“Pebrero 6–12. Juan 2–4: ‘Kinahanglan Magpakatawo Kamo Pag-usab’” Dali, Sunod Kanako—Alang sa Primary: Bag-ong Tugon 2023 (2022)
“Pebrero 6–12. Juan 2–4,” Dali, Sunod Kanako—Alang sa Primary: 2023
Pebrero 6–12
Juan 2–4
“Kinahanglan Magpakatawo Kamo Pag-usab”
Sa mubo nga klase sa Primary, wala kay panahon sa pagtudlo sa matag importante nga baroganan sa Juan 2–4. Pagtinguha og espirituhanon nga giya mahitungod kon unsa ang hatagan og gibug-aton aron matubag sa labing maayong paagi ang mga panginahanglan ug mga interes sa mga bata.
Dapita ang Pagpaambit
Aron sa pag-awhag sa mga bata sa pagpaambit sa unsay ilang nakat-onan ug nasinati, pangutan-a sila kon unsay ilang bag-ong gibuhat aron mahimong “[mga mananagat og] mga tawo” (Mateo 4:19). Tingali ganahan ka nga rebyohon ang leksiyon sa miaging semana uban kanila.
Itudlo ang Doktrina: Mas Gagmay nga mga Bata
Kinahanglan ko nga mabunyagan ug makompirmahan aron makabalik sa pagpuyo uban sa Langitnong Amahan.
Ang mga bata nga imong gitudloan nangandam sa paghimo sa importante nga mga lakang aron makapuyo pag-usab uban sa Langitnong Amahan pinaagi sa pagpabunyag (pagkatawo pinaagi sa tubig) ug pagpakompirma (pagkatawo pinaagi sa Espiritu). Unsaon nimo sila pagtabang nga makasabot sa kaimportante niining duha ka ordinansa?
Posible nga mga Kalihokan
-
I-summarize ang istorya ni Jesus nga nagtudlo kang Nicodemo (tan-awa sa Juan 3:1–10). Saari ang mga bata nga kon sila mabunyagan, ang Langitnong Amahan mohatag kanila sa gasa sa Espiritu Santo.
-
Ipakita sa mga bata ang pahina sa kalihokan niini nga semana, ug hangyoa sila sa paghulagway sa mga drowing. Basaha ang Juan 3:5, ug pagpamatuod nga kinahanglan kitang mabunyagan ug makompirmahan aron makapuyo pag-usab uban sa Langitnong Amahan.
-
Hangyoa ang mga bata sa paghisgot sa unsay ilang buhaton aron sa paghugas sa ilang mga kamot. Ipakita ang hulagway nga Batang Babaye Nga Gibunyagan (Libro sa mga Hulagway sa Ebanghelyo, nu. 104), ug tabangi ang mga bata sa pagtandi sa pagpanghugas sa atong mga kamot gamit ang tubig ngadto sa pagkahimong limpyo sa espirituhanon nga paagi pinaagi sa bunyag.
Ang Langitnong Amahan nahigugma kanako, mao nga gihatagan Niya ako og usa ka Manluluwas.
Unsaon nimo sa pagtabang ang mga bata nga makakat-on niining bililhon nga kamatuoran?
Posible nga mga Kalihokan
-
Hangyoa ang mga bata sa pagkompleto sa mga kapahayag nga sama niini: “Tungod kay gihigugma ko sa akong mga ginikanan, sila …” Basaha ang Juan 3:16. Dayon tabangi ang matag bata sa pagsubli sa Juan 3:16, nga ilisan ang mga pulong nga “ang kalibotan” sa iyang kaugalingon nga ngalan. Tabangi ang mga bata nga makamatikod sa unsay giingon niini nga bersikulo nga gibuhat sa Langitnong Amahan tungod kay nahigugma Siya kanato. Dapita ang mga bata sa pagdrowing og hulagway ni Jesus. Tugoti sila nga ipaambit ang ilang mga drowing sa usag usa ug ipahayag ang ilang gugma alang sa Manluluwas.
