Ko Sākeasi ʻi he Funga Sukaminó, tā ʻa James Tissot

15–21 Mē

Mātiu 21–23; Maʻake 11; Luke 19–20; Sione 12

“Vakai, ʻOku Haʻu Ho Tuʻí”

ʻI hoʻo lau e Mātiu 21–23; Maʻake 11; Luke 19–20; mo e Sione 12, tokanga ki he ngaahi ongo ʻokú ke maʻu mei he Laumālie Māʻoniʻoní. Fakahoa ki he “Ko Hono Feau e Ngaahi Fiemaʻu ʻa e Fānau Iiki Angé” ʻi he kamataʻanga ʻo e maʻuʻanga tokoni ko ʻení, ki ha ngaahi meʻa ke fakakaukau ki ai lolotonga hoʻo akoʻi e ngaahi tefitoʻi moʻoni ko ʻení.

Fakaafeʻi e Feʻinasiʻakí

Fakaʻaliʻali e fakatātā mei he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí, pea fakaafeʻi e fānaú ke nau vahevahe e meʻa ʻoku nau ʻilo fekauʻaki mo e meʻa ʻoku hoko ʻi he fakatātaá.

Akoʻi e Tokāteliné: Fānau Iiki Angé

Luke 19:1–10

ʻOku ʻafioʻi au ʻe he Tamai Hēvaní mo Sīsū Kalaisi ʻaki hoku hingoá.

ʻI hoʻo laukonga fekauʻaki mo e fengāueʻaki ʻa e Fakamoʻuí mo Sākeasí, ko e hā ha ngaahi pōpoaki ʻokú ke ʻilo ʻe lava ke tāpuekina ai e fānau ʻokú ke akoʻí?

Ngaahi ʻEkitivitī ʻe Ala Fakahokó

• Fakaʻaliʻali ha fakatātā ʻo Sākeasi ʻi he Funga Sukaminó (ʻi he fokotuʻutuʻu ko ʻení pe ʻi he ChurchofJesusChrist.org). Tokoniʻi e fānaú ke nau kumi ʻa Sākeasi pea puʻaki hono hingoá. Fokotuʻu ha ngaahi ngāue ke fai ʻe he fānaú lolotonga hoʻo fai e talanoa ʻo Sākeasi mo Sīsuú—hangē ko ʻení, tuʻu ʻete ke nau sio ʻo fakalaka atu ʻi he fuʻu kakai tokolahí pe fakatātaaʻi e kaka ʻi ha fuʻu ʻakau. Fakamatalaʻi ange naʻe mamata ʻa e Fakamoʻuí kia Sākeasi peá Ne ui ia ʻaki hono hingoá. Fakamoʻoniʻi ange, ʻoku ʻiloʻi foki ʻe he Fakamoʻuí ʻEne fānaú takitaha pea mo honau ngaahi hingoá.

• ʻOmi ha ngeʻesi ʻesiaʻi tā ki he kalasí, pe ngaohi ha ʻesiaʻi tā ʻaki e pepá. Fakaafeʻi e tamasiʻi takitaha ke taufetongi ʻi hono puke e ʻesiaʻi taá ki hono fofongá, lolotonga iá ʻoku lea ʻaki ʻe he toenga ʻo e kalasí, “ʻOku ʻafioʻi ʻe he Tamai Hēvaní mo Sīsū ʻa [hingoa ʻo e tokotahá].”

• Hivaʻi fakataha ha foʻi hiva fekauʻaki mo e ʻofa ʻa e Tamai Hēvaní, hangē ko e “Fānau Au ʻa e ʻOtuá” (Tohi Hiva ʻa e Fānaú, 2–3). Tokoniʻi e fānaú ke nau fakafanongo ki he ngaahi meʻa ʻe tokoni ke nau ʻiloʻi ʻoku ʻofa ʻa e Tamai Hēvaní ʻiate kinautolú.

Mātiu 21:12–14

Ko e temipalé ko ha potu toputapu.

