“Marso 13–19. Mateo 11–12: Lucas 11; ‘Papahulayon Ko Kamo,’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2023 (2022)

“Marso 13–19. Mateo 11–12; Lucas 11,” Dali, Sunod Kanako—Alang sa mga Indibidwal ug mga Pamilya: 2023

Imahe

Jesus nagbarog taliwala sa mga panganod

Be Not Afraid [Ayaw og Kahadlok], ni Michael Malm

Marso 13–19

Mateo 11–12; Lucas 11

“Papahulayon Ko Kamo”

Si Presidente Dallin H. Oaks mitudlo: “Ang mga kasulatan, diin mao ang mga pagpadayag sa nanglabay nga panahon, dili masabtan nga walay pagdawat sa mga pagpadayag sa karon. … Ang pagtuon sa mga kasulatan naghimo sa mga lalaki ug sa mga babaye sa pagdawat og mga pagpadayag” (“Scripture Reading and Revelation,” Ensign, Ene. 1995, 7).

I-rekord ang Imong mga Panghunahuna

Sa daghang mga paagi, gihimo sa mga Pariseo ug mga escriba ang pagsimba kang Jesus nga makahasol. Kasagaran ilang gihatagan og gibug-aton ang pig-ot nga mga lagda labaw sa mahangturong mga kamatuoran. Ang mga lagda mahitungod sa Igpapahulay nga adlaw, nga gipasabot nga usa ka adlaw sa pagpahulay, sa ilang mga kaugalingon nga usa ka bug-at nga palas-anon.

Ug unya, si Jesus Mismo miabot taliwala sa Iyang mga katawhan. Siya mitudlo kanila nga ang tinuod nga katuyoan sa relihiyon dili mao ang paghimo og mga alantuson apan sa paghupay kanila. Siya mitudlo nga ang Dios naghatag kanato og mga sugo, lakip ang usa nga pagtahod sa Igpapahulay, dili sa pagpabug-at kanato apan sa pagpanalangin kanato. Oo, ang dalan ngadto sa Dios higpit ug pig-ot, apan ang Ginoo mianhi sa pagpahibalo nga kita dili kinahanglan nga maglakaw niini nga mag-inusara. “Umari kanako,” nangamuyo Siya. Ang Iyang pagdapit, ngadto sa tanan kinsa “nabug-atan” sa bisan unsa nga rason, mao ang pagbarog tupad Kaniya, sa pagbugkos sa atong mga kaugalingon ngadto Kaniya, ug sa paghimo Kaniya nga makigbahin sa atong mga alantuson. Ang Iyang saad mao ang “Makakaplag kamog pahulay sa inyong mga kalag.” Itandi ngadto sa mga kapilian––naningkamot sa pagpadayon nga mag-inusara o magsalig sa mortal nga mga solusyon––ang Iyang “yugo masayon, ug magaan ang [Iyang] luwan.” (Mateo 11:28–30.)

Imahe

icon sa personal nga pagtuon

Mga Ideya alang sa Personal nga Pagtuon sa Kasulatan

Mateo 11:28–30

Papahulayon ako ni Jesukristo samtang ako nagsalig diha Kaniya.

Kitang tanan nagdala og mga alantuson—ang uban resulta sa atong kaugalingong mga sala ug mga sayop, ang uban nahimo pinaagi sa mga pagpili sa uban, ug ang uban dili sayop ni bisan kinsa apan kabahin lamang sa kinabuhi dinhi sa yuta. Bisan unsa pa ang rason sa atong mga pakigbisog, nangamuyo si Jesus kanato sa pagduol ngadto Kaniya aron Siya makatabang kanato pagpas-an sa atong mga alantuson ug makakaplag og kahupay (tan-awa usab sa Mosiah 24). Si Elder David A. Bednar mitudlo, “Ang paghimo ug paghupot og sagradong mga pakigsaad nagyugo kanato ngadto ug uban ni Ginoong Jesukristo” (“Makadaog sa Ilang mga Alantuson uban sa Kasayon,” Liahona, Mayo 2014, 88). Uban niini diha sa hunahuna, palandonga ang mga pangutana sama sa mosunod aron mas maayo ang pagsabot sa mga pulong sa Manluluwas niini nga mga bersikulo: Sa unsa nga paagi nga ang akong mga pakigsaad nagyugo kanako ngadto ug uban sa Manluluwas? Unsa ang akong kinahanglan nga buhaton sa pagduol ngadto ni Kristo? Sa unsang paagi nga ang yugo sa Manluluwas masayon ug ang Iyang luwan magaan?

