Transpigurasyon ni Kristo

The Transfiguration [Ang Transpigurasyon], ni Carl Heinrich Bloch

Abril 10–16

Mateo 15–17; Marcos 7–9

“Ikaw Mao ang Kristo”

Ang pagbasa sa mga kasulatan nagdapit sa Espiritu Santo nganha sa inyong kinabuhi. Usa sa labing importante nga mga misyon sa Espiritu Santo mao ang pagpamatuod ni Jesukristo. Samtang ikaw magbasa sa mga kasulatan niini nga semana, hatagi og pagtagad ang espirituhanong mga pagbati nga naglig-on sa imong pagpamatuod sa Manluluwas.

I-rekord ang Imong mga Panghunahuna

Dili ba katingalahan nga ang mga Pariseo ug mga Saduceo mamugos nga si Jesus mopakita kanila “og timailhan gikan sa langit”? Dili pa ba igo ang Iyang daghang nabantog nga mga milagro? Unsa ang mahitungod sa Iyang gamhanang mga pagtulon-an o ang daghang paagi nga Iyang gituman ang karaang mga panagna? Ang ilang pagpamugos nagagikan dili sa kakulang sa mga timailhan apan sa pagdumili sa “pag-ila sa mga timailhan” ug sa pagdawat niini. (Tan-awa sa Mateo 16:1–4.)

Si Pedro, sama sa mga Pariseo ug mga Saduceo, nakasaksi sa mga milagro sa Manluluwas ug nakadungog sa Iyang mga pagtulon-an. Apan ang dili malalis nga pagpamatuod ni Pedro, “Ikaw mao ang Kristo, ang Anak sa buhi nga Dios,” wala magagikan pinaagi sa iyang pisikal nga mga pagbati—sa iyang “pagkatawo.” Ang iyang pagpamatuod gipadayag ngadto kaniya pinaagi sa atong “Amahan nga atua sa langit.” Ang Pagpadayag mao ang bato diin gitukod sa Manluluwas ang Iyang Simbahan kaniadto ug karon—pagpadayag gikan sa langit ngadto sa Iyang mga sulugoon. Ug kini mao ang bato diin kita makatukod sa atong pagkatinun-an—pagpadayag nga si Jesus mao ang Kristo ug nga ang Iyang mga sulugoon naghupot sa “mga yawe sa gingharian.” Kon kita gitukod diha niini nga pundasyon, “ang gahom sa kamatayon dili gayod makabuntog [kanato]” (Mateo 16:15–19).

icon sa personal nga pagtuon

Mga Ideya alang sa Personal nga Pagtuon sa Kasulatan

Mateo 16:13–17

Ang pagpamatuod bahin ni Jesukristo nagagikan pinaagi sa pagpadayag.

Kon pangutan-on ni Jesukristo ang mga tawo karon, “Sumala sa sulti sa mga tawo, kinsa man kono ang anak sa Tawo?” unsa kaha ang ilang isulti? Unsaon nimo sa pagtubag kon si Jesus mangutana kanimo, “Unsa may inyong isulti, kinsa man ako?” (Tan-awa sa Mateo 16:13–15.)

Palandonga ang imong pagpamatuod sa Manluluwas ug giunsa nimo sa pagdawat niini. Unsa ang imong makat-onan gikan sa Mateo 16:15–17 nga makapalig-on niini? Kon gusto ka nga makakat-on pa og dugang mahitungod sa pagpamatuod ug personal nga pagpadayag susiha kini nga mga kasulatan: Juan 15:26; 2 Nephi 31:17–18; Alma 5:45–48; ug Doktrina ug mga Pakigsaad 8:2–3.

Tan-awa usab sa “Presidente Nelson: Hear Him—Personal Revelation” (video), ChurchofJesusChrist.org.

Mateo 16:13–19; 17:1–9; Marcos 9:2–9

“Ang mga yawe sa gingharian sa langit” ania sa yuta karon.

Ang “mga yawe sa gingharian sa langit” nga gisaad sa Manluluwas nga ihatag ngadto ni Pedro mao ang mga yawe sa pagkapari (Mateo 16:19). Unsa ang mga yawe sa pagkapari? Nganong kita nagkinahanglan niini? Palandonga kini nga mga pangutana samtang ikaw magbasa mahitungod sa saad sa Manluluwas diha sa Mateo 16:13–19 ug ang katumanan niini diha sa Mateo 17:1–9; Marcos 9:2–9 (tan-awa usab sa Hubad ni Joseph Smith, Marcos 9:3 [sa Marcos 9:4, footnote a]).

Ang ubang mga kapanguhaan nga motabang kanimo sa pagkat-on mahitungod sa yawe sa pagkapari naglakip sa Doktrina ug mga Pakigsaad 65:2; 107:18–20; 110:11–16; 128:9–11; “Yawe sa Pagkapari, Mga” sa Giya ngadto sa mga Kasulatan (scriptures.ChurchofJesusChrist.org); ug mensahe ni Elder Gary E. Stevenson “Asa ang mga Yawe ug Awtoridad sa Pagkapari?,” (Liahona, Mayo 2016, 29–32). Samtang nagtuon niini nga mga kapanguhaan, hunahunaa ang paghimo og usa ka lista sa unsay imong makat-onan mahitungod sa mga yawe sa pagkapari ug ang mga panalangin nga nagagikan niini. Ngano kaha nga ang yawe usa ka maayong simbolo alang sa katungod sa pagdumala og mga serbisyo sa pagkapari?

