Ko e Hāʻele ʻAngaua Maí, tā ʻe Harry Anderson

22–28 Mē

Siosefa Sāmita—Mātiu 1; Mātiu 24–25; Maʻake 12–13; Luke 21

“ʻO Ka Haʻu ʻa e Foha ʻo e Tangatá”

Fakalaulauloto ki he meʻa ʻoku fie maʻu ke akoʻi ki he fānau ʻokú ke akoʻí mei he Siosefa Sāmita—Mātiu 1; Mātiu 24–25; Maʻake 12–13; mo e Luke 21. ʻOkú ke tauʻatāina ke liliu ʻa e ngaahi fakakaukau maʻá e fānau lalahi angé ʻi he lēsoni ko ʻení, ke feʻunga foki ki he fānau iiki angé.

Fakaafeʻi e Feʻinasiʻakí

ʻOmi ki he kalasí ha meʻa pe fakatātā ʻoku fekauʻaki mo ha taha ʻo e ngaahi talanoa fakatātā pe ngaahi talanoa ʻi he laukonga ʻo e uike ní (hangē ko e lolo ke fakafofongaʻi ʻa e kau tāupoʻoú pe koini ʻe hongofulú ke fakafofongaʻi ʻa e ngaahi talēnití pe kihiʻi paʻanga ʻa e uitoú). Kole ki he fānaú ke nau vahevahe e meʻa ʻoku nau ʻiloʻi fekauʻaki mo e talanoa fakatātaá pe talanoá.

Akoʻi e Tokāteliné: Fānau Iiki Angé

Siosefa Sāmita—Mātiu 1:31.

Kimuʻa pea toe hāʻele mai ʻa Sīsuú, ʻe malangaʻi e ongoongoleleí ki he māmaní kotoa.

Ko e fakaʻilonga ʻe taha ʻe vavé ni mai ʻa e toe hāʻele mai ʻa Sīsuú, ko hono malangaʻi ʻo ʻEne ongoongoleleí ki māmani fulipeé. ʻE ala tokoni ʻa e fānaú ke fakakakato e kikite ko ʻení ʻaki hano vahevahe e ongoongoleleí.

Ngaahi ʻEkitivitī ʻe Ala Fakahokó

• Fakaʻaliʻali ha mape, ko ha foʻi kolope, pe fakatātā ʻo e foʻi māmaní (vakai, Tohi Fakatātā ʻo e Ongoongoleleí, fika 3) pea tokoniʻi ʻa e fānaú ke nau lea ʻaki ʻa e “Ko e Ongoongoleleí ni … ʻe malanga ʻaki ia ʻi he māmaní kotoa pē” (Siosefa Sāmita—Mātiu 1:31). Ko e hā e ʻuhinga ʻoku finangalo ai e ʻOtuá ke fanongo kotoa ʻEne fānaú ki Heʻene ongoongoleleí?

• Fakaafeʻi ʻa e fānaú ke nau laka tuʻu maʻu lolotonga hoʻomou hivaʻi fakataha ha foʻi hiva fekauʻaki mo hono vahevahe ʻo e ongoongoleleí, hangē ko e “ʻOku ou Fie Hoko Leva ko ha Faifekau” pe “Fanongo, ko e ʻEikí ʻoku Ui” (Tohi Hiva ʻa e Fānaú, 90, 94).

•     Ko e hā ha ngaahi founga ʻe niʻihi te tau lava ai ʻo vahevahe ʻa e ongoongoleleí?

ʻE malanga ʻaki ʻa e ongoongoleleí ki he māmaní kotoa. Tā ʻi he Angalelei ʻa e NASA Johnson Space Center

Mātiu 25:14–30

Te u lava fakaʻaongaʻi e ngaahi meʻafoaki kuo foaki mai ʻe he ʻOtuá kiate aú.