ʻE lava ke tokoni ʻa e ʻapasia ʻa Sīsū ki he temipalé, ʻo hangē ko hono fakamatalaʻi ʻi he ngaahi veesi ko ʻení, ke mahino ki he fānau ʻokú ke akoʻí ko e temipalé ko ha feituʻu toputapu ia.

Ngaahi ʻEkitivitī ʻe Ala Fakahokó

• Fakaʻaliʻali e fakatātā Ko Hono Fakamaʻa ʻe Sīsū ʻa e Temipalé (Tohi Fakatātā ʻo e Ongoongoleleí, fika 51), pea fai ʻa e talanoa ʻoku lekooti ʻi he Mātiu 21:12–14. Tokoni ki he fānaú ke nau kumi ʻa e paʻangá mo e monumanu ʻi he fakatātaá. Hili iá pea aleaʻi e ʻuhinga naʻe fie maʻu ai ʻe he Fakamoʻuí e kau fakafetongi paʻangá mo e kakai ne nau fakatau atu ʻa e fanga monumanú, ke nau mavahe mei he temipalé.

• Fakaʻaliʻali ha ʻū fakatātā ʻo e temipalé (hangē ko ʻení, vakai Tohi Fakatātā ʻo e Ongoongoleleí, fika 117–19), pea kole ki he fānaú ke vahevahe ʻenau ongo ʻi he taimi ʻoku nau sio ai ki ha temipalé. Te ke lava ʻo fakamatalaʻi ange ko e temipalé ko ha feituʻu ia te tau ʻalu ki ai ke fai ha ngaahi palōmesi mo e ʻOtuá, fekumi ki ha ngaahi tali ki he ngaahi lotú, pea ongoʻi ofi ai ki he ʻOtuá. Tokoniʻi e fānaú ke nau ʻiloʻi ʻa e ngaahi ongo mei he Laumālie Māʻoniʻoní ʻokú Ne talaange ko e temipalé ko ha feituʻu makehe. Kole ki he fānaú ke nau fakatātaaʻi, ko e hā te nau fai ʻo kapau te nau ʻi loto ʻi he temipalé. Hangē ko ʻení, te nau lava ʻo talanoa fanafana mo tangutu loto-ʻapasia.

• Hivaʻi fakataha ha foʻi hiva fekauʻaki mo e temipalé, hangē ko e “Fie Siofia Ha Temipale” (Tohi Hiva ʻa e Fānaú, 99), pea fakaafeʻi ʻa e fānaú ke fokotuʻu ha taumuʻa ke nau hū ki he temipalé ha ʻaho.

Ko e temipalé ko e fale ia ʻo e ʻEikí.

Mātiu 21:28–32

Te u lava ʻo talangofua.

ʻOku finangalo e Tamai Hēvaní ke tau talangofua. Ko e talanoa fakatātā ʻo e ongo foha ʻe toko uá, ko ha faingamālie ia ke akoʻi fekauʻaki mo e mahuʻinga ʻo e talangofuá.

Ngaahi ʻEkitivitī ʻe Ala Fakahokó

• Tā ha fakatātā ʻo ha ongo foha ʻi he palakipoé, pea fakaʻaongaʻi e ongo fakatātaá ʻi hoʻo toe fai ʻa e talanoa fakatātā ʻi he Mātiu 21:28–32. Ko e fē ʻa e foha naʻá ne fai e meʻa totonú ʻi he fakaʻosí? Kole ki he fānaú ke nau fakahingoa ha ngaahi meʻa te nau lava ʻo fai ke nau talangofua ai ʻi ʻapi. Tuku ke nau tā ha ʻū fakatātā ʻo kinautolu ʻi heʻenau fakahoko ha taha ʻo e ngaahi meʻa ko iá.

• Fakaafeʻi e fānaú ke nau vahevahe e ngaahi aʻusia kuo nau maʻu ʻi heʻenau talangofua ki heʻenau mātuʻá. Naʻe tāpuekina fēfē nai kinautolu ʻi heʻenau talangofuá?

