“29 Mē–4 Sune. Mātiu 26; Maʻake 14; Sione 13: ‘ʻI he Fakamanatu,’” Haʻu, ʻo Muimui ʻIate Au—Maʻá e Palaimelí: Fuakava Foʻoú 2023 (2022)
“29 Mē–4 Sune. Mātiu 26; Maʻake 14; Sione 13,” Haʻu, ʻo Muimui ʻIate Au—Maʻá e Palaimelí: 2023
ʻI he Fakamanatu Kiate Au, tā ʻa Walter Rane
29 Mē–4 Sune
Mātiu 26; Maʻake 14; Sione 13
“ʻI he Fakamanatu”
ʻI hoʻo lau ʻa e Mātiu 26; Maʻake 14; mo e Sione 13, fekumi ki he ngaahi tefitoʻi moʻoni ʻokú ke ongoʻi ʻe tāpuekina ai e fānau ʻokú ke akoʻí.
Fakaafeʻi e Feʻinasiʻakí
Fakaʻaliʻali e ʻū fakatātā ʻo e meʻa ne hoko ʻi he ngaahi vahe ko ʻení, hangē ko e Tohi Fakatātā ʻo e Ongoongoleleí, fika 54–55, pea fakaafeʻi ʻa e fānaú ke nau tala atu e meʻa ʻoku hoko ʻi he ʻū fakatātaá.
Akoʻi e Tokāteliné: Fānau Iiki Angé
Mātiu 26:26–29; Maʻake 14:22–24
ʻOku tokoniʻi au ʻe he sākalamēnití ke u fakakaukau kia Sīsū.
Tokoniʻi ke mahino ki he fānaú ko hono maʻu ʻo e sākalamēnití ko ha faingamālie ia ke manatuʻi ai e meʻa kuo fai ʻe Sīsū maʻatautolú.
Ngaahi ʻEkitivitī ʻe Ala Fakahokó
-
Fakamatalaʻi fakanounou e talanoa ʻo hono fakafeʻiloaki ʻe Sīsū ʻa e sākalamēnití. Te ke lava fakaʻaongaʻi e “Vahe 49: Ko e Fuofua Sākalamēnití” (ʻi he Ngaahi Talanoa ʻo e Fuakava Foʻoú, 124–26, pe ko e vitiō fekauʻaki mo iá ʻi he ChurchofJesusChrist.org). Ko e hā ʻoku tau toʻo ai ʻa e sākalamēnití? Tokoni ke mahino ki he fānaú ʻoku tau manatua ʻa Sīsū lolotonga e sākalamēnití.
-
Fakaʻaliʻali ki he fānaú ha konga mā mo ha ipu vai. ʻEke ange pe ʻoku nau ʻilo ko e hā ʻoku fakafofongaʻi ʻe he maá mo e vaí ʻi he sākalamēnití. Fakamatalaʻi ange ʻoku tokoni e ongo fakaʻilonga ko ʻení ke tau manatuʻi naʻe pekia ʻa Sīsū maʻatautolu pea toe tuʻu mei he maté.
-
Kole ki he fānaú ke kuikui honau matá pea fakakaukau ki ha taha ʻoku nau ʻofa ai, pea fakaafeʻi leva ke nau fakamatala fekauʻaki mo e tokotaha ko iá. Kole ange ke toe kuikui honau matá, fakakaukau ki he Fakamoʻuí, pea vahevahe leva ha ngaahi meʻa ʻoku nau ʻilo kau kiate Ia. Poupouʻi ke nau fakakaukau kia Sīsū lolotonga e sākalamēnití he uike takitaha.
-
Fakaafeʻi e fānaú ke nau fakahā atu ko e hā te nau lava ʻo fai ke nau manatuʻi ai ʻa Sīsū pea ke nau loto-ʻapasia lolotonga e sākalamēnití. Tokoniʻi e fānaú ke nau ʻai e kiʻi tohi ʻoku fakamatalaʻi ʻi he peesi ʻekitivitī ʻo e uike ní, pea fakaʻaongaʻi ia ke tokoni ke nau fakakaukau kia Sīsū lolotonga e sākalamēnití. Pe tuku ke nau fekumi ʻi ha ngaahi makasini ʻa e Siasí ki ha ʻū fakatātā ʻo Sīsū pea faʻu ha ʻū fakatātā kuo fakatahatahaʻi (collage) te nau lava ʻo sio ki ai lolotonga e houalotu sākalamēnití.
Te u lava ʻo ʻofa ki he niʻihi kehé ʻo hangē ko Sīsuú.
Naʻe fakahaaʻi ʻe Sīsū ʻEne ʻofá ʻaki ʻEne tokangaʻi ʻa kinautolu ne nau feohí. Ko e hā ha ngaahi faingamālie ʻoku maʻu ʻe he fānau ʻokú ke akoʻí ke fakahaaʻi ʻenau ʻofa ki he niʻihi kehé?
