“Pebrero 6–12. Juan 2–4: ‘Kinahanglan nga Igaanak Kamo Pag-usab,’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2023 (2022)
“Pebrero 6–12. Juan 2–4,” Dali, Sunod Kanako—Alang sa mga Indibidwal ug mga Pamilya: 2023
Pebrero 6–12
Juan 2–4
“Kinahanglan nga Igaanak Kamo Pag-usab”
Samtang magbasa ka sa Juan 2–4, ang Espiritu motudlo kanimo sa mga butang mahitungod sa imong kaugalingong pagkakabig. Isulat ang Iyang mga pag-aghat. Mahimong makakita ka og dugang nga espirituhanong mga panabot gikan sa mga ideya sa pagtuon niini nga latid.
I-rekord ang Imong mga Panghunahuna
Sa kasaulogan sa kasal sa Cana, gihimo ni Kristo ang tubig ngadto sa bino—usa ka kalihokan nga gitawag ni Juan “nahauna sa mga milagro” (Juan 2:11). Tinuod kana nga adunay laing kahulogan. Samtang mao kini ang unang milagro ni Jesus nga gihimo sa publiko, nagsimbolo usab kini og laing milagroso nga sinugdanan—ang proseso sa atong mga kasingkasing nga mausab kon mahimo kitang mas sama sa atong Manluluwas. Kini nga milagro sa tibuok kinabuhi nagsugod sa desisyon sa pagsunod ni Jesukristo, nga mag-usab ug magpuyo og mas maayo nga kinabuhi pinaagi Kaniya. Kini nga milagro makapausab sa kinabuhi nga ang pagkahimong “matawo pag-usab” mao ang usa sa labing maayong paagi sa paghulagway niini (Juan 3:7). Apan ang pagkatawo pag-usab mao lamang ang sinugdanan sa dalan sa pagkadisipulo. Ang mga pulong ni Kristo ngadto sa babayeng taga-Samaria sa may atabay nagpahinumdom kanato nga kon mopadayon kita niini nga dalan, sa kataposan ang ebanghelyo mahimong “atabay sa tubig” sa sulod kanato, “magatubod ngadto sa kinabuhing dayon” (Juan 4:14).
Mga Ideya alang sa Personal nga Pagtuon sa Kasulatan
Ang mga milagro ni Jesukristo “mipakita sa iyang himaya.”
Samtang ikaw nagbasa mahitungod sa paghimo sa Manluluwas sa tubig ngadto sa bino diha sa Juan 2:1–11, mahimong makaangkon ka og dugang nga mga panabot pinaagi sa paghunahuna sa mga panan-aw sa lain-laing mga tawo kinsa didto, lakip ni Maria, sa mga disipulo, ug sa uban. Kon ikaw nakasaksi sa mga panghitabo nga gihulagway dinhi, unsa ang imong mga panghunahuna ni Jesus niana nga higayon? Unsa ang gitudlo niini nga milagro kanimo mahitungod Kaniya?
Kinahanglan gayod nga matawo ako pag-usab aron makasulod sa gingharian sa Dios.
Sa dihang si Nicodemo pribadong miadto ni Jesus, mabinantayon siya nga tig-obserbar. Unya, bisan pa niana, gipanalipdan niya si Jesus sa publiko (tan-awa sa Juan 7:45–52) ug miapil sa mga tumutuo sa lubong sa Manluluwas (tan-awa sa Juan 19:38–40). Unsa nga mga pagtulon-an ang imong makita sa Juan 3:1–21 nga tingali nakapadasig ni Nicodemo sa pagsunod ni Jesus ug matawo pag-usab?
Si Propeta Joseph Smith mitudlo, “Ang pagkatawo pag-usab, moabut [pinaagi sa] Espiritu sa Dios pinaagi sa mga ordinansa” (Mga Pagtulun-an sa mga Presidente sa Simbahan: Joseph Smith [2007], 113). Unsa ang tahas sa imong bunyag ug pagkumpirma—ingon nga “igaanak sa tubig ug sa Espiritu” (Juan 3:5)—ang gihimo sa imong pagkatawo pag-usab? Unsay imong gibuhat sa pagpadayon niini nga proseso sa kausaban? (tan-awa sa Alma 5:11–14).
Tan-awa usab sa Mosiah 5:7; 27:25–26; David A. Bednar, “Kinahanglang Matawo Kamo Pag-usab,” Liahona, Mayo 2007, 19–22.
Gipakita sa Langitnong Amahan ang Iyang gugma alang kanako pinaagi ni Jesukristo.
Si Elder Jeffrey R. Holland mitudlo, “Ang unang dakong kamatuoran sa tanang kahangtoran mao nga ang Dios nahigugma kanato sa tibuok Niyang kasingkasing, gah[o]m, hunahuna, ug kusog” (Ugma ang Ginoo Mobuhat og Katingalahan diha Kaninyo,” Liahona, Mayo 2016, 129). Sa unsa nga paagi nabati nimo ang gugma sa Dios pinaagi sa gasa sa Iyang Anak?
Ang sakramento naghatag og panahon sa paghunahuna sa gugma sa Dios ug sa gasa sa Iyang Anak. Unsa nga mga himno ang nakatabang kanimo nga mobati niini nga gugma? Unsay imong mabuhat aron mahimong mas makahuluganon ang sakramento?
Samtang magpadayon ka sa pagbasa mahitungod sa pagtulon-an ug pangalagad sa Manluluwas, pangutan-a ang imong kaugalingon kon sa unsa nga paagi ang mga butang nga imong gibasa motabang kanimo nga masabtan ug mabati ang gugma sa Dios.