Akoʻi e Tokāteliné: Fānau Lalahi Angé

Luke 19:1–10

ʻI heʻeku fekumi ki he Fakamoʻuí, te u ʻiloʻi Ia.

Te ke lava ʻo fakaʻaongaʻi e talanoa ʻo Sākeasí ke tokoniʻi e fānaú ke nau fakakaukau ki he ngaahi meʻa te nau lava ʻo fai ke nau toe ofi ange ai ki he Fakamoʻuí.

Ngaahi ʻEkitivitī ʻe Ala Fakahokó

• Lau ʻa e Luke 19:1–10, pea kiʻi mālōlō ʻi he ngaahi veesi ʻe niʻihi ke aleaʻi e meʻa ʻoku talamai ʻe he vēsí fekauʻaki mo Sākeasí. Ko e hā e meʻa naʻe fai ʻe Sākeasi ke ne lava ai ʻo mamata kia Sīsuú? Naʻá ne tali fēfē ʻi he taimi naʻe kole ange ai ʻe Sīsū ke ne hifo ki lalo mei he fuʻu ʻakaú? Kole ki he fānau takitaha ke vahevahe ha ʻuhinga ʻe taha te nau fie mamata ai kia Sīsū. Kapau naʻe hāʻele mai ʻa e Fakamoʻuí ki hotau koló, ko e hā ha meʻa te tau fai ke tau teuteu aí?

• Fakaafeʻi e fānaú ke nau fakakaukau ki ha kakai ʻoku nau ʻiloʻi ʻoku nau fekumi ki he Fakamoʻuí, ʻo hangē ko Sākeasí. Fehuʻi ki he fānaú pe ko e hā te nau fai ke tokoniʻi ai ha taha kehe ke ako fekauʻaki mo e Fakamoʻuí.

• Fakaafeʻi e fānaú ke vahevahe ha ngaahi aʻusia ne nau ongoʻi ai naʻe ʻiloʻi mo ʻofaʻi kinautolu ʻe he Tamai Hēvaní mo Sīsū Kalaisi.

Mātiu 21:12–14

Ko e temipalé ko ha feituʻu toputapu ʻoku totonu ke u fakaʻapaʻapaʻi.

ʻE tokoni fēfē ʻa e talanoa ki hono fakamaʻa ʻe he Fakamoʻuí ʻa e temipalé, ke ke akoʻi ki he fānaú ʻa e toputapu ʻo e ngaahi temipalé?

Ngaahi ʻEkitivitī ʻe Ala Fakahokó

• Fakaafeʻi e fānaú ke nau lau e Mātiu 21:12–14. Fakaʻaliʻali e fakatātā Ko Hono Fakamaʻa ʻe Sīsū ʻa e Temipalé (Tohi Fakatātā ʻo e Ongoongoleleí, fika 51), pea fehuʻi ange pe ko e veesi fē ʻoku fakamatalaʻi ʻe he fakatātaá.

• Fakaafeʻi e fānaú ke vahevahe ʻenau ongo ʻi heʻenau hū ki loto ʻi ha temipale, ʻaʻahi ki he ngaahi kelekele ʻo e temipalé, pe sio ʻi he ʻū fakatātā ʻo e temipalé. Ko e hā e meʻa naʻá ne tokoniʻi kinautolu ke nau ʻiloʻi ko e temipalé ko ha feituʻu toputapu? Mahalo te ke fie vahevahe mo e fānaú ʻa e ʻuhinga ʻokú ke saiʻia ai ʻi he temipalé. Ko e hā ʻoku toputapu ai ia kiate koé?

• Fakaafeʻi ha toʻu tupu ʻe toko taha pe tokolahi ange ke haʻu ki he kalasí pea talanoa fekauʻaki mo e founga kuo nau teuteu ai ke hū ki he temipalé. Kapau kuo nau ʻosi ʻalu ki he temipalé, kole ange ke nau talanoa fekauʻaki mo ʻenau ongoʻi ʻi he taimi ne nau ʻi he temipalé aí.

