“Enero 30–Pebrero 5. Mateo 4; Lucas 4–5: ‘Ang Espiritu sa Ginoo ania Kanako,’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2023 (2022)

“Enero 30–Pebrero 5. Mateo 4; Lucas 4–5,” Dali, Sunod Kanako—Alang sa mga Indibidwal ug mga Pamilya: 2023

Imahe

Jesus nagbarog sa kamingawan

Ngadto sa Kamingawan, ni Eva Koleva Timothy

Enero 30–Pebrero 5

Mateo 4; Lucas 4–5

“Ang Espiritu sa Ginoo ania Kanako”

Gigamit sa Manluluwas ang mga kasulatan sa pagsalikway sa mga tintasyon ni Satanas ug sa pagpamatuod sa Iyang kaugalingong balaan nga misyon (tan-awa sa Lucas 4:1–21). Pamalandonga kon unsaon sa mga kasulatan paglig-on sa imong hugot nga pagtuo ug sa imong tinguha sa pagsalikway sa tintasyon.

I-rekord ang Imong mga Panghunahuna

Gikan sa Iyang kabatan-onan, si Jesus ingon og nakaamgo nga Siya adunay talagsaon, sagrado nga misyon. Apan samtang si Jesus nangandam sa pagsugod sa Iyang yutan-ong pangalagad, ang kaaway nagtinguha sa pagtanom og pagduda sa hunahuna sa Manluluwas. “Kay ikaw Anak man sa Dios,” miingon si Satanas (Lucas 4:3). Apan ang Manluluwas nakigsulti sa Iyang Amahan sa Langit. Nakahibalo Siya sa mga kasulatan, ug nasayod Siya kon kinsa Siya. Ngadto Kaniya, ang tanyag ni Satanas—“Kanimo ihatag ko kining tanang kagamhanan” (Lucas 4:6)—usa ka walay sulod nga tanyag, kay ang tibuok kinabuhi nga pagpangandam sa Manluluwas mitugot Kaniya sa pagdawat “sa gahum sa Espiritu” (Lucas 4:14). Busa bisan pa sa tintasyon, mga pagsulay, ug pagsalikway, si Jesukristo wala gayod magduhaduha gikan sa Iyang gitakda nang daan nga buhat: “Kinahanglan iwali ko ang maayong balita mahitungod sa gingharian sa Dios … kay alang sa maong katuyoan gipadala ako” (Lucas 4:43).

Imahe

icon sa personal nga pagtuon

Mga Ideya alang sa Personal nga Pagtuon sa Kasulatan

Mateo 4:1–2

Ang pagpakigsulti sa Dios nag-andam kanako sa pag-alagad Kaniya.

Sa pagpangandam alang sa Iyang misyon, miadto si Jesus sa kamingawan “aron makig-uban sa Dios” (Hubad ni Joseph Smith, Mateo 4:1 [diha sa Giya ngadto sa mga Kasulatan]). Hunahunaa unsay imong buhaton aron mobati nga duol ngadto sa Dios. Sa unsa nga paagi kini makaandam kanimo alang sa buhat nga gusto Niya nga imong buhaton?

Mateo 4:1–11; Lucas 4:1–13

Si Jesukristo nagpakita og ehemplo alang kanako pinaagi sa pagsalikway sa tintasyon.

Usahay ang mga tawo mobati nga sad-an kon sila tintalon sa pagpakasala. Apan bisan ang Manluluwas, kinsa mipuyo nga “walay sala” (Mga Hebreohanon 4:15), gitintal. Nahibalo si Jesukristo sa mga tintasyon nga kita nag-atubang ug unsaon sa pagtabang kanato sa pagbuntog niini (tan-awa sa Mga Hebreohanon 2:18; Alma 7:11–12).

Samtang ikaw nagbasa sa Mateo 4:1–11 ug Lucas 4:1–13, unsay imong nakat-onan nga makatabang kanimo kon ikaw nag-atubang og mga tintasyon? Mahimo nimong han-ayon ang imong mga hunahuna sa usa ka tsart sama niini:

Jesukristo	Ako
Jesukristo Unsay gitintal ni Satanas nga ipabuhat ni Kristo?	Ako Unsay gitintal ni Satanas nga ipabuhat kanako?
Jesukristo Giunsa ni Kristo pag-andam sa pagsalikway sa tintasyon?	Ako Sa unsa nga paagi ako makapangandam sa pagsalikway sa tintasyon?
Jesukristo	Ako

Unsa ang dugang nga mga panabot ang imong naangkon gikan sa Hubad ni Joseph Smith sa Mateo 4? (tan-awa ang mga footnote sa tibuok Mateo 4).

Tan-awa usab sa 1 Mga Taga-Corinto 10:13; Alma 13:28; Moises 1:10–22.

Lucas 4:16–32

Si Jesukristo mao ang gipanagna nga Mesiyas.

Kon ikaw hangyoon sa paghulagway kon unsa ang pagabuhaton nga gipadala si Jesukristo sa yuta, unsa ang imong isulti? Pinaagi sa pagkutlo sa usa sa mga panagna ni Isaias mahitungod sa Mesiyas, ang Manluluwas mihulagway og mga bahin sa Iyang kaugalingon nga misyon (tan-awa sa Lucas 4:18–19; Isaias 61:1–2). Unsay imong nakat-onan mahitungod sa Iyang misyon samtang ikaw nagbasa niini nga mga bersikulo?

Unsa ang pipila ka mga paagi ang Manluluwas nagdapit kanimo sa pag-apil sa Iyang buhat?