ʻOku ʻiloʻi ʻe he fānau īkí ʻenau ngaahi meʻafoakí mo e ngaahi meʻa ʻoku nau malavá. Tokoniʻi ke mahino kiate kinautolu ko e ngaahi meʻafoaki mo e ngaahi malava ko ʻení ʻoku maʻu ia mei he Tamai Hēvaní.

Ngaahi ʻEkitivitī ʻe Ala Fakahokó

• ʻOmi ha ʻū koini ke fakaʻaongaʻi ʻi hoʻo fai e talanoa fakatātā ʻo e ngaahi talēnití, ʻa ia ʻoku maʻu ʻi he Mātiu 25:14–30. Te ke lava ʻo kole ki ha fānau ʻe toko tolu ke nau fakafofongaʻi e kau tamaioʻeiki ʻe toko tolú. Fakamatalaʻi ange, naʻe ʻuhinga ʻa e talēnití ʻi he kuonga ʻo Sīsuú, ki he paʻanga, ka ʻi he ʻahó ni ʻoku ʻuhinga e talēnití ki he ngaahi meʻafoaki mo e ngaahi meʻa ʻoku tau malava ʻo faí.

• Kole ki he fānaú ke nau fakahingoa ha ngaahi founga kuo tokoniʻi ai kinautolu ʻe heʻenau mātuʻá, ngaahi tokouá, kau faiakó, pe ngaahi kaungāmeʻá. Ko e hā ha ngaahi talēniti ʻoku maʻu ʻe he kakai ko ʻení ʻokú ne tokoniʻi ai kinautolu ke nau tokoniʻi e niʻihi kehé?

• Fai ha kiʻi tohi nounou ki he fānaú ʻo tala ange kiate kinautolu takitaha fekauʻaki mo e ngaahi meʻaʻofá mo e ngaahi meʻa ʻoku malava ke nau fai ʻa ia ʻokú ke fakatokangaʻi ʻiate kinautolú. ʻI hoʻo vahevahe ki he fānau takitaha ʻa e meʻafoaki ʻokú ke vakai ki ai ʻiate kinautolú, poupouʻi kinautolu ke fakatupulaki ʻenau ngaahi meʻafoakí pea ngāue ʻaki ia ke tokoniʻi ʻaki ʻa e niʻihi kehé.

Mātiu 25:31–46

ʻOku finangalo ʻa Sīsū ke u tokoni ki he niʻihi kehé.

ʻOku tau tokoniʻi e Tamai Hēvaní mo Sīsū Kalaisi ʻaki hono tokoniʻi e niʻihi ʻoku tau feohí. Tokoni ki he fānaú ke nau fakakaukau ki ha ngaahi founga ke nau tokoni ai ki he niʻihi kehé.

Ngaahi ʻEkitivitī ʻe Ala Fakahokó

• Fakamatala fakaikiiki ʻa e talanoa fakatātā ʻi he Mātiu 25:34–46. Tokoniʻi e fānaú ke mahino ko e taimi ʻoku tau tokoniʻi ai e niʻihi kehé, ʻoku tau tokoniʻi ʻa Sīsū.

• Fakaʻaliʻali ha laʻitā ʻo ha kiʻi tamasiʻi pe taʻahine, mo ha fakatātā ʻo Sīsū ʻoku fufuuʻi ʻi mui ai. Ko e hā te tau fai ke tau tokoniʻi ai e tokotaha ko ʻení? Toʻo ʻa e laʻitā ʻo e kiʻi tamasiʻí pe taʻahiné pea fakamatalaʻi ange ko e taimi ʻoku tau tokoniʻi ai e niʻihi kehé, ʻoku tau tokoniʻi ʻa Sīsū.

• Fakaafeʻi e fānaú ke nau tā ha ʻū fakatātā ʻo ʻenau tokoniʻi e niʻihi kehé ʻi he ngaahi founga ʻoku fakamatalaʻi ʻe he Fakamoʻuí ʻi he Mātiu 25:35–36. Kole ki he fānau ko eé ke nau mateʻi pe ko e hā e meʻa ʻoku nau tā fakatātaaʻí.