• Kosi ha fakatātā ʻo ha temipale ke hangē ha ʻū kongokonga pāsoló, pea ʻoange ki he tamasiʻi pe taʻahine takitaha ha kiʻi konga ʻe taha. Kole ki he fānaú ke nau tohi ʻi he tuʻa ʻo e konga pāsoló, ha meʻa te nau lava ʻo fai ke nau teuteu ai ke hū ʻi he temipalé. ʻI hono vahevahe ʻe he tamasiʻi pe taʻahine takitaha ha fakakaukaú, tānaki ʻene kongá ki he pāsoló.

• Hiki ʻeni ʻi he palakipoé: ʻE lava ke tokoni ʻa e ke u teuteu ke ngāue ʻi he temipalé. Fakaafeʻi ʻa e fānaú ke nau fokotuʻu mai ha ngaahi founga ke ke fakakakato ʻaki ʻa e sētesi ko ʻení. ʻE ala kau ʻi he ngaahi fakakaukau ʻe niʻihi ʻa e “Tauhi ʻeku ngaahi fuakava ʻi he papitaisó” pe “Laumālie Māʻoniʻoní.”

Mātiu 23:25–28

ʻOku finangalo ʻa Sīsū ke u angatonu ʻi heʻeku ngaahi ngāué mo ʻeku ngaahi fakaʻānauá.

Naʻe akoʻi ʻe Sīsū ki he kau tangata tohí mo e kau Fālesí fekauʻaki mo hono mahuʻinga ʻo e moʻui totonu ʻaki e ongoongoleleí—kae ʻikai fakangalingali pē ke pehē ʻoku māʻoniʻoní. Ko e hā ha meʻa ʻe tokoni ke mahino e moʻoni ko ʻení ki he fānaú?

Ngaahi ʻEkitivitī ʻe Ala Fakahokó

• ʻI hoʻo lau e Mātiu 23:25–28 mo e fānaú, fakakaukau ke vahevahe e ʻuhinga ko ʻeni ʻo e mālualoí mei he Bible Dictionary [Tikisinale ʻa e Tohi Tapú]: “Ko ha taha ʻoku fakangalingali ʻoku anga fakalotu ka ʻoku ʻikai ke ne pehē.” Ko e hā e ʻuhinga ʻoku kovi ai ʻete hoko ko ha tokotaha mālualoí?

• Fakaʻaliʻali ki he fānaú ha ipu ʻoku maʻa ʻa tuʻa kae ʻuli ʻa loto, ke tokoni ke fakamatalaʻi ha heliaki ʻi he Mātiu 23:25. Te tau lava fēfē ʻo fakapapauʻi ʻoku tau maʻa mo haohaoa ʻi loto?

Poupouʻi e Ako ʻi ʻApí

Tokoniʻi e fānaú ke nau fakakaukau ki ha meʻa ne nau ako ʻi he kalasí te nau lava ʻo vahevahe mo honau ngaahi fāmilí ʻi ʻapi.

Fakatupulaki ʻEtau Akoʻí

Poupouʻi e ngaahi mātuʻa ʻa e fānaú. “Ko e ngaahi mātuʻá ko e kau faiako mahuʻinga taha kinautolu ʻo e ongoongoleleí ki heʻenau fānaú—ʻokú nau fakatou maʻu e tefitoʻi fatongia mo e mālohi lahi taha ke tākiekina ʻenau fānaú (vakai, Teutalōnome 6:6–7). ʻI hoʻo akoʻi e fānaú ʻi he lotú, fekumi ʻi he faʻa lotu ki he ngaahi founga ke poupou ai ki heʻenau mātuʻá ʻi honau fatongia mahuʻingá” (Ko e Faiako ʻi he Founga ʻa e Fakamoʻuí, 25).