8–14 Mē

Mātiu 19–20; Maʻake 10; Luke 18

“Ko e Hā ʻOku Ou Kei Hala Aí?”

Lau e Mātiu 19–20; Maʻake 10; mo e Luke 18, mo fakakaukau ki he fānau ʻokú ke akoʻí. Lekooti ha faʻahinga ongo fakalaumālie te ke maʻu. ʻE tokoni hoʻo teuteú ke ke akoʻi ki he fānaú ʻa e meʻa ʻoku nau fie maʻu ke ʻilo mei he ngaahi vahe ko ʻení.

Fakaafeʻi e Feʻinasiʻakí

Fakaafeʻi e fānaú ke nau vahevahe ha meʻa ʻoku nau manatuʻi mei he lēsoni ʻo e uike kuo ʻosí. Fakaʻaliʻali ha ʻū fakatātā ke tokoni ke nau manatuʻi.

Akoʻi e Tokāteliné: Fānau Iiki Angé

Maʻake 10:6–8

ʻOku finangalo e Tamai Hēvaní ke tau mali ʻi he temipalé mo maʻu ha ngaahi fāmili ʻoku taʻengatá.

ʻE ʻaonga fēfē ʻa e ako fekauʻaki mo e tokāteline ʻo e mali taʻengatá ki he fānau ʻokú ke akoʻí? Mahalo ʻe tokoni ke ke toe vakaiʻi e ngaahi moʻoni fekauʻaki mo e nofo malí ʻi he “Ko e Fāmilí: Ko ha Fanongonongo ki he Māmaní” (ChurchofJesusChrist.org).

Ngaahi ʻEkitivitī ʻe Ala Fakahokó

• Lau e Maʻake 10:6–8 ki he fānaú, pea fakaʻaliʻali ha laʻitā ʻo ha ongomeʻa mali. Kole ki he fānaú ke nau tuhu ki he tangatá mo e fefiné ʻi heʻenau fanongo ki hoʻo puʻaki ʻa e tangata mo e fefine. Fakamatalaʻi ange ʻoku finangalo ʻa e Tamai Hēvaní ki he tangatá mo e fefiné ke na mali (vakai, Sēnesi 1:27–28).

• Fakaʻaliʻali ha laʻitā ʻo ha fāmilí pea mo ha temipale. Fakaafeʻi ʻa e fānaú ke nau talanoa kau ki he meʻa ʻoku mamata ki ai ʻi he fakatātaá. Fakamatalaʻi ange ko e finangalo ʻa e Tamai Hēvaní ke silaʻi kitautolu ki hotau ngaahi fāmilí ʻi he temipalé, kae lava ke tau fakataha mo kinautolu ʻo taʻengata. Ke ke ongoʻingofua e fānau ʻoku teʻeki ai sila ʻenau ongomātuʻá.

• Hivaʻi fakataha ha hiva fekauʻaki mo e ngaahi fāmilí, hangē ko e “Ko ha Fāmili Fiefia” (Tohi Hiva ʻa e Fānaú, 104). Fakakaukau ke toutou hivaʻi ʻa e foʻi hivá. Fakaafeʻi e fānaú ke vahevahe ha ngaahi meʻa fakafiefia kuo nau fakahoko mo honau ngaahi fāmilí. Ko e hā ʻoku nau fakamālōʻia koeʻuhi ko honau ngaahi fāmilí?

• Hivaʻi ha foʻi hiva fekauʻaki mo e temipalé, hangē ko e “Fie Siofia Ha Temipale” pe “Ko e Fāmilí ke Taʻengata” (Tohi Hiva ʻa e Fānaú, 99, 98). Tuku ki he fānaú ke nau puke ha ʻū fakatātā ʻo e ngaahi temipalé pe ngaahi fāmilí, pea fakaafeʻi ke nau puke hake ʻenau ʻū fakatātaá ʻi he taimi te nau hiva ai “temipale” pe “fāmili.” Tokoniʻi e fānaú ke nau fakakaukau ki ha ngaahi ʻuhinga ʻoku mahuʻinga ai ke mali ʻi he temipalé.

ʻOku ʻofa ʻa Sīsū ʻi he fānaú, he “ʻoku ʻo e kakai peheé ʻa e puleʻanga ʻo e ʻOtuá” (Maʻake 10:14).

Maʻake 10:13–16

ʻOku finangalo ʻa Sīsū ke haʻu kiate Ia ʻa e fānau īkí kae lava ke Ne tāpuakiʻi kinautolu.