-
Kantaha og dungan ang usa ka awit mahitungod ni Jesus, sama sa “Mipadala sa Bugtong Anak” (Songbook sa mga Bata, 20–21). Ipaisa sa mga bata ang litrato ni Jesus sa matag higayon nga makanta nila ang pulong sama sa “Anak,” “Jesus,” o “Manluluwas.”
Si Jesukristo mao ang akong “tubig nga naghatag sa kinabuhi.”
Ang tanang bata sa imong klase makasabot sa pagbati og kauhaw. Unsaon nimo paggamit niana nga kasinatian aron sa pagtabang nila nga makasabot kon unsa ka dako sa atong pagpanginahanglan sa tubig nga naghatag sa kinabuhi nga gitanyag ni Jesukristo?
Posible nga mga Kalihokan
-
Gamita ang litrato sa latid niini nga semana sa Dali, Sunod Kanako—Alang sa mga Indibidwal ug mga Pamilya aron sa pagsaysay sa istorya ni Jesus ug sa babaye didto sa atabay (tan-awa sa Juan 4:5–15). Hangyoa ang mga bata sa pagsaysay og balik sa istorya.
-
Ipakita ang usa ka baso sa tubig, ug hisgoti sa mga bata kon nganong nagkinahanglan kita og tubig. Daklit nga I-summarize ang Juan 4:5–15, ug ipamatuod nga si Jesukristo ug ang Iyang ebanghelyo naghatag og kinabuhi sa atong mga espiritu, sama nga ang tubig naghatag og kinabuhi sa atong mga lawas.
Itudlo ang Doktrina: Mas Magulang nga mga Bata
Makatahod ako sa akong inahan sama sa gibuhat ni Jesus.
Sa kasal sa Cana, si Maria misulti kang Jesus nga nahurot na ang bino. Sumala sa Hubad ni Joseph Smith, si Jesus mitubag sa Iyang inahan pinaagi sa pagpangutana kaniya kon unsa man ang iyang gusto nga ipabuhat Kaniya ug miingon nga Iyaha kanang buhaton. Si Jesus usa ka ehemplo kon unsaon nato sa pagtratar sa atong mga inahan.
Posible nga mga Kalihokan
-
Dapita ang mga bata sa pagbasa sa Juan 2:1–11 ug papuli-puliha sa pagsaysay og usab sa istorya gamit ang ilang kaugalingon nga mga pulong.
-
Hangyoa ang mga bata sa paglista og mga butang nga tingali nagkinahanglan ang ilang inahan og tabang. Dapita sila sa pagbansay sa unsay ilang masulti ngadto kaniya pinaagi sa paggamit sa susama nga pangutana ni Jesus: “Unsa man ang imong gusto nga akong buhaton alang kanimo?”
-
Dapita ang pipila ka inahan sa pagbisita sa imong klase ug sa pagpaambit kon unsa ang gibuhat sa ilang mga anak aron sa pagpakita og pagtahod kanila.
Si Jesus nangutana sa iyang inahan kon unsa man ang iyang gusto nga ipabuhat Kaniya.
Ang mabunyagan ug makompirmahan susama sa pagpakatawo pag-usab.
Kon kita mabunyagan, nga gitawag ni Jesus og “matawo … pinaagi sa tubig,” makadawat kita og kapasayloan sa atong mga sala ug “makasulod sa Gingharian sa Dios” (Juan 3:5). Unsaon nimo pagtabang ang mga bata nga imong gitudloan nga makasabot kon unsa ang buot ipasabot sa pagpakatawo pag-usab?
Posible nga mga Kalihokan
-
Paghimo og mga piraso sa papel nga adunay mga pulong [word strips] nga nagpakita sa mga pulong sa Manluluwas diha sa Juan 3:3, ug ipabutang kini sa mga bata sa husto nga han-ay. Sa unsang paagi nga ang pagpabunyag ug pagpakompirma sama sa pagpakatawo pag-usab?