• Fakaafeʻi e fānaú ke nau vahevahe ʻenau ngaahi aʻusia ʻi he taimi ne fai ai ʻe ha taha ha tokoni faka-Kalaisi kiate kinautolu pe ki honau fāmilí.

Akoʻi e Tokāteliné: Fānau Lalahi Angé

Siosefa Sāmita—Mātiu 1:31

Kimuʻa pea toe hāʻele mai ʻa Sīsuú, ʻe malangaʻi e ongoongoleleí ki he māmaní kotoa.

ʻE lava ke tokoni atu e fānau ʻokú ke akoʻí ke malangaʻi e ongoongoleleí ki he māmaní kotoa kimuʻa ʻi he Hāʻele ʻAnga Ua Mai ʻa e Fakamoʻuí.

Ngaahi ʻEkitivitī ʻe Ala Fakahokó

• Fakaafeʻi e fānaú ke vahevahe e ngaahi tāpuaki ne nau maʻu pe te nau maʻu koeʻuhí ko ʻenau hoko ko e kau mēmipa ʻo e Siasi ʻo Kalaisí. Lau fakataha e Siosefa Sāmita—Mātiu 1:31, pea fehuʻi ki he fānaú pe ʻoku nau ongoʻi ʻoku tāpuekina fēfē ʻe he ongoongoleleí ʻa e fānau ʻo e ʻOtuá ʻi he funga ʻo māmaní.

• Fakaʻaliʻali ki he fānaú ha mape ʻo e māmaní pe mape homou fonuá, pea tokoniʻi kinautolu ke nau kumi e ngaahi feituʻu kuo malangaʻi ai ʻe ha mēmipa ʻo honau fāmilí pe kaungāmeʻá, ʻa e ongoongoleleí ʻi ha ngāue fakafaifekau.

• Fakaafeʻi ha fānau ʻe niʻihi ke nau omi mateuteu ke vahevahe ha founga naʻe fakafeʻiloaki ʻaki ʻa e ongoongoleleí ki he ngaahi mēmipa honau fāmilí pe ngaahi kuí.

• Kole ki he tamasiʻi pe taʻahine takitaha ke ne tohiʻi ha hingoa ʻo ha tokotaha te ne lava ʻo talanoa ki ai fekauʻaki mo Sīsū Kalaisi pe fakaafeʻi ki he lotú. Kole foki ki he fānaú ke nau lisi e ngaahi meʻa te nau lava ʻo fai he taimí ni ke nau hoko ai ko ha kau faifekau.

Mātiu 25:1–13

ʻOku ou fatongia ʻaki ʻeku ului kia Sīsū Kalaisí.

ʻOku akoʻi ʻe he talanoa fakatātā ʻo e kau taupoʻou ʻe toko hongofulú, ʻoku ʻikai lava ke tau kole mei he niʻihi kehé ʻa ʻetau ului ki he Fakamoʻuí. Te ke tokoniʻi fēfē e fānaú ke nau fatongia ʻaki ʻenau ului pē ʻanautolú?

Ngaahi ʻEkitivitī ʻe Ala Fakahokó

• Kole ki ha kiʻi tamasiʻi pe taʻahine ke haʻu mateuteu ke vahevahe ʻa e founga naʻá ne ako ai kau ki he talanoa fakatātā ʻo e kau taupoʻou ʻe toko hongofulú ʻi ʻapi he uike ní.

• Tā ha maama lolo ʻi he palakipoé, pea fakahingoa ko e fakamoʻoni. ʻOange ki he fānau takitaha ha laʻipepa kuo kosi hangē ha foʻi tulutā loló, pea kole ki he tamasiʻi takitaha ke tohiʻi ai ha meʻa te ne fai ke hoko ʻo toe ului ange ki he Fakamoʻuí. Fakapipiki ʻenau foʻi tulutaá ki he palakipoé ʻi he tafatafaʻaki ʻo e māmá.