Ngaahi ʻEkitivitī ʻe Ala Fakahokó
-
Fakaʻaliʻali ha ʻū fakatātā ʻo ha ngaahi talanoa kuo ako ʻe he fānaú he taʻú ni ʻi he taimi ne fakahaaʻi ai ʻe Sīsū ʻEne ʻofa ki he niʻihi kehé (vakai ki he ngaahi lēsoni kimuʻa ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí). Lau ʻa e Sione 13:34–35, pea tokoniʻi ʻa e fānaú ke nau toutou lau e kupuʻi lea “Hangē ko ʻEku ʻofa kiate kimoutolú, … mou feʻofaʻaki kiate kimoutolu.” Te tau fakahaaʻi fēfē ʻetau ʻofa ki hotau fāmilí mo e ngaahi kaungāmeʻá?
-
Fakaafeʻi ha tokotaha ke ne puke ha fakatātā ʻo Sīsū lolotonga hono hivaʻi ʻe he kalasí ha hiva fekauʻaki mo e ʻofa ʻa e Fakamoʻuí, hangē ko e “Ke Mou Feʻofaʻaki” (Tohi Hiva ʻa e Fānaú, 74). ʻOange ki he fānaú ha ngaahi foʻi haati pepa pea fakaafeʻi ke nau tā ha fakatātā ʻoku nau fai ha meʻa ke fakahaaʻi ʻaki ʻenau ʻofá ki ha taha kehe.
Akoʻi e Tokāteliné: Fānau Lalahi Angé
Mātiu 26:26–29; Maʻake 14:22–24
ʻOku tokoniʻi au ʻe he sākalamēnití ke u manatuʻi ʻa Sīsū Kalaisi mo ʻEne feilaulau maʻakú.
Te ke lava fēfē ʻo tokoniʻi e fānaú ke nau maʻu ha aʻusia ʻuhingamālie ange ʻi he sākalamēnití?
Ngaahi ʻEkitivitī ʻe Ala Fakahokó
-
Fakaafeʻi ʻa e fānaú ke nau taufetongi ʻi hono lau ʻa e ngaahi veesi ʻi he Mātiu 26:26–29 pe Maʻake 14:22–24 (vakai foki, Liliu ʻa Siosefa Sāmita, Maʻake 14:20–24 [ʻi he Fakahinohino ki he Ngaahi Folofolá]) mo e Tokāteline mo e Ngaahi Fuakava 20:75–79. Ko e hā ha ngaahi foʻi lea mo e fakakaukau ʻoku faitatau ʻi he ongo potufolofolá?
-
Fehuʻi ki he fānaú pe ko e hā e meʻa ʻoku nau fai ke tokoniʻi ai kinautolu ke nau fakakaukau kia Sīsū lolotonga e sākalamēnití. Tokoniʻi ke nau kumi ha ngaahi folofola pe lea mei he ʻū himi sākalamēnití, ʻa ia te nau lava ʻo lau lolotonga e sākalamēnití, pea lisi leva kinautolu ʻi ha kaati ʻa ia ʻe lava ʻe he fānaú ʻo fakaʻaongaʻi ʻi he taimi hoko te nau maʻu ai e sākalamēnití. Hivaʻi fakataha mo e fānaú ha niʻihi ʻo e ngaahi hiva ko ʻení (vakai, Ngaahi Himí, fika 89–107).
ʻĪmisifānau ʻoku nau maʻu sākalamēnitiʻOku tokoni ʻa e sākalamēnití ke tau manatuʻi ʻa Sīsū Kalaisi mo ʻEne feilaulau maʻatautolú.
-
Hiki ʻi he palakipoé ha ngaahi kupuʻi lea mei he lotu sākalamēnití, pea tokoniʻi e fānaú ke nau ako maʻuloto ia. ʻOku ʻuhinga nai ki he hā ʻa e ngaahi kupuʻi lea ko ʻení? Ko e hā ʻoku mahuʻinga ai ke fakafoʻou ʻetau ngaahi fuakava ʻo e papitaisó he uike kotoa peé?
-
Fakaafeʻi ha tokotaha maʻu Lakanga Taulaʻeiki Faka-ʻĒlone ke talanoa ki he fānaú fekauʻaki mo ʻene aʻusia ʻi heʻene teuteu, tāpuakiʻi, pe tufaki e sākalamēnití. Ko e hā ʻokú ne tokoniʻi ia ke teuteu ke ne fai ʻení? Ko e hā ʻene ongoʻi heʻene fai iá? ʻOku fakamanatu fēfē nai ʻe he maá mo e vaí kiate ia ʻa e Fakamoʻuí?
