Jesus nagtudlo ibabaw sa bungtod

Jesus Preaching Sermon on the Mount [Jesus Nagwali Ibabaw sa Bungtod], ni Gustave Doré

Pebrero 13–19

Mateo 5; Lucas 6

“Bulahan Kamo”

Hatagi og pagtagad ang mga panghunahuna nga imong madawat samtang ikaw nagbasa sa Mateo 5 ug sa Lucas 6, ug i-rekord kini sa usa ka study journal o sa ubang paagi. Kini nga latid makatabang kanimo sa pag-ila og pipila ka importanting mga baroganan niini nga mga kapitulo, apan ilha ang uban nga imong madiskobrehan sa imong pagtuon.

I-rekord ang Imong mga Panghunahuna

Niining higayona sa Iyang pangalagad, klaro nga ang mga pagtulon-an ni Jesus lahi kay sa unsay naandan nga nadunggan sa mga tawo. Ang kabos modawat sa gingharian sa Dios? Ang maaghop mopanunod sa yuta? Bulahan ang mga gilutos? Ang mga escriba ug mga Pariseo wala magtudlo sa maong mga butang. Ug gani kadtong kinsa tinud-anay nga nakasabot sa balaod sa Dios nakaila sa kamatuoran diha sa mga pulong sa Manluluwas. “Mata tungod sa mata” ug “dumti ang imong kaaway” mas ubos nga mga balaod (Mateo 5:38, 43). Apan si Jesukristo mianhi aron sa pagtudlo og mas taas nga balaod (tan-awa sa 3 Nephi 15:2–10), gihimo sa pagtabang kanato nga usa ka adlaw niana mahimong “magmahingpit, ingon nga hingpit ang [atong] Amahan nga langitnon” (Mateo 5:48).

icon sa personal nga pagtuon

Mga Ideya alang sa Personal nga Pagtuon sa Kasulatan

Mateo 5:1–12; Lucas 6:20–26, 46–49

Ang malungtarong kalipay moabot gikan sa pagpuyo sa paagi nga gitudlo ni Jesukristo.

Ang tanan gusto nga magmalipayon, apan dili ang tanan nangita og kalipay sa samang mga dapit. Ang uban nangita niini alang sa kalibotanong gahom ug kahimtang, ang uban sa bahandi o sa pagtagbaw sa pisikal nga mga gana. Si Jesukristo mianhi aron sa pagtudlo sa paagi padulong sa malungtarong kalipay, sa pagtudlo unsa ang tinuod nga kahulogan nga mabulahan. Unsa ang imong nakat-onan mahitungod sa pagbaton og malungtarong kalipay gikan sa Mateo 5:1–12 ug Lucas 6:20–26? Sa unsa nga paagi kini lahi gikan sa panan-aw sa kalibotan kabahin sa kalipay?

Unsa ang gitudlo niini nga mga bersikulo, uban sa Lucas 6:46–49, nganha kanimo mahitungod sa pagkahimong tinun-an ni Jesukristo? Unsa ka nadasig sa pagbuhat sa pagpalambo sa mga hiyas nga gihulagway niini nga mga bersikulo?

Tan-awa usab sa Giya ngadto sa mga Kasulatan, “Kabulahanan, Mga,” scriptures.ChurchofJesusChrist.org.

Mateo 5:13

“Kamo ang asin alang sa yuta.”

Ang asin dugay nang gigamit sa pagpreserbar, pagpalami, ug pagpalimpyo. Ang asin usab adunay relihiyoso nga kahulogan alang sa mga Israelite. May kalabutan kini sa karaan nga praktis sa pagsakripisyo og hayop ubos sa balaod ni Moises (tan-awa sa Levitico 2:13; Numero 18:19). Kon ang asin mawagtangan sa iyang kaparat, dili na kini epektibo, o “wala nay kaposlanan” (Mateo 5:13). Kini mahitabo kon kini masagolan o mahogawan sa laing mga elemento.

Hinumdomi kini samtang ikaw mamalandong sa Mateo 5:13. Unsaon nimo pagpabilin sa imong lami isip usa ka tinun-an ni Jesukristo? Unsaon nimo pagtuman sa imong pagpreserbar ug paglimpyo nga buhat isip ang asin sa yuta?

Tan-awa usab sa Doktrina ug mga Pakigsaad 103:9–10.

asin

“Kamo mao ang asin alang sa yuta” (Mateo 5:13).

Mateo 5:17–48; Lucas 6:27–35

Ang balaod ni Jesukristo mipuli sa balaod ni Moises.

Ang mga tinun-an tingali nasorpresa sa pagkadungog ni Jesus nga miingon nga ang ilang pagkamatarong kinahanglang molabaw sa pagkamatarong sa mga escriba ug mga Pariseo (tan-awa sa Mateo 5:20), kinsa mipasigarbo sa ilang mga kaugalingon kon unsa ka maayo silang misunod sa balaod ni Moises.

Samtang ikaw magbasa sa Mateo 5:21–48 ug Lucas 6:27–35, hunahunaa ang pagmarka sa duha ka kinaiya nga gikinahanglan diha sa balaod ni Moises (“Kamo nakadungog nga …”) ug unsay gitudlo ni Jesus sa pagbayaw niini nga mga kinaiya. Ngano sa imong hunahuna ang paagi sa Manluluwas usa ka mas taas nga balaod?