• Fakaafeʻi e fānaú ke nau tokoni atu ke faʻu ha lisi ʻo e ngaahi meʻa ke fai ke teuteu ai ki ha tokotaha makehe ke ʻaʻahi mai. ʻOku faitatau pe faikehekehe fēfē e ngaahi meʻá ni mei he ngaahi founga te tau lava ai ʻo teuteu fakalaumālie ki he Hāʻele ʻAnga Ua Mai ʻa e Fakamoʻuí?

• ʻI ha ʻū laʻipepa ʻe nima, hiki ai e ngaahi meʻa he ʻikai lava ke kole maí. ʻI ha ʻū laʻipepa ʻe nima, hiki ai e ngaahi meʻa ʻe lava ke kole maí. Veuveuki e ʻū laʻipepá, pea kole ki he fānaú ke nau fokotuʻutuʻu lelei kinautolu ki he ongo kulupu ʻe ua ko ʻení. Lau fakataha e Mātiu 25:1–13. Ko e hā e ʻuhinga ʻoku mahuʻinga ai ke ʻoua naʻa tau fakafalala ki he niʻihi kehé ʻa ʻetau ului kia Sīsū Kalaisí?

Mātiu 25:14–46

ʻI he Fakamaau Fakaʻosí, te tau ʻoatu ki he ʻEikí ha fakamatala ʻo ʻetau moʻuí.

Hili e Toetuʻú, ʻe fakamaauʻi kitautolu ʻe he ʻEikí ʻo fakatatau mo ʻetau talangofua ki Heʻene ngaahi fekaú mo hono tali ʻEne feilaulau fakaleleí. ʻOku akoʻi kitautolu ʻe he talanoa fakatātā ʻo e ngaahi talēnití mo e talanoa fakatātā ʻo e sipí mo e fanga kosí fekauʻaki mo e Fakamaau Fakaʻosi ko ʻení.

Ngaahi ʻEkitivitī ʻe Ala Fakahokó

• Fakaafeʻi ha vaeua ʻo e kalasí ke nau lau e Mātiu 25:14–30 pea mo e vaeua ʻe tahá ke nau lau e Mātiu 25:31–46. Kole ki he ngaahi kulupú ke nau fakatātaaʻi e ngaahi talanoa fakatātaá maʻá e kalasí. Ko e hā ʻoku akoʻi mai ʻe he ʻEikí ʻi he ngaahi talanoa fakatātā ko ʻení?

• Fakaafeʻi e fānaú ke nau lau tautau toko ua e Mātiu 25:35–36 pea faʻu ha lisi ʻo e ngaahi meʻa te nau lava ʻo fai ke fakahaaʻi ʻaki ʻenau ʻofa kia Sīsū Kalaisí.

Poupouʻi e Ako ʻi ʻApí

Kole ki he fānaú ke nau vahevahe mo honau ngaahi fāmilí e ngaahi founga te nau lava ai ʻo hoko ko ha kau faifekau lelei ange, pea talanoa mo honau ngaahi fāmilí fekauʻaki mo e kakai te nau lava ʻo vahevahe ki ai e ongoongoleleí.

Fakatupulaki ʻEtau Founga Akoʻí

Fakafanongo pe fakatulamaʻi ha talanoa. Koeʻuhi ʻoku saiʻia e fānaú he ngaahi talanoá, fekumi ki ha ngaahi founga ke fakakau kinautolu ʻi he ngaahi talanoa fakafolofola ʻokú ke vahevahé. Te nau lava ʻo puke ha ʻū fakatātā pe ngaahi meʻa, tā fakatātaaʻi e talanoá, fakatātaaʻi pe tokoni ke fai e talanoá. Toutou fai e talanoá ke tokoni kiate kinautolu ke nau ʻiloʻi e ngaahi fakaikiiki mahuʻingá mo e ngaahi akonaki ʻo e ongoongoleleí.