.

Posible nga mga Kalihokan

• Dapita ang usa ka bata sa pagbasa og kusog sa Mateo 4:1–2. Ipasabot nga diha sa mga kausaban sa Hubad ni Joseph Smith niini nga mga bersikulo, atong makat-onan nga si Jesus miadto sa kamingawan aron makig-uban sa Dios (tan-awa sa Hubad ni Joseph Smith, Mateo 4:1). Unsa ang gibuhat ni Jesus aron mas mapaduol sa Dios? Ipaambit kon sa unsang paagi ang pagpuasa nakatabang kanimo nga mobati nga mas duol sa Langitnong Amahan.

• Dapita ang mga bata nga nakapuasa na kaniadto sa pagpaambit sa ilang mga kasinatian. Unsaon nila sa pagpasabot ang pagpuasa ngadto sa usa ka tawo kinsa wala pa gayod makapuasa sukad?

• Pagsulat og mga pangutana mahitungod sa pagpuasa (sama sa ngano, kanus-a, o unsaon nato sa pagpuasa) diha sa mga piraso sa papel, ug ibutang kini sa usa ka panaksan. Dapita ang mga bata sa pagkuha og usa ka pangutana ug sa pagsulay og tubag niini. Unsa nga mga kasinatian ang mapaambit nimo o sa mga bata mahitungod sa pagpuasa?

Lucas 4:16–22, 28–30

Si Jesukristo mao ang akong Manluluwas.

Pamalandongi kon sa unsang paagi ang Manluluwas mipanalangin sa imong kinabuhi. Unsaon nimo pagtabang ang mga bata nga mas makadayeg sa Iyang impluwensiya diha sa ilang kinabuhi?

Posible nga mga Kalihokan

• Dapita ang usa ka bata nga motungha sa klase nga andam sa pagpaambit sa istorya diha sa Lucas 4:16–30. Tingali makatabang ang paggamit sa “Kapitulo 17: Nasuko nga mga Tawo sa Nazaret” (diha sa Mga Istorya sa Bag-ong Tugon, 42–43).

• Basaha ang Lucas 4:18 samtang magsunod ang mga bata. Hangyoa sila sa paghimo og lista sa mga butang nga giingon sa Manluluwas nga mianhi Siya aron sa pagbuhat. Dapita ang mga bata sa pagpaambit og mga ehemplo sa mga panahon sa dihang gibuhat kini nga mga butang ni Kristo, diha ba sa mga kasulatan o sa ilang kinabuhi.

• Isulat diha sa mga piraso sa papel ang mga pulong “Tungod ni Jesukristo …” Hatagi og papel ang matag bata, ug dapita sila sa pagsulat kon unsaon nila sa pagkompleto ang pulongan. Tugoti sila sa pagpaambit sa unsay ilang nasulat.

Mateo 4:18–22; Lucas 5:1–11

Si Jesukristo nagdapit kanato sa pagsunod Kaniya ug mahimong “[mga mananagat og] mga tawo.”

Adunay daghang paagi nga ang mga bata makasunod sa Manluluwas ug mahimong “[mga mananagat og] mga tawo” (Mateo 4:19). Unsaon nimo pagtabang kanila nga makakita sa maayo nga impluwensiya nga ilang mahimo ngadto sa uban?

Posible nga mga Kalihokan

• Dapita ang mga bata sa pagbasa sa Mateo 4:18–22 ug Lucas 5:1–11. Giunsa pagsanong sa mga disipulo ni Jesus ang Iyang tawag sa pagsunod Kaniya? Unsa ang atong mahimo aron masunod ang ilang ehemplo?

• Ipakita sa mga bata ang pipila ka himan sa panagat o hulagway sa usa ka mananagat. Unsay ipasabot nga mahimong “[mga mananagat og] mga tawo”? Unsa nga mga himan ang anaa kanato nga makatabang kanato nga mahimong mga mananagat og mga tawo?

Awhaga ang Pagkat-on diha sa Panimalay

Dapita ang mga bata sa pagpaambit ngadto sa ilang mga pamilya sa unsay ilang nakat-onan mahitungod sa pagkahimong mga mananagat og mga tawo.

Pagpalambo sa Atong Pagtudlo

Ang mga bata makaila sa impluwensiya sa Espiritu. Tudloi ang mga bata nga ang mga pagbati sa kalinaw, gugma, ug kainit nga anaa kanila kon maghisgot o magkanta sila mahitungod ni Jesukristo ug sa Iyang ebanghelyo nagagikan sa Espiritu Santo. Kini nga mga pagbati makalig-on sa ilang mga pagpamatuod.