-
Kole ki he fānau kuo ʻosi papitaisó ke nau vahevahe e meʻa ʻoku nau manatuʻi fekauʻaki mo honau papitaisó. Ne nau ongoʻi fēfē nai? Ko e hā ha ngaahi fuakava ne nau fakahoko? (vakai, Mōsaia 18:8–10). Talaange kiate kinautolu, ko e uike kotoa pē ʻoku tau maʻu ai e sākalamēnití, ʻoku lava ke hangē pē ia ʻoku tau toe papitaisó—ʻe lava ke fakamolemoleʻi ʻetau ngaahi angahalá, pea tau fakafoʻou ʻetau ngaahi fuakavá.
Naʻe fakahaaʻi mai ʻe Sīsū Kalaisi ʻa e founga ke tokoni ai ki he niʻihi kehé.
ʻE lava ke ueʻi fakalaumālie ʻa e fānau ʻokú ke akoʻí ʻe he talanoa ʻo hono fufulu ʻe he Fakamoʻuí e vaʻe ʻo ʻEne kau ākongá, ke nau tokoni ʻi he ʻofa ki he kakai ʻoku nau feohí.
Ngaahi ʻEkitivitī ʻe Ala Fakahokó
-
Kole ki ha taha ʻi he fānaú ʻi ha ngaahi ʻaho kimuʻa, ke ne lau ʻa e Sione 13:4–9 pea vahevahe ʻa e talanoá mo e kalasí ʻaki ʻa e founga fakakaukau ʻa Pitá. Ko e hā naʻe feinga ʻa e Fakamoʻuí ke akoʻi kia Pita mo e kau ʻAposetolo kehé? ʻE lava ke talanoa ʻa e fānaú ki he meʻa ne nau ako mei he talanoa ko ʻeni kau kia Sīsū Kalaisí. Ko e hā ʻoku tau ako fekauʻaki mo e tokoni ki he niʻihi kehé?
-
Lau fakataha ʻa e Sione 13:12–17. Kole ki he fānaú ke nau takitaha tohi fekauʻaki mo ha taimi naʻe tokoniʻi ai ʻe he Fakamoʻuí ha taha kehe. Poupouʻi ke nau fakakau e meʻa ʻoku nau ako mei Heʻene sīpingá. Fakaafeʻi kinautolu ke vahevahe mo e kalasí e meʻa ne nau tohí.
ʻOku ʻofa e kau ākonga ʻa Sīsū Kalaisí ʻi he niʻihi kehé ʻo hangē ko ia naʻá Ne faí.
ʻI he taimi ʻoku tau papitaiso aí, ʻoku tau fai ha ngaahi fuakava ke tau hoko ko e kau ākonga ʻa Sīsū Kalaisi. ʻI he Sione 13:34–35, naʻe fakamatalaʻi ʻe he Fakamoʻuí ʻa e founga te tau fakahaaʻi ai ko ʻEne kau ākonga kitautolu.
Ngaahi ʻEkitivitī ʻe Ala Fakahokó
-
Tohi ʻi he palakipoé ʻa e Ke mou ; hangē ko ʻEku kiate kimoutolú (Sione 13:34). Fakaafeʻi ʻa e fānaú ke nau fekumi ʻi he folofolá pea fakafonu e ngaahi konga ʻataá. Ko e hā ha ngaahi meʻa kehe te tau lava ʻo fai ke fakahaaʻi ko e kau ākonga kitautolu ʻa Kalaisi? Mahalo ʻe fakakaukau ʻa e fānaú ki ha ngaahi foʻi lea kehe ke ne fakakakato ʻa e sētesi ʻi he palakipoé, hangē ko e tokoni mo e tokoniʻi pe akoʻi.
-
Fakaafeʻi ʻa e fānaú ke nau lau ʻa e Sione 13:35 pea fakakaukau ki he niʻihi ʻoku nau ʻilo ko ha faʻifaʻitakiʻanga kinautolu ʻo ha kau ākonga ʻo Sīsū Kalaisi. Kole ange ke nau vahevahe ʻa e founga ʻoku fakahaaʻi ai ʻe he kakai ko ʻení ʻenau ʻofa ki he niʻihi kehé ʻo hangē ko ia naʻe fai ʻe he Fakamoʻuí.
Poupouʻi e Ako ʻi ʻApí
Fakaafeʻi e fānaú ke vahevahe mo honau ngaahi fāmilí ha meʻa te nau fai koeʻuhí ko e meʻa ne nau ako ʻi he kalasí. Hangē ko ʻení, te nau lava ʻo vahevahe ʻa e founga te nau manatu ai kia Sīsū Kalaisi lolotonga e sākalamēnití.
Fakatupulaki ʻEtau Founga Akoʻí
Vahevahe hoʻo fakamoʻoní ki hoʻo kalasí. ʻE lava ke faingofua ha fakamoʻoni ʻo hangē ko e “ʻOku ou ʻilo ʻoku ʻofa ʻa e Tamai Hēvaní kiate kimoutolu kotoa” pe “ʻOku ou ongoʻi lelei ʻi loto ʻi heʻeku ako kau kia Sīsū Kalaisí.”