Jesus Teaching the People by the Seashore [Jesus Nagtudlo sa mga Tawo diha sa Baybayon], ni James Tissot

Pebrero 20–26

Mateo 6–7

“Kanila Nagpanudlo Siya ingon nga May Kagahom”

Kon mobasa kita sa mga kasulatan nga adunay pangutana sa hunahuna ug uban sa sinsero nga tinguha sa pagsabot unsay gusto sa Langitnong Amahan nga atong mahibaloan, atong dapiton ang Espiritu Santo sa pagdasig nato. Samtang magbasa ka sa Mateo 6–7, hatagi og pagtagad kini nga mga panghunahuna.

I-rekord ang Imong mga Panghunahuna

Ang Wali Ibabaw sa Bungtod mao ang usa sa labing nailhan nga mga pakigpulong sa Kristiyanismo. Ang Manluluwas mitudlo uban ang puno sa kahulogan nga mga imahe, sama sa siyudad nga anaa sa bungtod, mga lirio sa kaumahan, ug mga lobo nga nagtakuban nga karnero. Apan ang Wali Ibabaw sa Bungtod labaw pa kay sa usa ka maanindot nga pakigpulong. Ang gahom sa mga pagtulon-an sa Manluluwas ngadto sa Iyang mga tinun-an makapausab sa atong mga kinabuhi, ilabi na kon atong puy-an kini. Dayon ang Iyang mga pulong mahimong labaw pa kay sa mga pulong; mahimo kining lig-on nga pundasyon alang sa kinabuhi nga, sama sa balay sa tawo nga buotan, makasugakod sa mga hangin ug mga baha sa kalibotan (tan-awa sa Mateo 7:24–25).

Mga Ideya alang sa Personal nga Pagtuon sa Kasulatan

Mateo 6–7

Ang pagpuyo sa mga pagtulon-an sa Manluluwas makatabang kanako nga mahimong sama Kaniya.

Ang Wali ibabaw sa Bungtod naglangkob og daghang mga baroganan sa ebanghelyo. Samtang ikaw magtuon niini nga mga kapitulo, pangutana sa Ginoo kon unsa ang iyang gusto kanimo nga makat-onan.

Usa ka baroganan nga mahimo nimong makaplagan mao ang panginahanglan sa pag-una sa mga butang sa Dios labaw sa mga butang sa kalibotan. Hain sa mga pagtulon-an sa Manluluwas diha sa Mateo 6–7 ang nagtabang kanimo sa pagtutok sa langitnong mga butang? Unsa ang ubang mga hunahuna o panghunahuna nga ikaw aduna? Unsa ang nakapadasig nimo nga buhaton? Hunahunaa ang pagrekord sa imong mga panghunahuna. Sama pananglit:

Mateo 6:1–4	Mas gusto ko nga magbantay mahitungod sa unsay gihunahuna sa Dios kanako kay sa unsay gihunahuna sa uban.

Ang laing baroganan sa Mateo 6–7 mao ang pag-ampo. Sa makadiyot timbang-timbanga ang imong mga pag-ampo. Unsay imong gibati sa imong pagpaningkamot sa pagpaduol ngadto sa Dios pinaagi sa pag-ampo? Unsa nga mga pagtulon-an diha sa Mateo 6–7 ang nagdasig kanimo sa pagpauswag sa paagi sa imong pag-ampo? I-rekord ang mga panghunahuna nga imong madawat. Sama pananglit:

Mateo 6:9	Kon ako mag-ampo, gusto kong gamiton ang ngalan sa Langitnong Amahan nga may balaang pagtahod.
Mateo 6:10	Kon ako mag-ampo, ako makapahayag sa akong tinguha nga ang kabubut-on sa Ginoo ang masunod.

Mahimo nimong basahon pag-usab ang Wali Ibabaw sa Bungtod, mangita og laing nagbalik-balik nga mga baroganan o mga mensahe nga ilabing magamit nganha kanimo. I-rekord unsay imong makaplagan diha sa usa ka study journal, uban sa imong mga hunahuna ug mga panghunahuna.

Kita mas makapaduol ngadto sa Dios pinaagi sa pag-ampo.

Mateo 6:7

Unsay buot ipasabot sa paggamit sa “pamulongpulong nga walay kapuslanan” sa pag-ampo?

Kasagaran nasabtan sa mga tawo nga ang “pamulongpulong nga walay kapuslanan” nagpasabot sa pagbalik-balik sa samang mga pulong sa makadaghang higayon. Apan, ang pulong nga walay kapuslanan makahulagway sa usa ka butang nga walay bili. Ang paggamit sa “pamulongpulong nga walay kapuslanan” sa pag-ampo makapasabot nga walay tiunay, kinasingkasing nga pagbati (tan-awa sa Alma 31:12–23).

Mateo 7:1–5

Ako makahukom sa matarong nga paagi.