-
Ipakita ang hulagway sa usa ka bag-ong natawo nga bata ug sa usa ka tawo nga gibunyagan ug gikompirmahan (tan-awa sa Libro sa mga Hulagway sa Ebanghelyo, nu. 104–5). Sa unsang paagi kita sama sa bag-ong natawo nga bata human kita nabunyagan ug nakompirmahan? (tan-awa sa Juan 3:3–5).
-
Dapita ang mga bata sa pagpaambit og mga panumdoman sa ilang mga bunyag. Basaha ang Mosiah 18:8–10 ug Doktrina ug mga Pakigsaad 20:37 aron sa pagrebyo sa pakigsaad sa bunyag. Tudloi ang mga bata nga ang mahunahunaon nga pag-ambit sa sakramento matag semana mao ang usa ka paagi sa pagpadayon sa proseso sa pagpakatawo pag-usab.
-
Tabangi ang mga bata nga makasag-ulo sa Mga Artikulo sa Hugot nga Pagtuo 1:4.
Ang Langitnong Amahan nahigugma kanako, mao nga Iyang gipadala ang Iyang Anak.
Unsaon nimo pagtabang ang mga bata nga masayod nga si Jesukristo gipadala sa yuta isip usa ka pagpahayag sa gugma sa Langitnong Amahan?
Posible nga mga Kalihokan
-
Hangyoa ang mga bata sa pagdrowing og hulagway sa ilang paborito nga gasa ug sa tawo nga mihatag kanila niana nga gasa. Dayon hangyoa ang usa ka bata sa pagbasa sa Juan 3:16. Unsa nga gasa ang gihatag sa Langitnong Amahan kanato? Sa unsang paagi kini nga gasa nagpakita sa Iyang gugma?
-
Hangyoa ang mga bata sa pagpangita og mga tubag sa pangutana “Nganong gipadala sa Langitnong Amahan si Jesukristo kanato?” samtang ilang basahon ang Juan 3:16–17 o manganta o maminaw sa “Mipadala sa Bugtong Anak” (Songbook sa mga Bata, 20–21).
Si Jesukristo nagtanyag kanako sa “tubig nga naghatag sa kinabuhi.”
Sama nga gigamit ni Jesus ang tubig sa pagtudlo sa babaye sa Samaria, mahimo nimong gamiton ang tubig sa pagtudlo sa mga bata kon nganong nagkinahanglan kita sa ebanghelyo ni Jesukristo.
Posible nga mga Kalihokan
-
Gamit ang Juan 4:5–23, pagsulat og katingbanan [summary] nga mga kapahayag gikan sa istorya sa babaye diha sa atabay. Hangyoa ang mga bata sa pagtan-aw niini nga mga bersikulo aron sa pagbutang sa mga kapahayag sa tukma nga han-ay. Unsay gustong itudlo ni Jesus sa babaye?
-
Hatagi ang mga bata og mainom nga tubig, ug hangyoa sila sa pagpaambit og mga kasinatian sa dihang giuhaw sila. Hisgoti kon unsa ang gibati sa dihang nakainom na gayod og tubig. Dapita ang mga bata sa pagngalan og mga butang nga, sama sa usa ka tasa nga tubig, makatagbaw kanato sa makadiyot. Unsa nga mga butang ang sama sa “tubig nga naghatag sa kinabuhi” nga makatagbaw kanato sa kahangtoran?
-
Isulat diha sa pisara ang Sa unsang paagi ang ebanghelyo sama sa tubig? Hangyoa ang mga bata sa paghunahuna kon unsaon nila sa pagtubag niini nga pangutana samtang basahon nila ang Juan 4:5–23.
Awhaga ang Pagkat-on diha sa Panimalay
Ikonsiderar ang paghangyo sa mga bata sa paghatag sa mga sakop sa ilang pamilya og mainom nga tubig kon mauli na sila. Samtang ila kining buhaton, mahimo silang mopaambit sa ilang nakat-onan mahitungod sa tubig nga naghatag sa kinabuhi.
Pagpalambo sa Atong Pagtudlo
Gamita ang mga pahina sa kalihokan. Samtang kompletohon sa mga bata ang mga pahina sa kalihokan, gamita ang panahon sa pagrebyo sa mga baroganan gikan sa leksiyon.