Pebrero 27–Marso 5

Mateo 8; Marcos 2–4; Lucas 7

“Ang Imong Pagsalig Nakaluwas Kanimo”

Pagbantay nga dili ka magdali sa pagtuon sa mga kasulatan. Paggahin og panahon alang sa mainampoong pagpamalandong, bisan kon kini mangahulogan nga ikaw walay panahon sa pagbasa sa matag bersikulo. Kining mga higayon sa pagpamalandong kasagarang modangat ngadto sa personal nga pagpadayag.

I-rekord ang Imong mga Panghunahuna

Usa sa labing klaro nga mga mensahe diha sa Bag-ong Tugon mao nga si Jesukristo usa ka mang-aayo. Mga asoy sa Manluluwas nga nag-ayo sa masakiton ug sa nag-antos daghan––gikan sa usa ka babaye nga may hilanat ngadto sa anak nga lalaki sa usa ka biyuda kinsa namatay. Nganong naghatag og gibug-aton sa pisikal nga pang-ayo? Unsa nga mga mensahe ang mahimong anaa alang kanato niini nga mga milagro? Dayag lamang nga ang usa ka klaro nga mensahe mao nga si Jesukristo mao ang Anak sa Dios, uban ang gahom sa tanang mga butang, lakip sa atong pisikal nga mga kasakit ug pagkadili hingpit. Apan ang laing kahulogan makita sa Iyang mga pulong ngadto sa maduhaduhaon nga mga escriba: “Aron mahibalo kamo nga ang Anak sa Tawo may kagahom diay dinhi sa yuta sa pagpasaylo og mga sala” (Marcos 2:10). Busa kon ikaw makabasa bahin sa buta nga tawo o usa ka sanlahon nga naayo, tingali ikaw maghunahuna sa pagpang-ayo—sa espirituhanon ug sa pisikal—nga ikaw makadawat gikan sa Manluluwas ug makadungog Kaniya nga moingon nganha kanimo, “Ang imong pagsalig nakaluwas kanimo” (Lucas 7:50).

Mga Ideya alang sa Personal nga Pagtuon sa Kasulatan

Mateo 8; Marcos 2–3; Lucas 7

Ang Manluluwas makaayo sa mga kaluya ug mga sakit.

Kining pipila ka mga kapitulo nagrekord sa daghang mga higayon sa milagroso nga pagpang-ayo nga gihimo sa Manluluwas. Samtang imong tun-an kining mga pagpang-ayo, pangitaa ang posible nga mga mensahe alang kanimo. Mahimo kang mangutana sa imong kaugalingon: Unsa ang gitudlo sa istorya bahin sa pagtuo diha ni Jesukristo? Unsa ang gitudlo sa asoy bahin sa Manluluwas? Unsay gusto sa Dios nga akong makat-onan gikan niini nga milagro? Ania ang pipila ka mga ehemplo, apan adunay daghan pa:

• Usa ka sanlahon (Mateo 8:1–4)

• Usa ka binatonan sa kapitan (Mateo 8:5–13; Lucas 7:1–10))

• Ugangan nga babaye ni Pedro (Mateo 8:14–15)

• Usa ka tawo nga nasakit og paralisis (Marcos 2:1–12)

• Usa ka tawo nga nanguyos ang kamot (Marcos 3:1–5)

• Ang anak nga lalaki sa babaye nga balo sa Nain (Lucas 7:11–16)

Tan-awa usab sa David A. Bednar, “Pagdawat sa Kabubut-on ug Panahon sa Ginoo,” Liahona, Ago. 2016. 17–23; Neil L. Andersen, “Nasamdan,” Liahona, Nob. 2018, 83–86.

Marcos 2:15–17; Lucas 7:36–50

Si Jesukristo mianhi dili sa paghukom sa mga makasasala apan sa pag-ayo kanila.

Samtang ikaw magbasa niini nga mga bersikulo mahitungod sa pakigbinayloay og sulti ni Jesus uban sa mga escriba ug mga Pariseo, mahimo nimong mahunahuna kon makita ba nimo ang imong kaugalingon niini nga mga asoy. Sama pananglit, ang imo bang mga hunahuna ug mga lihok mahimo ba gayod sama ngadto ni Simon ang Pariseo? Unsaon nimo sa paghulagway ang kalainan tali sa paagi nga nakita ni Jesus ang mga makasasala ug ang paagi nga mga Pariseo sama sa pagtan-aw ni Simeon kanila? Hunahunaa kon giunsa niadtong kinsa nabug-atan sa sala sa pagbati kon sila kauban sa Manluluwas. Unsa ang ilang bation kon sila kauban kanimo?

Mahimo ka usab nga mamalandong kon sa unsa nga paagi ikaw sama sa babaye nga gihulagway sa Lucas 7:36–50. Kanus-a ka nakasinati sa kalumo ug kalooy nga gipakita sa Manluluwas ngadto kaniya? Unsa ang imong nakat-onan gikan sa iyang ehemplo sa hugot nga pagtuo, gugma, ug kamapainubsanon?

Tan-awa usab sa Juan 3:17; Lucas 9:51–56; Dieter F. Uchtdorf, “Ang Gasa sa Grasya,” Liahona, Mayo 2015, 107–10.

Mateo 8:18–22; Marcos 3:31–35

Ang pagkatinun-an ni Jesukristo nagpasabot nga ako nagbutang Kaniya og una sa akong kinabuhi.