Unsang uban nga mga pangutana ang moabot sa imong hunahuna samtang ikaw nagbasa? I-rekord kini, ug pangitaa ang mga tubag niini nga semana diha sa mga kasulatan ug sa mga pulong sa mga propeta. Mahimong makaplagan nimo ang mga tubag sa pipila sa imong mga pangutana diha sa mensahe ni Elder David A. Bednar nga gipakisayran sa ibabaw.

Tan-awa usab sa John A. McCune, “Duol ngadto Kang Jesukristo—Magpakabuhi isip mga Santos sa Ulahing mga Adlaw,” Liahona, Mayo 2020, 36–38; Lawrence E. Corbridge, “Ang Dalan,” Liahona, Nob. 2008, 34–36.

Imahe

mga lalaki nag-akbo nga nagtan-aw sa mga disipulo nga nangagi sa umahan sa trigo

The Disciples Eat Wheat on the Sabbath [Ang mga Tinun-an Nagkaon og Trigo sa Igpapahulay], ni James Tissot

Mateo 12:1–13

“Pagbuhat og maayo sa adlaw nga igpapahulay.”

Ang mga pagtulon-an sa mga Pariseo lahi gikan sa Manluluwas sa daghang mga paagi, apan ilabi na sa giunsa sa pagtahod ang Igpapahulay nga adlaw. Samtang ikaw nagbasa sa Mateo 12:1–13, mahimong imong hunahunaon kon unsa ka maayo ang imong mga kinaiya ug mga lihok kabahin sa Igpapahulay nga nahiuyon sa mga pagtulon-an sa Manluluwas. Sa pagbuhat niini, mahimong palandungon nimo ang mga pahayag sama niini:

“Kahimut-an ko ang kalooy, ug dili ang paghalad” (bersikulo 7; tan-awa sa Oseas 6:6).
“Ang Anak sa tawo Agalon bisan pa sa adlaw nga igpapahulay” (bersikulo 8).
“Uyon sa kasugoan ang pagbuhat og maayo sa adlaw nga igpapahulay” (bersikulo 12).

Unsaon kaha niini nga mga pagtulon-an ang pag-impluwensya sa paagi nga ikaw moatubang sa Igpapahulay?

Tan-awa usab sa Marcos 2:23–3:5; “Igpapahulay nga Adlaw,” topics.ChurchofJesuschrist.org.

Mateo 12:34–37; Lucas 11:33–44

Ang akong mga pulong og mga lihok nagdan-ag kon unsa ang anaa sa akong kasingkasing.

Usa sa mga pagsaway sa Manluluwas kabahin sa mga Pariseo mao nga sila naninguha sa pagpakita nga matarong apan ang ilang mga katuyoan dili putli. Samtang ikaw nagtuon sa mga pahimangno sa Manluluwas ngadto sa mga Pariseo diha sa Mateo 12:34–37 ug Lucas 11:33–34, palandonga ang koneksyon tali sa atong mga kasingkasing ug sa atong mga lihok. Unsa ang kahulogan sa hugpong sa mga pulong nga “kadagaya sa kasingkasing” nganha kanimo? (Mateo 12:35). Sa unsang paagi ang atong mga pulong naghatag og kaangayan o naghukom kanato? (tan-awa sa Mateo 12:37). Unsa kaha ang kahulogan alang sa imong mata nga mahimong ”bug-os”? (Lucas 11:34). Palandonga kon sa unsang paagi ikaw makahimo nga “mapuno sa kahayag” (Lucas 11:36) pinaagi sa gahom sa Manluluwas.

