Marso 20–26

Mateo 13; Lucas 8; 13

“Ang May mga Dalunggan nga Makadungog, Kinahanglan Siya Magpatalinghog”

Samtang ikaw magbasa sa Mateo 13 ug Lucas 8; 13, hunahunaa unsaon nimo sa pag-andam ang imong kaugalingon sa “pagpatalinghog” ug sa pagpasalamat sa mga pagtulon-an sa Manluluwas niini nga mga sambingay. Unsay imong buhaton sa paggamit niini nga mga pagtulon-an diha sa imong kinabuhi?

I-rekord ang Imong mga Panghunahuna

Pipila sa labing halandumon nga mga pagtulon-an sa Manluluwas mao ang pinaagi sa yanong mga istorya nga gitawag og mga sambingay. Mas labaw pa kini kay sa makapaikag nga lakbit nga mga istorya mahitungod sa ordinaryo nga mga butang o mga panghitabo. Kini adunay talagsaong mga kamatuoran mahitungod sa gingharian sa Dios alang niadtong andam sa espirituhanong paagi. Usa sa unang mga sambingay nga gi-rekord sa Bag-ong Tugon—ang sambingay sa magpupugas (tan-awa sa Mateo 13:3–23)—nagdapit kanato sa pagsusi sa atong pagkaandam sa pagdawat sa pulong sa Dios. “Kay siya nga adunay iya,” mipahayag si Jesus, “pagahatagan og labaw pa, ug makabaton siya sa kadagaya” (Joseph Smith Translation, Matthew 13:10 [sa Mateo 13:12, footnote a]). Busa sa atong pagpangandam sa pagtuon sa mga sambingay sa Manluluwas—o sa bisan hain sa Iyang mga pagtulon-an—usa ka maayong paagi sa pagsugod mao ang pagsusi sa atong mga kasingkasing ug pagtino kon gihatagan ba nato ang pulong sa Dios og “maayong yuta” (Mateo 13:8) diin kini motubo, mamulak, molabong, ug mamunga nga mopanalangin kanato ug sa atong mga pamilya sa kabuhong.

Mga Ideya alang sa Personal nga Pagtuon sa Kasulatan

Mateo 13:3–23; Lucas 8:4–15; 13:6–9

Ang akong kasingkasing kinahanglang andam nga modawat sa pulong sa Dios.

Ngano nga usahay ang atong mga kasingkasing bukas ngadto sa kamatuoran, samtang sa ubang mga panahon kita matintal sa pagbatok niini? Ang pagbasa sa sambingay sa magpupugas makahatag og maayong oportunidad sa paghunahuna mahitungod kon unsa ka kamaayo sa pagdawat sa kamatuoran gikan sa Ginoo. Tingali makatabang ang pagpahaom sa mga bersikulo 3–8 sa Mateo 13 uban sa gihatag nga mga paghubad sa mga bersikulo 18–23. Unsay imong mahimo sa pag-ugmad og “maayong yuta” sa imong kaugalingon? Unsa kaha ang pipila ka “mga tunok” nga makapugong kanimo sa tinuod nga pagpatalinghog ug pagsunod sa pulong sa Dios? Unsaon nimo sa pagbuntog niini nga “mga tunok”?

Ang imong pagtuon niini nga sambingay maka-impluwensiya usab kon unsaon nimo pagbasa ang sambingay sa Lucas 13:6–9. Unsa ang “bunga” nga gipangita sa Ginoo gikan kanato? Unsaon nato pag-ugmad ang atong yuta aron kita “mamunga”?

Tan-awa usab sa Mosiah 2:9; Alma 12:10–11; 32:28–43; Dallin H. Oaks, “Ang Sambingay sa Magpupugas,” Liahona, Mayo 2015, 32–35.

Mateo 13:24–35, 44–52; Lucas 13:18–21

Ang mga sambingay ni Jesus nagtabang kanako pagsabot sa pagtubo ug sa paingnan sa Iyang Simbahan.

Si Propeta Joseph Smith mitudlo nga ang mga sambingay sa Mateo 13 naghulagway sa pagtubo ug paingnan sa Simbahan sa ulahing mga adlaw. Mahimo nimong ribyuhon ang mga pulong sa Propeta sa Mga Pagtulon-an sa mga Presidente sa Simbahan: Joseph Smith (2007), 355–369, samtang ikaw maghunahuna kon unsa ang gitudlo sa mosunod nga mga sambingay kanimo mahitungod sa Simbahan sa Ginoo:

• Mga trigo ug mga bunglayon (13:24–30, 36–43)

• Ang liso sa mustasa (13:31–32)

• Ang igpatutubo sa tinapay (pan) (13:33)

• Ang nalubong nga bahandi ug ang mutya nga labing bililhon (13:44–46)

• Ang pukot (13:47–50)

• Ang pangulo sa panimalay (13:52)

Human mamalandong niini nga mga sambingay, unsay imong nadasig nga buhaton sa pag-apil og mas hingpit diha sa buhat sa Simbahan ni Kristo sa ulahing mga adlaw?

Tan-awa usab ang Giya ngadto sa mga Kasulatan, “Gingharian sa Dios o Gingharian sa Langit,” “Sambingay,” scriptures.ChurchofJesusChrist.org.

