ang maayong Samarianhon

Ang Maayong Samarianhon, ni Dan Burr

Abril 17–23

Mateo 18; Lucas 10

“Unsa May Akong Buhaton aron Makapanunod Ako sa Kinabuhing Dayon?”

Samtang ikaw magmainampoong magbasa ug mamalandong sa Mateo 18 ug Lucas 10, hatagi og atensyon ang hilom nga mga pag-aghat sa Espiritu Santo. Mosulti Siya kanimo sa unsa nga paagi kini nga mga pagtulon-an ug mga istorya magamit nganha kanimo. I-rekord ang mga panghunahuna nga imong madawat.

I-rekord ang Imong mga Panghunahuna

Kon ikaw mangutana sa Ginoo, tingali madawat ang tubag nga wala nimo damha. Kinsa ang akong silingan? Bisan kinsa nga nagkinahanglan sa imong tabang ug gugma. Kinsa ang labing dako sa gingharian sa langit? Usa ka bata. Igo na ba ang pagpasaylo sa nakasala sa makapito ka higayon? Dili, kinahanglang mopasaylo ka og kapitoan ka pito. (Tan-awa sa Lucas 10:29–37; Mateo 18:4, 21–22.) Ang wala damha nga tubag gikan sa Ginoo makadapit kanato sa pag-usab sa paagi nga kita naghunahuna, nagbati, ug naglihok. Kon ikaw nagtinguha sa kabubut-on sa Ginoo tungod kay ikaw gusto gayod nga makakat-on gikan Kaniya, ang Ginoo motudlo kanimo kon unsaon sa pagpuyo sa paagi nga naggiya ngadto sa kinabuhing dayon uban Kaniya.

icon sa personal nga pagtuon

Mga Ideya alang sa Personal nga Pagtuon sa Kasulatan

Mateo 18:21–35

Kinahanglan akong mopasaylo sa uban kon gusto ko nga modawat og kapasayloan gikan sa Ginoo.

Ang sugyot ni Pedro nga makapasaylo siya og tawo makapito ka higayon ingon og sobra ra kaayo, apan mitudlo si Jesus og mas taas nga balaod. Ang iyang tubag, “Wala ako mag-ingon kanimo nga makapito, kondili, kapitoan ka pito” (bersikulo 22), wala magtudlo bahin sa gidaghanon apan hinoon mahitungod sa pagpalambo og usa ka bahin sa Kristohanong kinaiya sa pagpasaylo. Samtang magbasa ka sa sambingay sa ulipon nga dili maloloy-on, palandonga ang mga higayon nga imong gibati ang kalooy ug kapuangod sa Dios. Aduna bay usa ka tawo kinsa nagkinahanglan nga mobati og kalooy ug kapuangod gikan kanimo?

Si Elder David E. Sorensen mihatag niining importanting pahimangno: “Bisan tuod kita kinahanglan mopasaylo sa usa ka silingan kinsa nakapasakit kanato, kinahanglan kita maningkamot nga makatabang nga malikayan ang maong pagpasakit nga mausab. … Ang pagpasaylo wala magkinahanglan kanato nga modawat o motugot sa dautan. … Apan samtang kita makig-away batok sa sala, kinahanglan dili gayod kita motugot nga ang kalagot o kasuko mokontrolar sa atong mga hunahuna o mga lihok” (“Ang Pagpasaylo Makapausab sa Kaligutgot ngadto sa Gugma,” Liahona, Mayo 2003, 12).

Lucas 10:1–20

Kinsa ang Kapitoan?

Nagsunod sa sundanan nga natukod panahon sa Daang Tugon (tan-awa sa Exodo 24:1; Numeros 11:16), si Jesukristo “mitudlo og ubang kapitoan,” dugang ngadto sa Iyang mga Napulog Duha ka Apostoles, sa pagsaksi Kaniya, sa pagsangyaw sa Iyang ebanghelyo, ug sa pagtabang Kaniya sa Iyang buhat. Kini nga sundanan nagpadayon diha sa gipahiuli nga Simbahan. Ang mga Kapitoan gitawag aron sa pagtabang sa Napulog Duha sa ilang misyon isip espesyal nga mga saksi ni Jesukristo ngadto sa tibuok kalibotan.

Tan-awa usab sa Doktrina ug mga Pakigsaad 107:25–26, 33–34, 97.

Lucas 10:25–37

Aron makaangkon og kinabuhing dayon, kinahanglang gayod nga akong higugmaon ang Dios ug higugmaon ang akong silingan sama sa akong kaugalingon.

Makatabang ang paghinumdom nga ang sambingay sa maayong Samarianhon mao ang paagi sa pagtubag ni Jesus sa duha ka pangutana: “Unsa ang akong buhaton aron makapanunod ako sa kinabuhing dayon?” ug “Kinsa man ang akong silingan?” (Lucas 10:25, 29). Samtang ikaw magbasa niini nga sambingay, ibutang sa hunahuna kini nga mga pangutana. Unsa nga mga tubag ang imong nakaplagan?

Sa panahon ni Jesus, ang pagdumtanay tali sa mga Judeo ug mga Samarianhon milungtad sulod og gatusan ka tuig. Ang mga Samarianhon mga kaliwat sa mga Judeo nga nagpuyo sa Samaria kinsa nakigminyo sa mga Hentil. Gibati sa mga Judeo nga ang mga Samarianhon nahimong dautan pinaagi sa ilang pakig-uban sa mga Hentil ug mi-apostasiya. Ang mga Judeo mobiyahe og mga kilometro tipas sa ilang agianan aron sa paglikay nga moagi sa Samaria. (Tan-awa usab sa Lucas 9:52–54; 17:11–18; Juan 4:9; 8:48.)