Tan-awa usab sa Alma 12:12–14; Doktrina ug mga Pakigsaad 88:67–68.

Imahe

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Home Evening

Mateo 11:28–30.Makatabang ka sa imong pamilya sa paghanduraw sa mga pagtulon-an sa Manluluwas niini nga mga bersikulo pinaagi sa pagpapuli-puli kanila sa pagsulay sa pagbitad og butang nga bug-at, una sa ilang kaugalingon ug dayon adunay tabang. Unsa ang pipila ka mga alantuson nga atong gipas-an? Unsay buot ipasabot sa pagpas-an sa yugo ni Kristo diha sa atong mga kaugalingon? Ang hulagway sa kataposan niini nga outline makatabang kanimo sa pagpasabot kon unsa ang yugo.

Mateo 12:10–13.Samtang ikaw nagbasa mahitungod ni Jesus nga nag-ayo sa usa ka lalaki sa panahon sa Igpapahulay, ang imong pamilya makahimo sa pag-istorya mahitungod kon giunsa kita “naayo ingon sa usa” pinaagi sa Manluluwas. Unsaon sa Igpapahulay mahimong usa ka adlaw sa pag-ayo alang kanato?

Nadasig pinaagi sa ehemplo sa Manluluwas dinhi niini nga mga bersikulo ang imong pamilya makahimo og lista sa mga paagi nga ikaw makahimo sa “pagbuhat og maayo sa igpapahulay” (bersikulo 12). Siguroha ang paglakip sa mga oportunidad sa pagserbisyo sa uban. Kini makatabang sa paghupot sa imong lista ug sa pagdangop ngadto niini sa umaabot nga mga Dominggo.

Lucas 11:33–36.Palandonga kon unsaon kaha nimo sa pagtudlo sa imong pamilya kon unsa ang kahulogan nga mahimong “mapuno sa kahayag” (mga bersikulo 34, 36). Makatabang ba ang leksiyon nga maggamit og mga butang? Makahimo usab ikaw sa paghisgot og mga paagi sa pagdala sa kahayag sa Manluluwas nganhi sa atong mga kinabuhi, atong panimalay, ug sa kalibotan.

Lucas 11:37–44.Tingali ang imong pamilya makahisgot niini nga mga bersikulo samtang nagtinabangay og hugas sa mga plato. Ikaw makahimo sa pagsulti mahitungod kon nganong kini mahimong ngil-ad nga ideya sa paghugas lamang sa gawas sa mga butang sama sa mga panaksan ug mga tasa. Ikaw dayon makahimo sa pakiglabot niini ngadto sa panginahanglan nga mahimong matarong dili lamang sa atong mga buhat nga makita apan usab sa atong dili makita nga mga hunahuna ug mga pagbati.

Alang sa dugang nga mga ideya sa pagtudlo sa mga bata, tan-awa sa latid karon nga semana sa Dali, Sunod Kanako—Alang sa Primary.

Gisugyot nga himno: “Unsa Kalumo ang Sugo sa Dios,” Mga Himno, nu. 71.

Pagpalambo sa Personal nga Pagtuon

Pagmakanunayon. Ikaw mahimong makabaton og mga adlaw nga ang pagtuon sa mga kasulatan ingon og mas malisod o minos ang epekto kay sa imong gilauman. Ayaw paghunong. Si Elder David A. Bednar mitudlo, “Ang atong pagkamakanunayon sa paghimo og daw gagmay nga mga butang modala ngadto sa mahinungdanong mga sangputanan nga espiritwal” (“Labaw nga Makugihon ug Mabuhaton diha sa Panimalay,” Liahona, Nob. 2009, 20).