Jesus naglakaw uban sa mga disipulo nagdala og mga basket sa pan

Marso 27–Abril 2

Mateo 14; Marcos 6; Juan 5–6

“Ayaw Kamo Kalisang”

Samtang ikaw magbasa sa Mateo 14; Marcos 6; ug Juan 5–6, pangita og mga kamatuoran nga makahuluganon nganha kanimo. Mahimong mangutana ka sa imong kaugalingon og sama sa “Unsaon sa mga asoy niini nga mga kapitulo may kalabotan ngari kanako?” “Unsa nga mga mensahe ang akong nakaplagan alang sa akong kinabuhi?” o “Unsa ang gusto nakong ipakigbahin sa akong pamilya o sa uban?”

I-rekord ang Imong mga Panghunahuna

Unsa kaha ang nakadasig ni Pedro sa pagbiya sa kahilwasan sa iyang sakayan diha sa tunga-tunga sa Dagat sa Galilea atol sa makusog nga unos? Unsa ang migiya kaniya sa pagtuo nga kon si Jesus makalakaw diha sa tubig, makalakaw usab siya? Dili kita makahibalo sa kasigurohan, apan tingali misabot si Pedro nga ang Anak sa Dios mianhi dili lamang sa pagbuhat og talagsaong mga butang alang sa mga tawo apan sa paghatag og gahom sa mga tawo sama ni Pedro sa pagbuhat usab og talagsaong mga butang. Ang pagdapit ni Jesus, human sa tanan, mao ang “Dali, Sunod Kanako” (Lucas 18:22). Gidawat ni Pedro kini nga imbitasyon makausa, ug andam siya sa pagdawat niini pag-usab, bisan kon kini mipasabot nga mag-atubang sa iyang mga kalisang ug magbuhat og butang nga ingon og imposible. Tingali ang Ginoo dili mosugo nato sa pagkanaog sa usa ka sakayan sa tunga-tunga sa unos o mohatag sa atong gamay ra nga suplay sa tinapay kon liboan ang kinahanglan nga mokaon, apan mosugo Siya nato sa pagdawat og mga direksiyon bisan kon wala kita hingpit nga makasabot niini. Bisan unsa ang Iyang imbitasyon nato, ingon og usahay makasorpresa o gani makahadlok. Apan ang mga milagro mahitabo kon kita, sama ni Pedro, mowagtang sa atong mga kalisang, sa atong mga pagduha-duha, ug sa atong limitado nga pagsabot ug mosunod Kaniya pinaagi sa pagtuo.

icon sa personal nga pagtuon

Mga Ideya alang sa Personal nga Pagtuon sa Kasulatan

Juan 5:16–47

Si Jesukristo mipasidungog sa Iyang Amahan.

Ang relasyon tali sa Langitnong Amahan ug sa matag usa sa Iyang mga anak usa ka sagrado nga relasyon. Niini nga mga bersikulo, si Jesukristo mihatag kanato og makadasig nga modelo nga sundon sa atong relasyon uban sa Langitnong Amahan. Basaha ang Juan 5:16–47, ug markahi o timan-i ang matag higayon mogawas ang pulong nga Amahan. Giunsa sa pagpasidungog sa Anak ang Amahan, ug unsaon nimo pagsunod ang Iyang ehemplo? Unsa ang imong nakat-onan bahin sa unsay gibati sa Amahan mahitungod sa Anak? Unsa ang nakapadasig nimo nga buhaton sa paglig-on sa imong relasyon uban sa imong Langitnong Amahan?

Tan-awa usab sa Juan 17; Jeffrey R. Holland, “Ang Kahalangdon sa Dios,” Liahona, Nob. 2003, 70–73.

piraso sa mga pan ug mga isda

Milagrosong gipakaon ni Jesus ang lima ka libo ka mga tawo sa lima ka piraso nga pan ug duha ka isda.

Mateo 14:15–21; Marcos 6:33–44; Juan 6:5–14

Ang Manluluwas makapadako sa akong yano nga mga halad sa pagtuman sa Iyang mga katuyoan.

Gibati ba nimo sukad ang kakulangan sa pagtubag sa tanang mga panginahanglan nga imong nakita sa imong palibot—sa imong panimalay, sa imong mga relasyon, o sa katilingban? Ang mga tinun-an ni Jesus tingali mibati og kakulang sa dihang misugo Siya kanila sa pagpakaon sa sobra sa lima ka libo nga gigutom nga mga tawo sa dihang dihay lima lamang ka piraso sa pan ug duha ka isda. Samtang ikaw nagbasa mahitungod sa milagro nga misunod nga nahitabo, palandonga kon giunsa paggamit sa Dios ang imong yanong mga halad sa serbisyo sa pagpanalangin niadtong anaa sa imong palibot. Giunsa Niya sa pagpadako ang imong mga paningkamot samtang ikaw miserbisyo Kaniya? Hunahunaa kining pahayag gikan ni Sister Michelle D. Craig: “Kamo ug ako makahatag kon unsay anaa kanato ngadto kang Kristo, ug Iyang pilo-piloon ang atong mga paningkamot. Unsay inyong mahalad sobra na kaayo—bisan pa sa inyong tawhanong mga kakulangan ug kahuyang—kon kamo mosalig diha sa grasya sa Dios” (“Balaan nga Pagkawala Matagbaw,” Liahona, Nob. 2018, 54).