Imahe

Jesus nagbarog sa sinagoga

Bisan og ang mga Judeo naghulat sulod sa mga katuigan alang sa panagna ni Isaias nga matuman, daghan ang wala modawat nga si Jesus mao ang Mesiyas sa dihang mipahayag Siya, “Niining adlawa karon, kining bahin sa kasulatan natuman diha sa inyong pagpatalinghog niini” (Lucas 4:21). Samtang basahon nimo ang Lucas 4:20–30 (tan-awa usab sa Marcos 6:1–6), sulayi ang pagbutang sa imong kaugalingon sa lugar sa mga tawo sa Nazaret. Aduna bay bisan unsa nga butang nga mahimong makapugong kanimo sa pagdawat sa hingpit ni Kristo isip imong personal nga Manluluwas?

Tan-awa usab sa Mosiah 3:5–12 .

Mateo 4:18–22; Lucas 5:1–11

Samtang ako mosalig sa Ginoo, makatabang Siya kanako sa pagkab-ot sa akong balaang potensyal.

Si Presidente Ezra Taft Benson mitudlo: “Ang mga kalalakin-an ug mga kababayen-an kinsa mosalig sa ilang mga kinabuhi ngadto sa Dios makadiskobre nga Siya makahimo og daghan pa sa ilang mga kinabuhi kay sa ilang mahimo” (Mga Pagtulun-an sa mga Presidente sa Simbahan: Ezra Taft Benson [2014], 50). Timan-i kon sa unsa nga paagi kini nahitabo ngadto ni Pedro ug sa iyang isig ka mangingisda. Nakita ni Jesus ang usa ka butang nga mas mahinungdanon diha kanila kay sa ilang nakita diha sa ilang mga kaugalingon. Gusto Niya nga himoon silang “mangingisdag tawo” (Mateo 4:19; tan-awa usab sa Lucas 5:10).

Samtang ikaw nagbasa sa Mateo 4:18–22 ug Lucas 5:1–11, pamalandonga kon unsa ang gitabang ni Kristo kanimo nga ikaw mahimo. Giunsa nimo pagbati ang iyang pagdapit kanimo sa pagsunod Kaniya? Unsaon nimo sa pagpakita sa Ginoo nga ikaw andam sa pagbiya sa tanan sa pagsunod Kaniya? (tan-awa sa Lucas 5:11).

Imahe

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Home Evening

Mateo 4:1–2; Lucas 4:1–2.Unsa nga mga panabot ang atong maangkon gikan niini nga asoy mahitungod sa gahom sa pagpuasa? Ang mga sakop sa pamilya mahimong makigbahin og mga kasinatian nga sila aduna sa pagpuasa. Tingali sa mainampoong paagi kamo makahimo og mga plano sa pagpuasa og dungan alang sa piho nga katuyoan.

Mateo 4:3–4; Lucas 4:3–4.Sa dihang gitintal ni Satanas si Kristo sa paghimo sa bato ngadto sa pan, iyang gihagit ang balaan nga pagkatawo ni Kristo pinaagi sa pag-ingon, “Kay ikaw anak man sa Dios” (Mateo 4:3). Ngano nga si Satanas mosulay sa paghimo kanato nga magduda sa atong balaang pagkatawo––ug sa Manluluwas? Giunsa niya pagpaninguha sa paghimo niini? (Tan-awa usab sa Moises 1:10–23.)

Hubad ni Joseph Smith, Mateo 4:11.Human si Jesus gisulayan sa pisikal ug espirituhanong paagi, ang Iyang mga hunahuna mibalhin ngadto sa mga panginahanglan ni Juan nga Bautista, nga atua sa bilanggoan: “Ug karon si Jesus nasayod nga si Juan gibalhog ngadto sa bilanggoan, ug siya mipadala og mga anghel, ug tan-awa, sila miabot ug nangalagad ngadto kaniya [Juan]” (Hubad ni Joseph Smith, Mateo 4:11 [diha sa Giya ngadto sa mga Kasulatan]). Sa unsa nga paagi kita mapanalanginan samtang kita nagsunod sa ehemplo ni Kristo sa paghunahuna sa uban?

Lucas 4:16–21.Nakaila ba kita og bisan kinsa nga nagmasulub-on pag-ayo o kinsa nagkinahanglan nga “hatagan og kagawasan”? (Lucas 4:18). Unsaon nato sa pagtabang ang uban nga makadawat sa pagpang-ayo ug kagawasan sa Manluluwas? Mahimo usab nga ikaw maghisgot kon sa unsa nga paagi ang pagpahigayon og mga ordinansa sa templo nagtabang sa pagdala og “kagawasan sa mga binilanggo” (Lucas 4:18).

Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.

Gisugyot nga himno: “Dali, Sunod Mo Kanako,” Mga Himno, nu. 64.

Pagpalambo sa Atong Pagtudlo

Pagpuyo sa ebanghelyo ni Jesukristo. “Tingali ang labing importanting butang nga imong mabuhat [isip usa ka ginikanan o magtutudlo] mao ang … pagsunod sa ebanghelyo sa tibuok nimong kasingkasing. … Kini ang labing mahinungdanong paagi aron mahimong takos sa pagpakig-uban sa Espiritu Santo. Dili kinahanglan nga mahingpit ka, makugihon lamang nga naningkamot—ug magtinguha og kapasayloan pinaagi sa Pag-ula sa Manluluwas matag higayon nga ikaw nasayop” (Pagtudlo sumala sa Pamaagi sa Manluluwas,13).