Tan-awa usab sa Dallin H. Oaks, “Ang Melchizedek nga Pagkapari ug ang mga Yawe,” Liahona, Mayo 2020, 69–72.

estatuwa ni Pedro nga nagkupot og mga yawe

Ang mga yawe sa pagkapari mao ang awtoridad sa pagdumala sa paggamit sa pagkapari.

Mateo 17:14–21; Marcos 9:14–29

Kon nangita og mas lig-ong hugot nga pagtuo, ako makasugod sa hugot nga pagtuo nga ako aduna.

Ang amahan nga gihisgotan sa Mateo 17 ug sa Marcos 9 adunay mga rason nga mobati og pagduha-duha nga si Jesus makaayo sa iyang anak nga lalaki. Iyang gihangyo ang mga tinun-an ni Jesus sa pag-ayo sa iyang anak nga lalaki, ug dili sila makahimo. Apan sa dihang nangayo siya sa Manluluwas alang sa usa ka milagro, mipili siya sa pagpahayag og hugot nga pagtuo. “Ginoo, nagatuo ako,” miingon siya. Dayon, sa pagdawat nga ang iyang hugot nga pagtuo dili hingpit, midugang siya, “Tabangi ang pagtuo ko nga nakulangan.”

Unsa ang gitudlo sa Espiritu kanimo samtang nagbasa ka mahitungod niini nga milagro? Sa unsang paagi nga ang Langitnong Amahan mitabang kanimo sa pagpatubo sa imong hugot nga pagtuo? Unsay imong mahimo sa pagpalambo sa hugot nga pagtuo nga anaa na kanimo? Tingali makahimo ka og lista sa mga kasulatan, mga mensahe sa komperensiya, o mga kasinatian nga nakapalig-on sa imong hugot nga pagtuo.

Tan-awa usab sa Jeffrey R. Holland, “Nagatuo Ako,” Liahona, Mayo 2013, 93–95.

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Home Evening

Mateo 15:7–9; Marcos 7:6–7.Unsa ang kalainan tali sa pagsimba sa Dios uban sa atong mga ngabil, o mga pulong, ug sa pagsimba Kaniya uban sa atong mga kasingkasing?

Mateo 15:17–20; Marcos 7:18–23.Nganong magbantay kita mahitungod sa unsay isulod sa atong mga ba-ba? Gibase sa unsay gitudlo ni Jesus dinhi niini nga mga bersikulo, nganong kita kinahanglan gani nga mas magbantay mahitungod sa unsay mogawas sa atong mga ba-ba—ug mogawas sa atong mga kasingkasing? Unsaon nato pagbaton sa atong mga kasingkasing nga putli?

Mateo 16:15–17.Unsaon sa Dios sa pagpadayag ngari kanato nga si Jesus mao “ang Kristo, ang Anak sa Dios nga buhi”? (bersikulo 16). Unsaon nato pag-andam ang atong mga kaugalingon sa pagdawat niini nga pagpadayag gikan Kaniya?

Mateo 16:13–19; 17:1–9.Sa pagtudlo sa mga kabataan mahitungod sa mga yawe sa pagkapari, mahimo nimong iasoy ang istorya ni Elder Gary E. Stevenson mahitungod sa pagkanasirhan sa iyang sakyanan (tan-awa sa “Asa ang mga Yawe ug Awtoridad sa [Pagkapari]”sa Liahona, Mayo 2016, 29–32). Mahimo nimong pagamiton ang mga bata og mga yawe sa pag-abli sa balay, sa sakyanan, o sa ubang mga kandado. Hunahunaa ang pagpakita og usa ka hulagway sa Presidente sa Simbahan ug sa pagpamatuod nga siya naghupot sa tanang yawe sa pagkapari, sama lamang kaniadto ni Pedro.

Mateo 17:20.Ang mga propeta nga adunay hugot nga pagtuo ni Jesukristo nakapabalhin og tinuod nga mga bukid (tan-awa sa Jacob 4:6; Moises 7:13). Apan sa kasagaran dili kana mao ang milagro nga atong gikinahanglan. Mitudlo si Presidente Russell M. Nelson: “Kon kita adunay pagtuo sama ka gamay sa liso sa mustasa, ang Ginoo makatabang kanato nga mabalhin ang kabukiran sa pagkasagmuyo ug pagduha-duha diha sa umaabot natong mga buluhaton samtang magserbisyo kita sa mga anak sa Dios, lakip na ang mga sakop sa pamilya, mga miyembro sa Simbahan, ug kadtong dili pa mga miyembro sa Simbahan” (“Bililhong mga Gasa Gikan sa Dios,” Liahona, Mayo 2018, 10). Unsa ang pipila ka mga bukid sa atong kinabuhi nga kinahanglan nga balhinon? Unsaon nato sa pagpakita og hugot nga pagtuo diha sa gahom sa Dios sa pagtabang kanato nga mabalhin kini nga mga bukid?

Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.

Gisugyot nga awit: “Nagatuo ako Kang Kristo,” Mga Himno,, nu. 78.

Pagpalambo sa Atong Pagtudlo

Pagpundok kamo kanunay. Si Presidente Henry B. Eyring mitudlo: “Dili gayod mopalabay og usa ka kahigayonan sa pagpundok sa mga anak aron sa pagkat-on sa doktrina ni Jesukristo. Ang ingon nga mga higayon panagsa ra kaayo kon itandi sa mga paningkamot sa kaaway” (“The Power of Teaching Doctrine [Ang Gahom sa Pagtudlo sa Doktrina],” Ensign, Mayo 1999, 74).

tawo uban sa masakiton nga anak nga lalaki diha sa atubangan ni Jesus

Master, I Have Brought unto Thee My Son [Magtutudlo, Akong Gidala nganha Kanimo ang Akong Anak nga Lalaki], ni Walter Rane