Ngano kaha nga ang Manluluwas mipili og usa ka Samarianhon, usa ka tawo nga gikasilagan sa mga Judeo, isip ehemplo sa kapuangod ug paghigugma sa silingan? Unsa ang gidasig niini nga sambingay kanimo nga buhaton?

Tan-awa usab sa Mosiah 2:17; “Parable of the Good Samaritan” ug “A Good Samaritan” (mga video), ChurchofJesusChrist.org.

Lucas 10:38–42

Atong pilion “kanang maayong bahin” pinaagi sa paghimo og inadlaw nga mga pagpili nga mogiya ngadto sa kinabuhing dayon.

Sa Lucas 10:38–42, inanay nga gidapit ni Jesus si Marta sa paghunahuna og lain mahitungod sa paagi nga siya naggahin sa iyang panahon. Human nagkutlo niini nga mga bersikulo, si Sister Carol; F. McConkie mitudlo: “Kon kita magbalaan, kinahanglan gayod nga kita magkat-on sa paglingkod diha sa tiilan sa Usa nga Balaan sa Israel ug maghatag og panahon sa pagkabalaan. Ato bang biyaan ang telepono, ang walay katapusang lista sa mga buluhaton, ug ang mga kabalaka nga mga kalibutanon? Ang pag-ampo, pagtuon, ug pagpaminaw sa pulong sa Dios makadapit sa Iyang gugma nga makapaayo ug makalimpyo sa atong mga kalag. Paghatag og panahon nga mabalaan, nga kita mapuno sa Iyang sagrado ug makabalaang Espiritu” (“Ang Katahom sa Pagkabalaan,” Liahona, Mayo 2017, 11). Mahimong ikaw gusto nga mo-eksamen kon giunsa nimo sa paggahin ang imong panahon––bisan diha sa maayong mga butang. Aduna bay usa ka butang nga mas “kinahanglanon” (bersikulo 42) nga mas angay pa sa imong atensiyon?

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Home Evening

Mateo 18:1–11.Ngano nga si Jesus gustong kita mahimong sama sa usa ka gamay nga bata? Unsa nga mga hiyas aduna ang mga bata nga atong mapalambo nga mahimong mas mahisama ni Kristo? (tan-awa sa Mosiah 3:19).

Jesus uban sa mga bata

Si Jesus gusto nga ang Iyang mga tinun-an mahimong sama sa gagmay nga mga bata.

Mateo 18:15.Unsaon nato sa paggamit ang tambag diha sa Mateo 18:15 ngadto sa atong mga inter-aksiyon sa pamilya? Sa unsang paagi nga ang pagbuhat niini mopanalangin sa atong pamilya?

Mateo 18:21–35.Unsa ang gitudlo niini nga sambingay kanato mahitungod ni Jesukristo? Unsa ang gitudlo niini kanato mahitungod kon unsaon pagtagad sa uban?

Lucas 10:25–37.Ang mga miyembro sa pamilya mahimong malingaw sa pagsul-ob og mga sinina alang sa teatro ug i-aksyon kini nga sambingay. Sa unsang paagi kita usahay sama sa lain-laing mga tawo diha sa sambingay? Sa unsa nga paagi ang Manluluwas sama sa maayong Samarianhon? Sa unsang paagi kita mahimong sama sa maayong Samarianhon?

Mahimo nimong hunahunaon ang pagkanta og dungan sa usa ka himno o awit sa mga bata nga nagsuporta sa mga kamatuoran niini nga sambingay. Usa ka ehemplo mao ang “Sundon Ko Ikaw Ginoo” (Mga Himno, nu. 133), apan aduna pay daghan. Ang mga sakop sa pamilya mahimong malingaw sa pagpangita og usa ka himno o awit ug sa pagpasabot kon sa unsa nga paagi kini kalabot ngadto sa sambingay.

Lucas 10:38–42.Lisod ba gayod ang pagpahaom sa espirituhanong mga butang ngadto sa imong iskedyul sa pamilya? Ang istorya kabahin ni Maria ug Marta mahimong makadasig og family council o family home evening mahitungod kon unsaon sa pagbuhat niini og mas maayo. Isip usa ka pamilya, makahimo kamo og lista sa mga paagi sa pagpili “nianang maayong bahin” (Lucas 10:42).

Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.

Gisugyot nga awit: “Si Jesus Miingon Higugmaa ang Tanan,” Songbook sa mga Bata, 39.

Pagpalambo sa Atong Pagtudlo

Pag-amuma og usa ka mahigugmaong palibot. Ang paagi sa mga sakop sa pamilya nga mobati ug motagad sa usag usa dako og impluwensya sa espiritu sa imong panimalay. Tabangi ang mga sakop sa pamilya sa paghimo sa ilang bahin sa pagtukod og mahigugmaon, matinahuron nga panimalay aron nga ang tanan mobati nga luwas sa pakigbahin og mga kasinatian, mga pangutana, ug mga pagpamatuod. (Tan-awa sa Pagtudlo sumala sa Pamaagi sa Manluluwas, 15.)

Kristo uban ni Maria ug Marta

Christ in the Home of Mary and Martha [Kristo diha sa Panimalay ni Maria ug Marta], ni Walter Rane