Diha sa Mateo 7:1, ang Manluluwas ingon og nagsulti nga kinahanglan dili gayod kita maghukom, apan sa ubang mga kasulatan (lakip sa ubang mga bersikulo niini nga kapitulo), Siya naghatag kanato og mga panudlo mahitungod kon unsaon sa paghukom. Kon kana ingon og makalibog, ang Hubad ni Joseph Smith niini nga bersikulo mahimong makatabang kanimo sa pagsabot diin kini nagsulti kanato nga kita dili mohukom sa dili matarong nga paagi; nga aron kita dili pagahukman; apan nga kita mohukom sa matar[o]ng nga paghukom” (tan-awa sa Joseph Smith Translation appendix Mateo 7:1). Unsa ang imong makaplagan sa Mateo 7:1–5, uban sa nahibilin sa kapitulo, nga nagtabang kanimo nga makahibalo kon unsaon sa “paghukom sa matarong nga paghukom”?

Tan-awa usab sa, Lynn G. Robbins, “Ang Matar[o]ng nga Maghuhukom,” Liahona, Nob. 2016, 96–98.

Mateo 7:21–23

Nakaila ako ni Jesukristo pinaagi sa pagbuhat sa Iyang kabubut-on.

Ang hugpong sa mga pulong nga “Wala ko gay[o]d kamo igkaila” sa Mateo 7:23 giusab diha sa Hubad ni Joseph Smith ngadto sa “Wala gay[o]d kamo makaila kanako” (Tan-awa sa Hubad ni Joseph Smith, Mateo 7:33). Giunsa niini nga kausaban sa pagtabang kanimo nga mas makasabot kon unsa ang gitudlo sa Ginoo sa mga bersikulo 21–22 mahitungod sa pagbuhat sa Iyang kabubut-on? Unsa ka maayo ang imong gibati nga ikaw nakaila sa Ginoo? Unsa ang imong mabuhat aron mas makaila pa Kaniya og maayo?

Tan-awa usab sa David A. Bednar, “Kon Nakaila Pa Kamo Kanako,” Liahona, Nob. 2016, 102–5.

Mateo 7:24–27

Ang pagsunod sa mga pagtulon-an sa Manluluwas naghimo og lig-on nga pundasyon alang sa akong kinabuhi.

Ang pagpuyo sa ebanghelyo dili mokuha sa kalisdanan gikan sa atong mga kinabuhi. Ang duha ka mga balay sa sambingay sa Manluluwas sa Mateo 7:24–27 misinati sa samang unos. Apan ang usa sa mga balay nakahimo sa pagsugakod niini. Giunsa nga ang pagpuyo sa mga pagtulon-an sa Manluluwas mihimo og usa ka solidong pundasyon alang kanimo? Unsa sa imong paminaw ang nagdasig sa pagpadayon og tukod sa imong “balay ibabaw sa bato”? (tan-awa sa bersikulo 24).

Tan-awa usab sa Helaman 5:12.

Mga Ideya alang sa Pamilya nga Pagtuon sa Kasulatan ug Home Evening

Mateo 6–7.

Mateo 6:5–13.Unsa ang atong makat-onan mahitungod sa pag-ampo gikan sa paagi ang Manluluwas nag-ampo? Unsaon nato paggamit ang Iyang pag-ampo isip panig-ingnan sa pagpauswag sa atong personal ug pamilya nga mga pag-ampo? (Tan-awa usab sa Lucas 11:1–13.) Kon ikaw adunay mas gagmay nga mga anak, mahimo kamong magpraktis sa pag-ampo og dungan.

Mateo 6:33.Unsay gipasabot sa “unaha … pagpangita ang gingharian sa Dios”? Giunsa nato pagbuhat kini sa indibidwal nga paagi ug isip usa ka pamilya?

Mateo 7:1–5.Sa paghanduraw sa mga pagtulon-an niini nga mga bersikulo, ang imong pamilya makapangita og gamay kaayong tipik sa kahoy [mote] ug usa ka dakong piraso sa kahoy [beam]. Unsa ang gitudlo kanato sa pagtandi sa duha mahitungod sa paghukom sa uban?

Mateo 7:24–27.Aron matabangan ang imong pamilya nga mas makasabot sa sambingay sa Manluluwas sa tawo nga buotan ug sa tawo nga dili buotan, mahimo nimo silang pabu-buon og tubig diha sa balas ug dayon sa dakong bato. Unsaon nato pagtukod ang atong espirituhanon nga mga pundasyon diha sa usa ka dakong bato?

Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.

Gisugyot nga awit: “Ang Tawong Maalam ug ang Tawong Walay Kaalam,” Songbook sa mga Bata,, 132.

Pagpalambo sa Personal nga Pagtuon

Pakigbahin og mga panabot. Ang paghisgot og mga baroganan nga imong nakat-onan gikan sa imong personal nga pagtuon dili lamang maayong paagi sa pagtudlo sa uban; nagtabang usab kini sa pagpalig-on sa imong kaugalingong pagsabot. Sulayi ang pagpakigbahin og baroganan nga imong nakat-onan niini nga semana uban sa usa ka sakop sa pamilya o sa imong mga klase sa Simbahan.

I Have Prayed for Thee [Nag-ampo Ako alang Kanimo], ni Del Parson