Sama pananglit, unsay gitudlo ni Jesus sa Mateo 5:27–28 mahitungod sa atong responsibilidad sa atong mga hunahuna? Unsaon nimo pag-angkon og labaw nga pagpugong sa mga hunahuna ug mga pagbati nga moabot nganha sa imong salabutan ug kasingkasing? (tan-awa sa Doktrina ug mga Pakigsaad 121:45).

Mateo 5:48

Nagpaabot ba gayod ang Langitnong Amahan nga ako mahingpit?

Si Presidente Russell M. Nelson mitudlo:

“Ang pulong mahingpit gihubad gikan sa Gresyanhon og teleios, nga nagpasabot og ‘kompleto.’ … Ang infinitibo nga porma sa verbo mao ang teleiono, nga nagpasabot og ‘ang pagkab-ot niana nga gilay-on, nga hingpit nga molambo, nga matuman, o mahuman.’ Palihog hinumdomi nga ang pulong wala magpasabot og ‘gawasnon gikan sa sayop’; kini nagpasabot og ‘pagkab-ot sa umaabot nga katuyoan.’ …

“… Ang Ginoo mitudlo, ‘Kamo dili makahimo sa pagharong sa atubangan sa Dios karon … ; busa, padayon diha sa pagpailob hangtod kamo mahingpit’ [Doktrina ug mga Pakigsaad 67:13].

“Dili kita angayang masagmuyo kon ang atong kinasingkasing nga mga paningkamot ngadto sa pagkahingpit karon daw makapaluya ug walay kataposan. Ang pagkahingpit naghulat. Moabot kini sa ka hingpit human lamang sa Pagkabanhaw ug pinaagi lamang sa Ginoo. Naghulat kini sa tanan nga naghigugma kaniya ug nagsunod sa iyang mga sugo” (Perfection Pending,” Ensign, Nob. 1995, 86, 88).

Tan-awa usab sa 2 Pedro 1:3–11; Moroni 10:32–33; Doktrina ug mga Pakigsaad 76:69; Jeffrey R. Holland, “Busa, Kamo Kinahanglan nga Magmahingpit—sa Katap[o]san,” Liahona, Nob. 2017, 40–42.

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Home Evening

Mateo 5:1–9.Unsa nga mga baroganan ang gitudlo sa Mateo 5:1–9 ang makatabang sa imong panimalay nga mahimong mas malipayon nga dapit? Mahimo kang mopili og usa o duha nga ingon og labi ka importante nganha sa imong pamilya. Sama pananglit, unsa nga mga pagtulon-an ang atong makaplagan nga makatabang kanato nga mahimong mga maghuhusay? (tan-awa sa Mateo 5:21–25, 38–44). Unsa nga mga tumong ang atong mahimo? Unsaon nato sa pagsunod?

Mateo 5:13.Pagdongan og kaon sa pipila ka pagkaon nga gitimplahan og asin ug sa parehas nga pagkaon nga walay asin. Unsa nga kalainan ang atong namatikdan? Unsay ipasabot sa pagkahimo nga “ang asin sa yuta”? Unsaon nato paghimo niini?

Mateo 5:14–16.Aron matabangan ang imong pamilya nga makasabot kon unsay ipasabot nga mahimong “kahayag sa kalibotan,” mahimo kang mousisa og pipila ka mga tinubdan sa kahayag diha sa imong panimalay, sa imong kasilinganan, ug sa kalibotan. Tingali kini makatabang ang pagpakita kon unsa ang mahitabo kon imong itago ang kahayag. Unsa ang gipasabot ni Jesus sa dihang miingon Siya, “Kamo mao ang kahayag sa kalibotan”? (Mateo 5:14). Kinsa ang nahimong sama sa usa ka kahayag sa atong pamilya? Sa unsang paagi kita mahimong kahayag ngadto sa uban? (tan-awa sa 3 Nephi 18:16, 24–25).

Mateo 5:43–45.Samtang ang imong pamilya nagbasa sa mga pulong sa Manluluwas dinhi niini nga mga bersikulo, mahimo kang mosulti mahitungod kon kinsa, sa piho, ang imong gibati nga ikaw makahigugma, makapanalangin, ug makaampo alang kaniya. Unsaon nato sa pagpalambo sa atong gugma alang kanila?

Alang sa dugang nga mga ideya alang sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.

Gisugyot nga awit: “Dan-ag,” Songbook sa mga Bata,, 96.

Pagpalambo sa Atong Pagtudlo

Pagmapaniiron. “Samtang hatagan nimo og pagtagad ang panghitabo sa mga kinabuhi sa imong [mga anak], makakaplag ka og labing maayo nga mga oportunidad sa pagtudlo. … Ang mga komentaryo ug mga pangutana nga [ilang] himoon mahimong mosangpot ngadto sa mga higayon sa pagtudlo” (Pagtudlo sumala sa Pamaagi sa Manluluwas, 16).

kandila

“Kamo mao ang kahayag alang sa kalib[o]tan” (Mateo 5:14).