ʻOku ʻomi ʻe he talanoa ko ʻení ha fakamatala ke tokoniʻi ʻaki e fānaú ke nau ongoʻi e lahi e ʻofa ʻa Sīsū ʻiate kinautolú.

Ngaahi ʻEkitivitī ʻe Ala Fakahokó

• ʻI hoʻo lea pē ʻaʻau, vahevahe ʻa e talanoa ʻi he Maʻake 10:13–16.   Tokoniʻi e fānaú ke nau fakakaukau ki ha ngaahi taimi ne nau ongoʻi ai e ʻofa ʻa Sīsū kiate kinautolú. Fai hoʻo fakamoʻoní ki he fānaú ʻoku ʻofa ʻa Sīsū ʻiate kinautolu mo finangalo ke tāpuekina kinautolu.

• Fakaʻaliʻali e fakatātā Ko Kalaisi mo e Fānaú (Tohi Fakatātā ʻo e Ongoongoleleí, fika 47). Tokoniʻi e fānaú ke nau fakakaukauloto pe naʻe mei fēfē nai kapau ko kinautolu ʻa e taha ʻo e fānau ʻoku tangutu ʻi he tafaʻaki ʻo Sīsuú ʻi he fakatātaá. Fakaafeʻi e fānaú ke nau vahevahe ʻenau ongo kau kia Sīsuú.

• Tuku ki he fānaú ke nau tā ha ʻū fakatātā ʻoku tāpuakiʻi kinautolu ʻe Sīsū (vakai, Maʻake 10:16 mo e peesi ʻekitivitī ki he uike ní).

Maʻake 10:17–22

Kapau te u talangofua ki he ngaahi fekaú, te u lava ʻo maʻu ʻa e moʻui taʻengatá.

Naʻe akoʻi ʻe Sīsū ʻa e talavou koloaʻiá, ʻoku totonu ke ne talangofua ki he ngaahi fekaú—ka ne maʻu e moʻui taʻengatá—ko ha moʻui hangē ko ia ʻoku maʻu ʻe he Tamai Hēvaní.

Ngaahi ʻEkitivitī ʻe Ala Fakahokó

• Fakahoko ʻa e talanoa ʻo e talavou koloaʻiá ʻi he Maʻake 10:17–22 ki he fānaú. (Vakai foki, “Vahe 42: Ko e Talavou Koloaʻiá,” ʻi he Ngaahi Talanoa ʻo e Fuakava Foʻoú, 105–6, pe vitiō fekauʻaki mo iá ʻi he ChurchofJesusChrist.org.) Kole ange ke nau fakafanongo ki he meʻa ne talaange ʻe Sīsū ki he talavou koloaʻiá ke ne faí pea mo e tali ʻa e talavoú.

• Fai ha talanoa ʻe taha pe lahi ange fekauʻaki mo e fānau ne nau kole faleʻi mo e fakahinohino mei heʻenau ngaahi mātuʻá kae ʻikai muimui pe talangofuá. Ko e hā ha ngaahi meʻa ʻoku kole mai ʻe he Tamai Hēvaní ke tau faí? Ko e hā e ongo ʻoku tau maʻu ʻi he taimi ʻoku tau talangofua ai ki Heʻene ngaahi fekaú?

• Vahevahe ha ngaahi aʻusia ki ha taimi ne ke maʻu ai ha ngaahi ueʻi fakataautaha ke fai ha meʻa ke toe lelei ange.

Akoʻi e Tokāteliné: Fānau Lalahi Angé

Maʻake 10:6–8

ʻOku finangalo ʻa e Tamai Hēvaní ke tau mali ʻi he temipalé pea maʻu ha fāmili taʻengata.

ʻE lava ke tokoni ʻa e ngaahi meʻa naʻe akoʻi ʻe Sīsū fekauʻaki mo e nofo-malí, ke hanganaki atu ʻa e fānaú ki he mali ʻi he temipalé mo ʻohake ha fāmili taʻengata.

Ngaahi ʻEkitivitī ʻe Ala Fakahokó

• Kole ki ha taha ʻo e fānaú ke ne lau leʻolahi e Maʻake 10:6–8. Fakamatalaʻi ange ʻoku ʻuhinga e pikitai ki he “pipiki ki he” pe “puke maʻu” ha meʻa. Ko e hā ʻoku mahuʻinga ai ke kau fakataha ʻa e husepānití mo e uaifí, feʻofaʻaki, mo ngāue ko ha ongo hoa ngāué?