Mateo 14:22–33; Marcos 6:45–52; Juan 6:15–21

Midapit si Jesukristo nako nga wagtangon nako ang akong mga kalisang ug mga pagduha-duha ug magpakita og pagtuo Kaniya.

Handurawa sa imong hunahuna ang mga detalye sa talan-awon nga gihulagway sa Mateo 14:22–33; Marcos 6:45–52; ug Juan 6:15–21. Hunahunaa kon unsa kahay gibati ni Pedro ug sa ubang mga tinun-an. Unsay imong nakat-onan bahin sa pagkatinun-an gikan sa mga pulong ug aksyon sa Manluluwas niini nga mga bersikulo? Unsay imong nakat-onan gikan sa mga pulong ug mga aksyon ni Pedro? (Tan-awa usab sa 1 Nephi 3:7.) Unsa ang gidapit sa Ginoo nga imong buhaton nga susama sa pagkanaog gikan sa sakayan? Unsa ang imong nakita niini nga mga bersikulo nga nakahatag nimo og kaisog sa paggamit sa imong pagtuo kang Jesukristo?

Juan 6:22–71

Isip tinun-an ni Jesukristo, kinahanglang andam ako sa pagtuo ug pagdawat sa kamatuoran, bisan lisod kini buhaton.

Sa dihang si Jesus mipasabot sa Iyang Kaugalingon Mismo isip ang “pan sa kinabuhi” (Juan 6:48), daghan ang nakaingon niini nga usa ka “lisod kining sultiha” (Juan 6:60). Unsaon sa mga pulong ni Pedro diha sa Juan 6:68–69 pagtabang kanimo sa mga panahon nga ang mga doktrina sa Manluluwas ingon og malisod sa pagdawat o sa pagpuyo? Unsa ang nakapadani kanimo mahitungod sa pagpamatuod ni Pedro? Unsa ang pipila sa “mga pulong sa kinabuhing dayon” (Juan 6:68) nga nagtabang kanimo nga magpabiling mapasaligon sa pagsunod sa Manluluwas?

Tan-awa usab sa M. Russell Ballard, “Kang Kinsa Man Kami Moadto?,” Liahona, Nob. 2016, 90–92.

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Home Evening

Mateo 14:15–21.Hunahunaa kon unsaon nimo kaha pagtabang ang imong pamilya sa paghanduraw kon pila ka pan ug isda ang mahimong ipakaon sa lima ka libo ka mga tawo. Unsa ang gitudlo kanato sa milagro diha sa Mateo 14:15–21 mahitungod sa Manluluwas? Hunahunaa ang pagpakigbahin og kasinatian sa dihang imong gibati nga ikaw walay igo nga ikatanyag ug ang Manluluwas mipilo-pilo sa imong mga paningkamot.

Mateo 14:22–33.Tingali malingaw ang imong pamilya sa pagdrama sa istorya niini nga mga bersikulo. Ngano nga ang mga tinun-an nahadlok? Ngano nga si Pedro nakahimo sa pagbuntog sa iyang kalisang ug mibiya sa sakayan? Sa unsa nga paagi nagpakita siya og pagtuo bisan nagsugod na siya sa pagkaunlod? Sa unsa nga paagi nga kita usahay sama ni Pedro?

Juan 5:1–16.Dapita ang mga sakop sa pamilya sa pagtimaan kapila mogawas ang hugpong sa mga pulong “mamaayo” niini nga mga bersikulo. Sa unsa nga mga paagi nga si Jesukristo makaayo sa mga tawo? Kanus-a ug sa unsa nga paagi Siya mihimo kanato nga mamaayo?

Juan 6:28–58.Hatagi ang matag sakop sa pamilya og usa ka piraso nga pan nga kan-on, ug paghisgot sa mga benepisyo nga atong madawat gikan sa pan ug sa ubang makapahimsog nga mga pagkaon. Dayon siksika kini nga mga bersikulo pagdungan, mangita nganong si Jesukristo mitawag sa Iyang Kaugalingon nga “pan [tinapay] sa kinabuhi” (Juan 6:35). Unsa kaha ang ipasabot niini sa “pagkaon” sa pan sa kinabuhi? (tan-awa sa D. Todd Christofferson, “Ang Buhing Tinapay nga Nanaog Gikan sa Langit,” Liahona, Nob. 2017, 36–39).

Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.

Gisugyot nga himno: “Unsa ka Dako sa Kaalam ug sa Gugma,” Mga Himno, nu. 116).

Pagpalambo sa Personal nga Pagtuon

Paningkamot sa imong kaugalingong espirituhanong mga panabot. Sa imong personal ug pamilya nga pagtuon, ayaw limitahi ang imong kaugalingon sa mga tudling sa kasulatan nga gihatag dinhi niini nga mga latid. Ang Ginoo malagmit adunay mga mensahe alang kanimo niini nga mga kapitulo nga wala mahisgoti dinhi. Sa mainampoong paagi pangitaa kini.

Jesus nagbitad ni Pedro gikan sa tubig

Against the Wind [Sugat sa Hangin],, ni Liz Lemon Swindle