Niini nga mga bersikulo, gitudlo ni Jesus nga ang pagka-Iyang tinun-an nagkinahanglan kanato sa pagbutang Kaniya og una sa atong mga kinabuhi, bisan pa kon kanang pagkausahay nagpasabot nga kita kinahanglan gayod nga mosakripisyo sa ubang mga butang nga atong gimahal. Samtang ikaw nagtuon niini nga mga tudling, palandonga ang imong kaugalingong pagkatinun-an. Ngano nga ang mga tinun-an kinahanglang andam sa pagbutang og una sa Manluluwas? Unsa ang mahimo nimong biyaan sa pagbutang og una ni Jesus? (Tan-awa usab sa Lucas 9:57–62.)

Mateo 8:23–27; Marcos 4:35–41

Si Jesukristo adunay gahom sa pagdala og kalinaw taliwala sa mga kalisdanan sa kinabuhi.

Gibati ba nimo sukad ang kinaiya nga gihimo sa mga tinun-an ni Jesus diha sa unos sa dagat––nagtan-aw sa mga balod sa tubig nga nagpuno sa sakayan ug nangutana, “Magtutudlo, wala ka ba lang magpakabana nga mangalumos kita?”

Diha sa Marcos 4:35–41, makakaplag ka og upat ka pangutana. Ilista ang matag usa, ug palandonga unsay gitudlo niini kanimo mahitungod sa pag-atubang sa mga hagit sa kinabuhi uban sa hugot nga pagtuo diha ni Jesukristo. Giunsa sa Manluluwas pagdala og kalinaw ngadto sa mga kalisdanan sa imong kinabuhi?

Tan-awa usab sa Lisa L. Harkness, “Hil[o]m, Hunong,” Liahona, Nob. 2020, 80–82.

Gikan sa Kahadlok ngadto sa Hugot nga Pagtuo, ni Howard Lyon

Mga Ideya alang sa Pamilya nga Pagtuon sa Kasulatan ug Home Evening

Mateo 8; Marcos 2–4; Lucas 7.Hunahunaa ang paghimo og usa ka lista sa mga milagro nga gihulagway dinhi niini nga mga kapitulo. Sulayi ang pagpangita o sa pagdrowing og mga hulagway sa pipila niini (tan-awa sa Libro sa mga Hulagway sa Ebanghelyo o ChurchofJesusChrist.org). Ang matag sakop sa pamilya makagamit sa mga hulagway nga magamit sa pagsulti sa mga milagro ug sa pakigbahin kon unsa ang ilang nakat-onan gikan niini. Mahimo kang mopakigbahin og pipila ka mga ehemplo sa mga milagro nga imong nakita o nabasa mahitungod sa atong panahon.

Tan-awa usab ang mga video “Widow of Nain” ug “Calming the Tempest” (ChurchofJesusChrist.org).

Mateo 8:5–13; Lucas 7:1–10.Mahitungod sa unsa nga hugot nga pagtuo sa kapitan ang nakapadani ni Jesus? Unsaon nato sa pagpakita og samang hugot nga pagtuo diha ni Jesukristo?

Marcos 2:1–12.“Kapitulo 23: Ang Tawo nga Dili Makalakaw” (sa Mga Istorya sa Bag-ong Tugon, 57–58, o ang katugma nga video sa ChurchofJesusChrist.org) makatabang sa imong pamilya sa paghisgot sa Marcos 2:1–12. (Tan-awa usab ang video “Jesus Forgives Sins and Heals a Man Stricken with Palsy” sa ChurchofJesusChrist.org.) Sa unsang paagi kita mahisama sa mga higala sa tawo nga dili makalakaw? Kinsa ang nahimong ingon niana nga matang sa higala ngari kanato?

Marcos 4:35–41.Kini ba nga asoy makatabang sa mga sakop sa pamilya kon gibati nila ang kahadlok? Tingali sila makabasa sa bersikulo 39 ug makapakigbahin og mga kasinatian sa panahon nga ang Manluluwas mitabang kanila sa pagbati og kalinaw.

Ang mga bata mahimong malingaw sa pagpakaaron-ingnon nga sila anaa sa sakayan diha sa usa ka unoson nga dagat samtang usa ka bata nagbasa sa Marcos 4:35–38. Dayon, kon ang usa ka bata nagbasa sa bersikulo 39, makahimo sila sa pagpakaaron-ingnon nga anaa sa usa ka sakayan diha sa linaw nga dagat. Makakanta usab kamo og dungan sa awit mahitungod sa pagkakaplag og kalinaw diha sa Manluluwas, sama sa “Agalon, ang Unos Kapintas” (Mga Himno, nu. 60). Unsa nga mga hugpong sa mga pulong ang nagtudlo kanato mahitungod sa kalinaw nga gitanyag ni Jesus?

Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.

Gisugyot nga himno, “Agalon, ang Unos Kapintas,” Mga Himno, nu 60.

Pagpalambo sa Atong Pagtudlo

Pagkamaanaa ug dali nga maduol. Ang pipila sa labing maayo nga mga higayon sa pagtudlo nagsugod isip mga pangutana o kabalaka diha sa kasingkasing sa usa ka sakop sa pamilya. Pahibaloa ang mga sakop sa pamilya pinaagi sa imong mga pulong ug mga lihok nga ikaw matinguhaon sa pagpamati kanila. (Tan-awa sa Pagtudlo sumala sa Pamaagi sa Manluluwas, 16.)

Christ and the Palsied Man [Si Kristo ug ang Tawong Paralitiko], ni J. Kirk Richards