• Kole ki he fānaú ke nau tokoniʻi koe ke ke fakakaukau ki ha tali ki he ngaahi fehuʻi hangē ko e “Ko e hā e ʻuhinga ʻoku mahuʻinga ai ʻa e ngaahi fāmilí ʻi he Siasí?” pe “Ko e hā e ʻuhinga ʻoku mahuʻinga ai kiate koe ke ke mali ʻi he temipalé?” Tokoni ke nau maʻu ha ngaahi tali ʻi he ngaahi maʻuʻanga tokoni hangē ko e Maʻake 10:6–8; 1 Kolinitō 11:11; Tokāteline mo e Ngaahi Fuakava 42:22; 131:1–4; Mōsese 3:18, 21–24; mo e “Ko e Fāmilí: Ko ha Fanongonongo ki Māmani.”

• Hivaʻi fakataha ha foʻi hiva fekauʻaki mo e ngaahi fāmilí, hangē ko e “Ko e Fāmilí ke Taʻengata” (Tohi Hiva ʻa e Fānaú, 98). Vahevahe ki he fānaú hoʻo fakamoʻoni ki he mali mo e fāmili taʻengatá. Fakaafeʻi kinautolu ke vahevahe foki ʻenau fakamoʻoní.

Maʻake 10:17–22

ʻE lava ke tokoniʻi au ʻe Sīsū ke u ʻiloʻi e meʻa ʻoku fie maʻu ke u fai ke u tupulaki aí.

Naʻe fekumi ʻa e talavou koloaʻiá kia Sīsū peá ne maʻu ha fakahinohino pau ʻa ia naʻe fakataumuʻa pē kiate ia. Te ke lava fēfē ʻo ueʻi ʻa e fānaú ke nau fekumi ki ha fakahinohino tatau ʻi heʻenau moʻuí?

Ngaahi ʻEkitivitī ʻe Ala Fakahokó

• Kole ki he fānaú ke nau kumi ha veesi ʻi he Maʻake 10:17–22 ʻa ia ʻokú ne fakamatalaʻi e fakatātā ʻi he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí. Fakamatalaʻi ange naʻe fakataautaha e faleʻi ne ʻoange ʻe Sīsū ki he talavoú, pea te tau lava kotoa ʻo maʻu ha fakahinohino fakataautaha mei he ʻEikí ʻo fakafou ʻi he Laumālié.

• Lau fakataha e Maʻake 10:17–22. Fakaafeʻi ʻa e fānaú ke nau hiki ʻi he palakipoé ʻa e ngaahi fekau naʻe talaange ʻe he Fakamoʻuí ki he talavou koloaʻiá ke talangofua ki aí (vakai, veesi 19). Ko e hā mo ha toe meʻa ne kole ange ʻe Sīsū ke ne fai? (Vakai, veesi 21). Poupouʻi e fānaú ke nau fakakaukau ki ha ngaahi meʻa ʻe lava ke nau kamata fakahoko pe taʻofi ka nau muimui lelei ange ai kia Sīsū. Ko e hā ha ngaahi founga ʻe niʻihi te tau lava ai ʻo ʻiloʻi e meʻa ʻoku finangalo ʻa Sīsū ke tau faí?

Poupouʻi e Ako ʻi ʻApí

Fakaafeʻi ʻa e fānaú ke nau fakahaaʻi ki honau āmilí ʻoku nau ʻofa ʻiate kinautolu, mahalo ʻaki hano fai ha kiʻi tohi pe fai ha ngāue tokoni ʻi ha founga ʻofa.

Fakatupulaki ʻEtau Founga Akoʻí

Tokanga ki he fānaú. ʻOku tali fēfē ʻe he fānau ʻi hoʻo kalasí ʻa e ngaahi ʻekitivitī akó? Kapau ʻoku hangē ʻoku ʻikai ke nau kau maí, mahalo ʻoku taimi ke ʻahiʻahiʻi ha ʻekitivitī ʻe taha pe fai ha kiʻi luelue nounou loto-ʻapasia. ʻI he tafaʻaki ʻe tahá, kapau te ke fakatokangaʻi ʻoku kau mai mo ako ʻa e fānaú mei ha konga pau ʻo e lēsoní, ʻoua naʻá ke hohaʻa ke hoko atu koeʻuhí pē ke fakapapauʻi ʻokú ke akoʻi kotoa e lēsoni mei he naunaú.