Ang Dios ba usa ka espiritu?
Ang uban tingali maglibog sa pamahayag ni Jesus nga ang Dios usa ka espiritu. Ang Hubad ni Joseph Smith niini nga bersikulo naghatag og importante nga pagpatin-aw: “Kay ngadto sa mao ang Dios misaad sa iyang Espiritu.” Ang moderno nga pagpadayag nagtudlo usab kanato nga ang Dios adunay unod ug mga bukog (tan-awa sa Doktrina ug mga Pakigsaad 130:22–23; tan-awa usab sa Genesis 5:1–3; Mga Hebreohanon 1:1–3).
Gitanyag ni Jesus kanako ang Iyang buhi nga tubig.
Unsa kahay gipasabot ni Jesus sa dihang Iyang gisultihan ang babayeng taga-Samaria nga bisan kinsa ang moinom sa tubig nga Iyang gitanyag dili na gayod pagauhawon? Sa unsa nga paagi nga ang ebanghelyo sama sa buhing tubig?
Ang ebanghelyo ni Kristo mao ang buhing tubig nga nag-amuma sa atong mga kalag.
Usa sa mga mensahe sa Manluluwas ngadto sa babayeng taga-Samaria mao nga kon sa unsa nga paagi kita nagsimba mas importante kay sa asa kita mosimba (tan-awa sa Juan 4:21–24). Unsay imong gihimo sa “pagsimba sa Amahan diha sa espiritu ug sa kamatuoran”? (Juan 4:23).
Tan-awa usab sa Giya ngadto sa mga Kasulatan, “Pagsimba,” scriptures.ChurchofJesusChrist.org; Dean M. Davies, “Ang mga Panalangin sa Pagsimba,” Liahona, Nob. 2016, 93–95.
Mga Ideya alang sa Pamilya nga Pagtuon sa Kasulatan ug Home Evening
-
Juan 2–4.Samtang ang imong pamilya magbasa niini nga mga kapitulo niini nga semana, hatagi og espesyal nga pagtagad kon sa unsa nga paagi gigamit sa Manluluwas ang matag adlaw nga mga butang—pag-anak, hangin, tubig, ug pagkaon—sa pagtudlo sa espirituhanong mga kamatuoran. Unsa nga mga butang sa imong panimalay ang imong magamit sa pagtudlo sa espirituhanong mga kamatuoran?
Samtang ikaw magtuon niini nga mga kapitulo, hunahunaa ang pagtan-aw sa mga video nga nagpakita niini nga mga pangitabo: “Jesus Turns Water into Wine,” “Jesus Cleanses the Temple,” “Jesus Teaches of Being Born Again,” ug “Jesus Teaches a Samaritan Woman” (ChurchofJesusChrist.org).
-
Juan 2:13–17.Unsang mahugaw nga mga impluwensiya ang kinahanglang dili pasudlon sa imong pamilya sa inyong panimalay aron kini mahimong usa ka sagrado nga dapit—sama sa templo? Unsay imong buhaton aron kadtong mga butang dili makasulod?
-
Juan 3:1–6.Pakigsulti sa imong pamilya mahitungod sa milagro sa pagmabdos ug pagpanganak—ang proseso sa paglalang og buhi, intelihente nga binuhat. Si Jesus nagtudlo nga kinahanglan kitang matawo pag-usab sa dili pa mosulod sa gingharian sa Dios. Ngano nga ang pagkatawo pag-usab usa ka maayong pasumbingay alang sa kausaban nga gikinahanglan gikan kanato sa dili pa kita makasulod sa gingharian sa Dios? Sa unsa nga paagi kita makasinati sa proseso sa espirituhanong pagkatawo pag-usab?
-
Juan 3:16–17.Dapita ang mga sakop sa pamilya sa pagsulti pag-usab niini nga mga bersikulo sa ilang kaugalingong mga pulong ingon og nagpasabot sila niini ngadto sa usa ka higala. Sa unsa nga paagi si Jesukristo mitabang kanato nga mobati sa gugma sa Dios?
-
Juan 4:5–15.Unsay gitudlo sa Manluluwas kanato sa dihang Iyang gitandi ang Iyang ebanghelyo ngadto sa buhing tubig? Tingali ang imong pamilya mahimong motan-aw og pipila ka nagdagan nga tubig ug ihulagway ang mga kalidad niini nga tubig. Nganong kinahanglan nga moinom kita og tubig kada adlaw? Sa unsa nga mga pamaagi nga ang ebanghelyo ni Jesukristo sama sa “usa ka tubod sa tubig nga magatubo ngadto sa pagka-kinabuhing dayon”? (Juan 4:14).
Alang sa dugang nga mga ideya sa pagtudlo sa mga bata, tan-awa sa latid karon nga semana diha sa Dali, Sunod Kanako—Alang sa Primary.
Gisugyot nga awit: “Ang Pagtahod Usa ka Gugma,” Songbook sa mga Bata, 12.
Pagpalambo sa Personal nga Pagtuon
Pangitaa ang mga simbolo. Ang mga kasulatan sa kasagaran naggamit og mga butang, mga panghitabo, mga aksyon, o mga pagtulon-an sa pagrepresentar sa espirituhanong mga kamatuoran. Kini nga mga simbolo makapalambo sa imong pagsabot sa doktrina nga gitudlo. Sama pananglit, ang Manluluwas mipahisama sa pagkakabig ngadto sa pagkatawo pag-usab.
Living Water [Buhing Tubig], ni Simon Dewey