Ang ebanghelyo ni Jesukristo usa ka “perlas nga labing bililhon” (Mateo 13:46).

Mateo 13:24–30, 36–43

Ang matarong kinahanglan gayod motubo taliwala sa dautan hangtod sa kataposan sa kalibotan.

Usa ka paagi sa pagtuki niini nga sambingay mao ang pagdrowing og hulagway niini ug butangan kini sa hubad sa Mateo 13:36–43 ug Doktrina ug mga Pakigsaad 86:1–7. Ang bunglayon mao ang usa ka “makahilo nga sagbot, diin, hangtod nga kini moabot sa dalonggan, susama kini sa dagway sa trigo” (Giya ngadto sa mga Kasulatan, “Sagbut, mga”). Unsa nga mga kamatuoran niini nga sambingay ang nagdasig kanimo nga magpabilin nga matinud-anon bisan pa sa pagkadaotan sa kalibotan?

Lucas 8:1–3

Sa unsa nga mga paagi nga ang “pipila ka mga babaye” nangalagad ngadto sa Manluluwas?

“Mga babaye nga mga disipulo mibiyahi uban ni Jesus ug sa Napulog Duha, nagkat-on gikan ni [Jesus] sa espirituhanong paagi ug nagserbisyo Kaniya sa temporal nga paagi. … Dugang sa pagdawat sa pagpangalagad ni Jesus—sa maayong balita sa Iyang ebanghelyo ug sa mga panalangin sa Iyang makaayo nga gahom—kini nga mga babaye nangalagad ngadto Kaniya, mipaambit sa ilang kabtangan ug debosyon” (Anak nga mga Babaye sa Akong Gingharian [2017] ,4–5). Ang mga babaye kinsa misunod sa Manluluwas mihatag usab og gamhanang pagpamatuod Kaniya (tan-awa sa Linda K. Burton, “Masaligong mga Babaye,” Liahona, Mayo 2017, 12–15).

Mga Ideya alang sa Pamilya nga Pagtuon sa Kasulatan ug Home Evening

Mateo 13.Samtang magbasa ang sakop sa imong pamilya sa mga sambingay sa Manluluwas, tingali malingaw sila nga maghunahuna sa ilang kaugalingong mga sambingay nga nagtudlo sa samang mga kamatuoran mahitungod sa gingharian sa langit (ang Simbahan), nga naggamit og mga butang o mga sitwasyon nga sila sinati.

Mateo 13:3–23; Lucas 8:4–15.Human mabasa og dungan ang sambingay sa magpupugas, mahimong maghisgot ang imong pamilya og mga pangutana sama niini: Unsa ang makahimo sa atong “yuta” (atong mga kasingkasing) nga “batoon” o “mopugong” sa pulong? Unsaon nato pagsiguro sa atong yuta nga maayo ug mamunga?

Kon ikaw adunay gagmay nga mga bata sa imong pamilya, makalingaw kini ang pagdapit sa mga sakop sa pamilya sa pagdrama sa lain-laing mga paagi sa pag-andam sa atong mga kasingkasing sa pagpatalinghog sa pulong sa Dios samtang ang ubang mga sakop sa pamilya motag-an unsay ilang gibuhat.

Mateo 13:13–16.Unsaon nimo pagtabang ang mga sakop sa imong pamilya sa pagsabot sa ka-importante sa pagkaandam nga modawat sa pulong ni Kristo? Sa pagpakita “sa mga dunggan [nga] bungol,” mahimo nimong tabunan ang dalonggan sa usa ka sakop sa pamilya samtang hilom nimong basahon ang Mateo 13:13–16. Pila ang nasabtan niana nga sakop sa pamilya gikan sa mga bersikulo? Unsa ang mga paagi nga kita makabuka sa atong mga mata, dalonggan, ug mga kasingkasing ngadto sa pulong sa Dios?

Mateo 13:44–46.Unsa ang anaa niining duha ka lalaki dinhi niini nga mga sambingay? Aduna bay laing mga butang nga kinahanglan nga atong buhaton isip mga indibidwal ug isip pamilya sa pagbutang og una sa gingharian sa Dios sa atong mga kinabuhi?

Lucas 13:11–17.Diha bay mga kasinatian ang mga sakop sa pamilya nga mihimo kanila sa pagbati nga sila dili “makatul-id sa [ilang mga kaugalingon]”? Nakaila ba kita og usa ka tawo kinsa mibati og ingon niini nga paagi? Sa unsang paagi kita makatabang? Sa unsang paagi nga ang Manluluwas “mobadbad” kanato gikan sa atong mga sakit?

Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.

Gisugyot nga himno: “Nagpugas Kita,” Mga Himno, nu. 131.

Pagpalambo sa Atong Pagtudlo

Pagmemorya og kasulatan. Pagpili og tudling sa kasulatan nga pihong makahuluganon sa imong pamilya, ug dapita ang mga sakop sa pamilya sa pagmemorya niini. Si Elder Richard G. Scott mitudlo, “Ang namemorya nga kasulatan mao ang higalang molahutay nga dili magkahuyang sa paglabay sa panahon” (“Ang Gahum sa Kasulatan,” Liahona, Nob. 2011, 6).

Sambingay sa Magpupugas, ni George Soper